ໃນສະພາບທີ່ແນວຄວາມຄິດດ້ານກົດໝາຍບາງຢ່າງຍັງເປັນເລື່ອງໃໝ່ ຫຼື ຍັງບໍ່ທັນໄດ້ພັດທະນາຢ່າງເຕັມສ່ວນໃນລະບົບກົດໝາຍລາວ, ບໍລິສັດກົດໝາຍແຫ່ງໜຶ່ງ ຈຶ່ງໄດ້ກ້າວເຂົ້າມາຊ່ວຍໃນຈຸດນີ້.

ບໍລິສັດກົດໝາຍ LS Horizon ເຊິ່ງເປັນບໍລິສັດກົດໝາຍຊື່ດັງຂອງໄທ, ໄດ້ເປີດສາຂາຢູ່ລາວ ຫຼາຍກວ່າ 10 ປີ ມາແລ້ວ ເພື່ອຕອບສະໜອງຄວາມຕ້ອງການຂອງນັກລົງທຶນໄທ ແລະ ຕ່າງປະເທດ ທີ່ຕ້ອງການມາລົງທຶນໃນລາວ ຕາມນະໂຍບາຍຂອງລັດຖະບານລາວກ່ຽວກັບການດຶງດູດນັກລົງທຶນຕ່າງປະເທດ.

ທ່ານນາງ ໄຊນາລີ ຈັນທະລາ, ເຊິ່ງເປັນຫຸ້ນສ່ວນ ແລະ ເປັນໜຶ່ງໃນທີມນັກກົດໝາຍຂອງ LS Horizon ກ່າວວ່າ: “ໃນຖານະບໍລິສັດກົດໝາຍລາວ, ພວກເຮົາໄດ້ມີໂອກາດຊ່ວຍນັກລົງທຶນຊອກຫາທາງອອກ ກໍລະນີມີຊ່ອງຫວ່າງໃນກົດໝາຍ ເພື່ອຮັບປະກັນວ່າພວກເຂົາເຈົ້າດຳເນີນທຸລະກິດຖືກຕ້ອງຕາມຈຸດປະສົງ ແລະ ຂໍ້ກຳນົດຂອງກົດໝາຍ,”.

“ນະໂຍບາຍຂອງລັດຖະບານລາວຕໍ່ການດຶງດູດນັກລົງທຶນຕ່າງປະເທດ, ຂໍ້ຜູກພັນຂອງ ສປປ ລາວຕໍ່ອາຊຽນ, ອົງການການຄ້າສາກົນ ແລະ ອົງການທີ່ສຳຄັນອື່ນໆ ໄດ້ເປັນຕົວກະຕຸ້ນຫຼັກທີ່ຮຽກຮ້ອງໃຫ້ເກີດມີ ບໍລິສັດກົດໝາຍສາກົນຄືພວກເຮົາ.”

ທ່ານນາງ ໄຊນາລີ ກ່າວວ່າຄໍາຂວັນຂອງບໍລິສັດ “ມີທາງອອກສະເໝີ” ຄືຄະຕິຂອງບໍລິສັດໃນການໃຫ້ຄຳແນະນຳດ້ານກົດໝາຍທີ່ເໝາະສົມທີ່ສຸດ ເພື່ອຊ່ວຍໃຫ້ລູກຄ້າບັນລຸເປົ້າໝາຍຂອງເຂົາເຈົ້າໄດ້.

“ພວກເຮົາມີຄວາມກະຕືລືລົ້ນໃນການເປັນຕົວແທນໃຫ້ລູກຄ້າ ໃນການເຈລະຈາກັບເຈົ້າໜ້າທີ່ລັດ ເພື່ອຫາທາງອອກທີ່ຍຸຕິທຳສຳລັບລູກຄ້າ ໃນກໍລະນີທີ່ລູກຄ້າມີຂໍ້ຂັດແຍ່ງ ແລະ ບໍ່ເຂົ້າໃຈທາງດ້ານເນື້ອໃນຂອງກົດໝາຍ ຫຼື ການນໍາໃຊ້ກົດໝາຍນັ້ນ,” ນາງກ່າວ.

ແລະນີ້ກໍ່ເປັນສິ່ງທີ່ພົບເຫັນໄດ້ເລື້ອຍໆໃນປະເທດທີ່ກຳລັງພັດທະນາດ້ານເສດຖະກິດ ຄືປະເທດລາວ ເຊິ່ງເປັນບ່ອນທີ່ການນໍາໃຊ້ກົດໝາຍຍັງພົບສິ່ງທ້າທາຍຫຼາຍອັນຢູ່. ທ່ານນາງ ໄຊນາລີ ກ່າວວ່າ “ລັດຖະບານລາວກໍໄດ້ມີການພັດທະນາລະບົບກົດໝາຍ; ແຕ່ມັນກໍຍັງມີຄວາມບໍ່ແນ່ນອນ ແລະ ຄຸມເຄືອໃນກົດໝາຍຢູ່,”.

“ຄວາມບໍ່ແນ່ນອນ ແລະ ຄຸມເຄືອເຫຼົ່ານີ້ເປັນສິ່ງທີ່ທ້າທາຍສຳລັບພວກເຮົາ ໃນເວລາໃຫ້ຄຳແນະນຳກັບນັກລົງທຶນ. ເຖິງຢ່າງໃດກໍຕາມ, ບາງຄັ້ງສິ່ງທ້າທາຍເຫຼົ່ານີ້ກໍ່ສາມາດແກ້ໄຂໄດ້ໂດຍການຂໍຄວາມກະຈ່າງແຈ້ງ ແລະ ສົນທະນາປຶກສາກັບພະແນກກະຊວງທີ່ກ່ຽວຂ້ອງ ທີ່ພ້ອມຈະຊ່ວຍເຫຼືອນັກລົງທຶນໃນການແນະນໍາ ແລະ ຫາທາງອອກໃຫ້ເຂົາເຈົ້າ. ຮູບແບບໃນການອຳນວຍຄວາມສະດວກແກ່ນັກລົງທຶນແບບນີ້ ໄດ້ກາຍເປັນຜົນປະໂຫຍດທີ່ບໍ່ໄດ້ຄາດຄິດໃນການເຮັດວຽກໃນລາວ. ພວກເຮົາມີຄວາມຍິນດີໃນການຫາທາງອອກໃຫ້ກັບລູກຄ້າເພື່ອແກ້ບັນຫາດ້ານການເຮັດວຽກ ແລະ ດຳເນີນທຸລະກິດໃນລາວ”

LS Horizon ໃຫ້ບໍລິການໃນຫຼາຍຂົງເຂດ ນັບຕັ່ງແຕ່ການສ້າງຕັ້ງອົງກອນ, ດ້ານການຄ້າ, ການຄວບລວມ ແລະ ການຊື້ກິດຈະການ, ການເງິນໂຄງການ, ແລະ ຕະຫຼາດທຶນ. “ປະສົບການໃນການໃຫ້ຄໍາປຶກສາດ້ານກົດໝາຍໃນຂົງເຂດການຄ້າລະຫວ່າງປະເທດຂ້າມຊາຍແດນ ຊ່ວຍໃຫ້ພວກເຮົາເຂົ້າໃຈຄວາມຕ້ອງການຂອງລູກຄ້າຕ່າງປະເທດ ແລະ ພາຍໃນປະເທດຫຼາຍຂຶ້ນ ແລະ ສາມາດເຮັດວຽກເພື່ອໃຫ້ບັນລຸເປົ້າໝາຍຂອງເຂົາເຈົ້າໄດ້,” ກ່າວໂດຍ ທ່ານນາງ ໄຊນາລີ.

“ທີມງານນັກກົດໝາຍຂອງພວກເຮົາແມ່ນຈົບຈາກມະຫາວິທະຍາໄລທາງດ້ານກົດໝາຍໂດຍສະເພາະ ທັງໃນລາວ ແລະ ຕ່າງປະເທດ. ທີມງານໃນລາວໄດ້ຮ່ວມກັບເຄືອຂ່າຍນັກກົດໝາຍຂອງ LS Horizon ໃນພາກພື້ນ ເພື່ອສ້າງທີມງານທີ່ມີປະສິດທິພາບໃນການໃຫ້ຄຳປຶກສາດ້ານກົດໝາຍໃຫ້ກັບລູກຄ້າໄດ້ຕາມມາດຕະຖານສາກົນ.”

ທ່ານສາມາດຕິດຕໍ່ ແອວແອສຮໍລາຍຊອນ (ລາວ) ຈຳກັດຜູ້ດຽວ ໄດ້ທີ່ www.Ishorizon.com