9 ມື້, 9 ແຂວງ, 2999ກມ

ໃນຫວ່າງບໍ່ດົນມານີ້, ກຸ່ມຊ່າງຖ່າຍຮູບລາວ ໄດ້ເລີ່ມຕົ້ນອອກເດີນທາງຜະຈົນໄພການຂັບຂີ່ລົດຈັກ ແລະ ລົດ 4WD ຈາກແຂວງວຽງຈັນ ສູ່ ດອນຄອນ ແລະ ເດີນທາງກັບຄືນ ໂດຍຜ່ານເສັ້ນທາງທີ່ຫຍຸ້ງຍາກລໍາບາກໃນຊ່ວງລະດູຝົນ. ຈຸດມຸ້ງໝາຍ ແມ່ນເພື່ອສະແດງໃຫ້ເຫັນເຖິງການເດີນທາງພາຍໃນປະເທດໄປຍັງພາກໃຕ້ຂອງ ສປປ ລາວ ໃນຮູບແບບການເດີນທາງແບບໃໝ່ ແລະ ໜ້າຕື່ນເຕັ້ນປະທັບໃຈ, ໃນຂະນະດຽວກັນ,​ ກໍສະແດງໃຫ້ເຫັນຈຸດໝາຍປາຍທາງທີ່ຍັງບໍ່ເຄີຍພົບເຫັນມາກ່ອນ.

ໃນເບື້ອງຕ້ົນ ແມ່ນໄດ້ວາງແຜນການເດີນທາງ ໂດຍຜ່ານແຂວງວຽງຈັນ, ແຂວງ ໄຊສົມບູນ, ແຂວງ ຊຽງຂວາງ, ແຂວງ ບໍລິຄໍາໄຊ, ແຂວງ ຄໍາມ່ວນ, ແຂວງ ສະຫວັນນະເຂດ, ແຂວງ ສາລະວັນ, ແຂວງ ເຊກອງ, ແຂວງ ອັດຕະປື, ແລະ ແຂວງ ຈໍາປາສັກ, ແຕ່ເນື່ອງຈາກ ຂໍ້ຈໍາກັດໃນການເດີນທາງ, ຈຶ່ງໄດ້ມີການປັບປ່ຽນແຜນຄືນໃໝ່. ເສັ້ນທາງການເດີນທາງດັ່ງກ່າວນີ້ ໃຊ້ເວລາ 9 ວັນ, 9 ແຂວງ ຜ່ານໄລຍະທາງ 2999 ກມ. ຂໍໃຫ້ມີຄວາມສຸກກັບການຊົມຮູບພາບເຫຼົ່ານີ້ ແລະ ເປັນແຮງບັນດານໃຈເພື່ອເລີ່ມຕົ້ນການເດີນທາງທີ່ໜ້າຕື່ນເຕັ້ນດ້ວຍຕົວທ່ານເອງໃນ ສປປ ລາວ!

ມື້ທີ 1 : 220ກມ ວຽງຈັນ ຫາ ໄຊສົມບູນ

ມື້ທຳອິດ, ພວກເຮົາ ມາຮອດເມືອງອານຸວົງ ແຂວງໄຊສົມບູນ ແລະ ໄດ້ຊື່ນຊົມຍາກາດຕາເວັນຕົກດິນເທິງພູຫົວໂລ້ນ ກ່ອນພາກັນກາງເຕັ້ນ ແລະ ກິນເຂົ້າແລງໃນຄືນເດືອນແຈ້ງປານໄຟສະປອດໄລ້ໜ່ວຍໃຫຍ່.

ມື້ທີ 2 : 130ກມ ໄຊສົມບູນ ຫາ ຊຽງຂວາງ

ພາຍຫຼັງຕື່ນນອນແຕ່ເຊົ້າ, ພວກເຮົາໄດ້ເດີນທາງໄປຍັງ ຖໍ້າເຈົ້າອານຸວົງທີ່ສະຫງົບສວຍງາມ. ຖໍ້າ ແມ່ນບໍ່ເລິກປານໃດ, ແຕ່ເທືອກເຂົາໃນບໍລິເວນນີ້ແມ່ນເລິກຫຼາຍ ແລະ ເບິ່ງແລ້ວກໍງົດງາມຫຼາຍ.

ໃນບໍລິເວນໃກ້ຄຽງກັນນັ້ນ, ພວກເຮົາກໍຂັບໄປແວ່ສະຖານທີ່ສວຍງາມແຫ່ງໜຶ່ງ ເອີ້ນວ່າວັງນໍ້າຂຽວ ໂດຍມີສາຍນໍ້າໃສໄຫຼຈາກພູ ແລະ ເບື້ອງຫຼັງເປັນພູຜາທີ່ສວຍງາມ, ກ່ອນທີ່ພວກເຮົາ ຈະສືບຕໍ່ໄປຕາມເສັ້ນທາງຮົກເຮື້ອ ຜ່ານນໍ້າຕົກຕາດ ເພື່ອໄປຍັງຈຸດຕັ້ງຄ້າຍຕໍ່ໄປຂອງພວກເຮົາໃນເມືອງ ຄູນ, ແຂວງ ຊຽງຂວາງ.

ມື້ທີ 3 : 350ກມ ເມືອງຄູນ ຫາ ນາກາຍ (ຄຳມ່ວນ)

ເປັນອີກມື້ໜຶ່ງທີ່ໃຊ້ເວລາດົນໃນການຂັບລົດຜ່ານ ເມືອງ ໝອກ ສູ່ ນາກາຍ. ສະພາບເສັ້ນທາງນີ້ຍາກບໍ່ໃຫ້ເວົ້າເລີຍ ປານກັບຂີ່ລົງແກ້ງນຕົກເວລາມັນແຫ້ງ ທັງຫີນ, ທັງຝຸ່ນ, ທັງຊັນ, ແຕ່ຄວາມປະທັບໃຈຂອງມື້ນີ້ແມ່ນໄດ້ຂີ່ຜ່ານພູສາມຊຸມເຊິ່ງມີຄວາມສູງ 2,100 ແມັດຈາກລະດັບນຳ້ທະເລ ພ້ອມວິວທີ່ອະລັງການ ແລະ ອາກາດທີ່ເຢັນສຸດຂົ້ວ.

ມື້ທີ 4 : 460ກມ ນາການ (ຄຳມ່ວນ) ຫາ ຖ້ຳພູຜາສຸກ (ສາລະວັນ)

ຖືວ່າເປັນມື້ທີ່ຂັບລົດໄກສຸດໄລຍະທາງ 420 ກມ ຈາກນາກາຍເພື່ອມາແຄ້ມຢູ່ຖຳ້ພູຜາສຸກ ເມືອງ ສາລະວັນ ແຂວງສາລະວັນ. ສຳລັບມື້ນີ້ແມ່ນບໍ່ຄ່ອຍໄດ້ຖ່າຍຮູບປານໃດເພາະວ່າໃຊ້ເວລາໃນການຂັບລົດຈົນຕາເວັນຕົກດິນ.

ມື້ທີ 5 : 90ກມ ສາລະວັນ ຫາ ເຊກອງ (ເມືອງກະລືມ)

ຕື່ນນອນແຕ່ເຊົ້າ, ພວກເຮົາ ກໍໄດ້ໄປຊົມຖາທີ່ໜ້າອັດສະຈັນໃຈຫຼາຍ ແລະ ເຫັນການກໍ່ຕົວຂອງກຸ່ມກ້ອນຫີນຕະຫຼອດຫຼາຍສັດຕະວັດທີ່ເຫຼື້ອມຍິບຍັບສະທ້ອນແສງ. ພ້ອມນັ້ນ, ກໍຍັງມີເວລາໄດ້ແວ່ຊົມຫໍໄຕປີດົກທີ່ໂດດເດັ່ນຢ່າງໜ້າງຶດງໍ້ອັດສະຈັນໃຈທີ່ ວັດກາງ ຢູ່ແຂວງສາລະວັນ.

ມື້ທີ 6 : 150ກມ ເຊກອງ (ເມືອງກະລືມ) ຫາ ສວນກາເຟເທິງພູພຽງ (ປາກຊ່ອງ, ແຂວງຈຳປາສັກ)

ມື້ນີ້ ເປັນການຂັບຂີ່ທີ່ດີຫຼາຍ ໂດຍເດີນທາງໄປຍັງພູພຽງບໍລະເວນ ຈົນຮອດສວນກາເຟເທິງພູພຽງທີ່ມີມ ສະນັ້ນ, ດິນໃນເຂດນີ້ ຈຶ່ງອຸດົມສົມບູນໄປດ້ວຍແຮ່ທາດທີ່ເໝາະສົມກັບການປູກກາເຟ. ທັດສະນີຍະພາບກໍງົດງາມເຊັ່ນກັນ!

ມື້ທີ 7 : 60ກມ ສວນກາເຟເທິງພູພຽງ (ປາກຊ່ອງ, ແຂວງຈຳປາສັກ) ຫາ ອັດຕະປື

ພວກເຮົາວາງແຜນ ເພື່ອຕັ້ງແຄ້ມໃກ້ກັບນໍ້າຕົກຕາດ ຢູ່ແຂວງອັດຕະປື, ແຕ່ເນື່ອງຈາກສະພາບການລັອກດາວຂອງແຂວງ, ພວກເຮົາຕ້ອງໄດ້ປ່ຽນແຜນ ໂດຍພວກເຮົາໄດ້ເດີນທາງເລິກເຂົ້າໄປໃນເຂດພູພຽງບໍລະເວນແທນ ແລະ ກໍໄດ້ໄປຢ້ຽມຊົມນໍ້າຕົກຕາດທີ່ສວຍສົດງົດງາມໜ້າປະທັບໃຈກ່ອນຈະຕັ້ງແຄ້ມອີກຄັ້ງໜຶ່ງ.

ມື້ທີ 8 ແລະ 9 : ສອງມື້ສຸດທ້າຍ ແມ່ນມື້ທີ່ພວກເຮົາໄດ້ໄປເລາະເບິ່ງນໍ້າຕົກຕາດ ແລະ ບ່ອນອື່ນໆ ກ່ອນຈະເດີນທາງກັບຄືນສູ່ນະຄອນຫຼວງວຽງຈັນ. ການເດີນທາງຄັ້ງນີ້ມັນຊ່າງເປັນການຂັບຂີ່ທີ່ໜ້າປະທັບໃຈ ຜ່ານຫຼາກຫຼາຍບ່ອນທີ່ບໍ່ເຄີຍເຫັນມາກ່ອນ. ແນ່ນອນວ່າ ພວກເຮົາຈະວາງແຜນໄປທ່ຽວຄືແນວນີ້ອີກໃນອະນາຄົດ. ມັນເປັນການເດີນທາງແບບໃໝ່ ເພື່ອຄົ້ນຫາປະສົບການໃນການທ່ອງທ່ຽວລາວ!

ແປ ແລະ ຮຽບຮຽງໂດຍ ສັນຕິສຸກ ພູນສະຫວັດ
ຮູບໂດຍ ພູນຊັບ ເທວົງສາ