ເພີ່ມຄວາມຫວານ,​ ເພີ່ມຄວາມສົດຊື່ນໃຫ້ຊີວິດ

Author:

Category:

spot_img

ເວົ້າເຖິງວັດທະນະທຳການກິນຂອງຄົນລາວ, ຫຼັງກິນອາຫານຄາວແລ້ວກໍຈະມັກກິນອາຫານຫວານ. ຕົວເມືອງວຽງຈັນມີຂອງຫວານຫຼາຍຢ່າງນັບຈາກນຳ້ຫວານຖົ່ວດຳ, ເຂົ້າລອດຊ່ອງ, ເຂົ້າໜົມຖ້ວຍຊື່ດັງຢູ່ຕະຫຼາດກາງຄືນແຄມຂອງ ໄປຈົນຮອດກະແລ້ມ ອາແປະ ທີ່ຢູ່ຄູ່ວຽງຈັນມາຫຼາຍສິບປີ. ນອກນີ້ຍັງມີຮ້ານຂອງຫວານຕ່າງປະເທດ ທີ່ເປີດຂຶ້ນຢ່າງຫຼວງຫຼາຍໃຫ້ເຮົາໄດ້ເລືອກຊີມເຊັ່ນ:

ຮ້ານຂອງຫວານແບບໄທ:

ບ້ານຕົ້ນມະລິເຄັກ: ບ້ານຕົ້ນມະລິເປັນຮ້ານອາຫານຕາມສັ່ງ ແຕ່ທີ່ດັງກວ່າອາຫານກໍຄື ເຄັກທີ່ເມຍເຈົ້າຂອງຮ້ານເປັນຄົນເຮັດເອງ. ເພິ່ນໄດ້ໄປຮຽນເຮັດເຄັກທີ່ປະເທດໄທ ແລະ ນໍາເອົາປະສົບການມາປຸງແຕ່ງອອກເປັນເຄັກເນື້ອນຸ້ມ. ເຄັກທີ່ເປັນທີ່ນິຍົມຫຼາຍທີ່ສຸດແມ່ນເຄັກໝາກພ້າວ, ເຄັກໂອຣິໂອ ແລະ ເຄັກຊາຂຽວ.

ຮ້ານອັນເດີ້ ເດິ ທຣີ: ຮ້ານເຄັກເຊື້ອສາຍອຸດອນ ທີ່ຫາກໍ່ມາເປີດສາຂາຢູ່ລາວ ມີເຄັກແບບໃໝ່ມາໃຫ້ລອງເລື້ອຍໆ. ຜ່ານປະຕູຮ້ານສີແດງ, ທ່ານຈະພົບກັບຮ້ານທີ່ຕົກແຕ່ງຢ່າງໜ້າຮັກ ດ້ວຍບັນຍາກາດອົບອຸ່ນຄືກິນຢູ່ເຮືອນ. ຂອງຫວານທີ່ທາງຮ້ານພູມໃຈນໍາສະເໜີ ແມ່ນ ເຄຣັບຄາຣາເມວໝາກພ້າວ ເສີບພ້ອມວິບຄີມສົດ.

ຮ້ານຂອງຫວານຍີ່ປຸ່ນ – ເກົາຫຼີ:

ຮ້ານ ຄາເຟ່ ຄຣີມ: ເປັນຮ້ານຂອງຫວານສະໄຕລ໌ເກົາຫຼີ, ການຕົກແຕ່ງຂອງຮ້ານແມ່ນມີກິ່ນອາຍແບບລັອບ ດ້ວຍແກ້ວໃສຂັ້ນດ້ວຍເຫຼັກສີດຳ ຕັດກັນຢ່າງລົງຕົວກັບປະຕູສີແດງເຂັ້ມ. ທາງຮ້ານໄດ້ນໍາສະເໜີ  “ຫິມະທຳອິດໃນວຽງຈັນ” ເຊິ່ງກໍຄື ບິງຊູ, ກະແລ້ມເກັດນຳ້ກ້ອນ ເຊິ່ງເຮັດຈາກນົມສົດ ຕົບແຕ່ງດ້ວຍທັອປປິ້ງຕ່າງໆຊັ່ນ: ສະຕໍເບີລີ້, ຊາຂຽວ ແລະ ຖົ່ວແດງ. ຖ້າຫາກມື້ໃດຮ້ອນໆ, ເຮົາຂໍເຊີນທ່ານມາກິນ “ຫິມະ” ທີ່ຮ້ານນີ້ໄດ້ເລີຍ.

ຮ້ານ ໂຕກຽວ ເຄັກ: ເປັນຮ້ານທີ່ເສີບເຄັກຍີ່ປຸ່ນແທ້ໆ ເຊິ່ງເຮັດໂດຍຊ່າງເຮັດເຄັກຄົນຍີ່ປຸ່ນ. ລູກຄ້າສ່ວນຫຼາຍແມ່ນຕິດໃຈກັບເຄັກຟອງນໍ້າ ເຊິ່ງເປັນສັນຍາລັກຂອງຮ້ານ ທີ່ມີຄວາມນຸ້ມ, ເບົາ ແລະ ລົດຫວານແບບພໍດີຂອງວິປຄຣີມ, ແຕ່ງດ້ວຍໝາກໄມ້ສົດ ເຊິ່ງຈະເຮັດໃຫ້ທ່ານຮູ້ສຶກສົດຊື່ນຂຶ້້ນທັນທີ.​ ນອກຈາກນັ້ນ, ທາງຮ້ານກໍຍັງມີພຸດດິ້ງນົມຄັດສະຕາດແບບຍີ່ປຸ່ນ ແລະ ມູດໝາກໄມ້.

ຮ້ານກະແລ້ມ

ຮ້ານກະແລ້ມ ອາແປະ: ເປັນຮ້ານກະແລ້ມນ້ອຍໆ ຕັ້ງຢູ່ແຄມທາງເຈົ້າອານຸ ທີ່ມີກະແລ້ມກະທິດັ້ງເດີມໃສ່ເຂົ້າໜຽວໃນຈວຍກອບ ຫຼື ຖ້ວຍເຫຼັກທີ່ເຮົາຄຸ້ນເຄີຍເປັນຢ່າງດີ. ເຈົ້າຂອງຮ້ານຍັງໄດ້ເອົາເຜືອກ ແລະ ຊັອກໂກແລັດມາເພີ່ມຄວາມຫຼາກຫຼາຍໃຫ້ກັບລູກຄ້າ.

ຮ້ານກະແລ້ມ ສະວີດມູ: ຕັ້ງຢູ່ຂ້າງນໍ້າພຸ ແລະ ມີສາຂາຢູ່ວຽງຈັນເຊັນເຕີ້. ຮ້ານຕົບແຕ່ງດ້ວຍໄຟສີເຫຼືອງ ຕັດກັບການຕົບແຕ່ງແບບເຣໂທຣສີດຳ ເຊິ່ງໃຫ້ບໍລິການຂອງຫວານ ແລະ ກະແລ້ມຫຼາກຫຼາຍລົດຊາດ. ຂໍແນະນໍາໃຫ້ທ່ານລອງ ຮັນນີ້ໂທດ ຫຼື ເຂົ້າຈີ່ກອບໃສ່ນຳ້ເຜິ້ງ, ໝາກກ້ວຍ ແລະ ກະແລ້ມ.

 ຮ້ານກະແລ້ມ ເລີບ ໄລ້: ເປັນຮ້ານທີ່ຂາຍເຄັກ, ຂວງຫວານ ແລະ ກະແລ້ມ. ກ່ອນທີ່ຈະເປີດຮ້ານຄາເຟ່, ເພິ່ນໄດ້ເຮັດກະແລ້ມ ແລະ ສົ່ງຂາຍໃຫ້ບັນດາຮ້ານຢູ່ວຽງຈັນ ຕັ້ງແຕ່ປີ 2012. ຂອງຫວານທີ່ທາງຮ້ານແນະນໍາແມ່ນ ເລດີ ເບີລີ້ ຊັນເດ, ເຊິ່ງແມ່ນກະແລ໋ມເບີລີ້ ຕົກແຕ່ງດ້ວຍວິບຄີມ, ຄຸກກີ້ລົດຊັອກໂກແລັດ ແລະ ຊອດສະຕໍເບີລີ້ ທີ່ມີຍອດຂາຍສູງສຸດໃນຮ້ານ.

ຮ້ານ ເຈເຣມີ ຄາເຟ່: ເປັນຮ້ານຄາເຟ່ຂອງຊ່າງເຮັດເຂົ້າໜົມຊື່ດັງ, ເຈເຣມີ ເຮີຊັອກ. ເພິ່ນໄດ້ສັນສ້າງ ແລະ ເລີ່ມຕົ້ນອົບເຂົ້າຈີ່ ແລະ ເຄັກ ທີ່ມີຄວາມເປັນເອກະລັກ ແລະ ແປກຕາ ເຊິ່ງເປັນທີ່ຖືກຕາ ຕ້ອງໃຈຄົນລາວ, ແລະ ຄົນຕ່າງປະເທດ. ເຂົ້າໜົມທີ່ຄົນມັກຊື້ຫຼາຍທີ່ສຸດແມ່ນ choux pastry ແລະ ເອແຄ ລົດຊັອກໂກແລັດ

ຮ້ານເບເກີລີ້ ບາຍ ບໍຣີດ: ເປັນຄາເຟ່ເປີດໃໝ່ໃນວຽງຈັນ ເຊິ່ງເຈົ້າຂອງຮ້ານມີເຊື້ອສາຍລາວ-ຝຣັ່ງ. ທາງຮ້ານຂາຍເຂົ້າໜົມອົບແບບຝຣັ່ງ, ຄຸກກີ້, ເຄັກຟອງນໍ້າ, ເມີແຣງ ແລະ ເຄັກຕ່າງໆ. ຮ້ານນີ້ມີບັນຍາກາດຮົ່ມເຢັນ ແລະ ງຽບສະຫງົບ ເໝາະແກ່ການໄປລົມວຽກ ຫຼື ພົບປະກັບໝູ່ເພື່ອນ.

ທີ່ວຽງຈັນຍັງມີຮ້ານເຄັກ ແລະ ຮ້ານຂອງຫວານອີກຫຼາຍຮ້ານທີ່ລໍຖ້າໃຫ້ທ່ານໄປລິ້ມລອງ. ເມື່ອທ່ານອ່ານຈົບແລ້ວ ຂໍເຊີນທ່ານໄປເລືອກເພີ່ມຄວາມຫວານໃຫ້ຊີວິດທ່ານໄດ້ເລີຍ!

Champa Meuanglao
Champa Meuanglao
Lorem ipsum dolor sit amet, consectetur adipiscing elit, sed do eiusmod tempor incididunt ut labore et dolore magna aliqua. Ut enim ad minim veniam, quis nostrud exercitation ullamco

Read More

Related Articles