1: ທ່ານລອງເລົ່າກ່ຽວກັບເສັ້ນທາງກ້າວສູ່ການເປັນ ຮອງຫົວໜ້າພະແນກ ການຄ້າ ແລະ ການຕະຫຼາດ ທີ່ບໍລິສັດການບິນລາວ?

ບ້ານເກີດເມືອງນອນຂອງຂ້າພະເຈົ້າແມ່ນມາຈາກປະເທດສະວິດເຊີແລນ. ອາຊີບທໍາອິດພາຍຫຼັງຮຽນຈົບມະຫາວິທະຍາໄລກໍຄື ຊ່ວຍກໍ່ຕັ້ງ ສາຍການບິນ ນົກແອ (Nok Air) ຢູ່ປະເທດໄທ. ຕໍ່ມາກໍເຂົ້າເຮັດວຽກທີ່ສາຍການບິນ ເອັດເຄ ເອັກສ໌ເພຣສ (HK Express) ເຊິ່ງເປັນສາຍການບິນລາຄາຖືກໃນຮົງກົງ. ຂ້າພະເຈົ້າເຮັດວຽກໃນພະແນກເຕັກໂນໂລຊີການເດີນທາງປະມານສອງສາມປີ ກໍຕັດສິນໃຈຍ້າຍມາລາວ ແລະ ຮ່ວມງານກັບບໍລິສັດ ການບິນລາວ.

2: ສິ່ງທີ່ເປັນແຮງບັນດານໃຈແກ່ທ່ານສໍາລັບການປະກອບອາຊີບໃນອຸດສາຫະກໍາການບິນແມ່ນຫຍັງ?

ຍ້ອນມີພໍ່ແມ່ເປັນຜູ້ຈັດການໂຮງແຮມ ຈິ່ງເຮັດໃຫ້ຂ້າພະເຈົ້າມີໂອກາດໄດ້ຢູ່ກັບອຸດສາຫະກໍາທ່ອງທ່ຽວມາຕັ້ງແຕ່ໄວເດັກ ແລະ ມີຄວາມຮັກມັກໃນການຕິດຕໍ່ພົວພັນກັບຜູ້ຄົນຈາກທຸກມຸມໂລກ. ດັ່ງນັ້ນ, ຂ້າພະເຈົ້າຈິ່ງມີຄວາມຝັນທີ່ຈະເຮັດວຽກໃນດ້ານນີ້ແບບຈິງຈັງ. ສິ່ງທີ່ດຶງດູດໃຫ້ຂ້າພະເຈົ້າສົນໃຈໃນການບິນກໍຄື ຄວາມຕື່ນເຕັ້ນໃນເວລາຂຶ້ນບິນທຸກຄັ້ງ, ຂ້າພະເຈົ້າຍັງຮູ້ສຶກປະຫຼາດໃຈໃນຄວາມມະຫັດສະຈັນທາງວິສະວະກໍາ ທີ່ເຮັດໃຫ້ເຄື່ອງບິນສາມາດເຈີ້ຍເຈີດໄປຕາມທ້ອງເວຫາ ແລະ ນໍາພາຜູ້ໂດຍສານໄປຮອດຈຸດໝາຍປາຍທາງຢ່າງປອດໄພໃນທົ່ວໂລກ.

3: ໜ້າທີ່ຮັບຜິດຊອບຫຼັກຂອງທ່ານຢູ່ບໍລິສັດການບິນລາວແມ່ນຫຍັງ?

ໜ້າທີ່ຮັບຜິດຊອບຂອງຂ້າພະເຈົ້າໃນບໍລິສັດແມ່ນກ່ຽວຂ້ອງກັບວຽກງານການຄ້າ, ເຊິ່ງເປັນຜູ້ຄຸ້ມຄອງດ້ານການຄ້າອີເລັກໂທຣນິກ (E-commerce) ແລະ ການຈໍາໜ່າຍ, ໂດຍເຮັດວຽກຮ່ວມກັບບັນດາຫຸ້ນສ່ວນຈັດຈໍາໜ່າຍ ເປັນຕົ້ນແມ່ນ ຕົວແທນບໍລິສັດທ່ອງທ່ຽວອອນລາຍ ແຕ່ຍັງສະໜັບສະໜູນໃຫ້ລູກຄ້າສາມາດຈອງປີ້ໂດຍກົງທາງເວັບໄຊ ແລະ ແອັບມືຖືຂອງພວກເຮົາຫຼາຍຂຶ້ນ. ຂ້າພະເຈົ້າພ້ອມທີມງານກໍາລັງພັດທະນາບໍລິການໃໝ່ໆ ເຊັ່ນ ຄວາມສາມາດໃນການເລືອກບ່ອນນັ່ງ ຫຼື ຊື້ປະກັນໄພການເດີນທາງ ເປັນຕົ້ນ. ບໍລິການດັ່ງກ່າວ ຈະຊ່ວຍເພີ່ມທາງເລືອກແກ່ລູກຄ້າຂອງພວກເຮົາຫຼາຍຂຶ້ນ ແລະ ເປີດແຫຼ່ງລາຍຮັບໃໝ່ໃຫ້ກັບບໍລິສັດການບິນລາວ.

4: ຈຸດເດັ່ນຂອງການບິນລາວທີ່ແຕກຕ່າງຈາກສາຍການບິນອື່ນໆໃນພາກພື້ນແມ່ນຫຍັງ?

ນອກຈາກໃຫ້ບໍລິການຖ້ຽວບິນຕາມເສັ້ນທາງເຊື່ອມຕໍ່ກັບຕົວເມືອງໃຫຍ່ທີ່ສໍາຄັນຕ່າງໆ ເຊັ່ນ ກຸງເທບ, ຮາໂນ່ຍ ຫຼື ກຸງໂຊນແລ້ວ, ພວກເຮົາຍັງໃຫ້ບໍລິການເສັ້ນທາງຂະໜາດນ້ອຍ ເປັນຕົ້ນແມ່ນ ຈາກຫຼວງພະບາງໄປຊຽງໃໝ່ ຫຼື ຈາກປາກເຊໄປໂຮຈີມິນ. ສິ່ງດັ່ງກ່າວຖືວ່າສອດຄ່ອງກັບຍຸດທະສາດຂອງພວກເຮົາ ໃນການເຊື່ອມຈອດເຊື່ອມໂຍງປະເທດລາວເຂົ້າກັບພາກພື້ນ ແລະ ສາກົນ ເຊິ່ງເປັນຈຸດເດັ່ນທີ່ຄູ່ແຂ່ງຂອງພວກເຮົາບໍ່ມີໃຫ້ບໍລິການ. ນອກຈາກນີ້, ພວກເຮົາຍັງຮູ້ສຶກພາກພູມໃຈທີ່ມີການຮ່ວມມືກັບບໍລິສັດການບິນກວ່າ 30 ແຫ່ງທົ່ວໂລກ ເພື່ອດຶງດູດເອົານັກທ່ອງທ່ຽວໃຫ້ເດີນທາງເຂົ້າມາລາວຫຼາຍຂຶ້ນ, ເຊິ່ງຈະຊ່ວຍຊຸກຍູ້ສົ່ງເສີມທັງດ້ານການຄ້າ ແລະ ການພັດທະນາ.

5: ບໍລິສັດການບິນລາວມີການປັບຕົວໃຫ້ເຂົ້າກັບການປ່ຽນແປງພຶດຕິກໍາ ແລະ ຄວາມມັກຂອງລູກຄ້າ, ໂດຍສະເພາະຫຼັງການລະບາດຂອງພະຍາໂຄວິດຄືແນວໃດ?

ຂ້າພະເຈົ້າຍັງບໍ່ກ້າຮັບປະກັນໄດ້ວ່າ ຜົນກະທົບຈາກການລະບາດຂອງພະຍາດໂຄວິດຈະຍັງຄົງຢູ່ໄປອີກດົນປານໃດ, ແຕ່ກໍຄິດມາຕະຫຼອດວ່າ ການນໍາສະເໜີປະສົບການທີ່ສໍາຜັດຜ່ານທໍາມະຊາດອັນບໍລິສຸດຂອງລາວ ສາມາດກາຍເປັນຈຸດໝາຍປາຍທາງທີ່ດີໄດ້ ໂດຍສະເພາະໃນກຸ່ມຄົນທີ່ດໍາລົງຊີວິດໃນເຂດຕົວເມືອງທີ່ແອອັດຂອງອາຊີ. ຢ່າງໃດກໍຕາມ, ການພັດທະນາພື້ນຖານໂຄງລ່າງ ເປັນຕົ້ນແມ່ນ ການເປີດນໍາໃຊ້ເສັ້ນທາງລົດໄຟຄວາມໄວສູງ ລະຫວ່າງ ນະຄອນຫຼວງວຽງຈັນ ແລະ ຄຸນໝິງ, ຈະສົ່ງຜົນກະທົບຍາວນານກວ່າ ຕໍ່ເສັ້ນທາງການບິນຂອງພວກເຮົາ ເມື່ອທຽບກັບການລະບາດໃຫຍ່ຂອງພະຍາດດັ່ງກ່າວ.  

6: ທ່ານຊ່ວຍແບ່ງປັນຍຸດທະສາດການຕະຫຼາດນະວັດຕະກໍາ ທີ່ການບິນລາວຈະນໍາມາໃຊ້ໃນອະນາຄົດອັນໃກ້ນີ້ ເປັນຄືແນວໃດ?

ໃນຊ່ວງຕົ້ນປີນີ້, ການບິນລາວໄດ້ສະເຫຼີມສະຫຼອງຄົບຮອບ 35 ປີ ໂດຍມອບສ່ວນຫຼຸດ 35% ສໍາລັບການຈອງຜ່ານເວັບໄຊ ແລະ ແອັບມືຖືຂອງການບິນລາວ. ເຊິ່ງເປັນຄັ້ງທໍາອິດທີ່ໄດ້ຮັບຍອດຈອງຈໍານວນຫຼາຍສໍາລັບການຈອງໃນໜຶ່ງວັນ ຖືເປັນການທໍາລາຍສະຖິຕິຄັ້ງປະຫວັດສາດ! ໃນຊ່ວງບໍ່ດົນຜ່ານມາ, ການບິນລາວໄດ້ເປີດການຮ່ວມມືດ້ານນະວັດຕະກໍາກັບທະນາຄານ JDB ເຊິ່ງຊ່ວຍອໍານວຍຄວາມສະດວກໃຫ້ຜູ້ໃຊ້ສາມາດຈອງຖ້ຽວບິນຂອງການບິນລາວໄດ້ໂດຍກົງ ຜ່ານແອັບມືຖື JDB.

7: ທ່ານມີວິທີໃຊ້ປະໂຫຍດຈາກການຕະຫຼາດດິຈີຕອນ ເພື່ອເພີມທະວີການມີສ່ວນຮ່ວມຂອງລູກຄ້າ ແລະ ຄວາມເຊື່ອໝັ້ນໃນແບຣນຄືແນວໃດ?

ຂໍ້ໄດ້ປຽບສໍາຄັນອັນໜຶ່ງຂອງການຕະຫຼາດດິຈີຕອນ ກໍແມ່ນ ພວກເຮົາສາມາດກໍານົດເປົ້າໝາຍໂດຍແນໃສ່ກຸ່ມລູກຄ້າສະເພາະ. ວິທີການນີ້ ຊ່ວຍໃຫ້ພວກເຮົາສາມາດເຂົ້າເຖິງນັກເດີນທາງໃນຕະຫຼາດຕ່າງປະເທດ ໂດຍສະເພາະຜູ້ທີ່ບໍ່ເຄີຍຮູ້ຈັກການບິນລາວມາກ່ອນ. ຕົວຢ່າງເຊັ່ນ ພວກເຮົາສາມາດກໍານົດເປົ້າໝາຍຜູ້ຄົນທົ່ວເອີຣົບ ທີ່ມີຄວາມສົນໃຈຈະເດີນທາງມາລາວ. ຈາກນັ້ນພວກເຮົາຈິ່ງສາມາດໂປຣໂມດບໍລິການຂອງຕົນ ແລ້ວນໍາພວກເຂົາໄປຍັງເວັບໄຊການບິນລາວ ເພື່ອຈອງຖ້ຽວບິນໄດ້.

8: ການບິນລາວມີການພັດທະນາ ຫຼື ວາງແຜນທີ່ໜ້າສົນໃຈໃດໜຶ່ງໃນອະນາຄົດຄືແນວໃດ?

ໃນປີ 2025, ພວກເຮົາມີແຜນຈະເປີດເສັ້ນທາງໃໝ່ໃນລາວທີ່ໜ້າສົນໃຈຫຼາຍຂຶ້ນ ໂດຍຈະມີທັງສາຍການບິນພາຍໃນ ແລະ ຕ່າງປະເທດ. ນອກຈາກນີ້, ພວກເຮົາຍັງມີແຜນການໃຫຍ່ທີ່ຈະປັບປຸງເວັບໄຊ ແລະ ແອັບມືຖື ໂດຍຊ່ວຍໃຫ້ລູກຄ້າສາມາດຈັດການດ້ານການຈອງປີ້ຍົນ ພ້ອມທັງເພີ່ມການບໍລິການ ເພື່ອຍົກລະດັບການເດີນທາງຂອງລູກຄ້າຮ່ວມກັບພວກເຮົາ. ດັ່ງນັ້ນ, ຢ່າລືມຕິດຕາມການບິນລາວໃນໂຊຊຽວມີເດຍ ເພື່ອຮັບປະກັນບໍ່ໃຫ້ພາດຂໍ້ມູນຂ່າວສານ ແລະ ໂປຣໂມຊັ່ນທີ່ກໍາລັງຈະມີຂຶ້ນໃນໄວໆນີ້.

9: ທ່ານຫຼິງເຫັນທ່າອ່ຽງໃດແດ່ໃນອຸດສາຫະກໍາການບິນໃນລາວ ແລະ ການບິນລາວມີຈຸດຢືນເພື່ອຮັກສາຄວາມສາມາດໃນການແຂ່ງຂັນໄວ້ຄືແນວໃດ?

ທີມງານບໍລິຫານການບິນລາວຍ່ອມຮັບຮູ້ດີວ່າ ຈະເກີດມີການແຂ່ງຂັນຫຼາຍຂຶ້ນລະຫວ່າງສາຍການບິນທັງພາຍໃນ ແລະ ຕ່າງປະເທດ. ເຊິ່ງປັດຈຸບັນ, ການບິນລາວກໍາລັງດໍາເນີນການປະຕິຮູບໃນຫຼາຍດ້ານ ເພື່ອເຮັດໃຫ້ບໍລິສັດມີຄວາມສາມາດໃນການແຂ່ງຂັນຫຼາຍຂຶ້ນ. ພວກເຮົາກໍາລັງປັບປຸງລະບົບໄອທີ, ເປີດໂຕບໍລິການດິຈີຕອນໃໝ່ໆ ແລະ ນໍາເອົາຜູ້ທີ່ມີຄວາມຮູ້ຄວາມສາມາດຈາກຕ່າງປະເທດມາຮ່ວມງານ ເຊັ່ນ ຂ້າພະເຈົ້າ, ເພື່ອຫັນປ່ຽນສາຍການບິນໃຫ້ເປັນສາຍການບິນລະດັບພາກພື້ນຂະໜາດນ້ອຍແຕ່ມີປະສິດທິພາບ.

10: ທ່ານອາດເຄີຍເດີນທາງທ່ອງທ່ຽວໄປທົ່ວປະເທດລາວມາແລ້ວ. ບ່ອນທີ່ທ່ານມັກສຸດມີຫຍັງແດ່?

ຂ້າພະເຈົ້າມາຈາກສະວິດເຊີແລນ, ສະນັ້ນຈິ່ງບໍ່ແປກທີ່ຈະມັກຮັກທໍາມະຊາດເຂດພູດອຍ. ພາກເໜືອເຊັ່ນແຂວງຜົ້ງສາລີ ຖືເປັນສະຖານທີ່ທີ່ຂ້າພະເຈົ້າປະທັບໃຈກວ່າໝູ່. ແຕ່ກໍຍັງລໍຖ້າວັນເວລາທີ່ຈະໄດ້ເດີນທາງໄປສໍາຫຼວດຄວາມງົດງາມຂອງທໍາມະຊາດຢູ່ແຂວງໄຊສົມບູນເພີ່ມເຕີມ, ໂດຍສະເພາະໃນຊ່ວງລະດູໜາວ. ນອກຈາກນີ້, ທ່ານຍັງຈະເຫັນຂ້າພະເຈົ້າປາກົດຕົວຢູ່ແຂວງຫຼວງພະບາງເປັນປະຈໍາ, ເຊິ່ງຂ້າພະເຈົ້າຫາກໍສໍາເລັດການເຂົ້າຮ່ວມແຂ່ງຂັນຮາຟມາລາທອນປະຈໍາປີ ຂອງຫຼວງພະບາງ.