ການປູກໃບຢາສູບແມ່ນມີມາແຕ່ດົນແລ້ວໃນຜືນແຜ່ນດິນລາວ. ນອກຈາກໃຊ້ພັນເປັນຢາສູບແລ້ວ, ຄົນສະໄໝກ່ອນຍັງ ນິຍົມເຜົາໃບຢາສູບໃນງານສົບ, ຈູດໃບຢາສູບເພື່ອໄລ່ແມງໄມ້ ໂດຍສະເພາະໃນຊ່ວງລະດູຝົນ.

ທ່ານ ຄໍາພູມີ ແກ້ວແພງສີ, ຮອງຜູ້ອຳນວຍການ ບໍລິສັດ ຢາສູບລາວ ກ່າວວ່າ ໃນຊຸມປີ 1950 ຄົນຝຣັ່ງເລີ່ມນຳເຂົ້າຢາສູບສະໄໝໃໝ່ທີ່ຜະລິດແບບອຸດສາຫະກຳເຂົ້າມາໃນລາວ.

ທ່ານ ຄໍາພູມີ ຈົບການສຶກສາຂະແໜງເສດຖະສາດມາຈາກປະເທດລັດເຊຍໃນປີ 1980, ແລະ ຈົບດ້ານບໍລິຫານທຸລະກິດໃນລະດັບປະລິນຍາໂທ ຈາກປະເທດໄທ. ທ່ານ ຄໍາພູມີ ເລີ່ມເຮັດວຽກທີ່ບໍລິສັດ ຢາສູບລາວ ຈໍາກັດ ເປັນຊ່ຽວຊານກ່ຽວກັບໃບຢາ ແລະ ປະຈຸບັນ ເພິ່ນດຳລົງຕໍາແໜ່ງ ຮອງຜູ້ອຳນວຍການຝ່າຍບຸກຄະລາກອນ ແລະ ການຄວບຄຸມການປູກໃບຢາ.

ໃນປີ 1958, ບໍລິສັດຜະລິດຢາສູບແຫ່ງທຳອິດໄດ້ສ້າງຕັ້ງຂຶ້ນໂດຍນັກທຸລະກິດຄົນຈີນ, ໃສ່ຊື່ວ່າ ໂຮງງານ ຢາສູບລາວ ແລະໄດ້ປ່ຽນຊື່ພາສາອັງກິດເປັນ Lao Tobacco Company ໃນປີ 1980. ຜະລິດຕະພັນໃນຕອນນັ້ນແມ່ນໃຊ້ໃບຢາຈາກຕ່າງປະເທດ ປະສົມກັບໃບຢາຂອງລາວ.

ໃນປິ 2001, ບໍລິສັດ ຢາສູບລາວ ກໍ່ກາຍເປັນບໍລິສັດຮ່ວມທຶນລະຫວ່າງ ລັດຖະບານແຫ່ງ ສປປ ລາວ ແລະ ກຸ່ມບໍລິສັດ ອິມພີຣຽວ (ອັງກິດ) ແລະ ບໍລິສັດ S3T (ສິງກະໂປ) ແລ້ວປ່ຽນມາເປັນ ບໍລິສັດ ຢາສູບລາວ ຈໍາກັດ, ແນໃສ່ການຊ່ວຍເຫຼືອຊາວໄຮ່ຊາວສວນໃຫ້ຫຼຸດພົ້ນຈາກຄວາມທຸກຍາກ  ໂດຍການປູກໃບຢາແບບເປັນລະບົບ.

ໃນເມື່ອກ່ອນ, ມີຊາວສວນທີ່ປູກໃບຢາສະໜອງໃຫ້ບໍລິສັດ ຢາສູບລາວພຽງແຕ່ 300 ຄອບຄົວ ແລະ ເກັບກ່ຽວ ໃບຢາໄດ້ 600 ໂຕນຕໍ່ປິ. ປັດຈຸບັນ, ຈໍານວນຊາວສວນທີ່ລ້ຽງຊີບດ້ວຍການປູກໃບຢາມີຫຼາຍກວ່າ 1500 ຄອບຄົວ ເພື່ອສະໜອງໃບຢາໃຫ້ແກ່ບໍລິສັດ ແລະ ໃນຊຸມປິທີ່ຜ່ານມາສາມາດສ້າງລາຍໄດ້ໃຫ້ແກ່ຊາວສສວນເຖິງ 80 ຕື້ກີບ.

ທ່ານ ຄໍາພູມີກ່າວວ່າ ເຮົາມີຊາວສວນທີ່ດີທີ່ສຸດ ທີ່ສາມາດປູກໃບຢາສູບໃຫ້ແກ່ເຮົາໄດ້,​ ສະນັ້ນ ເຮົາຈື່ງບໍ່ຕ້ອງຊື້ໃບຢາຈາກບ່ອນອື່ນ. ເພິ່ນຍັງກ່າວຕື່ມອີກວ່າ: ບັນດາຊາວສວນໄດ້ປູກໃບຢາໃນ 8 ແຂວງຂອງລາວ, ເຊິ່ງເປັນບ່ອນທີ່ມີສະພາບດິນເໝາະສົມເພື່ອປູກໃບຢາທີ່ໄດ້ຄຸນນະພາບດີທີ່ສຸດ.

ຂຽນໂດຍ: Latsamy Phonevilay

ຮູບພາບ: ຈາກ ບໍລິສັດ ຢາສູບລາວ ຈໍາກັດ