Text by: ເຈສັນ ໂຣລັນ

ແປ ແລະ ຮຽບຮຽງໂດຍ: ວັນນະແສງ ອິນສານ

Photos by: ພູນຊັບ ເທວົງສາ

ຂ້າພະເຈົ້າໄດ້ມີໂອກາດຢືນຢູ່ເບື້ອງໜ້າຂອງຜ້າໄໝບູຮານອັນເກົ່າແກ່ທີ່ສືບທອດກັນຍາວນານມານັບຫຼາຍສະຕະວັດ ຜ້າສີ້ນຜືນນີ້ເປັ່ງປະກາຍດັ່ງກັບແສງຈັນເຈີດຈ້າກະທົບກັບແສງອາທິດໃນຍາມເຊົ້າເສັ້ນດ້າຍສີຄໍາຈັບຕ້ອງສະທ້ອນກັບໃສ່ແສງຍິບຍັບເກີດເປັນພາບດັ່ງກັບດວງດາວທີ່ຖືກດຶງຈາກທ້ອງຟ້າມາຈັບວາງໄວ້ໃນຜ້າໄໝສີດອກອັນຊັນ

ຊ່າງຕໍ່າຜ້າທີ່ສ້າງຜົນງານທີ່ສຸດແສນຈະສວຍງາມຜືນນີ້ໄດ້ຈາກໂລກຂອງເຮົາໄປເປັນເວລາດົນນານມາແລ້ວ ທີ່ຫຼົງເຫຼືອໄວ້ໃຫ້ລູກໃຫ້ຫຼານໄດ້ສືບກັນມາກໍ່ຄືຜົນງານການເລົ່າເລື່ອງຈາກປາຍນິ້ວມືຂອງເພິ່ນຜ່ານລວດລາຍທີ່ສະຫຼັບຊັບຊ້ອນເຊິ່ງກໍ່ແມ່ນລວດລາຍຂອງພະຍານາກທີ່ເລືອລອດຜ່ານດອກບົວ ພ້ອມກັບລາຍຝູງຊ້າງທີ່ກໍງລັງເຄື່ອນກຸ່ມໄປຕາມດ້ານລຸ່ມຂອງເພັດນິນຈິນດາ. ສິລະປະຜືນແຜ່ນນີ້ບໍ່ແມ່ນເປັນພຽງແຕ່ ສີ້ນ ທີ່ໄວ້ໃສ່ເທົ່ານັ້ນ ແຕ່ມັນເປັນດັ່ງກັບບົດກະວີທີ່ຖືກປະພັນຂຶ້ນມາດ້ວຍເສັ້ນດ້າຍເພື່ອອະທິບາຍເລົ່າເລື່ອງຜ່ານຜ້າໄໝລາວ

ຜົນງານອັນຍິ່ງໃຫຍ່ນີ້ເປັນພຽງໜຶ່ງໃນຫຼາຍໆຜົນງານອັນນັບບໍ່ຖ້ວນທີ່ຖືກມາຈັດວາງສະແດງຢູ່ທີ່ຕໍານັກຜ້າໄໝລາວບູຮານແຫ່ງນີ້, ເຊິ່ງໄດ້ຖືກໄຂຂຶ້ນໃນເດືອນຕຸລາທີ່ຜ່ານມາທີ່ ບ້ານພັກ ຫໍຄໍາ ເຊິ່ງຢູ່ຕິດກັບ ສໍານັກງານປະທານປະເທດ. ໃນທີ່ນີ້, ສະມາຄົມຫັດຖະກຳລາວ ສາມາດຍາດໄດ້ຜົນສໍາເລັດອັນພົ້ນເດັ່ນກໍ່ຄືການນໍາເອົາມໍລະດົກຕົກທອດອັນລ້ຳຄ່າທີ່ສືບທອດການມາຫຼາຍໆລຸ້ນຄົນຈາກຫຼາຍໆຄອບຄົວໃນທົ່ວປະເທດມາວາງສະແດງໃຫ້ສາທາລະນະຊົນໄດ້ຊື່ນຊົມ.

ງານວາງສະແດງດັ່ງກ່າວໄດ້ເປີດຂຶ້ນຢ່າງເປັນທາງການໂດຍທ່ານນາງ ນາລີ ສີສຸລິດ ພັນລະຍາປະທານປະເທດ ແຫ່ງ ສປປ ລາວ ຮ່ວມກັບ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳແລະ ທ່ອງທ່ຽວເຊິ່ງໄດ້ມີການຈັດວາງສະຖານທີ່ດັ່ງກ່າວອອກເປັນສອງໂຊນຫຼັກໆເພື່ອເຜີຍແຜ່ປະຫວັດເລື່ອງລາວຄວາມເປັນມາທີ່ໜ້າຕື່ນຕາຕື່ນໃຈຂອງສິລະປະຜ້າໄໝລາວ. ຫ້ອງທໍາອິດຖືກຈັດເປັນຫ້ອງມໍລະດົກທີ່ໄດ້ລວມລວມເອົາແຜ່ນແພຫຼາຍກວ່າ 100 ຜືນ ມາສະແດງຄວາມງົດງາມຂອງການຕໍ່າຜ້າແບບພື້ນເມືອງລາວ. ຜ້າແຕ່ລະຜືນບອກເລົ່າເລື່ອງລາວຂອງຕົນຜ່ານລວດລາຍທີ່ສະຫຼັບຊັບຊ້ອນ ນັບຕັ້ງແຕ່ສັນຍາລັກແຫ່ງຄວາມອຸດົມສົມບູນ ແລະ ປົກປ້ອງຮັກສາຈາກບູຮານຕະການ ໄປຈົນເຖິງລວດລາຍທີ່ເປັນຕົວແທນຕາງໜ້າໃຫ້ແກ່ວັດນະຄະດີທ້ອງຖິ່ນ ແລະ ຕໍານານເລົ່າຂານຂອງພຸດທະສາສະໜາ. ແຜ່ນແພບາງຜືນມີຄວາມເກົ່າແກ່ຕັ້ງແຕ່ກ່ອນສະໄໝທີ່ຝຣັ່ງເຂົ້າມາປົກຄອງລາວເສຍອີກ ແຕ່ຍັງຄົງຄວາມງົດງາມໄວ້ໄດ້ດີກວ່າສະຖາປັດຕະຍະກຳໃນຍຸກອານານິຄົມຊໍ້າ.

ການວາງສະແດງໄດ້ເປີດກວ້າງໃນສອງໂຊນທີ່ຖືກຄັດສັນຢ່າງພິຖີພິຖັນ. ໂຊນທຳອິດແມ່ນດັ່ງກັບຕົວແທນທີ່ຢັ້ງຢືນເຖິງສີມືຄວາມຊຳນິຊໍານານອັນແສນວິເສດໃນການຕໍ່າແຜ່ນຜ້າແບບພື້ນເມືອງຂອງລາວ ຜ່ານການວາງສະແດງແຜ່ນແພອັນເປັນມໍລະດົກຫຼາຍກວ່າ 100 ຜືນ ບໍ່ວ່າຈະເປັນ ສີ້ນໄໝທີ່ມີລວດລາຍຊັບຊ້ອນ, ແຜ່ນແຜສໍາລັບອອກງານພິທີການຕ່າງໆ ແລະ ແຜ່ນຜ້າສໍາລັບປະດັບປະດາຄົວເຮືອນ ເຊິ່ງບາງຜືນມີອາຍຸຍາວນານຫຼາຍກວ່າໜຶ່ງສະຕະວັດ.

ທີ່ຫ້ອງວາງສະແດງຖັດໄປ ຜູ້ເຂົ້າຢ້ຽມຊົມຈະໄດ້ຄົ້ນພົບວ່າຊ່າງຕໍ່າແຜ່ນສະໄໝໃໝ່ໄດ້ປະຍຸກເອົາລວດລາຍບູຮານເຫຼົ່ານັ້ນມາສ້າງສັນຜົນງານອອກມາຄືແນວໃດໃຫ້ແທດເໝາະກົມກືນກັບຍຸກສະໄໝປັດຈຸບັນ. ລອງຄິດພາບລວດລາຍພະຍານາກແບບດັ້ງເດີມທີ່ຖືກປະຍຸກຜ່ານຈິນຕະນາການຄວາມຄິດສ້າງສັນມາເປັນຜົນງານເທິງແຜ່ນຜ້າແບບລຽບໆທີ່ແຂວນໄວ້ຢູ່ເທິງຝາ ແລະ ລອງຈິດຕະນາການເບິ່ງວ່າເຕັກນິກອັນເກົ່າແກ່ຫຼາຍສະຕະວັດເຫຼົ່ານີ້ຖືກນໍາໃຊ້ປະຍຸກມາເປັນແຟຊັ້ນແບບຮ່ວມສະໄໝຈະອອກມາເປັນແນວໃດ. ການເຂົ້າມາໃນໂຊນນີ້ ບໍ່ຕ່າງຫຍັງກັບການໄດ້ທີ່ເຫັນການປ່ຽນແປງຂອງເວລາແບບທັນທີທັນໃດ ໄດ້ສໍາຜັດວ່າປະເພນີອັນເກົ່າແກ່ກ້າວຂ້າມໄປສະຕະວັດທີ 21 ຢ່າງໜ້າອັດສະຈັນໃຈຄືແນວໃດ ໂດຍທີ່ຍັງຮັກສາຈິດວິນຍານຂອງການຕໍ່າຜ້າຂອງລາວໃຫ້ຄົງຢູ່.

ສະຖານທີ່ຈັດວາງສະແດງ ຕໍານັກຜ້າໄໝລາວບູຮານ ເປັນອີກສ່ວນສໍາຄັນໜຶ່ງທີ່ຊ່ວຍເພີ່ມອັດທະຣົດປະສົບການຂອງການຢ້ຽມຊົມໃຫ້ຄັກຂຶ້ນໄປຕື່ມອີກ. ການເລືອກ ບ້ານພັກ ຫໍຄໍາ ສະຖາປັດຕະຍະກຳເກົ່າແກ່ແບບອິນດູຈີນຂອງຝຣັ່ງ ທີ່ມີສວນດອກໄມ້ທີ່ງຽບສະຫງົບໄດ້ປະສົມປະສານກາຍເປັນພື້ນຫຼັງທີ່ສະຫງ່າງາມໃຫ້ແກ່ຜ້າໄໝອັນລໍ້າຄ່າເຫຼົ່ານີ້. ແສງທໍາມະຊາດທີ່ສາດຊ່ອງລອດຜ່ານປ່ອງຢ້ຽມຈາກພື້ນຫາເພດານ ເຮັດໃຫ້ເຫັນລາຍລະອຽດຄວາມງົດງາມຂອງເສັ້ນໄໝ ແລະ ລາຍປັກຖັກແສ່ວທີ່ຊັບຊ້ອນ ທັງຊ່ວຍໃຫ້ເຮົາເຫັນລວດລາຍສີສັນທີ່ອຸດົມສົມບູນຂອງແຜ່ນແພບູຮານລາວ.

ສໍາລັບຜູ້ເຂົ້າຊົມທີ່ກະຫາຍຄວາມສົດຊື່ນລະຫວ່າງການຢ້ຽມຊົມຫ້ອງວາງສະແດງໃນ ຕໍານັກຜ້າໄໝລາວບູຮານ ເພິ່ນກໍ່ມີສາຂາຂອງຮ້ານ Naked Espresso ມາໃຫ້ບໍລິການກາເຟ ແລະ ອາຫານຫວ່າງແຊບໆຈາກທ້ອງຖິ່ນ. ການໄດ້ຈິບກາເຟເອສເພຣສໂຊ້ໄປພ້ອມເບິ່ງຜ້າໄໝລາວບູຮານທີ່ມີຄວາມເກົ່າແກ່ກ່ອນແມ່ຕູ້ທວດຂອງຂ້າພະເຈົ້າໄປພ້ອມ ເປັນຄວາມຮູ້ສຶກສົມບູນແບບທີ່ເກີນບັນຍາຍອີ່ຫຼີ.

ຕໍານັກຜ້າໄໝລາວບູຮານ ເປັນຫຼາຍກວ່າການວາງສະແດງແຜ່ນແພທີ່ສວຍງາມ. ສະຖານທີ່ແຫ່ງນີ້ໄດ້ສະແດງໃຫ້ເຫັນເຖິງຄວາມເລິກເຊິ່ງ ແລະ ຊັບຊ້ອນສວຍງາມຂອງປະເພນີການຕໍ່າຜ້າຂອງລາວ. ຜ້າແຕ່ລະຜືນມີເລື່ອງລາວຫຼາຍໆດ້ານໃຫ້ໄດ້ຊື່ນຊົມ: ບໍ່ວ່າຈະເປັນຄວາມຊໍານິຊໍານານຂອງຊ່າງຕໍ່າ, ຄວາມສຳຄັນທາງວັດທະນະທຳຂອງລາຍສີ້ນແຕ່ລະແບບ ແລະປະຫວັດຄວາມເປັນມາຂອງຄອບຄົວທີ່ເປັນເຈົ້າຂອງຜ້າຜືນນັ້ນໆ.

ໂຊນຂອງແຜ່ນແພແບບຮ່ວມສະໄໝໄດ້ພິສູດໃຫ້ເຫັນເລີຍວ່າສິລະປະພື້ນເມືອງຂອງລາວບໍ່ແມ່ນເປັນພຽງຟອດຊິ້ວພັນປີທີ່ຖືກຈັບມາວາງສະແດງໃນພິພິຕະພັນເທົ່ານັ້ນແຕ່ແຜ່ນຜ້າເຫຼົ່ານີ້ມີວິວັດທະນາການໄປຕາມຍຸກສະໄໝ ສື່ໃຫ້ເຫັນເຖິງການສະແດງອອກທາງຄວາມຮູ້ສຶກນຶກຄິດທີ່ມີການເສີມແຕ່ງພັດທະນາໄປສະເໝີ. ການທີ່ໄດ້ເຫັນນັກອອກແບບໜຸ່ມທີ່ເຮັດວຽກໃກ້ຊິດກັບຊ່າງຕໍ່າຜ້າເພື່ອລັງສັນຜົນງານທີ່ຮັບແຮງບັນດານໃຈຈາກປະເພນີອັນດີງາມເກົ່າແກ່ ບວກກັບການໄດ້ເຫັນຄວາມກ້າທີ່ຈະກ້າວອອກຈາກກອບເພື່ອເພີ່ມແນວຄິດສະໄໝໃໝ່ເຂົ້າໄປແມ່ນວິວັດທະນາການດ້ານວັດທະນະທໍາອັນສໍາຄັນທີ່ຈະຊ່ວຍຮັກສາໃຫ້ຜ້າໄໝບູຮານເຫຼົ່ານີ້ສືບສານຕໍ່ໄປ ແລະ ເປັນທີ່ສົນໃຈຂອງຄົນລຸ້ນຫຼັງ. ສະນັ້ນ ເຮົາມາຊ່ວຍກັນສະໜັບສະໜູນຊ່າງຕໍ່າຝີມືດີຈາກທ້ອງຖິ່ນນໍາກັນເທາະ ຜ່ານການຊ່ວຍຊື້ຊ່ວຍອຸດໜຸນຜົນງານສິລະປະສະໄໝໃໝ່ເຫຼົ່ານີ້ ແລະ ຮັກສາໃຫ້ເຕັກນິກຝີມືອັນເກົ່າແກ່ໄດ້ສືບຕໍ່ກ້າວໄປຂ້າງໜ້າໃນຍຸກສະໄໝໃໝ່ຂອງຊາດລາວ.

ຂໍເຕືອນ:ຫຼັງຈາກທີ່ທ່ານໄດ້ສໍາຜັດກັບຜົນງານສຸດພິເສດເຫຼົ່ານີ້ແລ້ວ, ທ່ານຈະບໍ່ສາມາດເບິ່ງສີ້ນທີ່ວາງຂາຍທົ່ວໄປຕາມທ້ອງຕະຫຼາດໄດ້ແບບເກົ່າອີກຕໍ່ໄປ ແລະ ນັ້ນແຫຼະແມ່ນແກ່ນສານສໍາຄັນຂອງການວາງສະແດງນີ້ຂຶ້ນມາ

ຫາກຕ້ອງການຂໍ້ມູນເພີ່ມຕື່ມ:ຕໍານັກຜ້າໄໝລາວບູຮານຕັ້ງຢູ່ພາກຕາເວັນອອກສຽງໃຕ້ຂອງ ສໍານັກງານປະທານປະເທດ (ຫໍຄໍາ) ແລະສາມາດເຂົ້າຢ້ຽມຊົມໄດ້ຕັ້ງແຕ່ 9 ໂມງເຊົ້າຫາ 5 ໂມງແລງ. ສະຖານທີ່ດັ່ງກ່າວອະນຸຍາດໃຫ້ຖ່າຍຮູບໄດ້ສະເພາະແບບບໍ່ໃຫ້ເປີດແຟລັດສ໌ ເພື່ອໃຫ້ຜູ້ເຂົ້າຢ້ຽມຊົມສາມາດບັນທຶກຄວາມງົດງາມຂອງແຜ່ນແພອັນແສນພິເສດເຫຼົ່ານີ້ໄວ້ ສືບສານຮັກສາໃຫ້ຄົນລຸ້ນຫຼັງໃນຕໍ່ໆໄປ.

ການເດີນທາງ:ສາຍການບິນລາວມີຖ້ຽວບິນພາຍໃນ ແລະ ຕ່າງປະເທດຫຼາກຫຼາຍຖ້ຽວສໍາລັບເດີນທາງໄປທີ່ ນະຄອນຫຼວງວຽງຈັນ ໄວ້ໃຫ້ບໍລິການທ່ານ