ເພີ່ມສຸນທະລີໃຫ້ມື້ອາຫານຂອງທ່ານກັບບັນຍາກາດແສນສົດຊື່ນທີ່ສວນພຶກສາຊາດທີ່ຜາຕັດແກ້

ນະຄອນຫຼວງພະບາງເປັນເມືອງທີ່ຂື້ນຊື່ໃນເລື່ອງຄວາມງາມທາງດ້ານວັດທະນະທຳ ແລະ ທັດສະນິຍະພາບຂອງເມືອງ. ມີຮ້ານອາຫານທີ່ມີຄວາມເປັນເອກະລັກຫຼາກຫຼາຍ ບໍ່ວ່າຈະເປັນຮ້ານອາຫານຕາມແບບສະບັບທ້ອງຖິ່ນ, ແບບຕາເວັນຕົກ ແລະ ແບບຟິວຊັນ ເພື່ອຕ້ອນຮັບທຸກກຸ່ມຄົນທັງນັກທ່ອງທ່ຽວຕ່າງຊາດ ແລະ ຜູ້ຄົນໃນທ້ອງຖິ່ນ. ໜຶ່ງໃນຮ້ານອາຫານທີ່ກຳລັງມາແຮງໃນຕອນນີ້ແມ່ນ ຮ້ານອາຫານ ສວນພຶກສາຊາດ ຜາຕັດແກ້. ວາລະສານ Forbes ຍັງໄດ້ຈັດອັນດັບໃຫ້ຮ້ານອາຫານ ສວນພຶກສາຊາດ ຜາຕັດແກ້ເປັນໜຶ່ງໃນສິບຮ້ານອາຫານສະໄຕລ໌ Farm to Table ທີ່ດີທີ່ສຸດ ເມື່ອບໍ່ດົນມານີ້.

Farm to Table (ຟາມທູເທໂບ້) ແມ່ນແນວຄວາມຄິດໃໝ່ທີ່ກຳລັງເປັນທີ່ນິຍົມໃນວົງການອາຫານໂລກ. ຟາມທູເທໂບ້ເປັນຮ້ານອາຫານທີ່ນໍາໃຊ້ວັດຖຸດິບທີ່ເກັບຈາກສວນຂອງຕົນເອງ, ສ່ວນປະກອບທີ່ ຊື້ຈາກສວນໃນທ້ອງຖິ່ນ ຫຼື ຈາກຕະຫຼາດປອດສານພິດ. ແນວຄວາມຄິດດັ່ງກ່າວໄດ້ມາຈາກການທີ່ຜູ້ຄົນຫັນມາໃສ່ໃຈໃນສຸຂະພາບຫຼາຍຂຶ້ນ ແລະ ສວນພຶກສາຊາດ ຜາຕັດແກ້ ກໍພະຍາຍາມຍົກໃຫ້ເຫັນຄວາມສຳຄັນຂອງແນວຄວາມຄິດດັ່ງກ່າວຜ່ານກິດຈະກຳດ້ານການສຶກສາຫຼາກຫຼາຍຮູບແບບ. ວັດຖຸດິບສ່ວນໃຫຍ່ທີ່ຮ້ານອາຫານນໍາມາປຸງແຕ່ງແມ່ນມາຈາກສວນປອດສານພິດ ແລະ ສວນສາທິດ ພາຍໃນສວນພຶກສາຊາດ ຜາຕັດແກ້ ເຊິ່ງນັກທ່ອງທ່ຽວກໍສາມາດເຂົ້າຊົມໄດ້ ໃນເວລາທີ່ມາຢ້ຽມຊົມສວນແຫ່ງນີ້.

ເມນູຕ່າງໃນຮ້ານແມ່ນຖືກສັນສ້າງຂຶ້ນມາໂດຍ ເຊບຈັນ ຫົວໜ້າຄົວຜູ້ຊໍານານຂອງຮ້ານ ຮ່ວມກັນກັບ ຣິກ ກາເດລາ ເຈົ້າຂອງສວນພຶກສາຊາດ ຜາຕັດແກ້ ໃນການຄັດເລືອກເມນູອາຫານທີ່ດີທີ່ສຸດເພື່ອເສີບໃນຮ້ານ. ອາຫານຫຼັກໃນຮ້ານແມ່ນຈະເປັນອາຫານລາວເຊັ່ນວ່າ: ລາບ (ລາບປາ,​ ລາບໄກ່ ແລະ ລາບເຕົາຮູ້), ຍໍາສົ້ມໂອ (ຍໍາໝາກກ້ຽງໃຫຍ່ກັບປາທອດກອບ), ແໜມເຂົ້າ (ເສີບພ້ອມກັບແຈ່ວໝາກຂາມ ແລະ ລູກຊີ້ນ). ທ່ານສາມາດເລືອກໃຫ້ອາຫານປຸງແຕ່ງແບບມັງສາວິລັດໄດ້ ແລະ ສາມາດເລືອກລະດັບຄວາມເຜັດຂອງອາຫານ ສຳລັບທ່ານທີ່ຍັງບໍ່ລຶ້ງກິນອາຫານລົດຈັດແບບຄົນທ້ອງຖິ່ນ. ເມນູແນະນໍາຂອງທາງຮ້ານແມ່ນໄກ່ຂີ້ຫຼດ (ໄກ່ຜັດໃບຂີ້ຫູດ) ກັບ ຍໍາສົ້ມໂອ.

ຄອບຄົວຂອງເຊບຈັນມີທຸລະກິດຮ້ານອາຫານທ່າເຮືອທີ່ແຂວງຫຼວງນໍ້າທາ ແລະ ລາວກໍມີໂອກາດໄດ້ມາປັບປຸງສີມືການປຸງແຕ່ງອາຫານຢູ່ທີ່ສວນແຫ່ງນີ້. ເຊບຈັນໄດ້ສ້າງສູດອາຫານຂຶ້ນມາໃໝ່ສຳລັບຮ້ານອາຫານ ສວນພຶກສາຊາດ ຜາຕັດແກ້ ຂຶ້ນມາຈາກປະສົບການໃນການເຮັດອາຫານກັບທຸລະກິດຄອບຄົວ ແລະ ປະສົບການທີ່ໄດ້ເຮັດຮ່ວມກັບທາງຮ້ານ. ທາງຮ້ານອາຫານໄດ້ມີໂອກາດຕ້ອນຮັບ ເຊບ ແສງ ຫຼວງລາດ ຈາກຮ້ານອາຫານ ຕິບເຂົ້າລາວ ຮ້ານອາຫານລາວທີ່ມີຊື່ສຽງໃນລັດ ວໍຊິງຕັນ ດີຊີ, ສະຫະລັດອາເມລິກາ. ຕອນທີ່ ເຊບແສງ ໄດ້ມາຢ້ຽມຢາມຜາຕັດແກ້, ລາວໄດ້ແນະນຳ ເຊບ ຈັນ ກ່ຽວກັບວິທີການນໍາສະເໜີອາຫານ ກໍຄືການຈັດແຕ່ງຈານອາຫານ ເພື່ອຮັບປະກັນວ່າ ບໍ່ພຽງແຕ່ອາຫານຈະມີລົດຊາດແຊບເທົ່ານັ້ນ ແຕ່ຍັງມີໜ້າຕາທີ່ດູດີພ້ອມ.

ວິທີເດີນທາງ:​

ສຳລັບປີ້ເຂົ້າຊົມສວນແມ່ນສາມາດຫາຊື້ໄດ້ທີ່ ຈຸດໃຫ້ຂໍ້ມູນຂອງຜາຕັດແກ້

ເຊິ່ງຕັ້ງຢູ່ໃນເມືອງຫຼວງພະບາງ ທີ່ບ້ານ ວັດທາດ. ລາຄາປີ້ດັ່ງກ່າວ ຈະລວມມີ

ຄ່າເຂົ້າຊົມສວນ ແລະ ຄ່າລ່ອງເຮືອ 15 ນາທີ. ນັກທ່ອງທ່ຽວສາມາດຊື້ອາຫານ

ລວມໃນປີ້ ຫຼື ສາມາດເລືອກອາຫານເອງໄດ້ທີ່ຮ້ານອາຫານຂອງເພິ່ນ.

ລາຄາອາຫານສ່ວນໃຫຍ່ແມ່ນຢູ່ທີ່ປະມານ ຈານລະ 50,000 ກີບ.

ຂຽນໂດຍ: DAVID ORMSBY

ຮູບພາບ: VYRIL EBERLE & DAVID ORMSBY

ແປ ແລະ ຮຽບຮຽງໂດຍ: ວິໄລສອນ ເຫຼື້ອງ