ທໍາມະຊາດສາມາດພົບເຫັນໄດ້ທຸກແຫ່ງຖ້າທ່ານຮູ້ບ່ອນຊອກ!

ຕາດຍອດຊວງ
ໃນ​ຖາ​ນະ​ທີ່ເປັນ​ທີ່ຕັ້ງສູນ​ກາງ​ຂອງ​ລັດຖະບານ ​ແລະ ແຫຼ່ງລວມທຸລະ​ກິດທີ່ໃຫຍ່ທີ່ສຸດຂອງລາວ, ນະຄອນຫຼວງ​ວຽງ​ຈັນ​ ຖ້າເບິ່ງໆ​ແລ້ວຄືຈະບໍ່ມີ​ແຫຼ່ງທ່ອງ​ທ່ຽວທາງ​ທຳ​ມະ​ຊາດໃດໃຫ້ໄດ້ໄປທ່ຽວໄປຫຼີ້ນຄືກັບແຂວງອື່ນໆເລີຍ, ແຕ່ນີ້ບໍ່ແມ່ນຄວາມຈິງເລີຍ! ທ່ານສາມາດໄປຢ້ຽມຊົມສະ​ຖານ​ທີ່​ ທີ່ສວຍງາມ ແລະ ໜ້າ​ຕື່ນ​ຕາຕື່ນໃຈ ດ້ວຍການຂັບລົດພຽງ ໜຶ່ງ ຫຼື ສອງຊົ່ວໂມງບວກກັບ​ຖະ​ໜົນ​ຫົນ​ທາງທີ່ຖືກສ້ອມແປງໃໝ່ ການ​ໄປຫຼີ້ນໄປທ່ຽວ​ໄດ້ກາຍມາເປັນເລື່ອງທີ່ງ່າຍ​ຂຶ້ນຫຼາຍ.

ຕາດຍອດຊວງ
ຕາດທີ່ງົດງາມຕະການຕາແຫ່ງນີ້ ປຽບໄດ້ດັ່ງກັບອັນຍະມະນີທີ່ຖືກເຊື່ອງຊ້ອນໄວ້ລໍຖ້າໃຫ້ຄົນມາຄົ້ນພົບ. ສາຍນ້ຳທີ່ຫຼັ່ງໄຫຼລົງຈາກໜ້າຜາຫີນ ກະທົບໃສ່ກັບກ້ອນຫີນ ແລ້ວກະເດັນອອກໄປດັ່ງເມກໝອກ ໃຫ້ຄວາມຮູ້ສຶກທີ່ສົດຊື່ນອີ່ຫຼີ ທັງເປັນສາກຫຼັງທີ່ສວຍງາມສຳລັບການຖ່າຍພາບໃນຊ່ວງລະດູຝົນ ແລະ ອາກາດໜາວເຢັນເພາະເປັນຊ່ວງທີ່ນ້ຳຕົກຕາດຈະບໍ່ແຫ້ງ!

ອ່າງນ້ຳມັງ
ໂຄງການກໍ່ສ້າງເຂື່ອນໄຟຟ້າ ໄດ້ເຮັດໃຫ້ເກີດມີອ່າງເກັບນ້ຳ ທີ່ມີທັດສະນີຍະພາບອັນສວຍງາມ ຂຶ້ນທີ່ເຂດພູເຂົາຄວາຍ. ນອກຈາກນັ້ນ, ທ່ານຈະສາມາດພົບເຫັນ ຕົ້ນແປກ ຂຶ້ນຢູ່ເຂດພູສູງ ທີ່ເບິ່ງແລ້ວປານວ່າບໍ່ແມ່ນຢູ່ ນະຄອນຫຼວງວຽງຈັນ.
ທ່ານສາມາດໄປກິນເຂົ້າປ່າ ຫຼື ໄປຕັ້ງແຄ້ມແຄມແມ່ນ້ຳກໍໄດ້.

ພູພະນັງ
ຕັ້ງຢູ່ທາງທິດຕາເວັນຕົກຂອງ ນະຄອນຫຼວງວຽງຈັນ, ເຂດພູດອຍແຫ່ງນີ້ມີເສັ້ນທາງຍ່າງປ່າທີ່ໂດ່ງດັງ ແລະ ສາມາດໄປ-ກັບໄດ້ພາຍໃນໜຶ່ງວັນໄດ້. ເມື່ອຂຶ້ນໄປເທິງຍອດພູ, ທ່ານຈະໄດ້ເຫັນທັດສະນີຍະພາບຂອງແມ່ນ້ຳຂອງທີ່ຍາວຢຽດອອກໄປຮອດຝັ່ງໄທ ສວຍສົດງົດງາມອີ່ຫຼີ! ຈຸດຕັ້ງຕົ້ນຂອງເສັ້ນທາງການຍ່າງປ່າແມ່ນຈະເລີ່ມຈາກ ຮ້ານ Wealth Coffee ທີ່ ບ້ານອ່າງໃຫຍ່.

ອ່ງນ້ຳຫຸມ
ອ່າງ​ເກັບ​ນ້ຳ​ແຫ່ງ​ນີ້​ໄດ້ຖືກ​ສ້າງ​ຂຶ້ນ​ເມື່ອ 40 ປີ​ກ່ອນ​ເພື່ອ​ໃຊ້ເປັນຊົນ​ລະ​ປະ​ທານ​ໃຫ້ແກ່ການເຮັດກະ​ສິ​ກຳ​ໃນ​ເຂດ​ດັ່ງ​ກ່າວ. ໜຶ່ງໃນຜົນປະໂຫຍດທີ່ໄດ້ຮັບແມ່ນ ອ່າງເກັບນໍ້າແຫ່ງນີ້ເປັນແຫຼ່ງຫາປາທີ່ອຸດົມສົມບູນ. ທ່ານສາມາດພົບເຫັນຊາວບ້ານຕຶກກະດຸ້ງຫາປາຢູ່ໃນເຂດນັ້ນ.

ຜາງອຍ
ຢູ່ທີ່ສົ້ນຂອງໜ້າຜາຫີນແຫ່ງນີ້ ມີແຜ່ນຫີນນ້ອຍໆແຜ່ນໜຶ່ງຕັ້ງຢູ່ຢ່າງດຸ່ນດ່ຽງເປັນເວລາຫຼາຍພັນປີ. ຊາວບ້ານພາກັນມາຍ່າງຂຶ້ນພູ ຫຼື ຂີ່ລົດຈັກມາບໍລິເວນນີ້ເພື່ອຖ່າຍຮູບເຊວຟີ້ ແລະ ຊົມວິວທິວທັດຂອງທົ່ງພຽງວຽງຈັນທີ່ຢູ່ຂ້າງລຸ່ມ.

ອ່າງນໍ້າຊວງ
ແມ່ນໍ້າແຫ່ງນີ້ມີພື້ນທີ່ຂະໜາດໃຫຍ່ໄວ້ໃຫ້ໄດ້ທ່ຽວໄດ້ສໍາຫຼວດ. ໃນນັ້ນເອງກໍ່ມີຮ້ານອາຫານທ້ອງຖິ່ນແຊບໆຕັ້ງຢູ່ແຕ່ເໜືອຕະຫຼອດໃຕ້ ເຊິ່ງຈະຊ່ວຍເຮັດໃຫ້ການມາພັກຜ່ອນຂອງທ່ານໄດ້ຜ່ອນຄາຍເຕັມທີ່ກັບໝູ່ເພື່ອນໃນຊ່ວງວັນເສົາ-ອາທິດ. ນອກນັ້ນ ຍັງສາມາດ ເຊົ່າເຮືອເພື່ອໄປຢ້ຽມຊົມ, ຫຼື ຕັ້ງແຄ້ມຢູ່ເກາະດອນຂະໜາດນ້ອຍບາງແຫ່ງໄດ້.

ພູກອງເຂົ້າ
ຕັ້ງຢູ່ທາງທິດເໜືອສຸດຂອງອ່າງເກັບນ້ຳມັງ, ເຂດດັ່ງກ່າວເປັນເຂດທີ່ເໝາະສຳລັບການໄປກິນເຂົ້າປ່າ ແລະ ຕັ້ງແຄ້ມ. ການຍ່າງຂຶ້ນພູຢູ່ເຂດນີ້ຈະນໍາພາທ່ານ ໄປສໍາຜັດ ແລະ ເບິ່ງຊົມພູມສັນຖານທີ່ໜ້າແປກຕາ ແລະ ທິວທັດທີ່ສວຍງາມ.

ພູຜາໄດ
ແມ່ນໜຶ່ງໃນເຂດທີ່ສູງທີ່ສຸດທີ່ຕັ້ງຢູ່ໃກ້ກັບ ນະຄອນຫຼວງວຽງຈັນ, ສໍາລັບຜູ້ຈະເດີນທາງໄປ ພູຜາໄດ ແມ່ນແນະນໍາໃຫ້ສະເພາະຜູ້ທີ່ມັກການປະຈົນໄພແບບໜັກໜ່ວງ ເພາະຕ້ອງໃຊ້ເວລາຍ່າງປ່າປະມານ 6–7 ຊົ່ວໂມງຈາກອ່າງນ້ຳມັງໄປ, ສະນັ້ນໃຫ້ເອົາຜ້າເຕັ້ນໄປນໍາ, ແລ້ວທ່ານຈະສາມາດເພີດເພີນກັບທ້ອງຟ້າຍາມຄໍ່າຄືນໄດ້ເຕັມທີ່!

ຮູບໂດຍ ພູນຊັບ ເທວົງສາ
ແປ ແລະ ຮຽບຮຽງໂດຍ ວັນນະແສງ ອິນສານ