English
ຖ້າຫາກເວົ້າເຖິງຄົນທີ່ເຮັດວຽກກັບສາຍການບິນ, ເຊື່ອວ່າທຸກຄົນຄົງຈະຄິດພາບເຖິງກັບຕັນຂັບເຮືອບິນ ຫຼື ນາງຟ້າທີ່ບໍລິການຜູ້ໂດຍສານດ້ວຍຮອຍຍິ້ມ ແມ່ນບໍ່? ແຕ່ວ່າວຽກຢູ່ສາຍການບິນແມ່ນຫຼາຍກວ່ານັ້ນ. ກ່ອນທີ່ຍົນຈະອອກບິນຮັບໃຊ້ຜູ້ໂດຍສານ, ພະນັກງານຝ່າຍຕ່າງໆຕ້ອງໄດ້ກວດກາ ແລະ ກຽມພ້ອມໃນດ້ານຕ່າງໆໂດຍມີຄະຕິປະຈໍາໃຈຄື ປອດໄພໄວ້ກ່ອນ. ໜຶ່ງໜ້າທີ່ທີ່ສຳຄັນຄືໜ້າທີ່ການຄິດໄລ່ນໍ້າໜັກ ແລະ ຄວາມສົມດູນຂອງເຮືອບິນກ່ອນທີ່ຈະອອກບິນຮັບໃຊ້ຜູ້ໂດຍສານ ເຊິ່ງຜູ້ທີ່ຢູ່ເບື້ອງຫຼັງໜ້າທີ່ນີ້ຄື ອ້າຍ ສີສະຫວາດ ສຸທຳມະວົງ. ການຄິດໄລ່ນໍ້າໜັກແມ່ນເປັນວຽກທີ່ທ້າທາຍຫຼາຍ ເຊິ່ງບໍ່ແມ່ນໃຜກໍສາມາດເຮັດໄດ້, ມັນຕ້ອງອາໄສປະສົບການ ແລະ ຄວາມຮອບຄອບໃນການຄິດໄລ່ສູດຄະນິດສາດທີ່ສັບສົນ ແລະ ຊັບຊ້ອນ ຕ້ອງມີການຄໍານວນຕັ້ງແຕ່ພາກສ່ວນເບົາທີ່ສຸດ ຈົນເຖິງພາກສ່ວນທີ່ໜັກທີ່ສຸດ: ຕັ້ງແຕ່ນໍ້າໜັກນໍ້າມັນຈົນເຖິງອາຫານ, ຕັ້ງແຕ່ຜູ້ໂດຍສານ ຈົນເຖິງກະເປົ໋າ, ຕັ້ງແຕ່ສິນຄ້າໄປຈົນຮອດຂອງພະນັກງານເທິງເຮືອບິນທຸກຄົນ ເຊິ່ງພະນັກງານຝ່າຍຄວາມປອດໄພພາກພື້ນດິນທຸກຄົນໄດ້ເອົາໃຈໃສ່ໃນການຄໍານວນທຸກຢ່າງເພື່ອໃຫ້ການເດີນທາງເປັນໄປຢ່າງປອດໄພ ແລະ ຮັດກຸມທີ່ສຸດ.
ອ້າຍສີສະຫວາດຮັກ ແລະ ພູມໃຈໃນອາຊີບຂອງເພິ່ນ ແຕ່ວ່າອາຊີບນີ້ກໍບໍ່ແມ່ນຄວາມຝັນທຳອິດຂອງເພິ່ນ. ເພິ່ນກໍເຄີຍມີຄວາມຝັນຄືຄົນທົ່ວໆໄປທີ່ຢາກເປັນກັບຕັນຂັບເຮືອບິນ ແຕ່ວ່າຍ້ອນປັດໄຈໃນສຸຂະພາບຕອນນັ້ນ ເຮັດໃຫ້ເພິ່ນໄດ້ຖືກຊັບຊ້ອນມາຢູ່ພະແນກຄວາມປອດໄພພາກພື້ນດິນຂອງສາຍການບິນລາວເພິ່ນ. ຕັ້ງແຕ່ມື້ນັ້ນຈົນຮອດມື້ນີ້ກໍເປັນເວລາ 14 ປີແລ້ວທີ່ອ້າຍສີສະຫວາດເຮັດວຽກໃນພະແນກນີ້. ປະຈຸບັນ ເພິ່ນດຳລົງຕໍາແໜ່ງຜູ້ຈັດການຂອງພະແນກນີ້ ເຊິ່ງເພິ່ນຍັງມີໜ້າທີ່ຮັບຜິດຊອບໃນການອັບເດດຖານຂໍ້ມູນກ່ຽວກັບນໍ້າໜັກ ແລະ ຄວາມສົມດູນ, ກົດລະບຽບໃໝ່ໆໃຫ້ທຸກໆສາຂາຂອງການບິນລາວ ທັງສາຂາພາຍໃນ ແລະ ຕ່າງປະເທດ. ເພິ່ນໄດ້ຕັ້ງເປົ້າໄວ້ວ່າເພິ່ນຈະເຮັດວຽກຢູ່ທີ່ແຫ່ງນີ້ຈົນຮອດມື້ກະສຽນ. ເພິ່ນມີຄວາມສຸກໃນການມາເຮັດວຽກທຸກມື້, ແຕ່ວຽກກໍບໍ່ແມ່ນງ່າຍເລີຍ.
“ຫຼາຍໆຄົນຢາກມາເຮັດວຽກທີ່ພະແນກເຮົາ, ເຊິ່ງມັນຄ່ອນຂ້າງຈະຍາກ ແລະ ກົດດັນ”
“ວຽກນີ້ຕ້ອງອາໄສການຄິດໄລ່ ແລະ ຄໍານວນທີ່ຖືກຕ້ອງ ແລະ ແນ່ນອນ, ແລະ ຖ້າຫາກເຈົ້າບໍ່ມັກຄິໄລ່ ຫຼື ສູດຄະນິດສາດ ວຽກນີ້ກໍບໍ່ເໝາະກັບເຈົ້າ” ກ່າວໂດຍອ້າຍ ສີສະຫວາດ “ສິ່ງທີ່ສຳຄັນທີ່ສຸດ ແລະ ພະນັກງານທຸກຄົນຕ້ອງຈື່ໃຫ້ຂຶ້ນໃຈຄືຄວາມປອດໄພຕ້ອງການກ່ອນສະເໝິ”
ການເຮັດໜ້າທີ່ນີ້ຕ້ອງຜ່ານການຝຶກດ້ານເຕັກນິກສະເພາະທັງໝົດ 4 ຫຼັກສູດ ແລະ ຕ້ອງມີການຝຶກອົບຮົມຄືນທຸກໆ 2 ປີ.
ອ້າຍສີສະຫວາດຜ່ານການຝຶກອົບຮົມລະດັບໂລກ ແລະ ມີທັກສະການເຮັດວຽກລະດັບສາກົນ, ແຕ່ວ່າເພິ່ນກໍບໍ່ມີແຜນທີ່ຈະຍ້າຍໄປບ່ອນອື່ນ, ຫຼືຍ້າຍອອກຈາກປະເທດລາວ. ໃນທາງກົງກັນຂ້າມ, ເພິ່ນຍັງຕ້ອງການຢາກຊັກຊວນໃຫ້ມີຄົນມາເຮັດວຽກໃນພະແນກຂອງເພິ່ນເພີ່ມ.
“ຫຼາຍຊາຍຂອງຂ້ອຍບອກວ່າຕ້ອງການມາເຮັດວຽກແບບຂ້ອຍ” ເພິ່ນກ່າວອອກມາພ້ອມດ້ວຍຮອຍຍິ້ມແຫ່ງຄວາມພາກພູມໃຈ