ສູດອາກາດບໍລິສຸດໃຈກາງເມືອງ

ຜ່ອນຄາຍຢູ່ຮ້ານກາເຟຢູ່ນະຄອນຫຼວງວຽງຈັນ
ນະຄອນຫຼວງວຽງຈັນ, ເມືອງຫຼວງຂອງ ສປປ ລາວ, ເມືອງທີ່ຂຶ້ນຊື່ເລື່ອງການທ່ອງທ່ຽວທັງທາງວັດທະນະທຳ ແລະ ປະຫວັດສາດທີ່ເຕັມໄປດ້ວຍຄວາມງົດງາມອັນແສນລ້ຳຄ່າຕໍ່ກັບປະເທດລາວບໍ່ວ່າຈະແມ່ນ ປະຕູໄຊ ອານຸສາວະລີ ທີ່ແມ່ນສິ່ງກໍ່ສ້າງ ເພື່ອເປັນອານຸສອນ ແກ່ການປະກາດເອກະລາດຈາກການປົກຄອງຂອງປະເທດຝຣັ່ງ, ທາດຫຼວງ ຫຼື ພະທາດຫຼວງ ຊຶ່ງເປັນປູຊະນິຍະສະຖານບູຮານອັນເປັນສັນຍະລັກຂອງປະເທດລາວ ແລະ ເປັນມິ່ງຂວັນຂອງປະຊາຊົນລາວຊາວພຸດທັງສອງຟາກຝັ່ງແມ່ນ້ຳຂອງເປັນຕົ້ນແລ້ວ ແຕ່ນອກຈາກນັ້ນແລ້ວ ນະຄອນຫຼວງວຽງຈັນກໍ່ຍັງມີແຫຼ່ງທ່ອງທ່ຽວທາງທຳມະຊາດທີ່ງົດງາມບໍ່ນ້ອຍໜ້າໄປກວ່າແຂວງອື່ນໃນ ສປປ ລາວ ອີກດ້ວຍ.
ແຕ່ມື້ນີ້ເຮົາຈະມາຍົກເລື່ອງທຳມະຊາດທີ່ທ່ານສາມາດເຂົ້າເຖິງໄດ້ໂດຍທີ່ບໍ່ຈຳເປັນທີ່ຈະຕ້ອງອອກຈາກໄປໄກຈາກນະຄອນຫຼວງເລີຍ ກໍ່ສາມາດຫາຍໃຈຮັບເອົາອາກາດທີ່ບໍລິສຸດເຂົ້າເຕັມປອດ ແລ້ວປ່ອຍໃຫ້ທຳມະຊາດໄດ້ຟື້ນຟູ ແລະ ໂອບກອດຕົວທ່ານຈາກຄວາມເມື່ອຍລ້າຈາກການຮຽນ, ການເຮັດວຽກ ຫຼື ການໃຊ້ຊີວິດ.

Aiden’s by Manee Cafe
ຖ້າທ່ານກຳລັງຊອກຫາສະຖານທີ່ທີ່ຈະນັ່ງອ່ານໜັງສືເຫຼັ້ມທີ່ທ່ານມັກພ້ອມກັບຟັງສຽງນ້ຳພຸທີ່ຈະຊ່ວຍໃຫ້ຈິດໃຈທ່ານສະຫງົບ ບວກກັບວິວຕົ້ນໄມ້ໃບຫຍ້າຂຽວງາມທີ່ໂອບອ້ອມທ່ານໄວ້ ແລ້ວຍັງມີອາຫານທັງຂອງຄາວທັງຂອງຫວານໃຫ້ທ່ານໄດ້ເລືອກຊິມ ທ່ານຕ້ອງໄດ້ລອງໄປ ໄອເດັນ ບາຍ ມະນີຄາເຟ່ ຈັກຄັ້ງແລ້ວ ເພາະສະຖານທີ່ແຫ່ງນີ້ມີຄົບທຸກຢ່າງທີ່ກ່າວມາຂ້າງເທິງນີ້ເລີຍ ຍັງບໍ່ພໍເທົ່ານັ້ນ ຄາເຟ່ນີ້ຍັງມີເອກະລັກພຽງ 1 ດຽວໃນລາວກໍ່ຄືຕົ້ນໝາກກອກ (ຕົ້ນໂອລີຟ) ອາຍຸເກືອບຮ້ອຍປີ ທີ່ຕັ້ງຢູ່ໜ້າຮ້ານໃຫ້ທ່ານໄດ້ຊື່ນຊົມຄວາມງົດງາມທີ່ແສນຈະມີສະເໜ່ນີ້ ແລະ ຍັງມີເດີນຫຼິ້ນສຳລັບເດັກນ້ອຍທີ່ຜູ້ໃຫຍ່ກໍ່ສາມາດຫຼິ້ນນຳກໍໄດ້ເດີ້.
– ສະຖານທີ່: ຮ່ອມ 42 ບ້ານ ໂພນປາເປົ້າ, ເມືອງ ສີສັດຕະນາກ, ນະຄອນຫຼວງວຽງຈັນ
– ເວລາເປີດຮ້ານ: 8 ໂມງເຊົ້າ ຫາ 9 ໂມງແລງ (ປິດທຸກໆ ວັນຈັນ)
– Facebook: Manee Cafe

Backyard Cafe & Playground
ຫາກທ່ານຕ້ອງການສູດອາກາດບໍລິສຸດເຂົ້າເຕັມປອດພ້ອມຊົມວິວທຳມະຊາດທີ່ມີທັງລານກວ້າງ, ໜອງປາພ້ອມກັບມີອາຫານຄາວ – ຫວານໄວ້ຄອຍບໍລິການທ່ານ (ຂໍແອບກະຊິບວ່າມີກະແລັມ ແລະ ບາບີຄິວ ເປັນເອກະລັກຂອງຮ້ານເພິ່ນເດີ) ແລະ ກໍມີບ່ອນຫຼິ້ນຕະລູດ ຫຼື ສະໄລເດີ້ ສຳລັບລູກຫຼານຂອງທ່ານນຳ. ທ່ານຕ້ອງໄດ້ລອງມາ ເດິ ແບັກຢາດ ຄາເຟ່ ແລະ ເພລຍ໌ກຣາວ ແລ້ວເດີ ເພາະຄາເຟ່ແຫ່ງນີ້ແມ່ນໄດ້ລວມທຸກຢ່າງແລ້ວ ທັງໂຊນສາລາເບິ່ງວິວໜອງ, ໂຊນຄາເຟ່, ໂຊນ White House, ໂຊນບ່ອນຫຼີ້ນສຳລັບເດັກນ້ອຍ.
ແລ້ວຍັງບໍ່ໝົດແຕ່ເທົ່ານັ້ນທ່ານຍັງຈະໄດ້ເບິ່ງວິຖີຊີວິດຂອງແກະ, ກະຕ່າຍ, ແບ້ ແລະ ງົວ ທີ່ເພິ່ນລ້ຽງໄວ້ນຳອີກດ້ວຍ. ສະນັ້ນ, ຖ້າທ່ານໄດ້ມີໂອກາດມາແວ່ຄາເຟ່ແຫ່ງນີ້ແລ້ວ ຢ່າລືມໄປໃຫ້ອາຫານໂຕແກະທີ່ອາໄສຢູ່ນຳກັນເປັນຝູງໃຫຍ່ດ້ວຍຜັກກາດທີ່ເພ່ິນມີຂາຍໃຫ້ຢູ່ໃນຄາເຟ່ນັ້ນນຳເດີ. ໂຕແກະນ່າຮັກ ແລະ ໃຫ້ເຮົາຈັບໄດ້ນຳ ແຕ່ຢ່າລູບບ່ອນເຂົາແກະເດີ ເພາະແກະອາດຈະເອົາຫົວແລ່ນຊົນທ່ານໄດ້.
– ສະຖານທີ່: ບ້ານ ດົງຄຳຊ້າງ, ເມືອງ ຫາດຊາຍຟອງ, ນະຄອນຫຼວງວຽງຈັນ
– ເວລາເປີດຮ້ານ: ວັນອັງຄານ ຫາ ວັນອາທິດ
– Facebook: Backyard Cafe&Playground

Vientiane Garden Restaurant
ຈະເປັນແນວໃດຖ້າທ່ານໄດ້ນັ່ງຫາຍໃຈເອົາອາກາດບໍລິສຸດພ້ອມກັບເບິ່ງຝູງປາຄາບລອຍໄປມາໃນອ່າງນ້ຳຕົກ ແລ້ວຍັງມີບັນດາພືດນາໆພັນໃຫ້ທ່ານໄດ້ສຳຫຼວດໄປນຳ. ເດົາໄດ້ບໍ່ຍາກເລີຍວ່າຕ້ອງເປັນອີ່ຫຍັງທີ່ແສນຈະສຸກໃຈທີ່ສຸດ. ແຕ່ຍັງບໍ່ໝົດພຽງເທົ່ານັ້ນ ເພາະຖ້າຫາກຍັງມີອາຫານແຊບໆໄດ້ກິນເຂົ້າທ່າມກາງບັນຍາກາດແບບນີ້ກໍຄືສິເປັນຄາບເຂົ້າທີ່ຈະຕິດຢູ່ໃນຄວາມຊົງຈຳທີ່ດີທີ່ສຸດໄປອີກຫຼາຍປີເລີຍ.
ເພາະສະນັ້ນ, ຖ້າທ່ານຕ້ອງການມີປະສົບການດັ່ງທີ່ກ່າວມາຂ້າງເທິງນັ້ນແລ້ວກໍຈະຕ້ອງໄດ້ເຂົ້າໄປລອງທີ່ ສວນອາຫານວຽງຈັນຈັກຄັ້ງແລ້ວ ເພາະເພິ່ນມີບໍລິການໃຫ້ຄົບໂດຍທີ່ບໍ່ຕ້ອງອອກໄປໃສໄກເລີຍ.
– ສະຖານທີ່: ບ້ານ ພະຂາວ, ເມືອງ ໄຊທານີ, ນະຄອນຫຼວງວຽງຈັນ
– ເວລາເປີດຮ້ານ: ເປີດໃຫ້ບໍລິການທຸກມື້ຕັ້ງແຕ່ເວລາ 10:30 ເຊົ້າ ຫາ 11:00 ໂມງແລງ
– Facebook: ສວນອາຫານວຽງຈັນ-Vientiane Garden

ແຕ່ໃນຖານະທີ່ທ່ານເປັນນັກເດີນທາງທ່ອງທ່ຽວ ບໍ່ວ່າໃນ ປະເທດລາວ ຫຼື ຢູ່ທົ່ວທຸກແຫ່ງໃນໂລກ, ສິ່ງທີ່ມີຄວາມສຳຄັນແມ່ນທ່ານຈະຕ້ອງຄຳນຶງເຖິງບົດບາດຂອງຕົວເອງທີ່ມີຕໍ່ລະບົບນິເວດ. ຕໍ່ການເປັນນັກເດີນທາງທ່ອງທຽວຢ່າງມີຄວາມຮັບຜິດຊອບ, ພວກເຮົາຈະຕ້ອງມີຄວາມເຂົ້າໃຈເຖິງບັນຫາດ້ານຄວາມສ່ຽງ ແລະ ວິທີການໃນການປ້ອງກັນບັນຫາດັ່ງກ່າວ ເພື່ອຫຼຸດຜ່ອນການຖິ້ມຮ່ອງຮອຍຂອງພວກເຮົາໄວ້.
ນອກຈາກນີ້ ແມ່ນຍັງພົວພັນເຖິງ ຄວາມມີສະຕິວ່າການກະທຳຂອງພວກເຮົາ ອາດຈະສົ່ງຜົນກະທົບຕໍ່ສຸຂະພາບຂອງຜູ້ອື່ນ, ພືດ, ສັດສາວາສິ່ງ ແລະ ສິ່ງແວດລ້ອມ ທີ່ພວກເຮົາຮ່ວມອາໄສຢູ່ ຄືແນວໃດ.
ດ້ວຍການຄິດຕຶກຕອງພຽງແຕ່ເລັກນ້ອຍ, ກໍ່ຈະເປັນສິ່ງທີ່ງ່າຍທີ່ຈະຫຼຸດຜ່ອນຮ່ອງຮອຍການເດີນທາງຂອງທ່ານ ແລະ ຄຳນຶງເຖິງສະຖານທີ່ທີ່ທ່ານກຳລັງຢ້ຽມຊົມ. ຈົ່ງຊ່ວຍກັນຮັກສາສິ່ງແວດລ້ອມ, ຜູ້ຄົນ ແລະ ສັດສາວາສິ່ງຂອງປະເທດລາວ ໃຫ້ມີຄວາມຈະເລີນຮຸ່ງເຮືອງ, ມີສຸຂະພາບທີ່ດີ ແລະ ມີຄວາມປອດໄພໃນອານາຄົດ.

ການເດີນທາງ
ການບິນລາວມີຖ້ຽວບິນຈາກ ນະຄອນຫຼວງວຽງຈັນ ໄປຍັງ ບາງກອກ, ຮາໂນ່ຍ, ເຊອຸນ ແລະ ຕົວເມືອງຕ່າງໆໃນລາວທຸກມື້.

ຮຽບຮຽງໂດຍ ແອ໋ນດີ໋ ຄຳສິງ
ຮູບໂດຍ ພູນຊັບ ເທວົງສາ