ຮຽບຮຽງໂດຍ: ເຈສັນ ໂຣລັນ

ຮູບໂດຍ: ພູນຊັບ ເທວົງສາ

ແປ ແລະ ຮຽບຮຽງໂດຍ: ໄພບູນ ທະນະບົວສີ 

ການໄຫຼຜ່ານຮ່ອມພູຂອງນໍ້າຕົກຕາດກວາງຊີ ທ່າມກາງການປົກຫຸ້ມຂອງປ່າໄມ້ອັນຕຶບໜາຢູ່ດ້ານນອກຕົວເມືອງຫຼວງພະບາງ ຖືເປັນປາກົດການທາງທໍາມະຊາດທີ່ໜ້າຫຼົງໄຫຼທີ່ສຸດອີກແຫ່ງໜຶ່ງຂອງລາວ. ນໍ້າຕົກທີ່ປະກອບດ້ວຍຫຼາຍຊັ້ນໄດ້ໄຫຼທຸ້ມລົງມາຈາກດ້ານເທິງຂອງຫີນປູນ ເຮັດໃຫ້ເກີດມີໜອງນໍ້າສີຟ້າຄາມເຮືອງແສງ ເຊິ່ງໄດ້ກາຍເປັນມົນສະເໜ່ດຶງດູດເອົານັກທ່ອງທ່ຽວມາເປັນເວລາດົນນານ.

ປັດຈຸບັນ, ນັກທ່ອງທ່ຽວສາມາດສໍາຜັດກັບຄວາມມະຫັດສະຈັນທາງທໍາມະຊາດແຫ່ງນີ້ຜ່ານມຸມມອງໃໝ່ໄດ້. ເດິວິວ (The View) ເຊິ່ງແມ່ນຮ້ານກາເຟເຮືອນຕົ້ນໄມ້ ທີ່ລີ້ຊ້ອນຢູ່ໃນປ່າສີຂຽວ, ຈະຊ່ວຍປ່ຽນປະສົບການໃນການປີນຂັ້ນໄດເຫຼັກອັນຫຍຸ້ງຍາກ ໃຫ້ກາຍເປັນການເດີນທາງທີ່ເຕັມໄປດ້ວຍຄວາມຫວັງແຫ່ງການຄົ້ນພົບ. ຮ້ານກາເຟແຫ່ງໃໝ່ຫຼ້າສຸດດັ່ງກ່າວ ສ້າງໂດຍ ບໍລິສັດ ອິນທິຣາ ກຣຸບ ໃນນາມຜູ້ບຸກເບີກດ້ານການທ່ອງທ່ຽວແບບອະນຸລັກໃນທ້ອງຖິ່ນ ໄດ້ມອບສິ່ງຕອບແທນແກ່ຜູ້ທີ່ສາມາດປີນປ່າຍຂຶ້ນໄປດ້ານເທິງ ເພື່ອສໍາຜັດກັບທິວທັດອັນກວ້າງໄກສຸດສາຍຕາທ່າມກາງການຫຸ້ມລ້ອມຂອງທໍາມະຊາດ, ພ້ອມລິ້ມລອງກັບລົດຊາດກາເຟລາວ ຫຼື ຈິບນໍ້າເຢັນໆ ທີ່ຖືກລວມເຂົ້າຢູ່ໃນຄ່າທໍານຽມເຂົ້າຊົມ. 

ສໍາລັບຜູ້ທີ່ສະແຫວງຫາຄວາມທ້າທາຍກວ່າການປີນໄຕ່ຂັ້ນໄດເຫຼັກອັນຍາກຫຍຸ້ງນີ້, ສາມາດສໍາຜັດກັບເສັ້ນທາງຊິບລາຍ (ໂຫນສະລິງ) ທັງ 5 ຂັ້ນ ທີ່ຈະພາບັນດານັກພະຈົນໄພລອຍລ່ອງຂຶ້ນໄປຢູ່ເໜືອປາຍໄມ້ ກ່ອນຈະເຄື່ອນຕົວດ້ວຍຄວາມໄວ ຜ່ານຕົ້ນໄມ້ເກົ່າແກ່ ແລ້ວແລ່ນຂ້າມໄປທາງນໍ້າຕົກຕາດ; ທີ່ນີ້ເອງ, ຜູ້ເຂົ້າຮ່ວມຈະມີໂອກາດໄດ້ຊື່ນຊົມທິວທັດຂອງນໍ້າຕົກສີຟ້າອັນໃສເຢັນຢູ່ເບື້ອງລຸ່ມ ໂດຍສະທ້ອນຈາກມຸມສູງທີ່ໜ້າຕື່ນເຕັ້ນ.

ເຂົ້າເບິ່ງຂໍ້ມູນເພີ່ມເຕີມໄດ້ໃນ Facebook: fb.com/TheViewatKuangSiFalls

ການເດີນທາງ: ຮ້ານກາເຟ ເດິວິວ ຕັ້ງຢູ່ບໍລິເວນນໍ້າຕົກຕາດກວາງຊີ ເຊິ່ງຫ່າງຈາກຕົວເມືອງຫຼວງພະບາງ 30 ກິໂລແມັດ. ຂະນະທີ່ສາຍການບິນລາວໃຫ້ບໍລິການຖ້ຽວບິນໄປຫຼວງພະບາງເປັນປະຈໍາ ໂດຍມີປາຍທາງຈາກນະຄອນຫຼວງວຽງຈັນ, ປາກເຊ, ກຸງເທບ, ຊຽງໃໝ່ ແລະ ຮາໂນ່ຍ.