ໃນຊ່ວງທ້າຍຂອງການເຂົ້າພັນສາ ແມ່ນໄດ້ຫຍັບໝໍ່ໃກ້ເຂົ້າມາ ແລະ ລະດູການເກັບກ່ຽວກໍ່ຈະໄດ້ເລີ່ມຕົ້ນຂຶ້ນ. ເພື່ອເປັນການສະແດງຄວາມຮູ້ບຸນຄຸນຕໍ່ກັບຊີວິດການເປັນຢູ່ທີ່ດີ ແລະ ຄວາມອຸດົມສົມບູນທີ່ໄດ້ຮັບຈາກສິ່ງສັກສິດໃນແຕ່ລະປີ, ຊາວລາວຈຶ່ງໄດ້ມີການຮ່ວມກັນເຮັດບຸນໂດຍການຖວາຍເຄື່ອງບູຊາຕ່າງໆຕໍ່ກັບພຣະແມ່ຄົງຄາ.

ຢູ່ຫຼວງພະບາງ, ບຸນດັ່ງກ່າວຖືວ່າມີຄວາມງົດງາມເປັນພິເສດ ເນື່ອງຈາກວ່າ ໝົດຕົວເມືອງຈະເຕັມໄປດ້ວຍແສງທຽນ ແລະ ໂຄມໄຟທີ່ມີສີສັນ. ບັນດາວັດວາອາຣາມ, ເຮືອນພັກອາໄສ ແລະ ຫ້າງຮ້ານທຸລະກິດຈະພາກັນຫ້ອຍໂຄມໄຟແທນການເປີດດອກໄຟ, ເຮັດໃຫ້ເມືອງມີຄວາມສະຫວ່າງສະໄຫວຢ່າງມີມົນສະກົດ. ໃນບຸນດັ່ງກ່າວ ແຕ່ລະໝູ່ບ້ານຈະມີການຮ່ວມກັນປະດິດສ້າງ ແລະ ປະດັບປະດາເຮືອລໍາໃຫຍ່ດ້ວຍໂຄງໄມ້ໄຜ່ທີ່ຖືກຕົບແຕ່ງດ້ວຍເຈ້ຍສີ ແລະ ໄຟແສງສີ. ການອອກແບບປະດັບປະດາຈະມີຕັ້ງແຕ່ແບບທີ່ລຽບງ່າຍ ໄປຈົນເຖິງການຕົບແຕ່ງແບບທີ່ມີໂຄງສ້າງລະອຽດດ້ວຍລວດລາຍຂອງບັນດາສັດວິເສດຕ່າງໆຈາກເທບນິຍາຍ.

ເມື່ອຟ້າເລີ່ມມືດ, ບັນດາເຮືອໄຟເຫຼົ່ານີ້ຈະຖືກແຫ່ລຽບຕາມທາງໃຫຍ່ຈາກ ວັດທາດນ້ອຍ ໄປຫາ ວັດຊຽງທອງ ທ່າມກາງການສະເຫຼີມສະຫຼອງມ່ວນຊື່ນ ແລະ ສຽງເພງ ເຊິ່ງເກືອບຈະເວົ້າໄດ້ວ່າຈະບໍ່ມີແສງໄຟຈາກດອກໄຟເລີຍ. ບັນດາຜູ້ຊົມຈະຢືນລຽນກັນຢູ່ຂ້າງທາງເພື່ອຮັບຊົມເຮືອໄຟທີ່ຖືກຕົບແຕ່ງດ້ວຍລວດລາຍແຕກຕ່າງກັນໄປ ຕາມຫົວຄິດປະດິດສ້າງຂອງຊ່າງແຕ່ລະກຸ່ມ. 

ເມື່ອບັນດາເຮືອໄຟຖືກແຫ່ໄປຮອດ ວັດຊຽງທອງ, ເຮືອໄຟເຫຼົ່ານີ້ຈະຖືກລຽນໄວ້ໃນເດີ່ນວັດ ລໍຖ້າການຕັດສິນໃຫ້ຄະແນນໂດຍບັນດາກໍາມະການ. ຫຼັງຈາກນັ້ນ, ເຮືອແຕ່ລະລຳຈະຖືກຂົນລົງຂັ້ນໄດໄປລ່ອງໃນນໍ້າຂອງເພື່ອເປັນການສະແດງຄວາມຂອບໃຈ ແລະ  ຄວາມຮູ້ບຸນຄຸນຕໍ່ສາຍນໍ້າ ແລະ ນຳເອົາໂຊກເອົາໄຊເຂົ້າມາສູ່ໝູ່ບ້ານ.

ສໍາລັບຂໍ້ມູນເພີ່ມເຕີມ 

ບຸນໄຫຼເຮືອໄຟໃນປີນີ້ຈະ
ໄດ້ຈັດຂຶ້ນໃນວັນທີ 3 ຕຸລາ.
ການບິນລາວມີຖ້ຽວບິນໄປ
ຫຼວງພະບາງເປັນປະຈໍາ
ທຸກອາທິດ.

ຮູບໂດຍ ພູນຊັບ ເທວົງສາ

ແປ ແລະ ຮຽບຮຽງໂດຍ ວັນນະແສງ ອິນສານ