ຕາມເສັ້ນທາງເປັນສາຍຍາວ ທັງເຕັມໄປດ້ວຍແສງອ່ອນໆທີ່ອາບເອ້ຈາກດວງຕາເວັນ ທ່າມກາງເຂດໃຈກາງເມືອງຂອງນະຄອນຫຼວງວຽງຈັນ ຍິ່ງເບິ່ງຄືກັບວ່າ ຕົວເມືອງແຫ່ງນີ້ຈະຢູ່ຫ່າງໄກຈາກປາກົດການກິນ-ດື່ມອັນຄຶກຄັກ ເຊັ່ນເຄື່ອງດື່ມ “ຄຣາຟຄ໊ອກເທວ”. ແຕ່ຖ້າທ່ານລອງສໍາຫຼວດກວດກາຢ່າງລະອຽດຖີ່ຖ້ວນ ພາຍໃນພື້ນຜິວອັນງຽບສະຫງົບຂອງຕົວເມືອງແລ້ວ ທ່ານຈະພົບວ່າ ໃນຊ່ວງຊຸມປີຜ່ານມາ ພະນັກງານທີ່ເຮັດໜ້າທີ່ປະສົມເຄື່ອງດື່ມຢ່າງສ້າງສັນທັງມີຄວາມຊໍານິຊໍານານ ໄດ້ນໍາເອົາຄວາມຈະເລີນຮຸ່ງເຮືອງຂອງຈຸດລວມແຫ່ງນະວັດຕະກໍາມານໍາໃຊ້ໃນພື້ນທີ່ແຫ່ງນີ້. ບໍ່ພຽງແຕ່ເທົ່ານັ້ນ, ສະຖານປະກອບການບັນເທີງທີ່ໜ້າຕື່ນເຕັ້ນຫຼາຍແຫ່ງ ກໍໄດ້ກໍ່ຕົວຂຶ້ນພາຍໃນເມືອງຫຼວງຂອງລາວແຫ່ງນີ້ ໂດຍສາມາດຕອບສະໜອງດ້ານບໍລິການອາຫານ-ເຄື່ອງດື່ມສໍາລັບທຸກຄົນ ເຊິ່ງມີຕັ້ງແຕ່ອາຫານ-ເຄື່ອງດື່ມອັນຫຼູຫຼາ ໄປຈົນເຖິງຮ້ານລັບໆທີ່ໜ້າຄົ້ນຫາ ລວມທັງຊິກ້າບາ (ຮ້ານບາສໍາລັບຜູ້ສູບຢາໂດຍສະເພາະ). ລອງມາເບິ່ງຮ້ານບາຄຣາຟຄ໊ອກເທວທີ່ໂດດເດັ່ນໃນເມືອງວຽງຈັນ ແລ້ວທ່ານຈະບໍ່ຜິດຫວັງ!

ຮ້ານອາຫານ 525

525 ເປັນຮ້ານອາຫານທີ່ຕັ້ງຢູ່ເຂດໃຈກາງເມືອງວຽງຈັນທີ່ໂດດເດັ່ນ ເຊິ່ງຫ່າງຈາກແມ່ນໍ້າຂອງອັນງຽບສະຫງົບພຽງບໍ່ເທົ່າໃດແມັດ; ເມື່ອຍ່າງຜ່ານສວນໄມ້ສີຂຽວອຸ່ມທຸ່ມ ກໍຈະເຫັນບ່ອນນັ່ງກາງແຈ້ງທີ່ສວຍງາມ ພ້ອມກັບຂ້າງໃນອັນຫຼູຫຼາແຕ່ຮຽບງ່າຍ ເຊິ່ງແຂກຈະຖືກນໍາພາທາງເຂົ້າສູ່ໂລກແຫ່ງຄວາມສຸກສະບາຍ ແລະ ການຕ້ອນຮັບທີ່ແສນອົບອຸ່ນ. ຮ້ານອາຫານ 525 ເປັນຜົນງານຂອງທ່ານ ແອນດຣູ ໄຊຄ໌ (Andrew Sykes) ທີ່ຍົກຍ້າຍມາຈາກຫຼວງພະບາງ ໂດຍມາພ້ອມກັບການບໍລິການຢ່າງປານີດຂອງອະດີດເມືອງຫຼວງເກົ່າ ເຊິ່ງຈະຊ່ວຍໃຫ້ທ່ານຮູ້ສຶກບໍ່ອຶດອັດທັງລືມຄວາມໜ້າເບື່ອໄດ້ ດັ່ງທີ່ ທ່ານ ແອນດຣູ ໄດ້ອະທິບາຍສັ້ນໆວ່າ “ຮ້ານອາຫານແຫ່ງນີ້ບໍ່ໄດ້ກ່ຽວກັບການເສີບຄ໊ອກເທວທີ່ “ດີເລີດ” ແຕ່ກ່ຽວຂ້ອງກັບການທີ່ເຮັດໃຫ້ຜູ້ຄົນຮູ້ສຶກໄດ້ຮັບການຕ້ອນຮັບອັນອົບອຸ່ນ”. ວິທີການໃຫ້ຄວາມສໍາຄັນຕໍ່ຜູ້ຄົນເປັນຫຼັກບໍ່ໄດ້ຈໍາກັດສະເພາະແຂກທີ່ມາໃຊ້ບໍລິການເທົ່ານັ້ນ ເນື່ອງຈາກ ທ່ານ ແອນດຣູ ໄດ້ເຮັດໃຫ້ພະນັກງານມີສ່ວນຮ່ວມກັບເຈົ້າຂອງຮ້ານ ໃນການພະຍາຍາມສ້າງຂອດບໍລິການທີ່ດີທີ່ສຸດຢ່າງເທົ່າທຽມກັນເທົ່າທີ່ຈະສາມາດເຮັດໄດ້ ເຊິ່ງເປັນວິທີທາງທີ່ສາມາດໃຫ້ຜົນຕອບແທນຈາກປະສົບການຂອງຜູ້ເຂົ້າໃຊ້ບໍລິການໂດຍແທ້ຈິງ ແບບບໍ່ມີແຫ່ງໃດທຽມທັນໄດ້ໃນເຂດເມືອງແຫ່ງນີ້.

ແຕ່ທາງຮ້ານ 525 ກໍມີຄວາມຊ່ຽວຊານໃນການຄັດເລືອກຄ໊ອກເທວນໍາອີກ. ການສະແດງກ່ຽວກັບວິທີການປະສົມສູດຄ໊ອກເທວ ເປເປິເພລນ (Paper Plane) ກໍເຮັດໄດ້ແບບດີເລີດ ໂດຍຜ່ານການປະສົມປະສານສ່ວນປະສົມດັ້ງເດີມທັງ 4 ຢ່າງ ໄດ້ແກ່ ວິສກີບູບົງ, ເຫຼົ້າອາມາໂຣ່, ອະເພໂຣນ ແລະ ນໍ້າໝາກກ້ຽງ. ໃນກໍລະນີນີ້, ດ້ວຍພື້ນຖານທີ່ມີລົດຫວານ ແລະ ມີຄວັນເລັກນ້ອຍຂອງວິສກີບູບົງຈາກ Woodford Reserve ໄດ້ຮັບການປັບແຕ່ງລັກສະນະຂອງລົດຊາດເປັນຢ່າງດີດ້ວຍເຫຼົ້າອະເພໂຣນກິ່ນໝາກກ້ຽງ, ຂະນະທີ່ລົດຊາດຂອງຄ໊ອກເທວຈະມີຄວາມສົມດູນ ແລະ ເຂັ້ມຂຸ້ນຕື່ມຂຶ້ນດ້ວຍລົດຫວານ-ຂົມປົນກັນແບບສັບຊ້ອນ ແລະ ມີກິ່ນຫອມຂອງເຫຼົ້າ Amaro Averna ໂດຍນໍາເອົາກິ່ນໝາກກ້ຽງກັບຊະເອມເທບ ພ້ອມກັບກິ່ນຂອງໄມເທິນ, ຈູນິເປີເບີຣີ, ໂຣສແມຣີ ແລະ ໃບເສດມາລວມເຂົ້າກັນ. ນໍ້າໝາກນາວສົດ ແລະ ການສັ່ນຂວດແບບແຮງໆ ເພື່ອໃຫ້ໄດ້ລົດຊາດ ແລະ ເນື້ອສໍາຜັດຂອງເຄື່ອງດື່ມ, ແຕ່ງເຕີມດ້ວຍຄວາມຮູ້ສຶກແບບນຸ້ມນວນຢູ່ໃນປາກ ທີ່ເພີ່ມຄວາມສົດຊື່ນ ແຕ່ອັດແໜ້ນໄປດ້ວຍລົດຊາດອັນເຂັ້ມຂຸ້ນ.

 ທາງຮ້ານຍັງໄດ້ນໍາສະເໜີລາຍການເຄື່ອງດື່ມຫຼາກຫຼາຍເມນູ ໂດຍມີບາເທນເດີຮັບເຊີນເປັນບາງຄັ້ງຄາວ ແລະ ຕົວເລືອກຕາມຊ່ວງເວລາທີ່ນໍາເອົາລົດຊາດອັນສົດໃໝ່ທັງມີຊີວິດຊີວາ. ເຄື່ອງດື່ມທີ່ໂດດເດັ່ນອີກຢ່າງໜຶ່ງ ເຊັ່ນ ຄ໊ອກເທວຍີ່ປຸ່ນ ເຊິ່ງສ້າງສັນຂຶ້ນສະເພາະສໍາລັບເນໂກຣນີວີກ (Negroni Week), ໂດຍນໍາສະເໜີເຄື່ອງດື່ມທີ່ມີລົດຂົມ ແລະ ເຂັ້ມຂຸ້ນແບບໃໝ່ ພ້ອມລົດຊາດທີ່ເບົາກວ່າແບບຍີ່ປຸ່ນ. ດ້ວຍນະວັດຕະກໍາໃໝ່, ເຄື່ອງດື່ມຊະນິດນີ້ຈິ່ງໄດ້ເພີ່ມເຂົ້າຊູຊິລົດຫວານ ເຊິ່ງຈະຊ່ວຍເຮັດໃຫ້ເນື້ອຂອງເນໂກຣນີມີຄວາມເຂັ້ມອ່ອນລົງ ແຕ່ລົດຊາດແຊບກວ່າສູດດັ້ງເດີມ ພ້ອມລິ້ມລອງສັກກາຍະພາບດ້ານລົດຊາດໄດ້ຢ່າງເຕັມທີ່. ຄ໊ອກເທວດັ່ງກ່າວຈະຖືກໂຮຍໜ້າດ້ວຍສາຫຼ່າຍທະເລຟອງນ້ອຍໆ ຫຼື ສາຫຼ່າຍທະເລພວງອະງຸ່ນ ເຊິ່ງເຄື່ອງດື່ມແຕ່ລະຈອກຈະມີຄວາມຊັບຊ້ອນເລັກນ້ອຍ ໂດຍຈະມີທັງກິ່ນຫອມ ແລະ ລົດເຄັມປະສົມກັນ.

ເມື່ອບໍ່ດົນຜ່ານມານີ້, ຮ້ານອາຫານ 525 ໄດ້ເພີ່ມລາຍການອາຫານໃຫ້ຫຼາກຫຼາຍ ໂດຍກວມເອົາທັງບໍລິການອາຫານເຊົ້າ ແລະ ອາຫານທ່ຽງເຕັມຮູບແບບ. ຮ້ານດັ່ງກ່າວຕັ້ງຢູ່ເຮືອນເລກທີ 8 ບ້ານວັດຈັນ ໃກ້ກັບໂຮງແຮມ ສາລານາ ບູຕິກ, ເປີດໃຫ້ບໍລິການທຸກວັນ ຕັ້ງແຕ່ 9:00 ໂມງເຊົ້າຈົນຮອດທ່ຽງຄືນ. ທ່ານສາມາດຈອງ ຫຼື ເບິ່ງຂໍ້ມູນເພີ່ມເຕີມໄດ້ທີ່: 525eatanddrink.com

ຮ້ານ Gallery 38

ເມື່ອລ້ຽວອອກຈາກຖະໜົນສາຍໜຶ່ງທີ່ຄຶກຄັກທີ່ສຸດໃນຕົວເມືອງວຽງຈັນ ເພື່ອມຸ່ງໜ້າເຂົ້າສູ່ເສັ້ນທາງຮ່ອມນ້ອຍໆ ແລ້ວກ້າວຂາຂຶ້ນຕາມຂັ້ນໄດແຕ່ລະຂັ້ນ ໂດຍຜ່ານຮ້ານກາເຟອັນງຽບສະຫງົບໄປຈົນຮອດຈຸດທີ່ເບິ່ງຄືກັບວ່າເປັນທາງຕັນ… ແຕ່ດ້ວຍແຮງຍູ້ທີ່ເໝາະສົມ ຈິ່ງເຮັດໃຫ້ແຜ່ນໄມ້ຂັດເງົາທີ່ຕັ້ງຢູ່ຕໍ່ໜ້າເປີດແງ້ມອອກ ພ້ອມເຜີຍໃຫ້ເຫັນຕົວຕົນຂອງຮ້ານ Gallery 38, ເຊິ່ງເປັນໜຶ່ງໃນຮ້ານບາຄຣາຟຄ໊ອກເທວທີ່ທັນສະໄໝທີ່ສຸດໃນນະຄອນຫຼວງວຽງຈັນ. ພາຍໃນແມ່ນເຕັມໄປດ້ວຍບັນຍາກາດສົມກັບຊື່ຂອງຮ້ານ, ໂດຍມີຮູບແຕ້ມສີນໍ້າມັນປະດັບເອ້ຢູ່ຕາມຝາຜະໜັງ.  

ສໍາລັບເຄື່ອງດື່ມຄ໊ອກເທວຂອງ Gallery 38 ກໍມີຄວາມກົມກືນກັບຮູບແບບການຕົກແຕ່ງພາຍໃນ ເພື່ອກໍ່ໃຫ້ເກີດຮູບລັກສະນະທີ່ແປກຕາຢ່າງໜ້າອັດສະຈັນ. ຄ໊ອກເທວ Gin 38 ຖືເປັນເຄື່ອງດື່ມສູດພິເສດທີ່ຂຶ້ນຊື່ປະຈໍາຮ້ານ ໂດຍມີສ່ວນປະສົມຂອງກິ່ນດອກກຸຫຼາບ, ເຫຼົ້າຈິນ, ນໍ້າໝາກນາວ ແລະ ນໍ້າດອກກຸຫຼາບ ເຊິ່ງເສີບໃນຈອກແກ້ວຂະໜາດໃຫຍ່ອັນໜ້າຮັກ, ລາດໜ້າດ້ວຍນໍ້າໂຊດາ ເພື່ອປັບຄວາມສົມດູນຂອງເຫຼົ້າຈິນທີ່ເຂັ້ມຂຸ້ນໃຫ້ເຂົ້າກັບກິ່ນຫອມຂອງດອກໄມ້. ເຄື່ອງດື່ມທີ່ບັນຈຸໃນຈອກແກ້ວໜ່ວຍນີ້ ສາມາດດື່ມໄດ້ງ່າຍແບບລື່ນຄໍ ເຊິ່ງນໍ້າໂຊດາຈະເພີ່ມຄວາມຊູ່ຊ່າຕາມດ້ວຍກິ່ນຫອມຂອງໝາກນາວ ເຮັດໃຫ້ກິ່ນຫອມຂອງດອກກຸຫຼາບບໍ່ສາມາດເອົາຊະນະເຄື່ອງດື່ມປະເພດນີ້ໄດ້ ອັນຈະຊ່ວຍໃຫ້ດັບຄວາມຫິວກະຫາຍໄດ້ເປັນຢ່າງດີໃນຄໍ່າຄືນຂອງລະດູຮ້ອນອັນອົບເອົ້າຍາມນີ້. 

ແຕ່ເມນູເຄື່ອງດື່ມກໍບໍ່ແມ່ນວ່າຈະມີລົດຊາດເບົາບາງ ແລະ ມີສ່ວນປະສົມຂອງດອກໄມ້ສະເໝີໄປ. ຖ້າຕ້ອງການລົດຊາດທີ່ກົມກ່ອມຫຼາຍຂຶ້ນ, ຄ໊ອກເທວ Neat Truffle ທີ່ປະສົມປະສານດ້ວຍເຫຼົ້າຈິນຊູວີກັບເຫັດທຣັບເຟິນ, ນໍ້າແອັບເປິ້ນ, ຫອມບົວລະພາ, ໃບເຕີຍ ແລະ ນໍ້າໝາກນາວ ເຊິ່ງທັງໝົດນີ້ເມື່ອຖືກຫຼອມລວມເຂົ້າກັນແລ້ວ ກໍຈະກາຍເປັນລົດຊາດທີ່ກົມກືນກັນຢ່າງໜ້າແປກໃຈ ເຊິ່ງກໍຢາກຈະຂອບໃຈທຣັບເຟິນ ມັສກີ້ເຖິງຈະມີກິ່ນອັນອັບເອົ້າແຕ່ກໍບໍ່ຄວນເບິ່ງຂ້າມ.

ຮ້ານ Gallery 38 ຕັ້ງຢູ່ຖະໜົນມັນທາຕຸລາດ ດ້ານເທິງຂອງຮ້ານກາເຟ Kaltura Café ທັງຢູ່ກົງກັນຂ້າມກັບຮ້ານກາເຟ Hard Rock, ເຊິ່ງເປີດໃຫ້ບໍລິການທຸກຄືນ ຕັ້ງແຕ່ 7:00 ໂມງແລງຈົນຮອດທ່ຽງຄືນ. ທ່ານສາມາດຈອງ ຫຼື ເບິ່ງຂໍ້ມູນເພີ່ມເຕີມໄດ້ທີ່: fb.com/gallery38.societyofdrinkers

ຮ້ານ Artisan Bar

Artisan Bar ແມ່ນຮ້ານອາຫານໃນນະຄອນຫຼວງວຽງຈັນ ໂດຍມີສາຂາຢູ່ຫຼວງພະບາງ, ເປັນຮ້ານອາຫານທີ່ໃຫ້ບໍລິການເຄື່ອງດື່ມຊັ້ນດີ ຈາກການຕົກແຕ່ງພາຍໃນທີ່ຫຼູຫຼາ ແລະ ສ່ອງແສງສະຫວ່າງດ້ວຍແສງໄຟອັນວິຈິດບັນຈົງມາເປັນເວລາຫຼາຍປີ. ຄວາມຈິງແລ້ວ, ຮູບລັກສະນະພາຍໃນຫ້ອງກິນດື່ມ ກໍຍັງເປັນທີ່ປະຈັກຕາຈົນເຮັດໃຫ້ບໍ່ສາມາດອົດທີ່ຈະເຫຼືອບຕາແນມເບິ່ງໄດ້, ນັບແຕ່ແທ່ງຫີນດ້ານເທິງສຸດທີ່ໜ້າປະທັບໃຈຈົນເຖິງບາເທນເດີທີ່ນຸ່ງຖືແຕ່ງກາຍຢ່າງຊານສະຫຼາດ; ການກ້າວຂ້າມຂອບປະຕູໄປສູ່ໂລກແຫ່ງຄວາມມືດມິດ ທ່າມກາງຄວາມສະຫງ່າງາມ ແລະ ຄວາມສຸກທາງໃຈ. ສໍາລັບຜູ້ທີ່ມັກສູບຢາ, ທາງຮ້ານ Artisan ກໍຍັງມີຫ້ອງສໍາລັບນັ່ງສູບຢາ ພ້ອມມີຢາສູບຫຼາຍປະເພດໃຫ້ເລືອກ.

ເຖິງແມ່ນວ່າ ບາເທນເດີຜູ້ຜູກໂບ ຈະມີຄວາມຊ່ຽວຊານໃນການປະສົມຄ໊ອກເທວເປັນຫຼັກ, ແຕ່ຄວາມໂດດເດັ່ນອັນແທ້ຈິງນັ້ນກໍຄື ເຫຼົ້າສູດພິເສດຂອງຮ້ານ Artisan ໂດຍສະເພາະກໍແມ່ນ Artisan Creamy ເຊິ່ງເປັນເຄື່ອງດື່ມທີ່ປະກອບດ້ວຍສ່ວນປະສົມຫຼາຍຢ່າງເພື່ອປຸງແຕ່ງໃຫ້ເຂົ້າກັນເປັນເນື້ອດຽວ ບໍ່ວ່າຈະເປັນເຫຼົ້າເຊີຣີ, ເຫຼົ້າ Disaronno, ເຫຼົ້າໂກໂກ້ ແລະ ນໍ້າຫວ້ານຫາງແຂ້ ທັງໝົດນີ້ລ້ວນແຕ່ເປັນສ່ວນປະສົມທີ່ຖືກຫຼອມລວມເຂົ້າເປັນເຫຼົ້າຄຣີມທີ່ມີລົດຊາດນຸ້ມນວນກົມກ່ອມ. 

ສໍາລັບເຄື່ອງດື່ມອ່ອນໆ, ແຂກສາມາດເລືອກດື່ມ Wild Honey ແລະ Pandan ໂດຍແມ່ນເຄື່ອງດື່ມທີ່ເຮັດຈາກເຫຼົ້າຣໍາ ປະສົມນໍ້າເຜິ້ງ ແລະ ໝາກກ້ຽງ ເຊິ່ງລາດໜ້າດ້ວຍໂຊດາເລັກນ້ອຍ ກ່ອນຈະເທລົງປົນກັບນໍ້າກ້ອນ. ກິ່ນຫອມສະໝຸນໄພຈາກໃບເຕີຍຊ່າງກົມກືນກັນດີກັັບນໍ້າເຜິ້ງດອກໄມ້ທີ່ມີລົດຫວານເລັກນ້ອຍບວກກັບກິ່ນໝາກກ້ຽງ ເຊິ່ງຈະກາຍເປັນເຄື່ອງດື່ມທີ່ສົມບູນແບບສໍາລັບຜ່ອນຄາຍຄວາມຮ້ອນໃນຄໍ່າຄືນອັນຮ້ອນອົບເອົ້າຂອງເມືອງວຽງຈັນ.

ຮ້ານ Artisan Bar ຕັ້ງຢູ່ໃກ້ກັບວັດກາໂທລິກ, ຖະໜົນສັກກະລິນ ໂດຍເປີດໃຫ້ບໍລິການແຕ່ວັນຈັນຫາວັນເສົາ ເລີ່ມແຕ່ເວລາ 7:00 ໂມງແລງຮອດທ່ຽງຄືນ. ສາມາດສັ່ງຈອງ ຫຼື ເບິ່ງຂໍ້ມູນເພີ່ມເຕີມໄດ້ທີ່: fb.com/artisanvientiane

ການເດີນທາງ: ສາຍການບິນລາວມີບໍລິການຖ້ຽວບິນທຸກວັນຈາກທົ່ວປະເທດ ແລະ ພາກພື້້ນ ເພື່ອເດີນທາງໄປຍັງນະຄອນຫຼວງວຽງຈັນ