ມົນສະເໜ່ແຫ່ງດວງຈັນ ເປ່ງພະລັງສູ່ແມ່ນໍ້າຂອງ

ງານບຸນປະຈໍາປີວັດພູເຮັດໃຫ້ເຂດພາກໃຕ້ຂອງລາວສ່ອງແສງເປັ່ງປະກາຍ,

ໃນມື້ຂຶ້ນ 15 ຄໍ່າເດືອນສາມເພັງ (ເດືອນລາວ) ກົງກັບມື້ພະຈັນເຕັມດວງໃນຊ່ວງເດືອນກຸມພາ, ວັດພູ ເຊິ່ງເປັນວັດເກົ່າແກ່ຂອງຂອມ ທັງເປັນແຫຼ່ງມໍລະດົກໂລກຂອງອົງການອຸຍເນັສໂກ ທີ່ຕັ້ງຢູ່ທາງພາກໃຕ້ຂອງລາວ ເຊິ່ງໄດ້ກັບຄືນມາຄຶກຄື້ນອີກຄັ້ງໃນຮອບປີ, ຊ່ວຍດຶງດູດເອົານັກທ່ອງທ່ຽວຈາກທົ່ວທຸກມຸມໂລກໃຫ້ເຂົ້າມາຮ່ວມສໍາຜັດກັບວິຖີວັດທະນະທໍາອັນມີຊີວິດຊີວາ. ເທດສະການງານບຸນດັ່ງກ່າວ ມີສາກເບື້ອງຫຼັງຂອງແມ່ນໍ້າຂອງ ທີ່ປຽບເໝືອນວິວປະກອບອັນໜ້າຫຼົງໄຫຼ, ໂດຍຈັດຂຶ້ນກົງກັບວັນບຸນມາຄະບູຊາ ເຊິ່ງເຊື່ອກັນວ່າເປັນວັນທີ່ພະພຸດທະເຈົ້າຊົງສະແດງໂອວາດປະຕິໂມກແກ່ພະສົງສາວົກ ເພື່ອໃຫ້ພະສົງນຳໄປປະພຶດປະຕິບັດ, ພ້ອມກະທໍາແຕ່ຄວາມດີ ແລະ ຊໍາລະລ້າງຈິດໃຈໃຫ້ບໍລິສຸດຜຸດຜ່ອງ. ຕົ້ນກໍາເນີດຂອງການສະເຫຼີມສະຫຼອງງານບຸນວັດພູ ແມ່ນມີຕໍານານເລົ່າຂານກັນຢ່າງກວ້າງຂວາງ ອັນໄດ້ນໍາພາພວກເຮົາຫວນຢ້ອນກັບຄືນສູ່ຍຸກອິນເດຍບູຮານ ເຊິ່ງຜູ້ທີ່ມີຄວາມເຫຼື້ອມໃສສັດທາຕ່າງກໍພາກັນຫຼັ່ງໄຫຼໄປຫາພະພຸດທະເຈົ້າຕາມຄວາມມຸ່ງມາດປາຖະໜາຂອງພວກຕົນ, ສົ່ງຜົນໃຫ້ເກີດມີການອຸປະສົມບົດ (ບວດເປັນພະ) ເພື່ອເປັນຄູບາອາຈານ ແລະ ຄົ້ນພົບແສງສະຫວ່າງທາງປັນຍາດ້ວຍຕົນເອງ. ເຖິງແມ່ນງານບຸນຈະຈັດຂຶ້ນເປັນປະຈໍາທຸກປີ, ແຕ່ວັນທີ່ແນ່ນອນແມ່ນຈະປ່ຽນແປງໄປ ແລະ ງານສະເຫຼີມສະຫຼອງສໍາລັບປີນີ້ແມ່ນມີກໍານົດຈັດຂຶ້ນລະຫວ່າງວັນທີ 22-24 ກຸມພາ 2024.

ຕະຫຼອດໄລຍະເວລາສາມວັນນີ້, ຜູ້ເຂົ້າຮ່ວມງານບຸນຈະໄດ້ສໍາຜັດກັບພາບທີ່ໜ້າປະທັບໃຈ ເຊິ່ງລວມເຖິງງານສະແດງແສງສີສຽງອັນໜ້າຫຼົງໄຫຼ, ການແຂ່ງຂັນກິລາ, ຂະບວນແຫ່ທີ່ໜ້າຕື່ນຕາຕື່ນໃຈ, ການສະແດງຟ້ອນພື້ນເມືອງ, ແລະ ການທ່ອງບົດສູດມົນອັນສັກສິດ. ໝາກຫົວໃຈຫຼັກຂອງເທດສະການງານບຸນດັ່ງກ່າວກໍຄື ການອະທິຖານອັນເລິກເຊິ່ງ ໂດຍບັນດາຜູ້ຝັກໄຝ່ທາງທໍາຈະມາລວມຕົວກັນໃນທີ່ນີ້ ເພື່ອລໍາລຶກເຖິງພະພຸດທະເຈົ້າ.

ແປ ແລະ ຮຽບຮຽງໂດຍ ໄພບູນ ທະນະບົວສີ
ຮູບໂດຍ ພູນຊັບ ເທວົງສາ