ບົດໂດຍ: ອານິຕາ ເພຣສຕັ້ນ

ຮູບໂດຍ: ອານິຕາ ເພຣສຕັ້ນ / ເອເວັນຊອງຟິມ

ແປ ແລະ ຮຽບຮຽງໂດຍ: ວັນນະແສງ ອິນສານ

ທ້ອງຟ້າເຕັມໄປດ້ວຍເມກເຝື້ອປົກຄຸມ, ຕົ້ນໄມ້ໃບຫຍ້າສີຂຽວກໍເລີ່ມປົ່ງຊອນຂຶ້ນມາ ເຮັດໃຫ້ທົ່ງນາຖືກປະດັບເອ້ດ້ວຍສີຂຽວຕະການຕາ, ແມ່ນໍ້າຂອງກໍເຕັມໄປດ້ວຍປູປາກຸ້ງຫອຍ ຂະນະທີ່ຕາມທ້ອງຕະຫຼາດກໍຈະມີພຽງພືດຜັກ ແລະ ໝາກໄມ້ສົດ ແຕ່ເກືອບຈະບໍ່ເຫັນຮອດນັກທ່ອງທ່ຽວ ເນື່ອງຈາກເປັນລະດູຝົນນັ້ນເອງ. ເມື່ອທ້ອງຟ້າປາກົດຂຶ້ນດ້ວຍຄວາມລຶກລັບຊັບຊ້ອນ, ຂະນະທີ່ຍອດຊໍ່ຟ້າຂອງວັດວາອາຮາມຫຼາຍແຫ່ງ ໄດ້ໂຜ່ຂຶ້ນເປັນຊໍ່ໆພາຍໃຕ້ເມກເຝື້ອທີ່ຄ້າຍກັບວ່າພວມເກາະຕິດຕາມສັນພູຫຼາຍໜ່ວຍທີ່ຕັ້ງລຽນລາຍກັນ. ບັນຍາກາດລັກສະນະນີ້ຍິ່ງເພີ່ມຄວາມມີສະເໜ່ໃຫ້ແກ່ເມືອງຫຼວງພະບາງຫຼາຍຂຶ້ນ ໂດຍສະເພາະການຖ່າຍຮູບງາມໆໃນຊ່ວງລະດູສີຂຽວນີ້.

ເມື່ອອຸນຫະພູມເພີ່ມຂຶ້ນຮອດລະດັບສູງສຸດໃນຊ່ວງເດືອນເມສາ, ອາກາດກໍເລີ່ມມີການປ່ຽນແປງ. ໃນເວລານັ້ນກໍຈະເຮັດໃຫ້ຈັງຫວະຊີວິດເລີ່ມເຄື່ອນທີ່ຊ້າລົງ, ສ່ວນລະດູການສີຂຽວກໍເລີ່ມກໍ່ຕົວຂຶ້ນ. ໃນແຕ່ລະວັນ, ບັນດາເມກເຝື້ອກໍຈະຈັບໂຕກັນເປັນກ້ອນ ກ່ອນທີ່ຝົນຈະເລີ່ມຕົກລົງມາຖີ່ຂຶ້ນເລື້ອຍໆຈົນຮອດກາງເດືອນມິຖຸນາ, ຈາກນັ້ນຝົນກໍຈະຕົກເກືອບທຸກໆວັນ. ປາກົດການນີ້ ບໍ່ໄດ້ໝາຍຄວາມວ່າຝົນຈະຕົກແບບແຮງໆຕະຫຼອດມື້ (ຍົກເວັ້ນກໍລະນີມີພະຍຸ), ແຕ່ເປັນລັກສະນະຝົນຝອຍ ຫຼື ຝົນລິນຄ່ອຍໆ ເຊິ່ງມາພ້ອມກັບຄວາມໜາວເຢັນ ພ້ອມຊໍາລະລ້າງ ແລະ ເພີ່ມຄວາມສົດຊື່ນຢ່າງມີຊີວິດຊີວາ ແລະແລ້ວກໍຈະມີແສງແດດສາດສ່ອງມາເປັນຊ່ວງໆ. ພະລັງອໍານາດຂອງທໍາມະຊາດ ໄດ້ຊ່ວຍອໍານວຍຄວາມສະດວກຕໍ່ການວາງແຜນ ແລະ ການຄາດຄະເນຕໍ່ສິ່ງທີ່ຈະເກີດຂຶ້ນໄດ້ງ່າຍ. ໂດຍສະເພາະກໍແມ່ນ ຖ້າຝົນຫາກຕົກໃນຊ່ວງຕອນເຊົ້າ, ຝົນກໍຈະຕົກໃນຊ່ວງເວລາດຽວກັນທຸກໆວັນລຽນຕິດກັນເປັນຫຼາຍມື້ ແບບບໍ່ມີຫຍັງຕ້ອງແປກໃຈ.

ຂະນະທີ່ຈໍານວນນັກທ່ອງທ່ຽວຫຼຸດລົງຢ່າງຫຼວງຫຼາຍ, ເຮັດໃຫ້ຕົວເມືອງອັນງຽບສະຫງົບແຫ່ງນີ້ຍິ່ງງຽບເຫງົາ. ວັນບຸນເຂົ້າວັດສາ (ເຂົ້າພັນສາ) ຂອງປີນີ້ ແມ່ນຈະເລີ່ມຂຶ້ນໃນວັນທີ 10 ກໍລະກົດ. ໃນໄລຍະເຂົ້າພັນສານີ້, ຈະບໍ່ມີການຈັດງານແຕ່ງດອງ ຫຼື ງານສະເຫຼີມສະຫຼອງຕາມປະເພນີຕ່າງໆ ແລະ ປະຊາຊົນບາງກຸ່ມກໍຈະພາກັນງົດດື່ມສິ່ງມຶນເມົາ. ຫາກທ່ານອາໄສຢູ່ຫຼວງພະບາງໃນຊ່ວງເວລານີ້, ທ່ານກໍຈະເຫັນວ່າ ການເຮັດບຸນທໍາທານໃນມື້ວັນສິນ ຈະຖືເປັນສີລິມຸງຄຸນຢ່າງຍິ່ງ.  ພະສົງສາມະເນນ ຈະພັກຢູ່ແຕ່ພາຍໃນວັດ ເພື່ອສຶກສາຮໍ່າຮຽນທໍາມະ ແລະ ນັ່ງສະມາທິເພື່ອປະຕິບັດທໍາ ພ້ອມຖືກຫ້າມເດີນທາງໄປສະຖານທີ່ອື່ນຈົນກວ່າຈະຮອດມື້ວັນສິນເພັງຂອງເດືອນຕຸລາ. 

ຜົນຜະລິດທີ່ວາງຂາຍໃນທ້ອງຕະຫຼາດຈະມີຄຸນນະພາບດີທີ່ສຸດໃນຊ່ວງລະດູຝົນ. ການໄປຕະຫຼາດຈິ່ງຖືເປັນສິ່ງທີ່ບໍ່ຄວນພາດ ໂດຍສະເພາະການວາງຂາຍສິນຄ້າທີ່ທ່ານອາດບໍ່ເຄີຍເຫັນມາກ່ອນ. ຫຼວງພະບາງມີພືດຜັກ ແລະ ໝາກໄມ້ຫຼາຍທີ່ສຸດໃນອາຊີ ເນື່ອງຈາກປະຊາຊົນນໍາຜົນຜະລິດທີ່ພວກເຂົາປູກໃນດິນຂອງຕົນເອງ ຫຼື ເກັບຈາກປ່າມາຂາຍ. ໃນຊ່ວງລະດູຝົນ ຖືເປັນຊ່ວງລະດູການເຫັດຫຼາຍຊະນິດ; ເຊື່ອກັນວ່າມີເຫັດກວ່າ 60 ສາຍພັນທີ່ເກີດໃນຜືນດິນແຫ່ງນີ້, ແລະ ບາງຊະນິດຍັງບໍ່ຮູ້ຊື່ ຫຼື ປະເພດ. ຜູ້ຄົນສາມາດສວຍໂອກາດທີ່ຈະໄດ້ຊີມລົດຊາດໝາກນັດຫວານໆ ທັງລາຄາຖືກທີ່ສຸດ ພ້ອມຕື່ນຕາຕື່ນໃຈກັບໜໍ່ໄມ້ສົດໆທີ່ຫາກໍເກັບມາໃໝ່ໆຈາກປ່າ ຫຼື ຈາກພູບໍລິເວນໃກ້ຄຽງ. 

ພູສີ ຖືເປັນສະຖານທີ່ຍອດນິຍົມສໍາລັບການຊົມວິວທິວທັດ ພ້ອມດື່ມດໍາກັບທັດສະນີຍະພາບອ້ອມຮອບຕົວເມືອງ. ການຍ່າງຂຶ້ນເທິງພູສີ ຈະສະດວກສະບາຍເມື່ອອາກາດເຢັນລົງ ຂະນະທີ່ທິວທັດພາຍໃຕ້ທ້ອງຟ້າອັນກວ້າງໃຫຍ່ຢ່າງໜ້າອັດສະຈັນກໍມີຄວາມງົດງາມຢ່າງເຫັນໄດ້ຊັດເຈນ. ຢູ່ຕາມເປິ້້ນພູແມ່ນຖືກປົກຄຸມດ້ວຍຕົ້ນດອກຝາງແດງ ຫຼື ຕົ້ນຫາງນົກຍູງ ທີ່ພວມເບັ່ງບານດ້ວຍດອກໄມ້ສີແດງສົ້ມສົດໃສ, ທັດສະນີຍະພາບດັ່ງກ່າວຍິ່ງເພີ່ມຄວາມງາມເປັນພິເສດ ເມື່ອແສງຕາເວັນສ່ອງກະທົບ ແລະ ຄ້າຍກັບວ່າຕົ້ນໄມ້ດັ່ງກ່າວພວມຈະລຸກໄໝ້ເປັນແປວໄຟ.

ການເຊົ່າລົດຖີບ ແລ້ວຂີ່ອອກໄປທາງວັດປ່າໂພນເພົາ ໂດຍມີຍອດຊໍ່ຟ້າສີທອງຕັ້ງເດັ່ນສະຫງ່າ ຢູ່ເຂດນອກຕົວເມືອງ ກໍເປັນອີກທາງເລືອກໜຶ່ງ. ໃນລະຫວ່າງທາງ,  ລອງແວ່ຂົວເກົ່າເພື່ອຊົມທິວທັດອັນງົດງາມຂອງແມ່ນໍ້າຄານ ແລະ ວັດປ່າໂພນເພົາ ທີ່ມີສາກຫຼັງເປັນໜ່ວຍພູສີຂຽວແກ່ ແລະ ຕົ້ນໝາກພ້າວທີ່ພວມເອນອ່ຽງລົງສູ່ແມ່ນໍ້າ. ທ່ານສາມາດຂຶ້ນໄປດ້ານເທິງສຸດຂອງວັດໄດ້ ຫາກຕ້ອງການທ່ຽວຊົມຮູບການຕົກແຕ່ງພາຍໃນແບບຮຽບງ່າຍ ແຕ່ມີເອກະລັກສະເພາະບໍ່ຄືໃຜ ລວມທັງຮູບແຕ້ມກ່ຽວກັບຊີວະປະຫວັດຂອງພະພຸດທະເຈົ້າໃນແບບສະບັບຂອງຕົນເອງ. ຢູ່ດ້ານຫຼັງວັດ, ມີໜ້າຜາຫີນທີ່ມີລັກສະນະງ່ຽງເລັກໜ້ອຍ ເຊິ່ງສາມາດແນມເຫັນຕົວເມືອງໂດຍຕັ້ງຫ່າງຈາກພູຫີນປູນທີ່ລຽນລາຍກັນເປັນຊັ້ນຄ້າຍຄືແຂ້ວເລື່ອຍ ຕະຫຼອດຮອດສະໜາມບິນຢູ່ຝັ່ງກົງກັນຂ້າມ ທ່າມກາງທິວທັດອັນກວ້າງໄກສຸດສາຍຕາ ທັງເຕັມໄປດ້ວຍຕົ້ນໄມ້ ແລະ ພືດພັນສີຂຽວອຸ່ມທຸ່ມ.   

ນໍ້າຕົກຕາດກວາງຊີ ກໍແມ່ນສະຖານທີ່ທ່ອງທ່ຽວທີ່ໜ້າທ່ຽວຊົມໃນຊ່ວງລະດູຝົນ. ໃນລະຫວ່າງທາງ, ທ່ານຈະເຫັນທົ່ງນາສີຂຽວ ລວມທັງຕົ້ນເຂົ້າທີ່ກໍາລັງເຕີບໂຕເພື່ອກຽມພ້ອມສູ່ການເກັບກ່ຽວ, ຂະນະທີ່ພວກຊາວນາພາກັນຂຸ້ນຂ້ຽວກັບໜ້າວຽກຂອງໃຜລາວ. ໃນເວລານີ້, ນໍ້າຕົກຕາດກໍຈະເຕັມໄປດ້ວຍນໍ້າໄຫຼຟາດຟົ້ງຢ່າງມີຊີວິດຊີວາ, ຕົ້ນໄມ້ໃບຫຍ້າຕ່າງກໍແຕກກ້ານກິ່ງງ່າເປັນສີຂຽວ ໂດຍເຊື່ອງຊ້ອນຈໍາພວກແມງໄມ້, ຕັກແຕນ, ແມງກະເບື້ອ, ຂີ້ເຂັບ ແລະອື່ນໆ. ຝູງຈັກຈັ່ນສົ່ງສຽງຮ້ອງ ປະສານກັບສຽງທຸ້ມຂອງນໍ້າຕົກຕາດອັນກ້ອງກັນວານ ຍິ່ງຮູ້ສຶກຄ້າຍຄືກັບສຽງດົນຕີປະສານສຽງຈາກທໍາມະຊາດ. ບໍລິເວນປ່າອ້ອມຮອບນໍ້າຕົກຕາດ ຍັງມີດອກໄມ້ແປກຕາຫຼາຍຊະນິດ ເປັນຕົ້ນແມ່ນ ຕົ້ນດອກດາຫຼາ ແລະ ດອກພຸດທະຮັກສາ (ດອກເຮລີໂຄເນຍ) ສີບົວແກ່ ແລະ ສີເຫຼືອງ.  

ລະດັບນໍ້າໃນແມ່ນໍ້າຂອງຈະເພີ່ມຂຶ້ນຈົນຮອດຈຸດສູງສຸດ, ສ່ວນແຄມຝັ່ງແມ່ນໍ້າກໍຍິ່ງເພີ່ມຄວາມອຸດົມສົມບູນຫຼາຍຂຶ້ນ. ຖືເປັນຊ່ວງເວລາທີ່ດີໃນການເດີນທາງແບບບໍ່ຮີບຮ້ອນໂດຍເລາະລຽບໄປຕາມຖໍ້າປາກອູ ພ້ອມທ່ຽວຊົມພະພຸດທະຮູບຫຼາຍຮ້ອຍອົງ ໂດຍແມ່ນຜູ້ເຫຼື້ອມໃສສັດທາໃນທາງພຸດທະສາສະໜາໄດ້ສ້າງສາປະໄວ້ຜ່ານຫຼາຍຮຸ່ນຄົນ. ຫາກທ່ານບໍ່ຢາກເດີນທາງໄກ, ເມືອງຈອມເພັດກໍແມ່ນອີກທາງເລືອກທີ່ເໝາະສົມ. ທ່ານສາມາດນັ່ງເຮືອຂ້າມຟາກສາທາລະນະ ເພື່ອເດີນທາງໄປສໍາຫຼວດຝັ່ງກົງກັນຂ້າມຂອງແມ່ນໍ້າຂອງ. ເມືອງຈອມເພັດ ປະກອບມີຫຼາຍສິ່ງທີ່ໜ້າສົນໃຈ ໂດຍສະເພາະ ວັດວາອາຮາມຫຼາຍແຫ່ງທີ່ງົດງາມ ທັງມີຄວາມສໍາຄັນ, ຂະນະທີ່ບ້ານຈ່ານ ເຊິ່ງເປັນບ້ານທີ່ມີຊື່ສຽງໃນການຜະລິດຫັດຖະກໍາເຄື່ອງປັ້ນດິນເຜົາ ເຊິ່ງທ່ານຈະເຫັນວິທີການປັ້ນໝໍ້ພື້ນເມືອງ ແລະ ຕະຫຼາດຈໍາໜ່າຍຜະລິດຕະພັນທ້ອງຖິ່ນທີ່ໜ້າສົນໃຈ. ນອກຈາກນີ້, ທິວທັດເມືອງຫຼວງພະບາງເມື່ອແນມຈາກຝັ່ງເມືອງຈອມເພັດ ກໍມີຄວາມງົດງາມເຊັ່ນກັນ.

ສໍາລັບນັກທ່ອງທ່ຽວແລ້ວ, ລະດູໃບໄມ້ປ່ຽນເປັນສີນີ້ ຖືເປັນຊ່ວງເວລາທີ່ດີທີ່ສຸດອີກຊ່ວງໜຶ່ງໃນການທ່ຽວຊົມເມືອງຫຼວງພະບາງ ໂດຍປາສະຈາກຄວາມອັ່ງອໍຂອງຜູ້ຄົນ. ສ່ວນລາຄາຫ້ອງພັກຂອງໂຮງແຮມ ຫຼື ເຮືອນພັກຕ່າງໆກໍຈະຖືກກວ່າ ແລະ ທິວທັດກໍງົດງາມກວ່າລະດູການອື່ນ. ຂະນະທີ່ວັດວາອາຮາມຫຼາຍແຫ່ງ ລວມທັງສະຖານທີ່ທ່ອງທ່ຽວອື່ນໆຈະມີຄວາມຄຶກຄື້ນໜ້ອຍລົງ ແຕ່ທ່ານກໍຈະມີໂອກາດໄດ້ທ່ຽວຊົມອ້ອມຮອບຕົວເມືອງໄດ້ຢ່າງເຕັມທີ່. 

ການເດີນທາງ:

ສາຍການບິນລາວໃຫ້ບໍລິການຖ້ຽວບິນໄປເມືອງຫຼວງພະບາງເປັນປະຈໍາ ໂດຍມີປາຍທາງຈາກນະຄອນຫຼວງວຽງຈັນ, ຊຽງໃໝ່, ຮາໂນ່ຍ ແລະ ປາກເຊ.