ອາດເວົ້າໄດ້ວ່າການປູກ ແລະ ເກັບກ່ຽວໃບຢາບໍ່ໄດ້ຫຍຸ້ງຍາກດັ່ງທີ່ຄິດ

ການປູກໃບຢາແມ່ນຕ້ອງມີການຫົດນໍ້າຢ່າງສະໝໍ່າສະເໜີ ເລີ່ມການປູກຕາມລະດູການ ແລະ ເກັບກ່ຽວເມື່ອເຖິງເວລາ. ການປູກໃບຢາກໍຄ້າຍຄືກັນກັບການປູກພືດຊະນິດອື່ນ: ກ້າເບ້ຍ, ເອົາເບ້ຍລົງດິນ, ໝັ່ນຫົດນໍ້າ ແລະ ລໍຖ້າເວລາເກັບກ່ຽວ. ໃນທາງຄໍາເວົ້ານັ້ນ, ການປູກໃບຢາແມ່ນແສນຈະງ່າຍ ແຕ່ໃນທາງປະຕິບັດນັ້ນບໍ່ແມ່ນເລີຍ.

ການປູກໃບຢາໃນລາວແມ່ນປູກໃນລະດູແລ້ງ ຕ່າງຈາກປະເທດອື່ນທີ່ປູກໃນລະດູຝົນ ເພາະລາວເຮົາຢູ່ໃນເຂດລົມມໍລະສຸມ ເຊິ່ງດິນຈະປຽກ ແລະ ອຸ້ມນໍ້າຫຼາຍເກີນໄປເຮັດໃຫ້ບໍ່ສາມາດປູກໃບຢາໄດ້. ເມື່ອສິ້ນສຸດລະດູຝົນ, ຊາວສວນຈຶ່ງສາມາດເລີ່ມປູກໃບຢາໄດ້.

ຊາວສວນຕ້ອງຫົດນໍ້າຕົ້ນໃບຢາເທື່ອລະຕົ້ນ ໂດຍໃຊ້ບົວຫົດນໍ້າ, ເຊິ່ງຕ້ອງຫົດອາທິດລະ 3-4 ມື້. ການຫົວນໍ້າດ້ວຍມື້ອາດຈະສ້າງບັນຫາໃຫ້ຊາວສວນພາຍຫຼັງໄດ້ ເນື່ອງຈາກວ່າການກະປະລິມານນໍ້າແມ່ນຍາກ ແລະ ບໍ່ມີລະບົບແບບແຜນ.

ຜົນສຸດທ້າຍເມື່ອໃບຢາບໍ່ໄດ້ຮັບປະລິນມານນໍ້າທີ່ພຽງພໍ ຫຼື ຫຼາຍເກີນໄປ, ມັນໄດ້ສົ່ງຜົນໃຫ້ໃບຢາອອກມາບໍ່ໄດ້ຄຸນນະພາບດີເທົ່າທີ່ຄວນ. ເຮົາຈະສັງເກດໄດ້ທີ່ຍອດຂອງໃບຢາເຊິ່ງເປັນບ່ອນທີ່ໄດ້ລາຄາດີທີ່ສຸດ ອາດບໍ່ໄດ້ຮັບນໍ້າເທົ່າທີ່ຄວນ ແລະ ເຮັດໃຫ້ຄຸນນະພາບຂອງໃບຢາຕົກລົງ. ການປູກໃບຢາແມ່ນສາມາດປູກໄດ້ພຽງປີລະຄັ້ງ,​ ສະນັ້ນ ຊາວສວນຈຶ່ງມີໂອກາດດຽວຕໍ່ປີໃນການເກັບກ່ຽວ ແລະ ຂາຍໃບຢາ. ຖ້າຫາກການປູກໃບຢາບໍ່ໄດ້ດີ ໝາຍຄວາມວ່າເຂົາເຈົ້າຕ້ອງລໍ້ຖ້າອີກ 1 ປີຈົນກວ່າລະດູແລ້ງຈະກັບມາອີກຄັ້ງ.

ມັນເປັນບັນຫາຫຼັກສຳລັບຊາວສວນເລີຍກໍວ່າໄດ້, ໂດຍສະເພາະບັນດາຊາວສວນທີ່ຫົດນໍ້າດ້ວຍມືຢູ່. ແຕ່ວ່າ ບໍລິສັດ ຢາສູບລາວ ຈໍາກັດ, ເຊິ່ງເປັນຜູ້ຮັບຊື້ໃບຢາຈາກຊາວສວນໂດຍກົງ ໄດ້ຄໍານຶງເຖິງບັນຫານີ້ ແລະ ຫາທາງແກ້ໄຂບັນກາ ໃຫ້ຊາວສວນດ້ວຍການແນະນໍາການສ້າງລະບົບຊົນລະປະທານ.

ການທົດລອງສ້າງ ແລະ ໃຊ້ລະບົບການຫົດນໍ້າໂດຍອັດຕະໂນມັດ ແມ່ນເລີ່ມຕົ້ນໃນປີນີ້ ໂດຍໄດ້ທົດລອງຢູ່ສວນຂອງຊາວສວນຈໍານວນ 30 ສວນ. ໃບຢາຈະໄດ້ຮັບການຫົວນໍ້າໂດຍທໍ່ນໍ້າແບບອັດຕະໂນມັດ ເຊິ່ງຈະຊ່ວຍຫຼຸດຜ່ອນເວລາໃນການເຮັດວຽກຂອງຊາວສວນລົງ.

ທ່ານ ມາກ ບາລລັນສ໌ ເຊິ່ງເປັນຜູ້ຈັດການຝ່າຍການຄວບຄຸມການປູກ ແລະ ປະສົມໃບຢາກ່າວວ່າ ລະບົບຊົນລະປະທານຈະຊ່ວຍຫຼຸດຈໍານວນແຮງງານໄດ້ຢ່າງຍືນຍົງ.​ “ມັນຈະຊ່ວຍຫຼຸດການໃຊ້ນໍ້າແບບຟຸມເຟືອຍ ແລະ ຊ່ວຍປັບສະພາບສວນ. ທາງດ້ານເຕັກນິກແລ້ວ ຖືວ່ານີ້ເປັນວິທີທີ່ມີປະໂຫຍດຫຼາຍ” ກ່າວໂດຍທ່ານມາກ.

ທ່ານໄດ້ເສີມຕື່ມວ່າ: “ ແລະ ສຳລັບຊາວສວນເອງ, ມັນຈະຊ່ວຍຫຼຸດຜ່ອນເວລາເຮັດວຽກຂອງເຂົາເຈົ້າລົງ ຈາກ 3-4 ມື້ຕໍ່ອາທິດ ເຫຼືອເຄື່ງມື້ຕໍ່ອາທິດ”

ມັນຈະຊ່ວຍປ້ອງການບໍ່ໃຫ້ຍອດຂອງໃບຢາຂາດນໍ້າ ຈົນແຫ້ງ. ລະບົບນີ້ຈະເຮັດການທົດລອງພຽງແຕ່ເຄິ່ງດຽວຂອງສວນ, ເພື່ອທີ່ທາງບໍລິສັດຈະສາມາດເກັບກຳຂໍ້ມູນຄວາມຕ້ອງແຕກຕ່າງໃນການໃຊ້ນໍ້າລະຫວ່າງສວນເຄິ່ງທີ່ໃຊ້ຊົນລະປະທານ ແລະ ສວນເຄິ່ງທີ່ໃຊ້ຊາວສວນຫົວດ້ວຍມືຄືເກົ່າ. ແຕ່ວ່າ ວິທີນີ້ຈະຊ່ວຍປະຫຍັດແຮງງານຂອງຊາວສວນໃນການເກັບກ່ຽວຢ່າງແນ່ນອນ.

ທ່ານ ມາກກ່າວວ່າທາງບໍລິສັດຕັ້ງໃຈທີ່ຈະສະແດງໃຫ້ຊາວສວນເຫັນຄວາມສຳເລັດໃນການໃຊ້ລະບົບຊົນລະປະທານ ແລະ ກະຕຸກຊຸກຍູ້ໃຫ້ຊາວສວນລົງທຶນໃນລະບົບຊົນລະປະທານ ເພື່ອປະຫຍັດເວລາ, ປະຫຍັດນໍ້າ ແລະ ປະຫຍັດທຶນໃນຕໍ່ໜ້າ.