ການບໍາລຸງຮັກສາເຮືອບິນບໍ່ໃຫ້ມີຂໍ້ຜິດພາດໃດໆປຽບດັ່ງກັບເປົ້າໝາຍສູງສູດຂອງພວກເຮົາ
ໂຮງຈອດເຮືອບິນທີ່ຢູ່ດ້ານຫຼັງສະໜາມບິນສາກົນວັດໄຕນີ້ເປັນຈຸດທີ່ຢູ່ຫ່າງໄກຈາກຄວາມສັບສົນວຸ້ນວາຍຂອງອາຄານຜູ້ໂດຍສານຂາອອກ-ຂາເຂົ້າ ພ້ອມທັງຫ່າງຈາກຜູ້ຄົນທີ່ພາກັນຕໍ່ແຖວລໍຖ້າທີ່ເຕັມໄປດ້ວຍສຽງລາກກະເປົ໋າໄປມາ. ໂຮງຈອດເຮືອບິນນີ້ຈຶ່ງເຮັດໃຫ້ເຮົາຮູ້ສຶກໄດ້ເຖິງຄວາມເປັນລະບຽບຮຽບຮ້ອຍ ແລະ ສະຫງົບງຽບ.
ບັນດາເຮືອບິນຫຼາຍລໍາຖືກຈັດລຽງເປັນຢ່າງດີຢູ່ເທິງໂຄງ ແລະ ຄານເຫຼັກອັນສູງສະຫງ່າຊຶ່ງຢູ່ທ່າມກາງກຸ່ມຊ່າງກົນຈັກຊຸດສີຟ້າທີ່ເຮັດວຽກຢ່າງງຽບໆຢູ່ດ້ານໃນເຮືອບິນແຕ່ລະລໍາ. ເມື່ອແນມເຂົ້າໄປກໍ່ຈະເຫັນກໍ້ແຜ່ນເຫຼັກ, ລູກບິດ, ຝາປິດ ແລະ ກໍ້ສາຍໄຟ ທີ່ຈັດວາງໄວ້ຢ່າງເປັນລະບຽບ.

ສາຍການບິນລາວ ມີຄວາມສາມາດໃນດໍາເນີນການບໍາລຸງຮັກສາທີ່ຈຳເປັນໃຫ້ກັບເຮືອບິນ ແອບັສ (Airbus) A320 ແລະ ອາເຕແອ (ATR) ດ້ວຍຕົນເອງ. ຊຶ່ງທັງໝົດນີ້ແມ່ນຄວາມມຸ່ງໝັ້ນພະຍາຍາມຂອງການບິນລາວໃນການຍົກສູງຄວາມອາດສາມາດຂອງວິສະວະກອນຂອງຕົນທີ່ໄດ້ຜ່ານການຢັ້ງຢືນຈາກ ​ອົງການ​ຄວາມ​ປອດ​ໄພ​ການບິນ​ເອີຣົບ.
ມື້​ນີ້, ຂ້າ​ພະ​ເຈົ້າໄດ້​ມີໂອກາດເຂົ້າຮ່ວມຊົມການກວດ C check, ເຊິ່ງ​ເປັນ​ການກວດ​ສອບຊີ້ນສ່ວນຕ່າງໆຂອງເຮືອບິນຢ່າງລະອຽດ. ໂດຍການກວດສອບດັ່ງກ່າວນີ້ຈະຖືກຈັດຕັ້ງປະຕິບັດເປັນຮອບວຽນແຕກຕ່າງກັນໂດຍອີງໃສ່ແຕ່ລະລຸ້ນເຮືອບິນ. ATR ຈະຕ້ອງໄດ້ຮັບການກວດສອບເມື່ອມີຮອບການບິນຄົບທຸກໆ 5,000 ຊົ່ວໂມງບິນ ແລະ Airbus A320 ຄວນໄດ້ຮັບການກວດເມື່ອມີຮອບການບິນຄົບ 7500 ຊົ່ວໂມງບິນ ຫຼື 24 ເດືອນ. ການກວດ C check ແມ່ນການກວດສອບດ້ວຍສາຍຕາຢ່າງລະອຽດຄຽງຄູ່ໄປກັບການທົດສອບລະບົບການດໍາເນີນງານຕ່າງໆຂອງເຮືອບິນ, ໂດຍຂະບວນການເຮັດວຽກທັງໝົດນີ້ໄດ້ຖືກຈັດຢູ່ໃນແຜນງານບຳລຸງຮັກສາເຮືອບິນຂອງສາຍການບິນລາວ.
ຊ່າງກົນຈັກຜູ້ໜຶ່ງໄດ້ອະທິບາຍໃຫ້ຂ້າພະເຈົ້າເຂົ້າໃຈກ່ຽວກັບຂະບວນການນີ້ຫຼາຍຂື້ນວ່າ “ຖ້າການກວດສະພາບຂອງຂອບປິດປະຕູທາງເຂົ້າແບບນີ້ແມ່ນສາມາດກວດເບິ່ງໄດ້ດ້ວຍຕາເປົ່າເລີຍ ແຕ່ບາງສ່ວນຂອງເຮືອບິນກໍ່ຕ້ອງໄດ້ມີການກວດສອບຢ່າງລະອຽດໃກ້ຊິດ ແລະ ທັງນໍາໃຊ້ອຸປະກອນພິເສດເຊົ້າຊ່ວຍໃນການກວດສອບອີກດ້ວຍ.”

ລາວຍັງບອກຕື່ມອີກວ່າຂະ​ບວນ​ການ​ທັງ​ໝົດນີ້​ມີຄວາມ​ລະ​ອຽດຫຼາຍ​ຈົນບາງຄັ້ງ​ອາດຈະ​ຕ້ອງໃຊ້​ເວ​ລາຮອດ​ສອງ​ອາ​ທິດ​ໃນການກວດສອບແຕ່ລະຄັ້ງອີກດ້ວຍ. ​ໃນ​ດ້ານ​ຄວາມ​ປອດ​ໄພ​ຂອງ​ການບິນ​ນັ້ນຈະຕ້ອງບໍ່ໃຫ້ເກີດຄວາມ​ຜິດ​ພາດໃດໆກໍ່ຕາມ ບໍ່ວ່າຈະນ້ອຍ ຫຼື ໃຫຍ່, ການບິນ​ລາວຈຶ່ງ​ຕ້ອງເອົາໃຈ​ໃສ່ຮັບປະກັນ​ວ່າ​ທຸກ​ຊີ້ນສ່ວນຂອງເຮືອບິນແມ່ນຈະ​ສາມາດດໍາເນີນການໄດ້ຢ່າງເຕັມປະສິດທິພາບຢູ່ສະເໝີ. ສະນັ້ນ ການທີ່ຈະບັນລຸເປົ້າໝາຍດັ່ງກ່າວນັ້ນ, ນາຍຊ່າງເພິ່ນໄດ້ກ່າວຕື່ມອີກວ່າ,
“ພວກເຮົາຕ້ອງເຮັດວຽກຢ່າງໜັກ ແລ້ວກໍ່ໜັກກວ່າເຮືອບິນທີ່ພວກເຮົາກວດສອບສະເໝີ.”

ແປ ແລະ ຮຽບຮຽງໂດຍ ວັນນະແສງ ອິນສານ
ຮູບໂດຍ ອານຸສິດ ບຸນຍົງ