ຢູ່ທິດໃຕ້ສຸດຂອງເມືອງຫຼວງພະບາງ ມີເດີ່ນຂະໜາດໃຫຍ່ທີ່ປູດ້ວຍຄອນກຣີດ ເຊິ່ງຄັ້ງໜຶ່ງເຄີຍເປັນສະຖານທີ່ສໍາລັບນັກແລ່ນ ຫຼື ໃຊ້ເປັນບ່ອນອອກກໍາລັງກາຍ ແລະ ບາງຄັ້ງກໍເປັນຈຸດນັດພົບຂອງຄູ່ບ່າວສາວ. ດ້ານຫຼັງຂອງພື້ນທີ່ແຫ່ງນີ້ແມ່ນ ວັດທາດຫຼວງ, ເຊິ່ງເປັນວັດເກົ່າແກ່ແຫ່ງໜຶ່ງທີ່ມີຄວາມໝາຍສໍາຄັນທາງປະຫວັດສາດ ຕໍ່ລາຊະວົງລາວ ແລະ ພິທີກໍາທາງສາສະໜາ. ຮູບຖ່າຍເກົ່າແກ່ໃນສະໄໝກ່ອນ ໄດ້ເຜີຍໃຫ້ເຫັນວ່າ ວັດແຫ່ງນີ້ໄດ້ຮັບການຟື້ນຟູຄືນໃໝ່ ພ້ອມກັບມາມີຊີວິດຊີວາອີກຄັ້ງ.

ມີຄວາມເຊື່ອວ່າ ເດີ່ນແຫ່ງນີ້ແມ່ນ “ສວນແຖນ”, ເຊິ່ງເປັນສວນສັກສິດຈາກນິທານພື້ນເມືອງຫຼວງພະບາງ. ນອກຈາກນີ້, ສະຖານທີ່ດັ່ງກ່າວໃນເມື່ອກ່ອນແມ່ນຖືກນໍາໃຊ້ເປັນບ່ອນຝັງສົບ ແລະ ຈູດເຜົາສົບຂອງຜູ້ນໍາສູງສຸດຂອງປະເທດ, ໂດຍໄດ້ຈັດງານຊາປານະກິດສົບເຈົ້າອາວາດວັດແສນ ບຸກຄົນສໍາຄັນຄັ້ງຫຼ້າສຸດ ໃນປີ 2008. ວັດທາດຫຼວງມີຄວາມສໍາຄັນຢ່າງເລິກເຊິ່ງທາງປະຫວັດສາດ, ເປັນບ່ອນປະດິດສະຖານຂອງບູຮານສະຖານເກົ່າແກ່ຈາກສັດຕະວັດທີ 12 ແລະ ອາດມີຄວາມກ່ຽວຂ້ອງກັບພະເຈົ້າອະໂສກແຫ່ງອິນເດຍນໍາອີກ.

ເມື່ອເຂົ້າໄປພາຍໃນບໍລິເວນວັດ, ນັກທ່ອງທ່ຽວຈະໄດ້ຜ່ານປະຕູທີ່ປະດັບປະດາຢ່າງວິຈິດງົດງາມ ແລະ ທ່ຽວຊົມສວນອັນຮົ່ມເຢັນ, ໂດຍໄດ້ຮັບການຕ້ອນຮັບຈາກພະພຸດທະຮູບປິດທອງຫຼາຍອົງຕັ້ງລຽນລາຍກັນເປັນແຖວ. ອາຄານໃຫຍ່ຂອງວັດມີລັກສະນະທໍາມະດາ, ມີຫ້ອງກຸຕິວິຫານທີ່ທາດ້ວຍສີຂາວ. ທີ່ດ້ານໜ້າຂອງວັດທາດຫຼວງ ມີພະທາດຂະໜາດໃຫຍ່ ເຊິ່ງບັນຈຸພະອັດຖິຂອງເຈົ້າມະຫາຊີວິດ ສີສະຫວ່າງວົງ, ຂະນະທີ່ອົງພະທາດໃຫຍ່ທີ່ຕັ້ງຢູ່ດ້ານຫຼັງ ເຊື່ອກັນວ່າເປັນບ່ອນບັນຈຸບູຮານວັດຖຸທາງພຸດທະສາສະໜາ.

ວັດທາດຫຼວງ ກໍາລັງຢູ່ໃນລະຫວ່າງການບູລະນະປະຕິສັງຂອນ ໂດຍແມ່ນສີມືຂອງທ່ານ ວິລະສິດ, ນາຍຊ່າງຫັດຖະກໍາ ໄວ 55 ປີ. ດ້ວຍປະສົບການດ້ານວຽກງານບູລະນະປະຕິສັງຂອນມາເປັນເວລາດົນນານ, ນາຍຊ່າງຄົນນີ້ ໄດ້ເດີນທາງຂຶ້ນເໜືອລົງໃຕ້ໄປທົ່ວປະເທດ ເພື່ອເຮັດໜ້າທີ່ອະນຸລັກຮັກສາຊັບສົມບັດທາງພຸດທະສາສະໜາຂອງລາວ. ທີ່ວັດທາດຫຼວງ, ມີສາມະເນນ ໄວ 13 ປີ ຄອຍໃຫ້ການຊ່ວຍເຫຼືອໃນການຕົກແຕ່ງຫໍພະພຸດທະຮູບໃຫຍ່ດ້ວຍປູນສາບຢ່າງປານີດ. ແມ່ພິມສໍາລັບການອອກແບບເຫຼົ່ານີ້ ສ້າງຈາກລາຍລະອຽດທີ່ມີຢູ່ເທິງຫໍພະພຸດທະຮູບ, ເຊິ່ງເປັນວິທີການອັນສະຫຼຽວສະຫຼາດ ໃນການອະນຸລັກປະຫວັດສາດຂອງວັດວາອາຮາມ. 

ຢູ່ອີກມຸມໜຶ່ງຂອງວັດ, ກໍມີສາມະເນນຫຼາຍອົງ ກໍາລັງພາກັນແຕ່ງແຕ້ມສັນຍະລັກທາງພຸດທະສາສະໜາແບບດັ້ງເດີມຂຶ້ນໃໝ່ ຢູ່ເທິງບານປະຕູປ່ອງຢ້ຽມໄມ້ສີດໍາ ພ້ອມເຄືອບສີທອງແບບໃໝ່. ພະພຸດທະຮູບສີດໍາຂອງວັດ ເຊິ່ງສະຖິດຢູ່ເທິງຫໍພະພຸດທະຮູບດ້ານຫຼັງ ໂດຍມີຜ້າສີເຫຼືອງປົກຄຸມຢູ່ ແມ່ນມີຄ່າສໍາຄັນເປັນພິເສດ ເຊິ່ງຍິ່ງໃຫຍ່ກວ່າພະພຸດທະຮູບທອງຄໍາທີ່ນໍາມາຈາກວັດອາຮາມ.

ການບູລະນະປະຕິສັງຂອນວັດທາດຫຼວງ ຖືເປັນຄວາມພະຍາຍາມຮ່ວມກັນຂອງຊຸມຊົນ ທີ່ເຕັມໄປດ້ວຍສຽງຫົວຢອກໄຍ ແລະ ມິດຕະພາບ, ເຊິ່ງສະທ້ອນໃຫ້ເຫັນເຖິງຄວາມສໍາຄັນຂອງວັດທີ່ມີຕໍ່ຊຸມຊົນມາເປັນເວລາດົນນານ. ຂະນະທີ່ແມ່ຍິງໃນພື້ນທີ່ກໍໄດ້ປະກອບສ່ວນສໍາຄັນໃນວຽກງານບູລະນະປະຕິສັງຂອນວັດແຫ່ງນີ້ ໂດຍຊ່ວຍປູພື້ນດ້ວຍປູນຊີມັງ. ເຖິງແມ່ນຈະມີນັກທ່ອງທ່ຽວເຂົ້າມາທ່ຽວຊົມວັດທາດຫຼວງຂ້ອນຂ້າງໜ້ອຍ, ແຕ່ກໍເຕັມໄປດ້ວຍຄັງປະຫວັດສາດລາວທ່າມກາງຄວາມງຽບສະຫງົບ, ໂດຍເປີດໂອກາດໃຫ້ຜູ້ມາທ່ຽວຊົມໄດ້ສຶກສາສໍາຫຼວດ ແລະ ສໍາຜັດຜົນງານຫັດຖະກໍາພື້ນເມືອງແບບລາວໆ.

ການເດີນທາງ: ສາຍການບິນລາວໃຫ້ບໍລິການຖ້ຽວບິນເປັນປະຈໍາໄປຍັງຫຼວງພະບາງ ໂດຍເດີນທາງຈາກ ນະຄອນຫຼວງວຽງຈັນ, ປາກເຊ, ຮາໂນ່ຍ, ກຸງເທບ, ຊຽງໃໝ່ ແລະ ສຽບລຽບ