ເວລາທີ່ເຮົາເດີນທາງໄປກັບການບິນລາວ, ເຮົາກໍອາດຈະຄິດວ່າພະນັກງານຕ້ອນຮັບເທິງເຮືອບິນ ຫຼືທີ່ເຮົາມັກເອີ້ນກັນວ່າ ສາວແອ-ບ່າວແອ ເປັນຄົນລາວທັງໝົດ. ແຕ່ວ່າ ທີ່ສາຍການບິນລາວ ມີສາວແອຄົນໜຶ່ງທີ່ເປັນຄົນຕ່າງປະເທດທີ່ອາໄສຢູ່ລາວເພື່ອເຮັດວຽກກັບການບິນລາວ.

ຢຸນ ໂຊຣະ ເປັນໜຶ່ງໃນພະນັກງານຕ້ອນຮັບເທິງເຮືອບິນຂອງການບິນລາວທີ່ເປັນຄົນສັນຊາດເກົາຫຼີແລະ ເປັນພະນັກງານຕ່າງຊາດຄົນດຽວທີ່ອາໄສຢູ່ລາວເປັນປະຈໍາເພື່ອຮັບໃຊ້ຜູ້ໂດຍສານຢູ່ເທິງເຮືອບິນ. ຄອບຄົວຂອງໂຊຣະ ຍ້າຍມາຢູ່ລາວໃນປີ 2000 ເນື່ອງຈາກພໍ່ຂອງລາວໄດ້ຖືກຍ້າຍມາປະຈໍາການຢູ່ລາວ. ມັນຄ່ອນຂ້າງທີ່ຈະເປັນເລື່ອງຍາກສຳລັບເດັກນ້ອຍເກົາຫຼີຄົນໜຶ່ງທີ່ຈະປັບຕົວສູ່ສະພາບແວດລ້ອມໃໝ່ທີ່ບໍ່ມີຫຍັງຄ້າຍຄືບ່ອນເກົ່າເລີຍ.

“ມັນແຕກຕ່າງຈາກບ້ານເກີດຂອງຂ້ອຍຫຼາຍ. ວັດທະນະທຳຕ່າງກັນ, ການກິນການຢູ່ກໍຕ່າງກັນ ແລະ ຂ້ອຍບໍ່ສາມາດສື່ສານກັບໃຜໄດ້. ແລະ ໃນຕອນນັ້ນ, ຄົນເກົາຫຼີກໍບໍ່ຮູ້ຈັກປະເທດລາວເລີຍ” ກ່າວໂດຍ ໂຊຣະ.

ແຕ່ຫຼັງຈາກທີ່ຢູ່ໄປດົນໆ ໂຊຣະກໍສາມາດປັບຕົວໄດ້. ໂຊຣະໄດ້ເຂົ້າຮຽນໃນໂຮງຮຽນລາວ, ໂຮງຮຽນ ມັດທະຍົມສົມບູນວຽງຈັນ ແລະ ຮຽນລະດັບປະລິນຍາຕໍ່ທີ່ມະຫາວິທະຍາໄລແຫ່ງຊາດ.​ ຕອນນີ້, ໂຊຣະສາມາດເວົ້າອອກມາໄດ້ເຕັມປາກວ່າປະເທດລາວຄືບ້ານຂອງລາວຢ່າງແທ້ຈິງ. ລາວພູມໃຈທີ່ໄດ້ມາຢູ່ທີ່ລາວ ແລະ ລາວກໍໄດ້ສ້າງຄວາມພູມໃຈໃຫ້ຕົນເອງ ແລະ ຄອບຄົວໄດ້ອີກເມື່ອລາວໄດ້ຖືກເລືອກເປັນພະນັກງານຕ້ອນຮັບເທິງເຮືອບິນຂອງສາຍການບິນລາວ.

“ມັນເປັນຄວາມຝັນຂອງຜູ້ຍິງທຸກຄົນທີ່ຢາກເປັນສາວແອ. ຕອນທີ່ຂ້ອຍໄດ້ຍິນວ່າການບິນລາວເປີດເສັ້ນທາງບິນໃໝ່ໄປອິນຊອນ (ເກົາຫຼີ),​ ຂ້ອຍກໍເລີຍໄປສະໝັກທັນທີ.” ກ່າວໂດຍ ໂຊຣະ.

ໃນຕອນທຳອິດ, ໂຊຣະບໍ່ໄດ້ຖືກຄັດເລືອກຍ້ອນວ່າ ສາຍການບິນລາວຕ້ອງການພະນັກງານສັນຊາດລາວເທົ່ານັ້ນ, ແຕ່ໃນເວລາຕໍ່ມາ ເມື່ອການບິນລາວໄດ້ລະບຸວ່າຕ້ອງການພະນັກງານສັນຊາດເກົາຫຼີ, ລາວກໍເລີຍໄປສະໝັກອີກຄັ້ງ ແລະ ໄດ້ຖືກບັນຈຸເຂົ້າເປັນພະນັກງານເທິງເຮືອບິນ.

“ຝັນຂ້ອຍກາຍເປັນຈິງເມື່ອຂ້ອຍໄດ້ຍິນວ່າຂ້ອຍຖືກຄັດເລືອກ.” ກ່າວໂດຍ ໂຊຣະ.

ປະຈຸບັນ, ພະນັກງານສັນຊາດເກົາຫຼີແຫ່ງສາຍການບິນລາວມີຢູ່ 4 ຄົນ, ເຊິ່ງໂຊຣະກໍເປັນໜຶ່ງໃນນັ້້ນ ແຕ່ແຕກຕ່າງຢູ່ບ່ອນວ່າ ພະນັກງານຄົນອື່ນອາໄສຢູ່ເກົາຫຼີ ມີພຽງໂຊຣະຄົນດຽວທີ່ອາໄສຢູ່ໃນລາວ. ໂຊຣະເຮັດວຽກກັບສາຍການບິນລາວມາເປັນເວລາ 3 ປີ ແລ້ວ ແລະ ສາມາດເວົ້າພາສາອັງກິດ, ພາສາເກົາຫຼີ ແລະ ພາສາລາວໃນລະດັບດີຫຼາຍ, ດັ່ງເຈົ້າຂອງພາສາເອງ,  ເຮັດໃຫ້ລາວສາມາດໃຫ້ບໍລິການໄດ້ທັງເສັ້ນທາງບິນພາຍໃນ ແລະ ຕ່າງປະເທດ.

“ສິ່ງທີ່ຂ້ອຍມັກທີ່ສຸດໃນການເຮັດວຽກອາຊີບນີ້ກໍຄືການໄດ້ໄປທ່ອງທ່ຽວຫຼາຍໆບ່ອນ ແລະ ໄດ້ພົບກັບຜູ້ຄົນທີ່ມາຈາກຫຼາຍໆປະເທດ. ສະຖານທີ່ໆຂ້ອຍມັກທີ່ສຸດໃນລາວແມ່ນຫຼວງພະບາງ. ຂ້ອຍຮູ້ສຶກວ່າຫຼວງພະບາງເປັນສະຖານທີ່ສະຫງົບ ສວຍງາມ ແລະ ຄົນຫຼວງພະບາງກໍເປັນມິດຫຼາຍ.” ກ່າວໂດຍ ໂຊຣະ.

ແລະ ເມື່ອເຮົາຖາມໂຊຣະວ່າໃນອະນາຄົດເພິ່ນວາງແຜນຈະລົງຫຼັກປັກຖານຢູ່ໃສ, ເພິ່ນກໍຕອບວ່າ: “ຂ້ອຍວາງແຜນຈະຢູ່ທີ່ລາວເລີຍ ເພາະລາວຖືເປັນບ້ານຂອງຂ້ອຍແລ້ວ.”

ຂຽນໂດຍ​ CAMERON DARKE

ແປ ແລະ ຮຽບຮຽງໂດຍ ລັດສະໝີ ພອນວິໄລ

ຮູບໂດຍ ພູນຊັບ ເທວົງສາ