ແປ ແລະ ຮຽບຮຽງໂດຍ ໄພບູນ ທະນະບົວສີ

ບົດ ແລະ ຮູບໂດຍ ມິກ ຊິບເພັນ

  ໃນມື້ທີ່ເດີນທາງໄປເຖິງຫຼວງພະບາງບໍ່ວ່າຈະເປັນຊ່ວງໃດກໍຕາມ ຄວາມສຸກໃຈຍ່ອມເກີດຂຶ້ນໄດ້ ເມື່ອທ່ານລອງຍ່າງເລາະລຽບຕາມຕົວເມືອງແບບບໍ່ຟ້າວຟັ່ງເພື່ອສໍາຫຼວດສິ່ງຮອບໆພາຍໃນບໍລິເວນແຫ່ງນີ້. ເມືອງປະຫວັດສາດ, ເຊິ່ງຄອບຄອງດິນແດນຂະໜາດນ້ອຍ ທີ່ຈຸດໄຫຼພົບລະຫວ່າງແມ່ນໍ້າຂອງກັບແມ່ນໍ້າຄານ ໂດຍເມືອງດັ່ງກ່າວແມ່ນເປັນທີ່ຕັ້ງຂອງວັດທີ່ງົດງາມທີ່ສຸດແຫ່ງໜຶ່ງຂອງລາວ, ລວມທັງຮ້ານກາເຟອັນມີສະເນ່, ຮ້ານຂາຍເສື້ອຜ້າແຟຊັ່ນ ແລະ ເຄື່ອງປະດັບງາມໆ. ແຕ່ວ່າພໍເມື່ອຜູ້ຂຽນກັບພັນລະຍາເດີນທາງມາເຖິງເມືອງແຫ່ງນີ້ໄດ້ບໍ່ດົນ, ຝົນຊໍ້າພັດຕົກກະໜໍ່າຈົນມືດຟ້າມົວດິນ ຈົນເປັນເຫດເຮັດໃຫ້ພວກເຮົາທັງຄູ່ບໍ່ສາມາດອອກໄປໃສໄດ້ເລີຍໃນມື້ນັ້ນ ແຕ່ພວກເຮົາກໍມີຄວາມສຸກບໍ່ໜ້ອຍ ເພາະໂຮງແຮມທີ່ພວກເຮົາເລືອກສໍາລັບພັກຜ່ອນທັງສອງຄືນນັ້ນກໍຄື ໂຮງແຮມ ອາວານີພລັສ ຫຼວງພະບາງ (Avani+ Luang Prabang).

  ທ່າມກາງສາຍຝົນ, ພວກເຮົາຕັດສິນໃຈມຸ່ງໜ້າໄປທີ່ຮ້ານ Main Street Bar & Grill ຂອງໂຮງແຮມເພື່ອຮັບປະທານອາຫານທ່ຽງ. ທໍາມະດາແລ້ວ, ຮ້ານອາຫານຂອງໂຮງແຮມຈະບໍ່ແມ່ນຕົວເລືອກທໍາອິດເນື່ອງຈາກພວກເຮົາຕ້ອງການສໍາຜັດລົດຊາດອາຫານທ້ອງຖິ່ນ, ແຕ່ພວກເຮົາກໍບໍ່ຜິດຫວັງທີ່ພະຍຸໄດ້ພັດນໍາພາທັງສອງມາທີ່ຈຸດນີ້. ເມື່ອບໍ່ດົນຜ່ານມາ, ທາງໂຮງແຮມອາວານີ ໄດ້ແຕ່ງຕັ້ງ ທ່ານ ເສີດ ທໍາຣົງສຸກສີ ເປັນຫົວໜ້າພໍ່ຄົວຄົນໃໝ່. ຕາມຄໍາອະທິບາຍຂອງຫົວໜ້າພໍ່ຄົວທີ່ໂຕະອາຫານນັ້ນ, ລາວໄດ້ສ້າງລາຍການອາຫານຄືນໃໝ່ທັງໝົດ ເຖິງເປົ້າໝາຍຫຼັກຂອງຮ້ານຈະເນັ້ນໃສ່ຄວາມເພິ່ງພໍໃຈຂອງລູກຄ້າຕ່າງປະເທດເປັນຫຼັກ ແຕ່ພໍ່ຄົວເສີດ ກໍຍັງໄດ້ລວມເອົາອາຫານເດັ່ນໆຂອງຫຼວງພະບາງຫຼາຍລາຍການເຂົ້າໃນປຶ້ມເມນູ. ອາຫານທີ່ໜ້າສົນໃຈກວ່າໝູ່ນັ້ນກໍແມ່ນ ໂຫຼນສົ້ມໝູ ເຊິ່ງເປັນແກງສົ້ມໝູທີ່ມີສີສັນແປກຕາ  ດັ່ງທີ່ປາກົດໃນຕໍາລາອາຫານຊາວວັງຂອງລາວ ແມ່ນສູດດັ້ງເດີມຂອງລາວ ທີ່ຄິດຄົ້ນສູດໂດຍເພຍສິງ, ອະດີດພໍ່ຄົວປະຈໍາວັງຫຼວງ ຂອງຫຼວງພະບາງ ໃນຊ່ວງກາງຊຸມປີ 1900. ຜົນງານດັ່ງກ່າວຖືກຮຽບຮຽງຂຶ້ນໂດຍ ທ່ານ ອະລັນ ເດວິດສັນ (ເອກອັກຄະລັດຖະທູດອັງກິດປະຈໍາລາວ ລະຫວ່າງປີ 1973-75, ແລະ ເປັນນັກຂຽນກ່ຽວກັບລາຍການອາຫານທີ່ປະສົບຄວາມສໍາເລັດໃນເວລາຕໍ່ມາ) ພາຍຫຼັງທີ່ທ່ານໄດ້ຮັບປຶ້ມຕໍາລາອາຫານຊາວວັງຕົ້ນສະບັບຂອງເພຍສິງ ຈາກເຈົ້າຊາຍໃນສະໄໝນັ້ນ. ໜັງສືດັ່ງກ່າວຖືກພິມເຜີຍແຜ່ໃນຊ່ວງຕົ້ນຊຸມປີ 1980 ໂດຍສໍານັກພິມຂະໜາດນ້ອຍຂອງລາຊະອານາຈັກ, ແຕ່ກໍຍັງຄົງເປັນໜັງສືສະເພາະກຸ່ມ.

  ເປັນເລື່ອງທີ່ໜ້າສົນໃຈທີ່ໄດ້ຄົ້ນພົບວ່າ ເຊຟເສີດ ເລືອກທີ່ຈະດຶງເອົາແຮງບັນດານໃຈຈາກໜ້າຕ່າງໆໃນປຶ້ມຕໍາລາ ພ້ອມໃຫ້ຄໍາແນະນໍາແກ່ຜູ້ທີ່ມາຮັບປະທານອາຫານໄດ້ຮູ້ຈັກກັບອາຫານທີ່ໜ້ອຍຄົນຈະຮູ້ຈັກ. ໂຫຼນສົ້ມໝູ ກໍເປັນອີກຕົວເລືອກໜຶ່ງທີ່ຄວນລອງຊີມ ເນື່ອງຈາກມີສ່ວນປະສົມຈາກນໍ້າກະທິໝາກພ້າວ ເຊິ່ງເປັນເຄື່ອງປຸງທີ່ນິຍົມໃຊ້ກັບອາຫານໄທຫຼາຍກວ່າອາຫານລາວ ບວກກັບສ່ວນປະກອບດ້ວຍໄຂ່ປາ ເຮັດໃຫ້ອາຫານເຍື່ອງນີ້ມີສີບົວແກ່ທີ່ໂດດເດັ່ນ.

  ເມນູໃໝ່ປະຈໍາຮ້ານ Main Street Bar & Grill ຍັງປະກອບມີອາຫານຫຼວງພະບາງອີກສອງລາຍການທີ່ໜ້າສົນໃຈ ໂດຍສະເພາະກໍແມ່ນຍໍາສະຫຼັດຫຼວງພະບາງ ໂດຍໃຊ້ນໍ້າຍໍາປະສົມໄຂ່ແດງ ເຊິ່ງປັດຈຸບັນຖືເປັນເມນູດັ້ງເດີມປະຈໍາຖິ່ນແຕ່ໄດ້ຮັບອິດທິພົນຈາກຍຸກລ່າອານານິຄົມ ພ້ອມດ້ວຍຕໍາໝາກຫຸ່ງ ເຊິ່ງຝານໝາກຫຸ່ງດິບເປັນຕ່ອນໜາໆ ໂດຍມີສ່ວນປະສົມຈາກນໍ້າປູ ເພື່ອເພີ່ມຄວາມນົວທີ່ເປັນເອກະລັກ. ສິ່ງທີ່ໜ້າສັງເກດອີກຢ່າງໜຶ່ງກໍຄື ເຂົ້າຜັດແຄມຂອງ (khao phat khem khong) ສູດສະເພາະຂອງພໍ່ຄົວ ເຊິ່ງເປັນເຂົ້າຜັດລາດໄຂ່ສຸດແຊບ ຄຽງດ້ວຍໄສ້ອົ່ວ ແລະ ຂຽບໝູ ປິດທ້າຍດ້ວຍພຸດດິ້ງໝາກໄມ້ລວມໃນຊອສກະທິຫອມໆຈາກໃບເຕີຍທີ່ມີລົດຊາດແຊບກົມກ່ອມ. ໂຊກດີທີ່ພໍ່ຄົວເສີດໃຈດີເຊີນຊວນພັນລະຍາຂອງຜູ້ຂຽນເຂົ້າຮ່ວມຮຽນເຮັດອາຫານແບບຕົວຕໍ່ຕົວ ແລະ ມື້ຕໍ່ມາ ຜູ້ເປັນເມຍກໍເພີດເພີນກັບການໃຊ້ເວລາໃນຊ່ວງບ່າຍ ໃນການມີສ່ວນຮ່ວມເພື່ອທໍາຄວາມເຂົ້າໃຈທີ່ຈະຄົ້ນຫາຄວາມລັບ ແລະ ຄວາມແຕກຕ່າງຂອງອາຫານຫຼວງພະບາງ ລວມທັງໂຫຼນສົ້ມໝູນໍາອີກ. ສິ່ງທີ່ໜ້າປະທັບໃຈທີ່ສຸດນັ້ນກໍຄື ພວກເຮົາສາມາດນັ່ງຮັບປະທານອາຫານຫຼັງເລີກຮຽນທ່າມກາງສະພາບແວດລ້ອມອັນຫຼູຫຼາ ແລະ ຜ່ອນຄາຍຂອງຮ້ານ Main Street Bar & Grill. 

  ຮ້ານອາຫານ Main Street Bar & Grill ທີ່ໂຮງແຮມອາວານີພລັສ ຫຼວງພະບາງ ເປີດໃຫ້ບໍລິການທຸກວັນ, ເລີ່ມແຕ່ 6:30 ໂມງເຊົ້າ ຫາ 11:00 ໂມງແລງ. ມີບໍລິການສອນເຮັດອາຫານຂອງເຊຟເສີດທຸກວັນ. ສໍາລັບຂໍ້ມູນເພີ່ມເຕີມສາມາດເຂົ້າເບິ່ງໄດ້ທີ່ avanihotels.com.

ອາຫານລົດເດັດທີ່ຮ້ານລິໂທລາວ

  ມື້ຕໍ່ມາ, ພວກເຮົາພາກັນຍ່າງໄປຕາມຖະໜົນສີສະຫວ່າງວົງ ເພື່ອມຸ່ງໜ້າໄປສູ່ວັດຊຽງທອງທ່າມກາງແສງແດດສົດໃສ. ຢູ່ທີ່ນີ້, ຝາຜະໜັງສີແດງທີ່ຕົກແຕ່ງດ້ວຍກະເບື້ອງໂມເສກແກ້ວສົ່ງແສງເຫຼື້ອມແວວວາວລະຍິບລະຍັບ, ສະທ້ອນໃຫ້ເຫັນເຖິງພາບການດໍາລົງຊີວິດປະຈໍາວັນໃນເຂດຊົນນະບົດທາງພາກເໜືອ. ຕໍ່ມາ, ໃນຂະນະທີ່ກໍາລັງຮັບປະທານອາຫານທ່ຽງທີ່ຮ້ານອາຫານລິໂທລາວ (Little Lao Culture Bar) ພວກເຮົາຈິ່ງສາມາດເຂົ້າໃຈວ່າ ມໍລະດົກທາງວັດທະນະທໍາອັນອຸດົມຮັ່ງມີແຫ່ງນີ້ ແມ່ນມີຄວາມຜູກພັນກັບພິທີກໍາທາງພຸດທະສາສະໜາ ບວກກັບຈັງຫວະການແກ່ວງໄກວຂອງຕົ້ນເຂົ້າໃນນາທີ່ປູກຕາມລະດູການ, ທັງໝົດລ້ວນແຕ່ເປັນສິລະປະຜ່ານກະເບື້ອງໂມເສກເຫຼົ່ານັ້ນ ເຊິ່ງໄດ້ກາຍເປັນແຮງບັນດານໃຈໃຫ້ກັບຮ້ານອາຫານແຫ່ງໃໝ່ທີ່ສວຍງາມແຫ່ງນີ້.

  ຮ້ານອາຫານລິໂທລາວ ຕັ້ງຢູ່ໃນຕຶກແຖວໃນຍຸກລ່າອານານິຄົມ ທີ່ໄດ້ຮັບການຕໍ່ເຕີມຄືນໃໝ່ຢ່າງງົດງາມ ເຊິ່ງຕັ້ງຢູ່ລະຫວ່າງກາງຖະໜົນສີສະຫວ່າງວົງ. ເມນູອາຫານພາຍໃນຮ້ານປະກອບມີແຈ່ວແຊບໆເຖິງ 22 ຊະນິດ ພ້ອມດ້ວຍເຄື່ອງຄຽງທີ່ສັ່ງເປັນຖ້ວຍນ້ອຍໆ ໂດຍນໍາມາປະສົມກັບອາຫານເພື່ອຊ່ວຍເຮັດອາຫານວ່າງ ແລະ ອາຫານຈານຫຼັກມີລົດຊາດແຊບເປັນພິເສດ. ສໍາລັບແຈ່ວສູດສະເພາະປະຈໍາຮ້ານປະກອບມີແຈ່ວສູດດັ້ງເດີມ ບໍ່ວ່າຈະເປັນແຈ່ວໝາກເລັ່ນ ລວມທັງແຈ່ວຍອດນິຍົມຂອງຫຼວງພະບາງເຊັ່ນ ແຈ່ວບອງ ທີ່ນິຍົມເສີບຄູ່ກັບປີ້ງຊີນ ແລະ ແຈ່ວຂີງ. ສ່ວນອາຫານຈານຫຼັກທີ່ຄັດເລືອກມາກໍປະກອບດ້ວຍອາຫານດັ້ງເດີມຂອງທ້ອງຖິ່ນ ເຊັ່ນ ໄສ້ອົ່ວເຄື່ອງ ແລະ ເອາະຫຼາມ. 

  ພໍ່ຄົວ/ແມ່ຄົວທີ່ຮ້ານລິໂທລາວ ຍັງໄດ້ສະແດງຄວາມເຄົາລົບຕໍ່ມໍລະດົກຂອງເພຍສິງ ດ້ວຍການປຸງແຕ່ງອາຫານຈານເດັ່ນ ທີ່ຄັດເລືອກຈາກປຶ້ມຕໍາລາລວມສູດອາຫານດັ້ງເດີມຂອງລາວ (Traditional Recipes of Laos) ໂດຍສະເພາະກໍແມ່ນ ໄຂ່ຂວໍ້າ (ໄຂ່ຍັດໄສ້) ເຊິ່ງແມ່ນໄຂ່ຕົ້ມທີ່ນໍາມາຍັດໄສ້ດ້ວຍໝູບົດປະສົມເຄື່ອງເທດ ກ່ອນຈະນໍາມາຈຸ່ມລົງໄຂ່ທີ່ຕີແລ້ວທອດໃຫ້ສຸກເຫຼືອງ. ຮ້ານລິໂທລາວມີຊື່ສຽງຢ່າງໄວວາເນື່ອງຈາກມີຄວາມຄິດສ້າງສັນໃນການປະສົມຄັອກເທວ ເຊິ່ງສາມາດດື່ມຂະນະຮັບປະທານອາຫານໃນຮ້ານຫຼັກໄດ້ ຫຼື ທີ່ Sun Song Social ເຊິ່ງເປັນຮ້ານບາສຸດຮິດທີ່ຢູ່ຊັ້ນເທິງ. ເມນູຄັອກເທວ ລວມມີ Mak Houng Dong ເຊິ່ງປະສົມດ້ວຍເຕກີລາ, ໝາກເຜັດ, ໝາກຫຸ່ງດອງ, ໝາກແຕງ, ເຂົ້າ ແລະ ໝາກນາວ ພ້ອມດ້ວຍ Sakhaan ທີ່ປະສົມຈາກເຫຼົ້າຈິນ, ໝາກຕູມ ແລະ ສະຂ່ານ.

  ຮ້ານອາຫານລິໂທລາວ ເປີດໃຫ້ບໍລິການທຸກວັນຍົກເວັ້ນສະເພາະວັນພຸດ ເຊິ່ງເລີ່ມແຕ່ 11:00 ໂມງເຊົ້າ – 11:30 ໂມງແລງ, ແລະ ຮ້ານບາ Sun Song Social ເລີ່ມແຕ່ 5:00 ໂມງແລງໂມງແລງ. ສາມາດເບິ່ງຂໍ້ມູນເພີ່ມເຕີມໄດ້ທາງ Facebook: Little Lao Culture Bar.

ຮ້ານອາຫານເປີດໃໝ່ອື່ນໆ

  ນອກຈາກນີ້, ໃນລະຫວ່າງທາງຂອງຖະໜົນສີສະຫວ່າງວົງ, ສາມາດຊອກຊີມທີ່ຮ້ານຕໍາຫວານ ເຊິ່ງເປັນຮ້ານຕໍາສົ້ມທີ່ຫາກໍເປີດໃໝ່ ເຖິງແມ່ນລາຍການອາຫານຫຼາຍເຍື່ອງຈະເປັນຮູບແບບອາຫານໄທຫຼາຍກວ່າລາວກໍຕາມ. ຂະນະທີ່ຮ້ານແມຊົງສາມຊັ້ນ (Maison Sam San), ທ່ານສາມາດເລືອກຊົມຜົນງານຫັດຖະກໍາທີ່ຜະລິດຂຶ້ນໃນທ້ອງຖິ່ນໄດ້ທີ່ຊັ້ນລຸ່ມ, ພ້ອມເລືອກຈິບຊາລາວທີ່ຫາກໍຊົງໃໝ່ໆທີ່ຊັ້ນ 2 ຫຼື ຂຶ້ນໄປຮ້ານບາຊັ້ນດາດຟ້າທີ່ຊັ້ນ 3 ເຊິ່ງທ່ານຈະສາມາດແນມເຫັນເສັ້ນທາງສາຍຫຼັກຂອງຫຼວງພະບາງຈາກມຸມມອງໃໝ່ໃນຊ່ວງພະອາທິດໃກ້ອັດສະດົງ. ອີກສະຖານທີ່ໜຶ່ງທີ່ລີ້ຊ້ອນຢູ່ສົ້ນຊອຍທີ່ເຕັມໄປດ້ວຍຮົ່ມເງົານັ້ນກໍຄື ຮ້ານອາຫານ Lost in Baan, ເຊິ່ງເຮັດໃຫ້ຫວນຄິດເຖິງຜົນງານສິລະປະເທິງຝາຜະໜັງ, ເຄື່ອງຫຼິ້ນແຜ່ນສຽງໄວນິນ ແລະ ຈານອາຫານຟິວຊັນອາຊີ.

ການເດີນທາງ: ສາຍການບິນລາວໃຫ້ບໍລິການຖ້ຽວບິນເປັນປະຈໍາ ຈາກນະຄອນຫຼວງວຽງຈັນ, ຮ່າໂນ່ຍ, ຊຽງໃໝ່ ແລະ ປາກເຊ ເພື່ອເດີນທາງໄປຫຼວງພະບາງ.

ຂໍ້ມູນເພີ່ມເຕີມ

Facebook ຂອງຮ້ານອາຫານຂ້າງເທິງ

  – ຮ້ານຕໍາຫວານ

  – Maison Sam San

  – Lost in Baan