ມາດຕະຖານໃໝ່ທີ່ເປັນບາດກ້າວສຳຄັນໃນການສົ່ງເສີມການທ່ອງທ່ຽວທີ່ຍືນຍົງໃນລາວ
ໃນຍຸກທີ່ການທ່ອງທ່ຽວ ແລະ ກິດຈະການດ້ານການທ່ອງທ່ຽວມີການພັດທະນາຢ່າງວ່ອງໄວ, ຄວາມຍືນຍົງຈຶ່ງບໍ່ແມ່ນທາງເລືອກອີກຕໍ່ໄປ ແຕ່ໄດ້ກາຍເປັນສິ່ງຈໍາເປັນທີ່ຕ້ອງມີການຮັບປະກັນໃຫ້ມີຄວາມຍືນຍົງ. ການຢັ້ງຢືນລາວຍືນຍາວ, ພ້ອມກັບມາດຕະຖານທີ່ຄົບຖ້ວນ ແລະ ກໍານົດເອງໄດ້ນັ້ນ ເຊິ່ງກໍາລັງໄດ້ຮັບການກໍານົດມາດຕະຖານໃໝ່ ທີ່ເປັນບາດກ້າວສຳຄັນໃນການສົ່ງເສີມການທ່ອງທ່ຽວທີ່ຍືນຍົງໃນລາວ. ການຢັ້ງຢືນລາວຍືນຍາວ ໄດ້ມີການດໍາເນີນການຈັດຕັ້ງປະຕິບັດໃນທ້ອງຖິ່ນ ໂດຍສະພາການຄ້າ ແລະ ອຸດສາຫະກໍາແຫ່ງຊາດລາວ. ຂະນະທີ່ໂຄງການ SUSTOUR ລາວ ເປັນຜູ້ພັດທະນາແຜນງານການຢັ້ງຢືນຄວາມຍືນຍົງ ພາຍໃຕ້ທຶນສະໜັບສະໜູນຈາກສະຫະພາບເອີຣົບ.

ມາດຕະຖານທີ່ເປັນແກນສໍາຄັນ
ການຢັ້ງຢືນລາວຍືນຍາວ ໄດ້ນໍາໃຊ້ຫຼັກການ ແລະວິທີການຈັດຕັ້ງປະຕິບັດຂອງ ທຣາເວວໄລຟ໌ (Travelife), ທີ່ມີການປັບໃຊ້ເປັນພິເສດສໍາລັບ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (MSME) ໂດຍສຸມໃສ່ 4 ຂະແໜງການທ່ອງທ່ຽວຫຼັກໃນລາວ ຄື: ການບໍລິການຂົນສົ່ງ, ຜູ້ໃຫ້ບໍລິການອາຫານ ແລະ ເຄື່ອງດື່ມ, ເຄື່ອງຫັດຖະກຳ ແລະ ເຄື່ອງທີ່ລະນຶກ, ແລະ ການທ່ອງທ່ຽວດ້ານວັດທະນະທຳ.

ການຢັ້ງຢືນຂອງພວກເຮົາ ແມ່ນໄດ້ໃຫ້ຄວາມສໍາຄັນໃນການຈັດການຂີ້ເຫຍື້ອທີ່ເປັນບັນຫາກວມລວມ, ໂດຍຄໍານຶງເຖິງບົດບາດສໍາຄັນໃນການບັນລຸຜົນຂອງການຈັດຕັ້ງດໍາເນີນງານທີ່ຍືນຍົງໃນທຸກພາກສ່ວນ.

1. ການບໍລິການຂົນສົ່ງ.
ມາດຕະຖານການຢັ້ງຢືນລາວຍືນຍາວ ແມ່ນເນັ້ນໃສ່ຄວາມຍືນຍົງເປັນຈຸດສໍາຄັນຂອງວຽກງານການບໍລິການຂົນສົ່ງ. ໂດຍມຸ່ງເປົ້າແນໃສ່ປະເດັນສໍາຄັນສາມຢ່າງໄດ້ແກ່: ປະສິດທິພາບຂອງຍານພາຫະນະ,
ການຫຼຸດຜ່ອນການປ່ອຍມົນລະພິດ, ແລະ ການຂັບຂີ່ທີ່ເປັນມິດກັບສິ່ງແວດລ້ອມ. ຜູ້ໃຫ້ບໍລິການຂົນສົ່ງ ໄດ້ຮັບການຊຸກຍູ້ສົ່ງເສີມໃຫ້ນໍາໃຊ້ຍານພາຫະນະທີ່ໃຊ້ນໍ້າມັນ ແລະ ຜະລິດອາຍແກັສເຮືອນແກ້ວໃຫ້ຫຼຸດໜ້ອຍລົງ. ຄວນມີການກວດສອບການບຳລຸງຮັກສາເປັນປະຈໍາ ເພື່ອຮັບປະກັນໃຫ້ຍານພາຫະນະສາມາດເຮັດວຽກໄດ້ໃນລະດັບທີ່ເໝາະສົມ, ເຊິ່ງຈະຊ່ວຍຫຼຸດຜ່ອນຜົນກະທົບຕໍ່ສິ່ງແວດລ້ອມ.

ການຈັດຝຶກອົບຮົມໃຫ້ແກ່ພະນັກງານ ກ່ຽວກັບເຕັກນິກການຂັບຂີ່ທີ່ເປັນມິດຕໍ່ສິ່ງແວດລ້ອມກໍມີຄວາມສໍາຄັນເຊັ່ນກັນ. ໃນການຂັບຂີ່ທີ່ເປັນມິດຕໍ່ສິ່ງແວດລ້ອມ ມີຄວາມກ່ຽວຂ້ອງກັບກົນລະຍຸດຕ່າງໆໃນການຂັບຂີ່ ເຊັ່ນ: ການເລັ່ງຄວາມໄວ ແລະ ການຫຼຸດຜ່ອນຄວາມໄວຢ່າງນຸ້ມນວນ, ການຮັກສາລະດັບຄວາມໄວໃຫ້ຄົງທີ່, ແລະ ການມອດເຄື່ອງຈັກເມື່ອບໍ່ໄດ້ໃຊ້ງານ. ໃນການປະຕິບັດດັ່ງກ່າວ, ສາມາດຊ່ວຍປະຢັດນໍ້າມັນ ແລະ ຫຼຸດຜ່ອນການການປ່ອຍທາດ CO2 ໄດ້ຫຼາຍພໍສົມຄວນ. ມາດຕະຖານການຢັ້ງຢືນລາວຍືນຍາວ ໄດ້ໃຫ້ການສະໜັບສະໜູນ ແລະ ສົ່ງເສີມ ແກ່ບັນດາຜູ້ໃຫ້ບໍລິການຂົນສົ່ງໃນການຈັດຝຶກອົບຮົມດັ່ງກ່າວສໍາລັບພະນັກງານຂັບລົດ, ເຊິ່ງຈະເປັນການເພີ່ມຄວາມຮູ້ແກ່ພະນັກງານໃຫ້ມີຄວາມເອົາໃຈໃສ່ຕໍ່ສິ່ງແວດລ້ອມຫຼາຍຂຶ້ນ.

2. ຜູ້ໃຫ້ບໍລິການອາຫານ ແລະ ເຄື່ອງດື່ມ
ຜູ້ໃຫ້ບໍລິການອາຫານ ແລະ ເຄື່ອງດື່ມ ມີບົດບາດສໍາຄັນສະເພາະໃນການສົ່ງເສີມການທ່ອງທ່ຽວທີ່ຍືນຍົງ. ການຢັ້ງຢືນລາວຍືນຍາວ ໄດ້ໃຫ້ບູລິມະສິດໃນການບໍລິການຈັດຫາໃນທ້ອງຖິ່ນ, ດັ່ງນັ້ນຈຶ່ງໄດ້ມີການຊຸກຍູ້ສົ່ງເສີມໃຫ້ແກ່ຊາວກະສິກໍາໃນທ້ອງຖິ່ນ ແລະ ຫຼຸດຜ່ອນການປ່ອຍກາກບອນທີ່ກ່ຽວຂ້ອງກັບການຂົນສົ່ງອາຫານ. ນອກຈາກນີ້, ຜູ້ໃຫ້ບໍລິການ ຄວນໃຫ້ຄໍາແນະນໍາກ່ຽວກັບວິທີການຈັດຕັ້ງປະຕິບັດຕົວຈິງ ເພື່ອຫຼຸດຜ່ອນຂີ້ເຫຍື້ອອາຫານ. ໃນນີ້ລວມມີ ການຄຸ້ມຄອງສິນຄ້າຄົງຄັງທີ່ດີ, ການຫຼຸດຜ່ອນຂີ້ເຫຍື້ອອາຫານ, ແລະ ການນໍາສະເໜີທາງເລືອກໃຫ້ກັບລູກຄ້າ.

ໃນການສົ່ງເສີມທາງເລືອກທີ່ດີຕໍ່ສຸຂະພາບ ແມ່ນເປັນກະແຈສໍາຄັນອີກຢ່າງໜຶ່ງຂອງການຢັງຢືນລາວຍືນຍາວ. ຜູ້ໃຫ້ບໍລິການໄດ້ຮັບການຊຸກຍູ້ໃຫ້ນໍາສະເໜີອາຫານ ເຊິ່ງບໍ່ພຽງແຕ່ມີຄຸນຄ່າດ້ານໂພສະນາການເທົ່ານັ້ນ, ແຕ່ຍັງສະແດງໃຫ້ເຫັນເຖິງວັດທະນະທໍາໃນການປຸງແຕ່ງອາຫານຂອງທ້ອງຖິ່ນນໍາອີກ, ເຊິ່ງຈະເປັນການຊ່ວຍຍົກລະດັບປະສົບການການກິນຂອງນັກທ່ອງທ່ຽວ ຄຽງຄູ່ກັບການສົ່ງເສີມປະເພນີຂອງທ້ອງຖິ່ນໄປພ້ອມກັນ.

3. ທຸລະກິດເຄື່ອງຫັດຖະກຳ ແລະ ເຄື່ອງທີ່ລະນຶກ
ຄວາມຍີືນຍົງສໍາລັບທຸລະກິດໃນຂະແໜງ ຫັດຖະກຳ ແລະ ເຄື່ອງທີ່ລະນຶກ ໝາຍເຖິງການນໍາໃຊ້ວັດສະດຸທີ່ເປັນມິດກັບສິ່ງແວດລ້ອມ ແລະ ນໍາມາຈາກທ້ອງຖິ່ນ. ນອກຈາກນີ້ຍັງໝາຍເຖິງການ​ສົ່ງ​ເສີມວຽກງານຫັດ​ຖະ​ກຳ​ພື້ນ​ເມືອງທີ່ເປັນ​ສີໄມ້ລາຍມືຂອງ​​ລາວ ເຊິ່ງຊ່ວຍ​ປົກ​ປັກ​ຮັກ​ສາ​ມໍ​ລະ​ດົກ​ທາງວັດ​ທະ​ນະ​ທຳ ແລະ ສ້າງ​ໂອ​ກາດ​ທາງ​ເສດ​ຖະ​ກິດ​ໃຫ້​ແກ່​ຊ່າງຜູ້ມີສີມືໃນທ້ອງ​ຖິ່ນ.

ປັດໄຈສໍາຄັນອື່ນໆຂອງມາດຕະຖານການຢັ້ງຢືນລາວຍືນຍາວປະກອບມີ ການປະຕິບັດທາງການຄ້າທີ່ເປັນທໍາ, ການກໍານົດລາຄາ ແລະ ຄ່າຈ້າງງານທີ່ເທົ່າທຽມກັນ, ແລະ ການຫຸ້ມຫໍ່ທີ່ເປັນມິດຕໍ່ສິ່ງແວດລ້ອມ.

4. ການທ່ອງທ່ຽວດ້ານວັດທະນະທຳ
ການທ່ອງທ່ຽວດ້ານວັດທະນະທຳ ມີຄວາມສໍາຄັນເປັນຢ່າງຍິ່ງຕໍ່ນັກທ່ອງທ່ຽວ ໃນການຮັບຮູ້ເຖິງຄວາມຮັ່ງມີທາງວັດທະນະທໍາ ແລະ ປະຫວັດສາດຂອງຊາດລາວ. ມາດຕະຖານການຢັ້ງຢືນລາວຍືນຍາວ ໄດ້ຊ່ວຍຮັບປະກັນການດໍາເນີນງານດ້ານການທ່ອງທ່ຽວຢ່າງມີຄວາມຮັບຜິດຊອບ. ການສະແດງຄວາມເຄົາລົບໃນຂະນົບທໍານຽມ ແລະ ຮີດຄອງປະເພນີຂອງທ້ອງຖິ່ນ ແມ່ນເປັນສິ່ງສໍາຄັນຫຼາຍ, ເຊິ່ງບໍ່ຕ່າງຫຍັງກັບການສົ່ງມອບປະສົບການທາງວັດທະນະທໍາອັນແທ້ຈິງ. ສິ່ງດັ່ງກ່າວນີ້, ໄດ້ເຮັດໜ້າທີ່ໃນການສ້າງປະສົບການໃໝ່ແກ່ນັກທ່ອງທ່ຽວໃຫ້ມີຄວາມສົມບູນຍິ່ງຂຶ້ນ, ໃນຂະນະດຽວກັນນັ້ນ ກໍເປັນການສ້າງຄວາມເຂົ້າໃຈ ແລະ ການສະແດງຄວາມເຄົາລົບຕໍ່ວັດທະນະທໍາຂອງທ້ອງຖິ່ນນໍາອີກ.

ການມີສ່ວນຮ່ວມຂອງຊຸມຊົນໃນທ້ອງຖິ່ນ ແມ່ນເປັນສິ່ງສໍາຄັນອີກຢ່າງໜຶ່ງຂອງມາດຕະຖານໃໝ່ນີ້. ການລວມເອົາຄົນທ້ອງຖິ່ນເຂົ້າໃນວຽກງານການທ່ອງທ່ຽວທາງວັດທະນະທໍາເຫຼົ່ານີ້ ໄດ້ຊ່ວຍຊຸກຍູ້ສົ່ງເສີມໃຫ້ແກ່ການເຕີບໂຕທາງດ້ານເສດຖະກິດໃນຊຸມຊົນ ແລະ ມອບປະສົບການໃໝ່ໆທີ່ໜ້າເຊື່ອຖືໄດ້ໃຫ້ແກ່ບັນດານັກທ່ອງທ່ຽວ. ໃນການສົ່ງເສີມພຶດຕິກໍາທີ່ມີຄວາມຮັບຜິດຊອບແກ່ກຸ່ມນັກທ່ອງທ່ຽວ, ເຊັ່ນ ການຖ່າຍຮູບດ້ວຍຄວາມເຄົາລົບ ແລະ ບໍ່ຖິ້ມຂີ້ເຫຍື້ອຊະຊາຍນັ້ນ, ຈະເປັນການຊ່ວຍຮັກສາມໍລະດົກທາງວັດທະນະທໍາ ແລະ ສິ່ງແວດລ້ອມໃຫ້ແກ່ຄົນຮຸ່ນຫຼັງ.

ບົດບາດຂອງໂຄງການ SUSTOUR ລາວ ແລະ ສຄອຊ
ການຢັ້ງຢືນລາວຍືນຍາວ ບໍ່ແມ່ນຄວາມຄິດລິເລີ່ມຂອງອົງການຈັດຕັ້ງໃດໜຶ່ງພຽງຜູ້ດຽວ, ແຕ່ເປັນສຸດຍອດຂອງຄວາມພະຍາຍາມ ໃນການຮ່ວມມືກັນລະຫວ່າງຫຼາຍພາກສ່ວນ ທີ່ຕ່າງຝ່າຍຕ່າງກໍມີເປົ້າໝາຍເພື່ອແນໃສ່ການທ່ອງທ່ຽວແບບຍືນຍົງ. ໜຶ່ງໃນຄວາມຄິດລິເລີ່ມທີ່ສໍາຄັນດັ່ງກ່າວນັ້ນກໍແມ່ນໂຄງການ SUSTOUR ລາວ. ຈຸດປະສົງຂອງໂຄງການນີ້, ກໍເພື່ອສົ່ງເສີມການທ່ອງທ່ຽວທີ່ຍືນຍົງ, ລວມທັງການສ້າງວຽກເຮັດງານທໍາທີ່ເປັນມິດຕໍ່ສິ່ງແວດລ້ອມ, ແລະ ການອະນຸລັກມໍລະດົກທາງທໍາມະຊາດ ແລະ ວັດທະນະທໍາໃນລາວ.

ເປົ້າໝາຍສໍາຄັນຂອງຄວາມສໍາເລັດຂອງການຈັດຕັ້ງປະຕິບັດໂຄງການ SUSTOUR ລາວນັ້ນກໍຄື ການໃຫ້ຄວາມສໍາຄັນໃນການເຮັດວຽກຮ່ວມກັນ, ໂດຍເປັນເວທີຮອງຮັບໃຫ້ແກ່ລັດຖະບານ, ທຸລະກິດ, ແລະ ຊຸມຊົນໃນການເຮັດວຽກຮ່ວມກັນ ເພື່ອບັນລຸເປົ້າໝາຍຄວາມຍືນຍົງຮ່ວມກັນ. ໂຄງການນີ້ໄດ້ຊ່ວຍໃຫ້ທຸລະກິດຫຼາຍແຫ່ງ ສາມາດປັບປຸງຮູບແບບການດໍາເນີນງານຂອງຕົນໃຫ້ສອດຄ່ອງກັບແນວທາງປະຕິບັດທີ່ຍືນຍົງ ດ້ວຍການສະໜອງການຝຶກອົບຮົມ, ແຫຼ່ງຂໍ້ມູນ, ແລະ ການສະໜັບສະໜູນຢ່າງຕໍ່ເນື່ອງ, ເຊິ່ງສົ່ງຜົນໃຫ້ອຸດສາຫະກໍາການທ່ອງທ່ຽວມີຄວາມເປັນມິດຕໍ່ສິ່ງແວດລ້ອມຫຼາຍຂຶ້ນ ແລະ ມີຄວາມຮັບຜິດຊອບເພີ່ມຂຶ້ນ.

ສະພາການຄ້າ ແລະ ອຸດສາຫະກໍາແຫ່ງຊາດລາວ (ສຄອຊ) ແມ່ນມີບົດບາດສໍາຄັນໃນຄວາມພະຍາຍາມນີ້. ໃນນາມທີ່ເປັນຕົວແທນຂອງຊຸມຊົນ, ສຄອຊ ບໍ່ພຽງແຕ່ໃຫ້ການສະໜັບສະໜູນແນວທາງປະຕິບັດທີ່ຍືນຍົງເທົ່ານັ້ນ, ແຕ່ຍັງໄດ້ຄຸ້ມຄອງດູແລຂະບວນການອອກໃບຢັ້ງຢືນນໍາອີກ, ທັງນີ້ກໍເພື່ອເຮັດໃຫ້ສາມາດຮັບປະກັນໄດ້ວ່າ ທຸລະກິດດັ່ງກ່າວມີຄຸນສົມບັດສອດຄ່ອງຕາມມາດຕະຖານທີ່ເຂັ້ມງວດ ເຊິ່ງກໍານົດໂດຍການຢັ້ງຢືນລາວຍືນຍາວ. ເພື່ອເຮັດໃຫ້ໄດ້ຄືແນວນັ້ນ, ສຄອຊ ກໍາລັງເຮັດວຽກຢ່າງຫ້າວຫັນ ເພື່ອປູກຝັງຈິດສໍານຶກກ່ຽວກັບຄວາມຍືນຍົງໃນຂະແໜງທ່ອງທ່ຽວ, ເພື່ອຮັບປະກັນໃຫ້ຂະແໜງທ່ອງທ່ຽວ​ຍັງ​ຄົງ​ເປັນ​ເສົາ​ຄ້ຳ​ຫຼັກ​ຂອງ​ການ​ດຳ​ເນີນ​ທຸລະ​ກິດ​ຢູ່​ລາວ.

ສະຫຼຸບ
ການຢັ້ງຢືນລາວຍືນຍາວ ບໍ່ໄດ້ເປັນພຽງແຕ່ບັນຊີລາຍການກວດສອບ, ແລະ ກໍບໍ່ໄດ້ເປັນພຽງແຕ່ສັນຍາລັກລາຄາແພງເພື່ອເພີ່ມຄວາມສໍາເລັດທາງທຸລະກິດເທົ່ານັ້ນ ແຕ່ຍັງເປັນຄວາມມຸ່ງໝັ້ນທີ່ຈະໄດ້ຮັບໂດຍບໍ່ເສຍຄ່າໃຊ້ຈ່າຍໃດໆ ເຊິ່ງທຸລະກິດທຸກແຫ່ງສາມາດເຮັດໄດ້. ການຢັ້ງຢືນລາວຍືນຍາວຖືເປັນຄວາມມຸ່ງໝັ້ນໃນການຮັກສາຄຸນຄ່າທີ່ເປັນສ່ວນສໍາຄັນຂອງ
ສະເໜ່ ແລະ ສິ່ງດຶງດູດໃຈຂອງລາວ ໂດຍສະເພາະກໍແມ່ນ ຄວາມມຸ່ງໝັ້ນຕໍ່ສິ່ງແວດລ້ອມ, ຜູ້ຄົນຂອງພວກເຮົາ, ແລະ ມໍລະດົກທີ່ເປັນເອກະລັກຂອງພວກເຮົາ. ດ້ວຍການຍອມຮັບເອົາມາດຕະຖານເຫຼົ່ານີ້, ພວກເຮົາບໍ່ພຽງແຕ່ປ່ຽນແປງວິທີການດໍາເນີນທຸລະກິດເທົ່ານັ້ນ, ແຕ່ພວກເຮົາກໍາລັງກໍານົດອະນາຄົດຂອງການທ່ອງທ່ຽວຢ່າງຍືນຍົງໃນລາວນໍາອີກ.

ຖ້າທ່ານແມ່ນຜູ້ປະກອບການທຸລະກິດໃນຂະແໜງທ່ອງທ່ຽວໃນລາວ, ພວກເຮົາຂໍເຊີນຊວນທ່ານເຂົ້າຮ່ວມບາດກ້າວອັນສໍາຄັນທີ່ຈະນໍາໄປສູ່ຄວາມຍືນຍົງ. ການຢັ້ງຢືນລາວຍືນຍາວເປີດຮັບສະໝັກແລ້ວມື້ນີ້. ທ່ານສາມາດເຂົ້າໃນເຟສບຸກຂອງພວກເຮົາ ແລະ ຮ່ວມເດີນທາງສູ່ອະນາຄົດທີ່ຍືນຍົງກັບພວກເຮົາ. ລູກຄ້າຂອງທ່ານ, ຊຸມຊົນຂອງທ່ານ, ແລະ ໂລກຂອງພວກເຮົາຈະສະແດງຄວາມຮູ້ບຸນຄຸນຕໍ່ທ່ານ. ຄວາມມຸ່ງໝັ້ນຂອງທ່ານໃນມື້ນີ້ ຖືເປັນການລົງທຶນໃນອະນາຄົດຂອງລາວ, ດ້ວຍການລົງທຶນພາຍໃຕ້ຄໍາໝັ້ນສັນຍາທີ່ວ່າ ຈະມອບຜົນປະໂຫຍດໃຫ້ກັບທຸກຄົນ. ພວກເຮົາສາມາດສ້າງມໍລະດົກທີ່ຍືນຍົງໃຫ້ກັບປະເທດລາວຮ່ວມກັນໄດ້, ເຊິ່ງເປັນສິ່ງທີ່ຄົນຮຸ່ນຫຼັງຈະໄດ້ຫຼຽວ​ເບິ່ງ​ຄືນ​ດ້ວຍ​ຄວາມ​ພາກພູມ​ໃຈ ​ແລະ ຮູ້ບຸນຄຸນ.

ເວລາສໍາລັບການທ່ອງທ່ຽວແບບຍືນຍົງໄດ້ເດີນທາງມາຮອດແລ້ວ, ແລະ ໃບຢັ້ງຢືນລາວຍືນຍາວກໍປຽບເໝືອນປະຕູທີ່ກໍາລັງເປີດຕ້ອນຮັບທ່ານ. ຢ່າໄດ້ລັ່ງເລ, ຮີບສະໝັກເລີຍມື້ນີ້!

ຂໍ້ມູນເພີ່ມເຕີມ
ຫ້ອງການໂຄງການ SUSTOUR Laos (ອາຄານ LNCCI) ຖະໜົນໄກສອນ ພົມວິຫານ, ບ້ານ ໂພນພະເນົາ, ເມືອງ ໄຊເສດຖາ, ນະຄອນຫຼວງວຽງຈັນ, ສປປ ລາວ ຕູ້ໄປສະນີ: 4596

ແປ ແລະ ຮຽບຮຽງໂດຍ ໄພບູນ ທະນະບົວສີ
ເນື້ອໃນ ແລະ ຮູບໂດຍ ໂຄງການ SUSTOUR Laos