ງານບຸນມະໂຫລານຮູບເງົາສາກົນ ເຊິ່ງເປັນງານບຸນມະໂຫລານຮູບເງົາທີ່ຫາເບິ່ງໄດ້ຍາກທີ່ສຸດໃນອາຊີຈະຫວນກັບຄືນມາໃຫ້ໄດ້ເບິ່ງ-ຊົມອີກຄັ້ງ ທີ່ຫຼວງພະບາງ ໃນຕົ້ນເດືອນທັນວາທີ່ຈະມາເຖິງນີ້, ເນື່ອງຈາກ Blue Chair ແລະ ບັນດາຄູ່ຮ່ວມງານ ໄດ້ນໍາເອົາຮູບເງົາອາຊີຕາເວັນອອກສ່ຽງໃຕ້ ແບບຮ່ວມສະໄໝມາສູ່ເມືອງມໍລະດົກໂລກອັນງົດງາມ ຂອງອົງການຢູເນັສໂກ ເຊິ່ງເປັນບ່ອນທີ່ໂຮງໜັງເກົ່າແຫ່ງສຸດທ້າຍຖືກປິດຕົວລົງ ໃນປີ 1985.

ງານບຸນມະໂຫລານຮູບເງົາປະຈໍາປີນີ້ຈັດຂຶ້ນໃນລະຫວ່າງວັນທີ 5 ຫາ 9 ທັນວາ ເຊິ່ງທຸກຄົນສາມາດເຂົ້າຮ່ວມໄດ້ໂດຍບໍ່ມີຄ່າໃຊ້ຈ່າຍໃດໆ, ສ່ວນລາຍການສະແດງພາຍໃນງານດັ່ງກ່າວຈະປະກອບມີ ຮູບເງົາສັ້ນຫຼາຍເລື່ອງ ລວມທັງສາລະຄະດີເລື່ອງສັ້ນ ແລະ ຮູບເງົາທົ່ວໄປ ນັບແຕ່ຮູບເງົາຈາກຄ້າຍຊື່ດັງຂອງໄທ, ຮູບເງົາສັ້ນຂອງສິງກະໂປ ຈົນຮອດຮູບເງົາ “ອາດເຮົາສ໌” ທີ່ໄດ້ຮັບລາງວັນຈາກຫວຽດນາມ. ນອກຈາກນີ້, ຍັງມີລາຍການກິດຈະກໍາອື່ນໆ ເປັນຕົ້ນແມ່ນ ການສະແດງສົດ, ງານເສວະນາ, ແລະ ເວທີຖາມ-ຕອບຈາກນັກສ້າງຮູບເງົາ.

Blue Chair ສ້າງຕັ້ງຂຶ້ນໄດ້ 15 ປີແລ້ວ ພາຍໃຕ້ຊື່ “ງານ​ບຸນມະ​ໂຫລານຮູບ​ເງົາ ຫຼວງ​ພະ​ບາງ”. ມີຈຸດປະສົງໃນການສະໜັບສະໜູນອຸດສາຫະກໍາຮູບເງົາລາວທີ່ຫາກໍໄດ້ຮັບການກໍ່ຕັ້ງຂຶ້ນເມື່ອບໍ່ດົນຜ່ານມາ ໂດຍມອບໂອກາດໃຫ້ບັນດານັກສ້າງຮູບເງົາລາວຮ່ວມກັນສືບສານ ແລະ ສໍາຜັດປະສົບການການສ້າງຮູບເງົາຂອງເພື່ອນຮ່ວມສາຍງານດຽວກັນໃນພາກພື້ນ, ຂະນະທີ່ງານປະຈໍາປີນີ້ ມີຮູບເງົາຫຼາຍເລື່ອງຈາກ 10 ປະເທດໃນພາກພື້ນເຂົ້າຮ່ວມ ເຊິ່ງຈະສ້າງຄວາມເພິ່ງພໍໃຈໃນກຸ່ມນັກສ້າງຮູບເງົາພໍສົມຄວນ ໂດຍຫຼາຍຄົນໃຫ້ຄວາມສົນໃຈທີ່ຈະເຂົ້າຮ່ວມງານ ເພື່ອສ້າງເຄືອຂ່າຍ, ພົບປະກັບຜູ້ຊົມ ແລະ ລະດົມຄວາມຄິດສໍາລັບໂຄງການຕໍ່ໜ້າ ພ້ອມດື່ມດໍາກັບລົດຊາດເບຍລາວເຢັນໆທີ່ແຄມຝັ່ງແມ່ນໍ້າຂອງ.

ໃນປີ 2022, Martina Escobar, ຜູ້ກໍາກັບຮູບເງົາ ແລະ Monster Jiminez, ຜູ້ຜະລິດຮູບເງົາ ເຊິ່ງທັງສອງມາຈາກຟີລິບປິນ ໄດ້ແບ່ງປັນເລື່ອງລາວກ່ຽວກັບຮູບເງົາຂອງພວກຕົນ ເລື່ອງ “Leonor Will Never Die” ໃນງານບຸນມະໂຫລານຮູບເງົາ; ຈາກນັ້ນພວກເຂົາກໍໄດ້ອະທິບາຍໃຫ້ຜູ້ຊົມຟັງຕື່ມວ່າ: ທັງສອງໄດ້ພົບກັນທີ່ຫຼວງພະບາງໃນງານບຸນມະໂຫລານຮູບເງົາ ປີ 2016, ຄວາມຈິງແລ້ວ ຕົວລະຄອນ Leonor ອາດຈະບໍ່ສາມາດປາກົດໃນບົດຮູບເງົາເລື່ອງນີ້ໄດ້ ຖ້າບໍ່ມີງານດັ່ງກ່າວ.

ທ່ານ Sean Chadwell, ຜູ້ອໍານວຍການຝ່າຍບໍລິຫານຂອງ Blue Chair ກ່າວວ່າ “ບາງຄັ້ງກໍມີຄົນມາຖາມວ່າ ພວກເຮົາເຮັດເພື່ອລາງວັນໃດໜຶ່ງ ຫຼື ບໍ່,” ທ່ານກ່າວຕື່ມວ່າ: “ແຕ່ພວກເຮົາບໍ່ມີລາງວັນ. ຫຼວງພະບາງຖືເປັນສະຖານທີ່ທີ່ເຕັມໄປດ້ວຍບັນຍາກາດທີ່ເໝາະສົມ ສໍາລັບການສ້າງຄວາມສໍາພັນກັບເພື່ອນມິດຜູ້ສ້າງຮູບເງົາ, ລວມທັງວາງແຜນໂຄງການຕໍ່ໄປ ແລະ ຊື່ນຊົມຍິນດີກັບສິ່ງທີ່ພວມສະແດງຢູ່ຕໍ່ໜ້າ. ແລ້ວຈະມາຂັດຂວາງສິ່ງດີໆເຫຼົ່ານີ້ເພື່ອຫຍັງ?”

ສະຖານທີ່ຈັດງານບຸນກາງແຈ້ງຍາມຄໍ່າຄືນລັກສະນະນີ້ ມັກຈະມີແຂກເຂົ້າຮ່ວມກວ່າ 1,200 ຄົນໃນແຕ່ລະປີ, ບັນດາຜູ້ເຂົ້າຮ່ວມເຫຼົ່ານີ້ສ່ວນໃຫຍ່ແມ່ນມາຊົມຮູບເງົາທີ່ກໍາລັງສາຍເທິງໜ້າຈໍຂະໜາດໃຫຍ່ທີ່ສຸດຂອງເມືອງ. ເຊິ່ງທ່ານ Sean Chadwell ກ່າວວ່າ: “ເນື່ອງຈາກເປັນງານບຸນຮູບເງົາທີ່ທຸກຄົນສາມາດເຂົ້າຮ່ວມໄດ້ຟຣີ,” ທ່ານກ່າວອີກວ່າ: “ວິທີການນີ້ຖືເປັນສ່ວນໜຶ່ງໃນເປົ້າໝາຍສໍາຄັນ ເຊິ່ງກໍຄື: ການພະຍາຍາມເຮັດທຸກວິທີທາງເພື່ອສ້າງກຸ່ມຜູ້ຊົມຮູບເງົາໃຫ້ຫຼາຍທີ່ສຸດພາຍໃນປະເທດ.”  

ທ່ານ Vone Liosakoun, ຜູ້ຈັດການໂຄງການ Blue Chair ກ່າວວ່າ: “ການເປີດໂອກາດໃຫ້ທຸກຄົນເຂົ້າຮ່ວມງານບຸນມະໂຫລານຮູບເງົາໂດຍບໍ່ເສຍຄ່າ ຖືເປັນສິ່ງທ້າທາຍອີກຢ່າງໜຶ່ງ, ແຕ່ເຫດຜົນສໍາຄັນຢ່າງໜຶ່ງທີ່ພວກເຮົາເຮັດໄດ້ກໍແມ່ນ ການຕ້ອນຮັບແຂກບ້ານແຂກເມືອງດ້ວຍໄມຕີຈິດມິດຕະພາບຂອງຊຸມຊົນຊາວຫຼວງພະບາງ.” ສໍາລັບປີນີ້, ມີໂຮງແຮມໃນທ້ອງຖິ່ນ 20 ກວ່າແຫ່ງ ທີ່ຕົກລົງເຫັນດີເປັນຄູ່ຮ່ວມງານກັບ Blue Chair ໃນການເປັນເຈົ້າພາບຕ້ອນຮັບບັນດານັກສ້າງຮູບເງົາ ແລະ ແຂກ VIP ທີ່ເຂົ້າຮ່ວມງານບຸນຄັ້ງນີ້. 

ຂໍ້ມູນເພີ່ມເຕີມ ແລະ ລາຍຊື່ຮູບເງົາທັງໝົດ ສາມາດເຂົ້າເບິ່ງໄດ້ທີ່ bluechair.film

ການເດີນທາງ: ສາຍການບິນລາວ ໃຫ້ບໍລິການຖ້ຽວບິນໄປຫຼວງພະບາງເປັນປະຈໍາ ຈາກນະຄອນຫຼວງວຽງຈັນ, ຮາໂນ່ຍ, ກຸງເທບ ແລະ ຊຽງໃໝ່