ບົດ ແລະ ຮຽບຮຽງໂດຍ ໂຮງໝໍເພື່ອນລາວ ສຳລົບເດັກ

ແປ ແລະ ຮຽບຮຽງໂດຍ ໄພບູນ ທະນະບົວສີ

ເນື່ອງໃນໂອກາດສະເຫຼີມສະຫຼອງວັນຄົບຮອບ 10 ປີ, ການຈັດງານແລ່ນຫຼວງພະບາງຮາຟມາຣາທອນ: ແລ່ນເພື່ອເດັກນ້ອຍ ຍັງຄົງເປັນງານແລ່ນປະຈໍາປີ ທີ່ສະແດງໃຫ້ເຫັນເຖິງຄວາມມີນໍ້າໃຈໄມຕີ ແລະ ຄວາມເມດຕາກະລຸນາຂອງຊຸມຊົນຄົນມັກແລ່ນ. ງານດັ່ງກ່າວໄດ້ແບ່ງໄລຍະທາງອອກເປັນ 3 ສ່ວນ ຄື 7 ກມ, 14 ກມ ແລະ 21 ກມ, ເຊິ່ງຜູ້ເຂົ້າຮ່ວມທີ່ມີຄວາມສາມາດທຸກຄົນຈະມາລວມຕົວກັນ ເພື່ອສໍາຫຼວດເບິ່ງຄວາມງົດງາມຂອງຕົວເມືອງຫຼວງພະບາງ ພ້ອມປະກອບສ່ວນເຂົ້າໃນການສ້າງຄວາມດີຮ່ວມກັນ ທ່າມກາງສາກຫຼັງທີ່ເຕັມໄປດ້ວຍວັດວາອາຮາມອັນເກົ່າແກ່ ແລະ ພູມມີທັດທີ່ສວຍງາມ, ຈາກນັ້ນນັກແລ່ນກໍຈະເລີ່ມຕົ້ນອອກເດີນທາງແຫ່ງຄວາມອົດທົນທາງຮ່າງກາຍ ຄຽງຄູ່ກັບການຄົ້ນພົບທາງວັດທະນະທໍາ.

ເປັນເວລາໜຶ່ງທົດສະວັດແລ້ວ ທີ່ງານແລ່ນຫຼວງພະບາງຮາຟມາຣາທອນຄັ້ງນີ້ ຍັງຄົງເປັນສັນຍານແຫ່ງຄວາມຫວັງ, ໂດຍລາຍໄດ້ຈາກການລະດົມທຶນທັງໝົດ ແມ່ນຖືກນໍາໄປບໍລິຈາກໂດຍກົງໃຫ້ແກ່ ໂຮງໝໍເພື່ອນລາວສໍາລັບເດັກນ້ອຍ ເຊິ່ງເປັນໂຮງໝໍເດັກທີ່ໃຫ້ບໍລິການບໍ່ເສຍຄ່າພຽງແຫ່ງດຽວໃນພາກເໜືອຂອງລາວ. ໂຮງໝໍແຫ່ງນີ້, ໄດ້ໃຫ້ບໍລິການປິ່ນປົວທາງການແພດທີ່ສໍາຄັນແກ່ເດັກນ້ອຍ ແລະ ໄດ້ປິ່ນປົວເດັກມາແລ້ວກວ່າ 40,000 ຄົນ ໃນປີ 2023.

ເພື່ອເປັນການສະເຫຼີມສະຫຼອງຄົບຮອບ 10 ປີ, ຈິ່ງຮັບປະກັນໄດ້ວ່າ ງານແຂ່ງຂັນສໍາລັບປີນີ້ຈະຖືກຈັດຂຶ້ນຢ່າງຍິ່ງໃຫຍ່ທີ່ສຸດໃນປະຫວັດສາດຂອງງານແລ່ນຮາຟມາຣາທອນ. ໃນປີຜ່ານມາ, ມີຜູ້ເຂົ້າຮ່ວມກຸ່ມ RUN FOR CHILDREN ຫຼື ແລ່ນເພື່ອເດັກນ້ອຍ ຈໍານວນ 2,300 ຄົນ. ສ່ວນເປົ້າໝາຍປີ 2400 ແມ່ນຄາດວ່າຈະມີຜູ້ເຂົ້າຮ່ວມກຸ່ມຫຼາຍກວ່າ 2,500 ຄົນ.

ເມື່ອນັກແລ່ນເລີ່ມກ້າວຂາເຂົ້າສູ່ເສັ້ນໄຊ ກໍຈະຖືເປັນການສະເຫຼີມສະຫຼອງຄວາມສໍາເລັດຂອງຕົນເອງ ແລະ ຜົນໂດຍລວມແຫ່ງການອຸທິດຕົນ ບວກກັບຄວາມມີນໍ້າໃຈໄມຕີຈິດຕະຫຼອດຊ່ວງໜຶ່ງທົດສະວັດ.

 ການແລ່ນຫຼວງພະບາງຮາຟມາຣາທອນ ເປັນໄດ້ຫຼາຍກວ່າການແຂ່ງຂັນ ເນື່ອງຈາກເປັນການສະເຫຼີມສະຫຼອງໃຫ້ແກ່ຊຸມຊົນ, ຄວາມຮັກແພງສາມັກຄີ ແລະ ກ້ອນກໍາລັງຂອງກຸ່ມຄົນທີ່ມາລວມຕົວກັນ ເພື່ອສ້າງການປ່ຽນແປງໃນທາງທີ່ດີ. ບໍ່ວ່າຈະແລ່ນຮ່ວມກັນກັບໝູ່ເພື່ອນ, ຄອບຄົວ ຫຼື ຜູ້ຮ່ວມງານທີ່ມີຄວາມສົນໃຈ ເຊິ່ງຜູ້ເຂົ້າຮ່ວມຍ່ອມຈະລວມຕົວກັນດ້ວຍຄວາມມຸ່ງໝັ້ນຕັ້ງໃຈຮ່ວມກັນໃນການສ້າງສິ່ງທີ່ແຕກຕ່າງ. ເມື່ອກ້າວເຂົ້າສູ່ປີທີ 10, ງານດັ່ງກ່າວຍັງຄົງເສີມສ້າງແຮງບັນດານໃຈໃນການກໍ່ໃຫ້ເກີດມີຄວາມຫວັງ ແລະ ກະຕຸ້ນຄວາມຮູ້ສຶກຂອງທຸກຄົນໃນການເປັນສ່ວນໜຶ່ງທີ່ໄດ້ເຂົ້າຮ່ວມ ໂດຍປະຖິ້ມມໍລະດົກແຫ່ງໄມຕີຈິດມິດຕະພາບ ແລະ ຄວາມເອື້ອອາທອນໄວ້ຢ່າງຍືນຍົງ.

ໂຄງການແລ່ນເພື່ອເດັກນ້ອຍໃນຄັ້ງນີ້ ໄດ້ມອບໂອກາດໃຫ້ຜູ້ຄົນໃນທ້ອງຖິ່ນ ແລະ ບັນດານັກທ່ອງທ່ຽວໃນການ ສະໜັບສະໜຸນເດັກນ້ອຍໃນປະເທດລາວ. ທຸກກ້າວຍ່າງຂອງທ່ານແມ່ນມີຄວາມສຳຄັນຕໍ່ ໂຮງໝໍເພື່ອນລາວ ສຳລັບເດັກນ້ອຍ ໃນການຊ່ວຍເຫຼືອຊີວິດເດັກນ້ອຍທຸກໆຄົນ.