ສາຍສຳພັນອັນຍາວນານຂອງຕາເວັນອອກ ແລະ ຕາເວັນຕົກໄດ້ສ້າງໃຫ້ຊຽງໄຮ້ ເປັນສູນລວມແຫ່ງອະນາຄົດ ທີ່ຍັງຄົງເຊິ່ງວັດທະນະອັນດັ້ງເດີມຂອງຊາວຈີນ

ມື້ທີ 1:

ເດິບັນ (The Bund)

ສະຖານທີ່ແຄມແມ່ນໍ້າທີ່ໂດ່ງດັງ ງນການທ່ຽວຊົມແສງສີໃນຍາມກາງຄືນ ແລະ ຍັງເປັນບ່ອນຈັດງານ​ວາງ​ສະ​ແດງຂອງສະຖາປັດຕະຍະກຳ Beaux Arts ແລະ ບ່ອນ​ວາງ​ສະ​ແດງງານສິລະປະ​ຕ່າງໆ. ເຂດນີ້ເຄີຍຢູ່ພາຍໃຕ້ການ​ປົກ​ຄອງຂອງອັງກິດ ແລະ ອາເມລິກາ; ແລະ ເຄີຍເປັນແຫລ່ງຄ້າຂາຍ, ສະ​ຖານ​ບັນ​ເທີງ, ໂຮງແຮມ ແລະ ທະນາຄານ. ອາຄານຫລາຍຫລັງໄດ້ມີການປັບປ່ຽນພາຍໃນແຕ່ຍັງຄົງຮັກສາ​ລັກ​ສະ​ນະພາຍນອກແບບ​ດັ້ງ​ເດີມໄວ້.

ຈັດຕຸລັດປະຊາຊົນ ຊຽງໄຮ້ ແລະ ຫໍພິພິທະພັນ ຊຽງໄຮ້

ໃນ​ສະ​ໄໝ​ກ່ອນ ນະ​ຄອນ​ຊຽງ​ໄຮ້​ເຄີຍເປັນສູນລວມ​ທາງການຄ້າ​ຂອງອຳນາດອານານິຄົມເອີຣົບ  ແລະ ບໍລິເວນເຂດນີ້ຍັງເຄີຍຖືກສ້າງເປັນສະໜາມແຂ່ງມ້າມາກ່ອນ. ແຕ່ເມື່ອລັດຖະບານໄດ້ຫັນປ່ຽນແນວຄິດ ນໍາຜືນດິນດັ່ງກ່າວມາປະຕິຮູບໃໝ່ ລົບລ້າງເລື່ອງແຂ່ງຂັນເດີມພັນອອກໄປ ແລະ ໄດ້ສ້າງຊື່ໃໝ່ໃຫ້ບ່ອນດັ່ງກ່າວເປັນ “ຈັດຕຸລັດປະຊາຊົນ”. ປະຈຸບັນ, ສະຖານທີ່ດັ່ງກ່າວເປັນທີ່ຕັ້ງຂອງບັນດາຫໍພິພິທະພັນ ແລະ ສະ​ຖານ​ທີ່​ລາ​ຊະການຕ່າງໆ – ສຳຄັນທີ່ສຸດແມ່ນ​ມີຫໍພິພິທະພັນຊຽງໄຮ້ ເຊິ່ງທ່ານຈະໄດ້ຮຽນຮູ້ກ່ຽວກັບປະຫວັດສາດ​ອັນ​ຍາວ​ນານຂອງຈີນ ຜ່ານວັດຖຸບູຮານຕ່າງໆທີ່ວາງສະແດງພາຍໃນຫໍພິພິທະພັນ.

ລ່ອງເຮືອທີ່ແມ່ນໍ້າຫວງຜູ່

ການລ່ອງເຮືອທີ່ແມ່ນໍ້າຫວງຜູ່ໃຊ້ເວລາປະມານ 45 ນາທີ. ທ່ານຈະໄດ້ເຫັນພາບທິວທັດສອງຝັ່ງແມ່ນໍ້າ ແລະ ລອງຈິນຕະນາການເຖິງພາບແຄມຝັ່ງສອງແມ່ນໍ້າໃນສະໄໝກ່ອນ. ເມື່ອທ່ານລ່ອງເຮືອໂຄ້ງໄປຫາປາກແມ່ນໍ້າ, ທ່ານຈະຮູ້ສຶກວ່າຕຶກອາຄານຕ່າງເບິ່ງຄືນ້ອຍລົງ ສະແດງໃຫ້ເຫັນວ່າເມືອງໃຫຍ່ແຫ່ງນີ້ຍັງເຫລືອພື້ນທີ່ໃຫ້ພັດທະນາຕໍ່ໄປອີກ!

ມື້ທີ 2

ສວນ ຢູຢວນ

ສວນແຫ່ງນີ້ ຖືກຄົ້ນພົບໂດຍຄອບຄົວຜູ້ຮັ່ງມີໃນສະຕະວັດທີ 16. ສວນຢູຢວນເປັນສະຖານທີ່ທີ່ສາມາດສະທ້ອນໃຫ້ເຫັນເຖິງການອອກແບບ​ທີ່​ມີ​ລັກ​ສະ​ນະດັ້ງເດີມຂອງ​ຊາວຈີນ. ຕົບແຕ່ງດ້ວຍຕົ້ນໄມ້ທີ່ສວຍສົດງົດງາມ ແລະ ມີສາລາ ແລະ ເຮືອນຊົງຈີນພາຍໃນສວນກວ້າງ, ມີກ້ອນຫິນນ້ອຍໃຫຍ່ຈັດລຽງໄວ້ຢ່າງສວຍງາມ ແລະ ​ຍັງມີອ່າງປາຄາບ ໄວ້​ໃຫ້​ແຂກ​ໄດ້​ຊື່ນ​ຊົມ. ​ທ່ານອາດ​ຈະຮູ້ສຶກດັ່ງວ່າໄດ້ຍ້ອນໄປຫາອີກຍຸກສະໄໝໜຶ່ງກໍ່ເປັນໄດ້. ນອກ​ນັ້ນ ຍັງ​ມີຕະຫລາດນັດຢູ່ໃກ້ໆສວນ ທີ່ທ່ານສາມາດເລາະກິນ-ທ່ຽວ ແລະ ຊ໋ອບປິ້ງນຳອີກ.

ຫລູເຈຍຊຸຍ ແລະ ຫໍໄຂ່ມຸກແຫ່ງເມືອງຊຽງໄຮ້ (Oriental Pearl Tower)

ຫລູເຈຍຊຸຍ ຕັ້ງຢູ່ແຄມຝັ່ງຕາເວັນອອກຂອງແມ່ນໍ້າ ຫວງປູ, ເຊິ່ງ​ເປັນພື້ນທີ່ປູກຝັງຂະໜາດໃຫຍ່ເມື່ອ 25 ປີກ່ອນ. ປະຈຸບັນ, ຫລູເຈຍຊຸຍກາຍເປັນເມືອງທີ່ເປັນສູນກາງດ້ານການເງິນຂອງຈີນ. ຕຶກສູງ​ທີ່​ນັບ​ມື້​ນັບ​​ແຜ່ຂະ​ຫ​ຍາຍ​​ອອກ ໄດ້​ເຮັດ​ໃຫ້​ເມືອງ​ດັ່ງ​ກ່າວ ມີ​ການ​ພັດ​ທະ​ນາ​ຢ່າງ​ຕໍ່​ເນື່ອງ. ຫໍໄຂ່ມຸກແຫ່ງເມືອງຊຽງໄຮ້ ເປັນໜຶ່ງໃນສະຖານທີ່ສຳຄັນທີ່ມີຊື່ສຽງຂອງຊຽງໄຮ້ ແລະ ເປັນບ່ອນທີ່ທ່​ານສາມາດເຫັນວິວແມ່ນໍ້າຈາກຈຸດຊົມວິວ ແລະ ຮ້ານອາຫານອ້ອມຮອບ ຢ່າງ​ສວຍ​ງາມ.

ຖະໜົນ ນານຈິງ ຕາເວັນອອກ

ຖະໜົນດັ່ງກ່າວເຄີຍເປັນແຫລ່ງຊອບປິ້ງຊັ້ນນຳຂອງຈີນ ໃນສະໄໝທີ່ຫ້າງສັບພະສິນຄ້າແຫ່ງທຳອິດຂອງປະເທດ​ຈີນໄດ້ເປີດ​ໃຫ້ບໍລິການ ແລະ ປັດຈຸບັນໄດ້ກາຍເປັນຖະໜົນ​ຄົນ​ຍ່າງ ທີ່ນັກ​ທ່ອງ​ທ່ຽວສາມາດຍ່າງເລາະ ແລະ ຊື້ເຄື່ອງ​ໄດ້. ເປັນສະຖານທີ່ທີ່ເຕັມໄປດ້ວຍເຄື່ອງແບຣນ​ຍີ່​ຫໍ້ຕ່າງໆ ຈາກຫລາຍໆປະເທດເຂົ້າມາລວມໄວ້ນຳກັນ.

ຖະໜົນ ຖຽນຈີຟາງ (Tianzifang)

ເປັນຊຸມຊົນໜຶ່ງທີ່ປະ​ກອບດ້ວຍອາຄານທີ່ເກົ່າແກ່ ແລະ ຮ່ອມຊອກຊອຍຕ່າງໆໃນເຂດສຳປະທານຂອງຝຣັ່ງໃນສະໄໝກ່ອນ, ເຊິ່ງປັດຈຸບັນກາຍເປັນຮ້ານຄ້າ, ຮ້ານຂາຍເສື້ອຜ້າ, ຮ້ານຄາເຟ່ ແລະ ຮ້ານອາຫານ. ຖ້າຫາກທ່ານຄິດເຖິງບ່ອນຊື້ຂອງທີ່ລະນຶກທີ່ເປັນເອກະລັກ ແລະ ຕ້ອງການຊຸກຍູ້ຜົນງານສິລະປິນຊາວຈີນ, ທ່ານສາມາດມາເລືອກຊື້ຂອງຝາກຂອງຕ້ອນຢູ່ທີ່ນີ້ໄດ້ເລີຍ.

ຂຽນໂດຍ: JASON ROLAN

ຮູບໂດຍ: JASON ROLAN, ພູນຊັບ ເທວົງສາ

ແປ ແລະ ຮຽບຮຽງໂດຍ: ວິໄລສອນ ເຫລື້ອງ