ຂຽນໂດຍ: ແອ໋ນດີ້ ຄຳສິງ

ພາບໂດຍ: ວິລະວັນ ຈັນທະວົງ

ພູພະນັງ ເປັນ 1 ໃນລາຍຊື່ປ່າສະຫງວນແຫ່ງຊາດຂອງ ສປປ ລາວ ເຊິ່ງລວມມີເນື້ອທີ່ 70,000 ເຮັກຕາ ໂດຍພູພະນັງແຫ່ງນີ້ຕັ້ງຢູ່ທີ່ບ້ານອ່າງໃຫຍ່ ເມືອງສີໂຄດຕະບອງ ນະຄອນຫຼວງວຽງຈັນ ແລະ ນີ້ກໍຄືຈຸດໝາຍປາຍທາງຂອງຂ້າພະເຈົ້າໃນມື້ນີ້. ການເດີນທາງໄປຍັງພູພະນັງນັ້ນຈະໃຊ້ເວລາປະມານ 40 ນາທີດ້ວຍລົດໃຫຍ່ຈາກຕົວເມືອງນະຄອນຫຼວງວຽງຈັນມຸ່ງໜ້າໄປທາງທິດເໜືອຕາມແຄມຝັ່ງແມ່ນ້ຳຂອງ ກ່ອນຈະມາຮອດ Wealth Coffee ຮ້ານຄາເຟ່ທີ່ຈະໃຫ້ເຮົາສາມາດແວ່ພັກເມື່ອຍຈາກການນັ່ງລົດກ່ອນຈະເລີ່ມຕົ້ນການອອກຍ່າງປ່າເພື່ອໄປຍັງຈຸດຊົມວິວພູພະນັງ ແລະ ກໍເປັນທີ່ພັກສຳລັບຂ້າພະເຈົ້າໃນມື້ນີ້ ໂດຍຈະພັກແຮມຢູ່ທີ່ລານຕັ້ງແຄ້ມທີ່ທາງ Wealth Coffee ຈັດຫາໄວ້ໃຫ້ ຫຼືຖ້າທ່ານມີເຕັ້ນສຳລັບຕັ້ງແຄ້ມຂອງທ່ານເອງກໍສາມາດນຳມາກາງພັກແຮມທີ່ລານຕັ້ງແຄ້ມຂອງເພິ່ນໄດ້ແຕ່ຕ້ອງໄດ້ແຈ້ງກັບທາງເພິ່ນກ່ອນ.

ຮອດເວລາຕາເວັນຄ້ອຍຄ່ຳຍາມແລງທາງລານຕັ້ງແຄ້ມກໍໄດ້ມີການສຸມກອງໄຟເພື່ອໃຫ້ຄວາມອົບອຸ່ນ ແລະ ບັນເທົາຄວາມໜາວເໜັບທີ່ພັດຜ່ານມາໃຫ້ແກ່ຜູ້ມາພັກເຊົາ ຕໍ່ມາຂ້າພະເຈົ້າກໍມານັ່ງດື່ມດ່ຳກັບບັນຍາກາດອັນງຽບສະຫງົບທ່າມກາງທຳມະຊາດ ແລະ ແສງດາວທີ່ລະຍິບລະຍັບປະດັບປະດາເຕັມທ້ອງຟ້າອັນແສນງົດງາມ ກ່ອນຈະກຽມເຂົ້າພັກເພື່ອເກັບແຮງໄວ້ໃຊ້ໃນການອອກເດີນທາງໄປຍັງຈຸດຊົມວິວພູພະນັງໃນມື້ອື່ນເຊົ້າ. 

ຮອດຕອນເຊົ້າແລ້ວ, ມື້ຕໍ່ມາຂ້າພະເຈົ້າກໍໄດ້ອອກເດີນທາງພ້ອມກັບກຸ່ມນັກທ່ອງທ່ຽວທ່ານອື່ນໆທີ່ພວມເດີນທາງມາຮອດນັ້ນກໍໄດ້ພາກັນຍ່າງນຳຫຼັງຜູ້ນຳທາງໂຕນ້ອຍທີ່ມີຊື່ວ່າແດງເປັນໝານາຍພານໂຕນ້ອຍທີ່ເຮັດໜ້າທີ່ໃນການນຳທາງບັນດາແຂກໄປຍັງຈຸດຊົມວິວ. ເສັ້ນທາງທີ່ຈະຂຶ້ນໄປຍັງຈຸດຊຸມວິວນັ້ນມີໄລຍະທາງປະມານ 5 ກິໂລແມັດ ແລະ ໃຊ້ເວລາປະມານ 1 ຊົ່ວໂມງປາຍໆ ຫຼື ຫຼາຍກວ່ານັ້ນເພາະຈະຂຶ້ນກັບຄວາມໄວໃນການຍ່າງຂອງແຕ່ລະຄົນ, ໂດຍຕະຫຼອດເສັ້ນທາງນັ້ນກໍຈະເປັນທາງຂື້ນພູທີ່ຄ່ອນຂ້າງຈະຊັນ ແລະ ເປັນຫີນຜາແຕ່ກໍບໍ່ຍາກເກີນໄປສຳລັບນັກຍ່າງປ່າມືໃໝ່ ແຕ່ລະວັງຢ່າຍ່າງພັດຫຼົງທາງກັບແດງ ແລະ ກຸ່ມນັກຍ່າງປ່າທີ່ນຳໜ້າໄປເພາະອາດຈະເຮັດໃຫ້ທ່ານຫຼົງປ່າໄດ້. 

ເມື່ອໃກ້ຈະຮອດຈຸດຊົມວິວແລ້ວກໍຈະໄດ້ພົບກັບຈຸດໄຫວ້ພະທີ່ຢູ່ກ້ອງລານຫີນແຜ່ນໃຫຍ່ໂດຍມີພຣະພຸດທະຮູບສະຖິດຢູ່ 2 ອົງ ແລະ ຄ້ອງ 1 ໜ່ວຍ ແລະ ຖັດຈາກລານຫີນແຜ່ນນັ້ນມາບໍ່ໄກ ໃນທີ່ສຸດກໍມາຮອດຈຸດຊົມວິວພູພະນັງ ແລະ ພາບທີ່ປາກົດໃຫ້ເຫັນຢູ່ທາງໜ້ານີ້ກໍຄຸ້ມຄ່າສຳລັບການຍ່າງປ່າເປັນເວລາຊົ່ວໂມງກວ່າ ນັ້ນກໍຄືພາບວິວທຳມະຊາດທີ່ປະກອບດ້ວຍໜ່ວຍພູຂຽວສະອຸ້ມອັນກວ້າງໃຫຍ່ສຸດລູກຫູລູກຕາປະສານກັບທ້ອງຟ້າສີຂາວປົນຟ້າອ່ອນ ແລະ ແມ່ນ້ຳຂອງທີ່ພາດຜ່ານກາງສອງຝັ່ງ ນັ້ນກໍສະທ້ອນໃຫ້ເຫັນຄວາມອຸດົມສົມບູນທາງທຳມະຊາດຂອງປະເທດເຮົາ ບອກໄດ້ເລີຍວ່າ ຂ້າພະເຈົ້ານັ້ນສາມາດນັ່ງເບິ່ງວິວແບບນີ້ໄດ້ໝົດມື້ແບບບໍ່ມີເບື່ອເລີຍ ເພາະທຸກຄັ້ງທີ່ໄດ້ເດີນທາງມາທີ່ພູພະນັງແຫ່ງນີ້ໄດ້ເຮັດໃຫ້ຂ້າພະເຈົ້າຮູ້ສຶກໄດ້ເຖິງການເປັນສ່ວນໜຶ່ງຂອງທຳມະຊາດທີ່ອຸດົມສົມບູນ ແລະ ການໄດ້ຖືກທຳມະຊາດຮັກສາຈິດໃຈທີ່ກະວົນກະວົນຈາກເລື່ອງອື່ນມາກໍໄດ້ຖືກເຮັດໃຫ້ສະຫງົບລົງຄືກັນກັບມີເວດມົນທີ່ເຮັດໃຫ້ລືມເລື່ອງທີ່ໜັກໃຈໄປໝົດ.

ພູພະນັງແຫ່ງນີ້ກໍປຽບສະເໝືອນປອດຂອງເມືອງສີໂຄດຕະບອງທີ່ມີນັກທ່ອງທ່ຽວທັ້ງພາຍໃນ ແລະ ຕ່າງປະເທດແວະວຽນມາທ່ຽວຊົມຄວາມງົດງາມທາງທຳມະຊາດນີ້ບໍ່ຂາດສາຍ ຖ້າທ່ານຕ້ອງການຈະສູດອາກາດບໍລິສຸດໃຫ້ເຕັມປອດ, ຜ່ອນຄາຍທາງກ່າງທຳມະຊາດອັນງຽບສະຫງົບແບບບໍ່ຕ້ອງອອກໄປໄກຈາກຕົວເມືອງ ແລະ ທ້າທາຍຕົນເອງດ້ວຍການຍ່າງທ່ຽວຊົມທຳມະຊາດນັ້ນ ພູພະນັງກໍເປັນອີກໜຶ່ງທາງເລືອກທີ່ເໝາະສົມທີ່ສຸດສຳລັບທ່ານໃນທ້າຍອາທິດນີ້.

ການເດີນທາງ

ເສັ້ນທາງການຍ່າງປ່າແມ່ນເລີ່ມຈາກ ຮ້ານກາເຟ ເວວ  ເຊິ່ງຕັ້ງຢູ່ຫ່າງຈາກຕົວເມືອງໄປທາງທິດຕາເວັນຕົກປະມານ 30 ກິໂລແມັດ.