ເດີນທາງສູ່ຫົນທາງທຳມະຊາດ ເພື່ອຮຽນຮູ້ ແລະ ປົກປັກຮັກສາຊ້າງລາວ

ພວກມັນປາກົດຕົວຂຶ້ນທ່າມກາງໝອກຍາມເຊົ້າ, ຝູງຮ່າງສີໝົ່ນ ຄ່ອຍໆເຄື່ອນຍ້າຍຈາກຈອມພູ ລົງຫາຫ້ວຍ. ພວກມັນຄ່ອຍໆຈຸ່ມຕົວລົງແຄມນ້ຳຕຽນ, ເທື່ອລະຕົວ ເທື່ອລະຕົວ. ຂະບວນສັດສອງງ່າເຄື່ອນທີ່ຢ່າງງຽບສະຫງົບ ມີພຽງສຽງຮ້ອງຈາກຊ້າງນ້ອຍກາງຝູງທີ່ໄດ້ສ້າງສຽງເພງຍາມເຊົ້າໃຫ້ແກ່ຝູງຂອງມັນ.

ປະເທດລາວ, ເຊິ່ງແຕ່ກ່ອນເຄີຍຖືກເອີ້ນວ່າດິນແດນລ້ານຊ້າງ, ແຕ່ດຽວນີ້ເຫັນວ່າປະຊາກອນຊ້າງໄດ້ຫຼຸດລົງຢ່າງຫຼວງຫຼາຍ ຍ້ອນການຕັດໄມ້ທຳລາຍປ່າ ແລະ ການລ່າສັດແບບຜິດກົດໝາຍ. ສູນອະນຸລັກຊ້າງລາວໄດ້ຖືກກໍ່ຕັ້ງຂຶ້ນໃນ ປີ 2011 ໂດຍທ່ານ ເຊບາສຕຽນ ດູຟີໂລ, ເຊິ່ງເປັນຜູ້ຮ່ວມກໍ່ຕັ້ງອົງການ ElefantAsia. ທ່ານເຮັດວຽກເປັນນັກອະນຸລັກຊ້າງໃນລາວ ເປັນເວລາ 20 ປີແລ້ວ, ແລະ ທ່ານກໍມີຄວາມຕັ້ງໃຈທີ່ຈະຫັນປ່ຽນສະພາບຄວາມເປັນຢູ່ຂອງຊ້າງໃຫ້ເປັນຕາມທຳມະຊາດຂອງມັນ ໂດຍການສ້າງຄວາມຮູ້ ຄວາມເຂົ້າໃຈກ່ຽວກັບວິຖີຊີວິດຂອງຊ້າງ, ແລະໃຫ້ໂອກາດຄົນໄດ້ເຂົ້າຢ້ຽມຊ້າງໃນສະພາບແວດລ້ອມຕາມທຳມະຊາດຂອງມັນດ້ວຍຄວາມເຄົາລົບ.

ຊ້າງໃນສູນນີ້ແມ່ນມາເພື່ອພັກຜ່ອນ, ລໍຖ້າເກີດລູກ ຫຼື ພັກຟື້ນຈາກການເຮັດວຽກແກ່ໄມ້ ຫຼື ເຮັດວຽກໃນອຸດສາຫະກຳທ່ອງທ່ຽວ. ທ່ານຈະບໍ່ໄດ້ເຫັນທົວນັກທ່ອງທ່ຽວມາຂີ່ຊ້າງ ຫຼື ອາບນ້ຳໃຫ້ຊ້າງ. ຢູ່ທີ່ນີ້, ຊ້າງໃຊ້ຊີວິດຄືຊ້າງແທ້ໆ!
ໂດຍລວມແລ້ວ, ທາງສູນເປັນບ່ອນທີ່ເອົາໃຈໃສ່ຄວາມເປັນຢູ່, ສັງເກດ ແລະ ຮຽນຮູ້ສັດ. ຢູ່ທີ່ນີ້ຈະບໍ່ມີການສື່ສານ ແລະ ພົວພັນກັບຊ້າງ ເພາະເປົ້າໝາຍຂອງທີ່ນີ້ແມ່ນເພື່ອຫຼີກລ່ຽງການເຂົ້າໃກ້ມະນຸດ ເຊິ່ງອາດກະທົບເຖິງພຶດຕິກຳທາງທຳມະຊາດຂອງພວກມັນ. ເນື່ອງຈາກວ່າທາງສູນອະນຸລັກຊ້າງລາວ ມີຄວາມຫວັງວ່າຈະປ່ອຍຊ້າງເຫຼົ່ານີ້ ຄືນສູ່ປ່າໃນທີ່ສຸດ, ສະນັ້ນສິ່ງທີ່ສຳຄັນຈິ່ງແມ່ນການທີ່ພວກມັນມ່ວນກັບການເປັນທຳມະຊາດຂອງຊ້າງ ໂດຍທີ່ ບໍ່ຕ້ອງເຮັດກິດຈະກຳທີ່ຄົນສ້າງໃຫ້ ຫຼື ພົບກັບຄົນ.

ນັກທ່ອງທ່ຽວສາມາດສັງເກດເບິ່ງຊ້າງໄດ້ຈາກຫຼາຍຈຸດໃນສູນ, ເຊິ່ງໜຶ່ງໃນນັ້ນແມ່ນເຮືອນຕົ້ນໄມ້ທີ່ຕັ້ງຢູ່ໃນປ່າ ໃນເຂດຊຸມຊົນຊ້າງ. ສູນອະນຸລັກຊ້າງເປັນໂຮງໝໍຊ້າງແຫ່ງດຽວໃນລາວ, ໃນນັ້ນຍັງມີນັກຊີວະວິທະຍາທີ່ສາມາດໃຫ້ຄຳຕອບຕໍ່ກັບທຸກຄຳຖາມຂອງທ່ານກ່ຽວກັບວົງຈອນຊີວິດຂອງຊ້າງ. ກິດຈະກຳອື່ນລວມມີການຢ້ຽມຢາມພິພິຕະພັນຊ້າງ, ການຂີ່ເຮືອຄາຢັກໃນແມ່ນ້ຳຕຽນອັນສວຍງາມ, ແລະ ການຊ່ວຍນໍາຊ້າງກັບເຂົ້າປ່າ ໃນຕອນກາງຄືນເພື່ອກັບບ່ອນທີ່ພັກຂອງມັນ.
ສູນອະນຸລັກຊ້າງ ເປັນບ່ອນທີ່ທ່ານສາມາດເຂົ້າເຖິງຊ້າງໄດ້ຢ່າງໃກ້ຊິດໃນສະພາບແວດລ້ອມຕາມທຳມະຊາດຂອງພວກມັນ. ສູນນີ້ຕັ້ງຫ່າງໄກຈາກສະຖານທີ່ທ່ອງທ່ຽວທັງຫຼາຍ ແລະ ນຳໃຊ້ວິທີການຄົບວົງຈອນໃນການອະນຸລັກຊ້າງລາວ. ສູນນີ້ບໍ່ແມ່ນແຄມຊ້າງທົ່ວໄປ, ເນື່ອງຈາກວ່າສູນອະນຸລັກຊ້າງລາວ ບໍ່ໄດ້ ເອົາຊ້າງຈາກປ່າເຂົ້າມາໃນເຂດນັກທ່ອງທ່ຽວ. ແຕ່ກົງກັນຂ້າມ, ທ່ານຕ້ອງໄດ້ເຂົ້າໄປຫາພວກມັນ, ເຂົ້າໄປໃນທີ່ທີ່ຊ້າງແມ່ນຊ້າງໂດຍແທ້ຈິງ.

ການເດີນທາງໄປສູນ:
ມີລົດຕູ້ນ້ອຍຮັບສົ່ງຈາກສະຖານີຫຼວງພະບາງ ການເດີນທາງແມ່ນໃຊ້ເວລາ 2 ຊົ່ວໂມງ ແລະຕ້ອງໄດ້ຈອງບ່ອນນັ່ງກ່ອນທີ່ຫ້ອງການຂອງສູນອະນຸລັກຊ້າງລາວ, ບ້ານປາຄໍາ, ຫຼວງພະບາງ.

ຕິດຕໍ່ໄດ້ທີ່:
ໂທ: +856(0)71 2523 07, +856(0)20 96 59 06 65 elephantconserva-tioncenter.com

ແປ ແລະ ຮຽບຮຽງໂດຍ ວິໄລພອນ ຈຸລາມະນີ
ຮູບໂດຍ PAUL WAGER / ECC