ສະຖານທີ່ທີ່ຈະພາທ່ານຍ້ອນອະດີດໄປຮູ້ຈັກກັບແຂວງ ຊຽງຂວາງຕັ້ງແຕ່ອະດີດຕະການ

ຫໍພິພິທະພັນມູນເຊື້ອແຂວງຊຽງຂວາງໄດ້ຖືກຈັດໃຫ້ເປັນໜຶ່ງໃນຫໍພິພິທະພັນທີ່ດີທີ່ສຸດໃນອາຊີຕາເວັນອອກສ່ຽງໃຕ້ ຫຼັງຈາກເປີດໃຫ້ເຂົ້າຊົມຢ່າງເປັນທາງການໃນທ້າຍປີ 2018. ສະຖານທີ່ແຫ່ງນີ້ເຕັມໄປດ້ວຍເລື່ອງລາວ, ສິ່ງປະດິດສະຖານ,​ ຮູບເງົາສັ້ນ ແລະ ເຄື່ອງວາງສະແດງອື່ນໆທີ່ຈະເຮັດໃຫ້ທ່ານຮູ້ສຶກຕື່ນຕາຕື່ນໃຈ ເຊິ່ງບໍ່ແປກໃຈເລີຍທີ່ສະຖານທີ່ແຫ່ງນີ້ໄດ້ຮັບຊື່ສຽງກ່າວຂານດັ່ງກ່າວ.

ສະຖານທີ່ແຫ່ງນີ້ບອກເລົ່າຄວາມເປັນມາຂອງແຂວງ ຊຽງຂວາງໃນແຕ່ລະຍຸກສະໄໝ, ໂດຍສະເພາະສະໄໝສົງຄາມທີ່ເກືອບບໍ່ມີວັນສິ້ນສຸດຂອງອະນາຈັກ ພວນ ທີ່ຄັ້ງໜຶ່ງໃນອະດີດເຄີຍເປັນອະນາຈັກທີ່ອຸດົມຮັ່ງມີເທິງພູພຽງຊຽງຂວາງແຫ່ງນີ້, ໃນຍຸກທີ່ຜູ້ຄົນຈາກຈີນ, ຫວຽດນາມແລະໄທອົບພະຍົບເຂົ້າມາລາວຜ່ານເສັ້ນທາງການຄ້າຕາມພູພຽງແລະຄວາມລຶກລັບຕ່າງໆຂອງແຂວງເຊັ່ນທົ່ງໄຫຫີນ ເຊິ່ງກຳລັງຖືກຂໍບັນຈຸເຂົ້າໃນລາຍການມໍລະດົກໂລກຂອງໂຄງການອຸຍເນສໂກ.

ຫໍພິພິທະພັນແຫ່ງນີ້ເປັນເຮືອນຊົງລາວສອງຊັ້ນ ຕັ້ງບໍ່ຫ່າງຈາກໃຈກາງເມືອງໂພນສະຫວັນຫຼາຍ. ສະຖານທີ່ແຫ່ງນີ້ຖືກສ້າງຂຶ້ນເພື່ອເປັນຈຸດໃຈກາງທາງດ້ານວັດທະນະທຳສຳລັບປະຊາຊົນໃນແຂວງ ຊຽງຂວາງ, ນັກຮຽນ-ນັກສຶກສາ,ນັກທ່ອງທ່ຽວ ແລະ ນັກບູຮານນະຄະດີຈາກຕ່າງປະເທດ ສາມາດເຂົ້າຊົມ,ສຶກສາຄວາມເປັນມາ ແລະ ເລື່ອງລາວຂອງແຂວງ ຊຽງຂວາງໄດ້ຢ່າງງ່າຍດາຍແລະ ສະດວກກວ່າແຕ່ກ່ອນທີ່ການເຂົ້າເຖິງຂໍ້ມູນທາງດ້ານປະຫວັດສາດແມ່ນຈໍາກັດ.

ເມື່ອກ້າວເຂົ້າມາໃນພິພິທະພັນ, ທ່ານຈະໄດ້ພົບກັບພະນັກງານຕ້ອນຮັບທີ່ຈະທັກທາຍທ່ານດ້ວຍຮອຍຍິ້ມ ແລະ ພ້ອມອຳນວຍຄວາມສະດວກທ່ານໃນການເລາະຊົມຫໍພິພິທະພັນແຫ່ງນີ້. ຊັ້ນໜຶ່ງຂອງພິພິທະພັນແມ່ນວາງສະແດງກ່ຽວກັບຄວາມເປັນມາຂອງແຂວງ ຊຽງຂວາງ, ຄວາມລຶກລັບທີ່ໜ້າຄົ້ນຫາຂອງທົ່ງໄຫຫີນ, ແລະ ຄວາມອຸດົມຮັ່ງມີຂອງ ອະນາຈັກພວນ ເຊິ່ງເຄີຍປົກຄອງພູພຽງແຫ່ງນີ້ໃນເມື່ອກ່ອນ.

ພາຍໃນຊັ້ນສອງຂອງພິພິທະພັນ, ທ່ານຈະໄດ້ຊົມການວາງສະແດງຕ່າງໆໃນສະໄໝສົງຄາມອິນໂດຈີນແບບເຈາະເລິກແລະຄົບຖ້ວນ. ພ້ອມດຽວກັນນັ້ນ, ຍັງມີການວາງສະແດງແຜ່ນຜ້າ,ມີຫຸ່ນວາງສະແດງຮູບແບບການແຕ່ງກາຍ, ເຄື່ອງດົນຕີແລະສິ່ງປະດິດຈາກຊົນເຜົ່າຫຼັກທັງ6 ຊົນເຜົ່າໃນຊຽງຂວາງ. ນອກຈາກນັ້ນ, ຍັງມີການວາງສະແດງພາບເຫດການ ແລະ ຄວາມຫຍຸ້ງຍາກຕ່າງໆ ໃນໄລຍະກ່ອນການຍຶດອໍານາດ ຂອງ ສປປ ລາວ ແລະ ມີການສາຍຮູບເງົາສັ້ນກ່ຽວກັບຄວາມຫຼາກຫຼາຍທາງດ້ານວັດທະນະທຳ ແລະ ສະຖານທີ່ທ່ອງທ່ຽວຕ່າງໆຂອງຊຽງຂວາງ ເຊິ່ງສາຍແບບຕໍ່ເນື່ອງ ເພື່ອໃຫ້ທ່ານໄດ້ຮັບຊົມຄວາມງາມຂອງແຂວງຊຽງຂວາງໄດ້ຢ່າງເພີດເພີນອີກດ້ວຍ.

ຫໍພິພິທະພັນແຫ່ງນີ້ເໝາະສົມສໍາລັບຜູ້ເຂົ້າຊົມທຸກເພດ, ທຸກໄວ; ມີຮ້ານຂາຍເຄື່ອງທີ່ລະນຶກ, ຫ້ອງຮຽນ, ຫ້ອງປະຊຸມ ແລະ ຫ້ອງຄົ້ນຄວ້າສໍາລັບການສຶກສາແລະ ວິໄຈວັດຖຸບູຮານ ຫຼື ສິ່ງປະດິດຕ່າງໆ.

ຫໍພິພິທະພັນແຂວງຊຽງຂວາງ ເໝາະສົມສໍາລັບນັກທ່ອງທ່ຽວທີ່ຕ້ອງການຄົ້ນຄວ້າ ແລະ ຮຽນຮູ້ກ່ຽວກັບມໍລະດົກຂອງລາວ ຫຼື ຄວາມເປັນມາຂອງແຂວງຊຽງຂວາງໄດ້ເປັນຢ່າງດີ.ສາມາດເວົ້າໄດ້ວ່າພິພິທະພັນແຫ່ງນີ້ແມ່ນໜຶ່ງໃນສະຖານທີ່ທາງດ້ານວັດທະນະທຳທີ່ດີທີ່ສຸດຂອງ ສປປ ລາວ ກໍ່ວ່າໄດ້.

ຂໍ້ມູນເພີ່ມຕື່ມ:

ຫໍພິພິທະພັນຕັ້ງຢູ່ຖະໜົນມິດຕະພາບຊຽງຂວາງ-ເຫງະອານ, ບ້ານ ໂພນສະຫວັນ

ເປີດວັນຈັນ-ສຸກ, ເວລາ 9:00 – 4:00

ຂຽນໂດຍ: ROSS CORBETT

ແປ ແລະ ຮຽບຮຽງໂດຍ: ອານິຕາ ສຸພະເຂດ

ຮູບຈາກ: ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ ຊຽງຂວາງ