ໃນຊ່ວງຕົ້ນເດືອນສິງຫາ 2025, ທ່ານ ເຫຼັກໄຫຼ ສີວິໄລ  ໄດ້ເຂົ້າຢ້ຽມຢາມລັດວິສາຫະກິດການບິນລາວຢ່າງເປັນທາງການ ເພື່ອຮັບຟັງການລາຍງານຄວາມຄືບໜ້າດ້ານການດຳເນີນງານ ແລະ ແຜນການພັດທະນາຍຸດທະສາດຂອງສາຍການບິນແຫ່ງຊາດ. ຄະນະນຳຂອງການບິນລາວໄດ້ນຳສະເໜີການປະຕິບັດວຽກງານ ແລະ ແຜນພັດທະນາໃນປະຈຸບັນເຊັ່ນ: ການດຳເນີນງານຂອງເຮືອບິນຈຳນວນ 12 ລຳ ແລະ ການພັດທະນາການເຊື່ອມໂຍງໃນພາກພື້ນ. ໂດຍສະເພາະ ມີແຜນຈະເຊົ່າເຮືອບິນ COMAC C909 ເພີ່ມອີກ 1 ລຳ ເພື່ອຮອງຮັບຄວາມຕ້ອງການໃນລະດູການທ່ອງທ່ຽວປີ 2025.

ການຢ້ຽມຢາມນີ້ ຍັງໄດ້ສະທ້ອນໃຫ້ເຫັນເຖິງຄວາມມຸ່ງໝັ້ນຂອງການບິນລາວຕໍ່ການຮັກສາຄວາມປອດໄພ ໂດຍຢູ່ໃນຂະບວນການກຽມການກວດສອບ IOSA ຄັ້ງທີ 6 ຊຶ່ງຈັດຢູ່ລະຫວ່າງວັນທີສິງຫາ. ລັດຖະມົນຕີໄດ້ຊື່ນຊົມການດຳເນີນງານຕາມມາດຕະຖານສາກົນ ແລະ ເຄືອຂ່າຍຂອງສາຍການບິນທີ່ເພີ່ມຂຶ້ນ ລວມມີ 7 ເສັ້ນບິນພາຍໃນ, 7 ເສັ້ນບິນຕ່າງປະເທດ ແລະ 6 ເສັ້ນບິນແບບເໝົາລຳ.

ໃນຂະນະທີ່ການບິນລາວຍັງສຶກສາເພີ່ມການຮ່ວມມືກັບຄູ່ຄ້າໃນພາກພື້ນ ນອກເໜືອຈາກຂໍ້ຕົກລົງ Codeshare ກັບສາຍການບິນບາງກອກແອ ແລະ ຫວຽດເຈັດ ທ່ານລັດຖະມົນຕີໄດ້ຍືນຢັນວ່າ ລັດຖະບານເຫັນດີກັບການຮ່ວມມືຕໍ່ໄປກັບບໍລິສັດ COMAC ຂອງ ສປ ຈີນ ເພື່ອເພີ່ມສັກກະຍາພາບຂອງສາຍການບິນ ແລະ ຊຸກຍູ້ໃຫ້ການບິນລາວເປັນສາຍການບິນລະດັບຕົ້ນໆໃນພູມມີພາກອາຊຽນ.

ການຢ້ຽມຢາມຂອງທ່ານເຫຼັກໄຫຼ ສີວິໄລ ໄດ້ສະທ້ອນໃຫ້ເຫັນເຖິງຄວາມສຳຄັນທີ່ລັດຖະບານ ໄດ້ມີຕໍ່ການບິນລາວ ໂດຍຖືເປັນສ່ວນສຳຄັນຂອງໂຄງສ້າງພື້ນຖານຂອງປະເທດ ແລະ ການເຊື່ອມໂຍງພາກພື້ນ.