ຮຽບຮຽງໂດຍ: ເຈສັນ ໂຣລັນ

ຮູບໂດຍ: ສີວິໄຊ ມະນີວົງ

ແປ ແລະ ຮຽບຮຽງໂດຍ: ໄພບູນ ທະນະບົວສີ

ວັນເວລາລ່ວງເລີຍໄປຄືກັບສາຍນໍ້າໄຫຼລ່ອງຂອງແມ່ນໍ້າຂອງໃນເມືອງຈໍາປາສັກ ບ່ອນເຊິ່ງມີເຮືອນໄມ້ຫຼາຍຫຼັງຕັ້ງຢັ່ງຢາຍລະຫວ່າງຕົ້ນຕານຫຼາຍສິບຕົ້ນ ທ່າມກາງສາຍພູເກົ້າທີ່ຕັ້ງເດັ່ນສະຫງ່າຢ່າງໂດດເດັ່ນເປັນສາກຫຼັງ, ພູເຂົາສັກສິດແຫ່ງນີ້ແມ່ນພູເຂົາທີ່ຜາສາດຫີນວັດພູຈຳປາສັກເຊີ່ງເປັນສະຖານທີ່ສຳຄັນຂອງອົງການ UNESCO ໄດ້ຖືກສ້າງຂື້ນເພື່ອສັກກາລະບູຊາ ຕົວເມືອງແຄມແມ່ນໍ້າອັນງຽບສະຫງົບແຫ່ງນີ້ ເຄີຍເປັນທີ່ຕັ້ງຂອງອານາຈັກຂອມບູຮານ ເຊິ່ງໄດ້ປະເຊີນກັບການປ່ຽນແປງຜ່ານຫຼາຍສະຕະວັດ. ພາຍຫຼັງມີໂຄງການຈໍາປາ (CHAMPA) ໂດຍໄດ້ຮັບທຶນຊ່ວຍເຫຼືອຈາກ ອົງການຝຣັ່ງເພື່ອການພັດທະນາ (AFD), ມີຫຼາຍໂຄງການເກິດຂຶ້ນເພື່ອສ້າງໃຫ້ເມືອງຈຳປາສັກມີຜະລິດຕະພັນທ່ອງທ່ຽວທີ່ຫຼາກຫຼາຍ ແລະ ເຮັດໃຫ້ນັກທ່ອງທ່ຽວຕ້ອງການພັກຢູ່ເມືອງນີ້ດົນ. ໃນນີ້ຊາວບ້ານເຂດດັ່ງກ່າວຈິ່ງໄດ້ຮັບການສະໜັບສະໜູນໃຫ້ມີການອະນຸລັກ ແລະ ພັດທະນາສະຖານມໍລະດົກທາງວັດທະນະທໍາທີ່ຈັບຕ້ອງບໍ່ໄດ້ແຫ່ງນີ້. 

ເລີ່ມທີ່ບ້ານເມືອງແສນ, ເຊິ່ງມີຊື່ສຽງໃນດ້ານຫັດຖະກໍາເຄື່ອງປັ້ນດິນເຜົາທີ່ໂດ່ງດັງ ໂດຍສະເພາະກໍແມ່ນຮ້ານຂອງທ່ານສຸລິວັນ ທາງຮ້ານໄດ້ປັ້ນດິນໜຽວໃຫ້ເປັນຮູບປັ້ນຕ່າໆທັງສາສະໜາຮິນດູ ແລະ ພະພຸດທະຮູບທີ່ໜ້າອັດສະຈັນ ຊວນໃຫ້ລະນຶກເຖິງວັດພູຈໍາປາສັກ. ຫ່າງຈາກບ່ອນນີ້ບໍ່ໄກປານໃດ, ສຽງກະທົບກັອກແກັກຂອງກີ່ຕໍ່າຫູກແບບພື້ນເມືອງ ຈະດຶງດູດເອົາຜູ້ຄົນໃຫ້ມາທ່ຽວຊົມເຮືອນຕໍ່າຫູກແມ່ຄໍາແດງ, ບ່ອນເຊິ່ງນິ້ວມືທີ່ອາບເອ້ດ້ວຍສີຄາມຈະຄ່ອຍໆເກາະກ້ຽວເສັ້ນໄໝໃຫ້ກາຍເປັນລວດລາຍອັນຊັບຊ້ອນ ໂດຍບອກເລົ່າເລື່ອງລາວກ່ຽວກັບມໍລະດົກຂອງຊາດ (ເຮືອນຕໍ່າຫູກແຫ່ງນີ້ເປີດທຸກວັນ, ເລີ່ມແຕ່ 11:00 ໂມງເຊົ້າ – 2:00 ໂມງແລງ ແລະ 4:00 ໂມງແລງ – 8:00 ໂມງແລງ).

ຫາກຕ້ອງການຍ່າງເລາະຫຼິ້ນເພື່ອຜ່ອນຄາຍໃນຕອນເຊົ້າ, ສາມາດຍ່າງຕາມເສັ້ນທາງແຄມແມ່ນໍ້າຂອງ ໂດຍມຸ່ງໜ້າໄປທາງຮ້ານວາງສະແດງ ແລະ ຂາຍເຄື່ອງຫັດຖະກໍາຈັກສານ ທີ່ຫາກໍປັບປຸງໃໝ່ຂອງ ທ່ານ ນາງ ຂຽວສະຫວັນ ເຊິ່ງຕັ້ງຢູ່ໃກ້ກັບວັດເມືອງກາງ. ທີ່ຮ້ານດັ່ງກ່າວ, ຈະພົບກັບສິນຄ້າຫັດຖະກໍາເຄື່ອງຈັກສານນ້ອຍໃຫຍ່ຫຼາຍລາຍການທີ່ປະດິດຈາກໄມ້ໄຜ່ ບວກກັບກິ່ນຫອມຂອງຫຍ້າຫວານ ປະສົມປະສານກັບສາຍລົມໂຊຍພັດມາຈາກຝັ່ງແມ່ນໍ້າ. “ໂຄງການ CHAMPA ຊ່ວຍເປີດໂອກາດໃຫ້ຂ້ອຍໄດ້ສະຖານທີ່ເໝາະສົມ ເພື່ອເກັບສະສົມຜົນງານໄດ້ຢ່າງລົງໂຕ,” ທ່ານ ນາງ ຂຽວສະຫວັນກ່າວດ້ວຍຄວາມພູມໃຈ ພ້ອມອວດຮູບໂສມກະຕິບເຂົ້າທີ່ຍັງຄົງສະພາບງົດງາມ ເຖິງແມ່ນຈະຜ່ານລະດູມໍລະສຸມມາແລ້ວກໍຕາມ.

ແມ່ນໍ້າຂອງອັນກວ້າງໃຫຍ່ ເຊິ່ງເມື່ອກ່ອນສາມາດຊົມວິວໄດ້ຈາກແຄມຝັ່ງເທົ່ານັ້ນ, ແຕ່ປັດຈຸບັນນັກທ່ອງທ່ຽວສາມາດສໍາຫຼວດແມ່ນໍ້າສາຍນີ້ໄດ້ໂດຍກົງ ຜ່ານທົວນໍາທ່ຽວຂອງ ເຮືອນພັກອະນຸຊາ ບໍລິການເຮືອກາຍັກ (ລາຄາເລີ່ມຕົ້ນແມ່ນ 275,000 ກີບ ສໍາລັບກຸ່ມປະມານ 5 -10 ຄົນ). ເຊິ່ງສາມາດພາຍເຮືອເລີ່ມຈາກເຂດບ້ານພູງອຍ ແລ້ວລອຍລ່ອງໄປຕາມກະແສນໍ້າ ບ່ອນທີ່ຊາວຫາປາຫຼາຍຄົນພວມກາງມອງເປັນສາຍຍາວ ທ່າມກາງແສງແດດອ່ອນໆໃນຍາມເຊົ້າ ໂດຍມຸ່ງໜ້າໄປເຂດໃຈກາງເມືອງຈໍາປາສັກ ຫຼື ພາຍເຮືອຂ້າມໄປຫາດຊາຍອັນບໍລິສຸດເຊິ່ງຕັ້ງຢູ່ດອນແດງ. ຂະນະທີ່ການລ່ອງເຮືອ Irrawaddy, ກໍສາມາດຕອບໂຈດສໍາລັບຜູ້ທີ່ຕ້ອງການຊົມວິວແມ່ນໍ້າແບບຜ່ອນຄາຍສະບາຍຕາ ພ້ອມທັງເປັນໂອກາດໃຫ້ທ່ານໄດ້ນັ່ງຊົມດວງຕາເວັນທີ່ພວມຈະລາລັບຈາກຂອບຟ້າ ເຊິ່ງເປັ່ງແສງສີເຫຼືອງອ່ອນຢ່າງງົດງາມ ທີ່ຢູ່ເບື້ອງຫຼັງແຄມຝັ່ງທ່າມກາງການຫຸ້ມລ້ອມຂອງລໍາໄມ້ຈໍາພວກຕົ້ນຕານ, ພ້ອມທັງມີວັດໂຕະໂມະ ທີ່ລີ້ຊ້ອນຢູ່ທາງຝັ່ງຊ້າຍຂອງແມ່ນໍ້າຂອງ ຫຼື ໂຮມສະເຕອັນຮຽບງ່າຍແຕ່ງົດງາມຢູ່ດອນແດງ ເຊິ່ງຕັ້ງຢູ່ກາງແມ່ນໍ້າ ໂດຍແມ່ນທ່ານ ວຽງເປັນເຈົ້າຂອງໂຮມສະເຕແຫ່ງນີ້.

ເມື່ອເຖິງຍາມຄ້ອຍຄໍ່າລົງ, ກິ່ນອາຍແຫ່ງຄວາມຮ້ອນອົບເອົ້າກໍທຸເລົາເບົາລົງ ແລະແລ້ວໂຮງລະຄອນຕຸກກະຕາກໍກັບມາມີຊີວິດຊີວາອີກຄັ້ງ (ການສະແດງລະຄອນຕຸກກະຕາແມ່ນມີສະເພາະວັນອັງຄານ, ວັນພຸດ, ສຸກ ແລະ ເສົາ ເວລາ 8:15 ໂມງແລງ). ພາຍໃນອາຄານທີ່ສ້າງຂຶ້ນໃໝ່ ເຊິ່ງຕັ້ງຢູ່ຂ້າງຫ້ອງການທ່ອງທ່ຽວ, ນິທານບູຮານ ທີ່ໄດ້ຮັບອິດທິພົນມາຈາກນິທານລາມມະກຽນ ໄດ້ຖືກນໍາມາຖ່າຍທອດອາລົມຄວາມຮູ້ສຶກຜ່ານຕົວລະຄອນຕຸກກະຕາ ທີ່ພວມຟ້ອນໄປຕາມຈັງຫວະດົນຕີພື້ນເມືອງ. ໂຄງການ CHAMPA ຍັງໃຫ້ການສະໜັບສະໜູນໂຮງລະຄອນແຫ່ງນີ້ດ້ວຍການສັ່ງຊື້ເຄື່ອງດົນຕີພື້ນເມືອງອັນໃໝ່ ພ້ອມສະໜອງການຝຶກອົບຮົມໃຫ້ແກ່ນັກສິລະປິນຮຸ່ນໃໝ່ ເພື່ອສືບທອດໃນອະນາຄົດ.

ໃນການຟື້ນຟູເມືອງຈໍາປາສັກຄືນໃໝ່ ບໍ່ໄດ້ ຈໍາກັດສະເພາະທີ່ວັດທະນະທໍາພຽງຢ່າງດຽວເທົ່ານັ້ນ, ເຊິ່ງເດັກນ້ອຍ ຍັງມີໂອກາດໄດ້ຝຶກພາສາອັງກິດ ແລະ ພາສາຝຣັ່ງ ທີ່ສູນຮຽນພາສາອັງກິດ -ຝຣັ່ງ ເພື່ອກະກຽມຄວາມພ້ອມໃນການຕ້ອນຮັບນັກທ່ອງທ່ຽວຕ່າງປະເທດ. ທ່ານນາງ ມາລິດາ ຜູ້ກໍ່ຕັ້ງສູນກ່າວຂະນະທີ່ນັກຮຽມກໍາລັງຫຼິ້ນບົດບາດສົມມຸດ ໃນການສົນທະນາກັບແຂກໃນງານລ້ຽງຕ້ອນຮັບຈໍາລອງຂອງໂຮງແຮມ ວ່າ: “ພວກເຮົາກໍາລັງສ້າງຂົວເຊື່ອມຕໍ່ລະຫວ່າງວັດທະນະທໍາ ຕ່າງໆເຂົ້າຫາກັນ”.

ຂະນະທີ່ໂຄງການອະນຸລັກສິ່ງແວດລ້ອມກໍປາກົດຕົວຂຶ້ນເຊັ່ນກັນ ໂດຍມີລົດຈັກໄຟຟ້າແລ່ນຜ່ານອາຄານຍຸກອານານິຄົມແບບງຽບໆ ເຊິ່ງສະຖານທີ່ສາກແບັດເຕີຣີໃໝ່ທີ່ຕັ້ງຢູ່ດ້ານນອກເຮືອນພັກ ນະຄອນຣີເວີວິວ. ນັກທ່ອງທ່ຽວຍັງສາມາດເຊົ່າລົດຖີບທີ່ຮ້ານທ່ານ ເຂັມເພັດ (ບ້ານໂພໄຊ) ໂດຍຈະຊ່ວຍໃຫ້ການສໍາຫຼວດເສັ້ນທາງເພື່ອສໍາຜັດບັນຍາກາດຂອງຕົວເມືອງ ແລະ ທົ່ງນາອ້ອມຂ້າງດ້ວຍຈັງຫວະຊີວິດທີ່ຊ້າລົງ.

ທີ່ຮ້ານອາຫານໂຮມເມດໃນບ້ານວັດອາມາດ, ເຊິ່ງເຈົ້າຂອງຮ້ານຊື່ວ່າ ບຸນມີ ໄດ້ເປີດບໍລິການໃໝ່ພາຍຫຼັງປອດພະຍາດໂຄວິດ ໂດຍສ້າງໃຫ້ກາຍເປັນສູນການຮຽນຮູ້ດ້ານການປຸງແຕ່ງອາຫານ. ໃນທີ່ນີ້, ຫ້ອງຮຽນປຸງແຕ່ງອາຫານພາກເຊົ້າ (ສາມາດຈອງຜ່ານໂຮງແຮມທີ່ທ່ານພັກໄດ້) ຈະເປີດເຜີຍສູດຄວາມລັບຂອງອາຫານລາວ ນັບແຕ່ເຂົ້າໜຽວອັນອ່ອນນຸ້ມ ຈົນຮອດແກງປະສົມສະໝຸນໄພທີ່ມີກິ່ນຫອມຫວນຊວນຊີມ ຫຼື ເມນູພິເສດຂອງທາງຮ້ານ ເປັນຕົ້ນກໍແມ່ນ ແໜມເຂົ້າ. ຫາກທ່ານຕ້ອງການເພີດເພີນກັບລົດຊາດອາຫານແບບຮຽບງ່າຍ, ລອງຍ່າງຕາມກິ່ນສໍາຜັດເພື່ອນໍາທາງໄປຫາຮ້ານແມ່ທັດສະນີ ໂດຍມີເຂົ້າໜົມພ້ອມເສີບເປັນອາຫານເຊົ້າ ເຊິ່ງນັກທ່ອງທ່ຽວຈະຕ້ອງໄດ້ກຽມທ້ອງໃຫ້ພ້ອມກ່ອນອອກເດີນທາງສໍາຫຼວດແຕ່ລະວັນ ດ້ວຍເຂົ້າໜົມລາວພື້ນເມືອງ.

ທີ່ບ້ານທາງຄົບ, ສາມາດເດີນທາງໄປໄດ້ໃນຂະນະທີ່ຂັບລົດມຸ່ງໜ້າໄປທາງວັດພູຈໍາປາສັກຜ່ານທັດສະນີຍະພາບອັນງົດງາມ, ທ່ານຈະເຫັນກຸ່ມແມ່ຍິງທີ່ພວມດັດແປງໄມ້ໄຜ່ທີ່ຫາໄດ້ຈາກທ້ອງຖິ່ນ ເພື່ອປະດິດເປັນກະເປົາສະໄໝໃໝ່ ເຊິ່ງຖືເປັນເຄື່ອງພິສູດໃຫ້ເຫັນເຖິງວິວັດທະນາການຂອງຜົນງານຫັດຖະກໍາແບບຍືນຍົງ. ທີ່ແຫ່ງນີ້, ນັກທ່ອງທ່ຽວຈະໄດ້ສໍາຜັດບັນຍາກາດຂອງສຽງກະທົບກັນຂອງລໍາໄມ້ໄຜ່ເມື່ອຖືກຜ່າອອກ ບວກກັບສຽງຫົວຢອກໄຍກັນດັງກ້ອງທົ່ວບໍລິເວນ ຂະນະທີ່ຊ່າງສີມືກໍາລັງເຮັດວຽກດ້ວຍຄວາມພາກພຽນ, ເຊິ່ງຜະລິດຕະພັນສໍາເລັດຮູບຂອງພວກເຂົາ ໄດ້ປະສົມປະສານລະຫວ່າງວິທີການແບບດັ້ງເດີມເຂົ້າກັບການອອກແບບທີ່ທັນສະໄໝ (ເປີດທຸກວັນ, ເລີ່ມແຕ່ 8:00 ໂມງເຊົ້າ ຮອດ 4:00 ໂມງແລງ).

ສະໜາມກິລາເມືອງຈໍາປາສັກ ຖືເປັນບ່ອນທີ່ໃຫ້ຄວາມຮູ້ສຶກແບບຜ່ອນຄາຍສໍາລັບຜູ້ທີ່ມັກຫຼິ້ນກິລາ ທ່າມກາງບັນຍາກາດອັນງຽບສະຫງົບຂອງຕົວເມືອງ. ທີ່ສະໜາມກິລາແຫ່ງນີ້, ນັກທ່ອງທ່ຽວສາມາດເຂົ້າຮ່ວມການແຂ່ງຂັນກິລາມິດຕະພາບ ເຊັ່ນ ຕີດອກປີກໄກ ່, ບານບ້ວງ ແລະ ປິງປອງ ເພື່ອເພີ່ມຄວາມມີຊີວິດຊີວາໃຫ້ກັບການທ່ອງທ່ຽວໄດ້ສໍາຫຼວດວັດທະນະທໍາໃນພື້ນທີ່ດັ່ງກ່າວ. ສ່ວນຜູ້ທີ່ມັກຮັກໃນດ້ານການດູແລສຸຂະພາບ ແມ່ນສາມາດຜ່ອນຄາຍໄດ້ທີ່ ຈໍາປາສັກສະປາ ຢູ່ບ້ານວັດນະຄອນ ຫຼື ເຂົ້າຮ່ວມຮຽນໂຍຄະເພື່ອການຟື້ນຟູຮ່າງກາຍໄດ້ທີ່ La Folie Lodge ຢູ່ດອນແດງ, ບ່ອນທີ່ສວນພຶກສາສາດອັນງຽບສະຫງົບ ຈະຊ່ວຍເຕີມເຕັມປະສົບການໄດ້ຢ່າງລົງໂຕ.

ນັກທ່ອງທ່ຽວທີ່ມັກຊອກຮູ້ສຶກສາກ່ຽວກັບປະຫວັດສາດ ແລະ ສະຖານບູຮານ ສາມາດຂະຫຍາຍເວລາເຂົ້າພັກເຊົາດ້ວຍການສໍາຫຼວດສະຖານບູຮານອັນເປັນສັນຍະລັກ ໄດ້ແກ່ ໂຮງນາງສີດາ, ໂຮງທ້າວເຕົ່າ ແລະ ທາດສາມປາງ. ສະຖານທີ່ບູຮານເຫຼົ່ານີ້ ຈະຊ່ວຍສະໜອງຂໍ້ມູນອັນລະອຽດກ່ຽວກັບພູມມີທັດທາງບູຮານວິທະຍາ ອັນອຸດົມຮັ່ງມີຂອງພື້ນທີ່ແຫ່ງນີ້. ການພັດທະນາທີ່ໜ້າສົນໃຈຕ່າງໆ ເພື່ອເພີ່ມປະສົບການໃຫ້ກັບນັກທ່ອງທ່ຽວ, ໂດຍສະເພາະກໍແມ່ນ ການພັດທະນາເສັ້ນທາງທ່ອງທ່ຽວ ເພື່ອເຊື່ອມຕໍ່ກັບສາລາສື່ຄວາມໝາຍມໍລະດົກພາຍໃນພື້ນທີ່ມໍລະດົກ. ໃນປີ 2025, ຈະເປີດໃຫ້ບໍລິການສາລາສື່ຄວາມໝາຍມໍລະດົກ ທີ່ຫ້ວຍສະຫົວ ເຊິ່ງຕັ້ງຢູ່ເມືອງບູຮານທີ່ຖືກສ້າງຂຶ້ນໃນສັດຕະວັດທີ 5 ພ້ອມທັງເສັ້ນທາງຍ່າງເພື່ອທ່ຽວຊົມໂຄງສ້າງສະຖາປັດຕະຍະກໍາບູຮານ.

ເຖິງແມ່ນການປ່ຽນແປງດັ່ງກ່າວຈະສົ່ງຜົນກະທົບໄປທົ່ວເມືອງບູຮານແຫ່ງນີ້, ແຕ່ຈິດວິນຍານຂອງຕົວເມືອງແມ່ນບໍ່ມີມື້ປ່ຽນແປງ. ໃນທີ່ນີ້, ການດໍາລົງຊີວິດແບບດັ້ງເດີມຍັງສືບຕໍ່ດໍາເນີນໄປຢ່າງລາບລື່ນ ທ່າມກາງຕົ້ນດອກຈໍາປາ ແລະ ຍອດຊໍ່ຟ້າຂອງວັດ ແລະ ປັດຈຸບັນ ເຂດດັ່ງກ່າວໄດ້ຮັບການຕໍ່ເຕີມດ້ວຍການພັດທະນາວຽກງານການທ່ອງທ່ຽວຢ່າງມີຄວາມຮັບຜິດຊອບ ແລະ ຍືນຍົງ.

ໂຄງການ CHAMPA ຍັງສືບຕໍ່ເສີມສ້າງແຜນງານອັນຍິ່ງໃຫຍ່ທີ່ເຕັມໄປດ້ວຍຄວາມຫວັງສໍາລັບອະນາຄົດຂອງເມືອງຈໍາປາສັກ, ໂດຍໃຫ້ຄໍາໝັ້ນສັນຍາທີ່ຈະຊ່ວຍຍົກລະດັບປະສົບການໃຫ້ກັບນັກທ່ອງທ່ຽວ. ເວັບໄຊທີ່ປະກອບດ້ວຍຂໍ້ມູນອັນຄົບຖ້ວນສົມບູນສໍາລັບນັກທ່ອງທ່ຽວ ທີ່ພວມເປີດໂຕ, ໂດຍນໍາສະເໜີຊ່ອງທາງດິຈີຕອນໃຫ້ແກ່ນັກທ່ອງທ່ຽວ ເພື່ອສໍາຜັດກັບພູມມີທັດວັດທະນະທໍາອັນຫຼາກຫຼາຍໃນພື້ນທີ່ແຫ່ງນີ້. ສໍາລັບຜູ້ທີ່ມັກຮັກໃນການຍ່າງປ່າເປັນຊີວິດຈິດໃຈ ກໍຈະໄດ້ພົບກັບເຄືອຂ່າຍເສັ້ນທາງສໍາຫຼວດທີ່ໄດ້ຮັບການຂະຫຍາຍໃຫ້ກວ້າງຂວາງຂຶ້ນໃນໄວໆນີ້ ລວມທັງເສັ້ນທາງທ່ຽວຊົມຫັດຖະກໍາແບບເຄິ່ງວັນ ຜ່ານເມືອງຈໍາປາສັກ ແລະ ເສັ້ນທາງທ່ອງທ່ຽວທາງດ້ານບູຮານວິທະຍາອີກ 2 ແຫ່ງເປັນຢ່າງໜ້ອຍ ເຊິ່ງເນັ່ງອ້ອມຮອບວັດພູ ແລະ ເມືອງບູຮານ. ເສັ້ນທາງດັ່ງກ່າວ, ໄດ້ຮັບການອອກແບບໂດຍສົມບູນເພື່ອໃຫ້ແທດເໝາະສໍາລັບຜູ້ທີ່ຕ້ອງການໃຊ້ເວລາຍ່າງປະມານ 2-3 ຊົ່ວໂມງ ເຊິ່ງຈະມີເວລາດື່ມດໍາກັບປະຫວັດສາດອັນສັບຊ້ອນແຫ່ງນີ້. ການພັດທະນາທີ່ສໍາຄັນອື່ນໆ ຍັງເປັນການບົ່ງບອກເຖິງການເພີ່ມຄວາມໜ້າສົນໃຈໃຫ້ແກ່ເມືອງຈໍາປາສັກຫຼາຍຂຶ້ນ ໂດຍມີສູນວັດທະນະທໍາແຫ່ງໃໝ່ທີ່ຕັ້ງເດັ່ນສະຫງ່າຢູ່ແຄມຝັ່ງແມ່ນໍ້າ, ໃນຂະນະທີ່ການປັບປຸງທ່າເຮືອພະພິນ ກໍເປັນການບອກເລົ່າກ່ຽວກັບການມາເຖິງຂອງການເຊື່ອມຈອດເຊື່ອມໂຍງທີ່ສະດວກສະບາຍຫຼາຍຂຶ້ນ ລະຫວ່າງຕາຝັ່ງແຄມແມ່ນໍ້າ ແລະ ຈຸດໝາຍປາຍທາງທີ່ຕັ້ງຢູ່ຫ່າງອອກໄປ. 

ນອກຈາກນີ້, ພື້ນຖານໂຄງລ່າງທາງວັດທະນະທໍາ ຍັງໄດ້ຮັບຄວາມສົນໃຈເປັນຢ່າງດີ. ຫໍພິພິທະພັນວັດພູ ຄາດວ່າຈະໄດ້ຮັບການປັບປຸງ ແລະ ຂະຫຍາຍພື້ນທີ່ໃຫ້ກວ້າງຂວາງ ເຊິ່ງຈະຊ່ວຍສະໜອງຂໍ້ມູນອັນລະອຽດກ່ຽວກັບປະຫວັດສາດອັນຍາວນານຂອງພື້ນທີ່ແຫ່ງນີ້ ພ້ອມທັງວາງສະແດງຂໍ້ມູນໃໝ່ໆທີ່ຫາກໍຖືກຄົ້ນພົບ ຜ່ານການສຶກສາຄົ້ນຄວ້າຜ່ານ LIDAR. ໃນຂະນະດຽວກັນ, ຫໍພຣະໄຕປິດົກທີ່ວັດເມືອງກາງກໍກໍາລັງໄດ້ຮັບການບູລະນະປະຕິສັງຂອນດ້ວຍຄວາມພິຖີພິຖັນ ເພື່ອປົກປັກຮັກສາລັກສະນະສະເພາະຂອງໂຄງສ້າງທີ່ເປັນເອກະລັກແຫ່ງນີ້ເອົາໄວ້. ປັດຈຸບັນ, ເຂດໃຈກາງເມືອງ ແລະ ແຄມຝັ່ງແມ່ນໍ້າຂອງກໍາລັງໄດ້ຮັບການປ່ຽນແປງ ເຊິ່ງກໍ່ໃຫ້ເກີດມີພື້ນທີ່ແຫ່ງໃໝ່ສໍາລັບປະຊາຊົນໃນທ້ອງຖິ່ນ ແລະ ນັກທ່ອງທ່ຽວ ເພື່ອມາເຕົ້າໂຮມ ແລະ ເຊື່ອມຈອດເຊື່ອມໂຍງຫາກັນ.

ບໍ່ວ່າທ່ານຈະເລືອກເດີນທາງໂດຍການລ່ອງເຮືອມາແຕ່ເມືອງປາກເຊ (ທ້າວ ໂອໄລວັນ: 030 9800252) ຫຼື ດ້ວຍລົດໂດຍສານໃນທ້ອງຖິ່ນ, ເມືອງຈໍາປາສັກໃນປັດຈຸບັນແມ່ນພ້ອມທີ່ຈະມອບປະສົບການຕອບແທນແກ່ບັນດາແຂກທີ່ມາຢ້ຽມຢາມທ່ຽວຊົມ. ພາຍໃນຕົວເມືອງແຫ່ງການປ່ຽນແປງ ເຊິ່ງບ່ອນທີ່ວຽກງານຫັດຖະກໍາພວມໄດ້ຮັບການຟື້ນຟູ ບວກກັບມົນສະເໜ່ຂອງສາຍນໍ້າ, ເງົາຂອງວັດໃນທຸກໆແຈມຸມ ແລະ ປະຕູທາງເຂົ້າຂອງຫ້ອງຫັດຖະກຳຕ່າງໆ ລ້ວນແຕ່ເຕັມໄປດ້ວຍເລື່ອງເລົ່າທີ່ພວມລໍຖ້າໃຫ້ມີການຄົ້ນພົບ.

ໂຄງການ CHAMPA ເປັນໂຄງການລິເລີ່ມ ພາຍໃຕ້ການຮ່ວມມືລະຫວ່າງ ຂະແໜງໜ່ວຍງານຫ້ອງການມໍລະດົກໂລກ ວັດພູຈໍາປາສັກ ອຳນາດການປົກຄອງທ້ອງຖິ່ນເມືອງຈຳປາສັກ ແລະ ອົງການສະຖາບັນຝຣັ່ງແຫ່ງພາກຕາເວັນອອກໄກ (EFEO) ໂດຍໄດ້ຮັບທຶນຊ່ວຍເຫຼືອຈາກ ຝຣັ່ງເພື່ອການພັດທະນາ(AFD). ໂຄງການດັ່ງກ່າວໄດ້ນໍາໃຊ້ວິທີການຮອບດ້ານ ເພື່ອປົກປັກຮັກສາ ແລະ ຍົກລະດັບມໍລະດົກທາງວັດທະນະທໍາ ລວມທັງທໍາມະຊາດ ຄຽງຄູ່ກັບການສົ່ງເສີມວຽກງານການທ່ອງທ່ຽວໃນທ້ອງຖິ່ນ ແລະ ການພັດທະນາຊຸມຊົນ. ໂຄງການຍັງໄດ້ຊ່ວຍສະໜັບສະໜູນໂຄງການທ່ອງທ່ຽວໃນທ້ອງຖິ່ນ ຈໍານວນ 40 ໂຄງການ ຜ່ານຍຸດທະສາດຫານເປີດຮັບບົດສະເໜີ ໂດຍສົ່ງເສີມການປະຕິບັດງານຢ່າງຫ້າວຫັນ ດ້ານການທ່ອງທ່ຽວທີ່ມີຄວາມຮັບຜິດຊອບ ແລະ ອະນຸລັກມໍລະດົກວັດທະນະທໍາທີ່ຈັບຕ້ອງບໍ່ໄດ້ໃນພື້ນທີ່ດັ່ງກ່າວ.

ສໍາລັບຂໍ້ມູນເພີ່ມເຕີມ ສາມາດເຂົ້າເບິ່ງທີ່: www.tourismchampasak.com, ພາຍໃຕ້ການພັດທະນາໂດຍໂຄງການ CHAMPA ເພື່ອສະໜອງຂໍ້ມູນທີ່ຫຼາກຫຼາຍກ່ຽວກັບການທ່ອງທ່ຽວເມືອງຈໍາປາສັກ. ຫຼື ເຂົ້າເບິ່ງຂໍ້ມູນທີ່ສູນຂໍ້ມູນທ່ອງທ່ຽວ ເຊິ່ງຕັ້ງຢູ່ເຂດໃຈກາງເມືອງດັ່ງກ່າວ, ໂທ: +856 (0) 20 94290543.

ການເດີນທາງ: ສາຍການບິນລາວໃຫ້ບໍລິການຖ້ຽວບິນໄປເມືອງປາກເຊທຸກວັນ ໂດຍມີປາຍທາງຈາກນະຄອນຫຼວງວຽງຈັນ, ຫຼວງພະບາງ, ສຽມຣຽບ ແລະ ໂຮຈີມິນ.