ເລີ່ມຕົ້ນຈາກຈຸດເລີ່ມຕົ້ນນ້ອຍໆ ຈົນປະຈຸບັນກາຍເປັນລາຊາແຫ່ງອຸດສະຫະກຳການທ່ອງທ່ຽວ ໃນຖານະຜູ້ກໍ່ຕັ້ງບໍລິສັດທ່ອງທ່ຽວຊັ້ນນໍາຂອງລາວ ແລະ ຜູ້ນໍາກຸ່ມບໍລິສັດອິນທິຣາ. ທ່ານ ອິນທີ ເດືອນສະຫວັນ, ເຊິ່ງປະຈຸບັນເປັນຜູ້ອຳນວຍການກຸ່ມອິນທິຣາ ແລະ ບໍລິສັດທ່ອງທ່ຽວ ກຣີນ ດີສໂຄເວີລີ້, ແຕ່ເພິ່ນບໍ່ເຄີຍຄິດເລີຍວ່າເພິ່ນຈະກ້າວເຂົ້າມາເຮັດວຽກໃນສາຍການທ່ອງທ່ຽວເລີຍ. ເພິ່ນຮຽນຈົບຈາກປະເທດຣັດເຊຍ ແລະ ເຮັດວຽກເປັນພະນັກງານຂາຍໃນລາວ. ແຕ່ໃນປີ 1998, ຄອບຄົວຂອງເພິ່ນໄດ້ເລີ່ມເປີດຮ້ານອາຫານນ້ອຍໆ ໃນເຮືອນຮູບແບບໂຄໂລນຽວຂອງເພິ່ນ. “ໃນຕອນນັ້ນ ບ້ານເຮົາຫາກໍເປີດປະເທດ ແລະ ນັກທ່ອງທ່ຽວກໍບໍ່ມີຫຼາຍ. ພວກເຮົາເສີບແຕ່ອາຫານລາວ ແລະ ເນື່ອງຈາກວ່າຮ້ານເຮົາຕັ້ງໃກ້ກັບນໍ້າພຸ ເຮັດໃຫ້ເຮົາເລີ່ມມີລູກຄ້າຄົນຕ່າງປະເທດຫຼາຍຂຶ້ນ.” ກ່າວໂດຍ ທ່ານ ອິນທີ.

ຮ້ານອາຫານນ້ອຍໆນີ້ປັດຈຸບັນກາຍເປັນຮ້ານອາຫານທີ່ຂຶ້ນຊື່ໄດ້ວ່າເປັນຮ້ານອາຫານລະດັບຕົ້ນໃນນະຄອນຫຼວງກໍວ່າໄດ້, ຮ້ານອາຫານ ຂອບໃຈເດີ້  ຈາກທີ່ມີບ່ອນນັ່ງໃນຮ້ານພຽງແຕ່ 36 ບ່ອນ ຕອນນີ້ແມ່ນມີຫຼາຍກວ່າ 300 ບ່ອນນັ່ງ. ຕຶກຂອງຮ້ານອາຫານຕັ້ງແຕ່ປີ 1923 ໄດ້ຖືກບູລະນະ ປັບປຸງໃໝ່. “ການຕົບແຕ່ງຕຶກແມ່ນມີຄອນເສັບດຽວກັນກັບເມນູຂອງເຮົາ ຄືການຮັບເອົາອິດທິພົນຈາກຕ່າງຊາດ ດ້ວຍການຕົບແຕ່ງ ແລະ ການນໍາສະເໜີ ແຕ່ຄວາມເປັນລາວຄືຫົວໃຈສຳຄັນຂອງເຮົາ.” ຮ້ານອາຫານ ຂອບໃຈເດີ້ກາຍເປັນຮາກຖານຂອງກຸ່ມອິນທິຣາ, ກຸ່ມບໍລິສັດໃຫ້ບໍລິການດ້ານຮ້ານອາຫານ ແລະ ໂຮງແຮມ ເຊິ່ງມີຮ້ານອາຫານໃນກຸ່ມ 3 ຮ້ານ ແລະ ໂຮງແຮມອີກ 2 ແຫ່ງ.

ໄປພ້ອມໆກັນກັບການຂະຫຍາຍຕົວຂອງກຸ່ມອິນທິຣາ, ທ່ານ ອິນທີຍັງໄດ້ເປີດບໍລິສັດທ່ອງທ່ຽວ ກຣີນ ດີສໂຄເວີຣີ ຂຶ້ນໃນປີ 2000. ປະຈຸບັນ, ບໍລິສັດນີ້ໄດ້ຂະຫຍາຍການບໍລິການໄປທົ່ວທຸກພາກໃນລາວ ແລະ ມີທັງໝົດ 7 ຫ້ອງການ. ກຣີນ ດີສໂຄເວີຣີໃຫ້ບໍລິການຈອງແພັກເກັດການທ່ອງທ່ຽວ ແລະ ການປະຈົນໄພທີ່ດີທີ່ສຸດໃນລາວ ລວມມີ ການຍ່າງປ່າ, ການຂີ່ເຮືອຄາຢັກ, ການຂີ່ລົດຖີບ, ການປີນພູ ແລະ ການຂີ່ຊິບລາຍ. ໂປຣແກຣມຕ່າງໆແມ່ນເນັ້ນໃສ່ການທ່ອງທ່ຽວແບບຍືນຍົງ ຕາມຄວາມເຊື່ອໝັ້ນຂອງທ່ານ ອິນທີ ທີ່ວ່າ “ການໄປທ່ຽວຈະສ້າງຄວາມໝາຍ ຄວາມຮູ້ສຶກດີໃຫ້ແກ່ຄົນທ້ອງຖິ່ນ ແລະ ນັກທ່ອງທ່ຽວເອງໄດ້, ເຂົາເຈົ້າຕ້ອງອານຸລັກສະພາບແວດລ້ອມ ແລະ ວັດທະນະທຳພາຍໃນທ້ອງຖິ່ນ, ແລະ ຕ້ອງສ້າງປະໂຫຍດໃຫ້ແກ່ຊຸມຊົນໄດ້.”

ເມື່ອເບິ່ງຍ້ອນກັບໄປໃນສອງທົດສະວັດທີ່ຢູ່ໃນວົງການການທ່ອງທ່ຽວ, ທ່ານ ອິນທີ ເຫັນຄວາມປ່ຽນແປງຫຼາຍຢ່າງ ແລະ ໄດ້ແນະນໍາວ່າ “ເມື່ອມີນັກທ່ອງທ່ຽວເຂົ້າມາທ່ຽວຫຼາຍຂຶ້ນ, ສະຖານທີ່ທ່ອງທ່ຽວຕ່າງໆໃນບ້ານເຮົາຕ້ອງໄດ້ຮັບການປົກປັກຮັກສາໃຫ້ຍັງຄົງສວຍງາມ ແລະ ປ້ອງກັນບໍ່ໃຫ້ມັນຖືກທຳລາຍລົງ ເພື່ອພ້ອມຮັບນັກທ່ອງທ່ຽວໃນພາຍພາກໜ້າ.” ແລະ ທ່ານໄດ້ກ່າວຕື່ມອີກວ່າ ຈໍານວນນັກທ່ອງທ່ຽວທີ່ເຂົ້າມາທ່ຽວລາວໃນປະຈຸບັນ ຈະສາມາດສ້າງລາຍຮັບໃຫ້ລາວໄດ້ຫຼາຍຂຶ້ນຖ້າຫາກເຮົາສາມາດເຈາະກຸ່ມນັກທ່ອງທ່ຽວທີ່ເຂົ້າມາພັກເປັນເວລາດົນ ແລະ ນັກທ່ອງທ່ຽວທີ່ມີຄວາມສາມາດຈ່າຍສູງໄດ້. ຖ້າຫາກສິ່ງທີ່ທ່ານ ອິນທີ ຄາດຫວັງປະສົບຜົນເປັນຈິງ, ປະເທດລາວ ແລະ ຮ້ານ ຂອບໃຈເດີ້ ອາດເປັນບ່ອນທີ່ “ໂລກໄດ້ພົບກັນ” ໃນອະນາຄົດກໍເປັນໄດ້.

ຂຽນໂດຍ JASON ROLAN

ແປ ແລະ ຮຽບຮຽງໂດຍ ລັດສະໝີ ພອນວິໄລ

ຮູບໂດຍ ພູນຊັບ ເທວົງສາ ແລະ ອິນທິຣາ ກຣຸບ