​ຄຸນນະພາບມາເປັນອັນດັບໜຶ່ງສະເໝີ.

ໃນເຂດເມືອງນອງ, ສວນຕົ້ນກ້ວຍໄດ້ແຜ່ຂະຫຍາຍອອກໄປກວ້າງຈົນສຸດສາຍຕາເຕັມໄປດ້ວຍໃບຕອງທີ່ມີສີຂຽວອຸ່ມທຸ່ມ ຍາວຢຽດໄປເຖິງຕີນພູທີ່ອ້ອມຮອບສວນແຫ່ງນີ້ຢູ່ໃນສວນກ້ວຍດັ່ງກ່າວມີການຈັດແບ່ງຊາວສວນໃນການກວດກາແຕ່ລະຕົ້ນຢ່າງລະອຽດ, ມີຜູ້ຈົດບັນທຶກຄຸນນະພາບ ແລະ ການຈະເລີນເຕີບໂຕຂອງຕົ້ນກ້ວຍ. ນອກຈາກນັ້ນ, ຍັງມີການຈັດແບ່ງໜ້າທີ່ຂອງຊາວສວນເພື່ອທີ່ຈະຮັກສາຜົນຜະລິດທີ່ມີຄຸນນະພາບ ແລະ ປອດໄພ. 

ບໍລິສັດ ສຸກຮຸ່ງເຮືອງ ເປັນຜູ້ລົງທຶນໃນການສ້າງສວນກ້ວຍແຫ່ງນີ້ຂຶ້ນມາ ໂດຍມີເປົ້າໝາຍໃນການສ້າງສວນທີ່ເປັນມິດກັບສິ່ງແວດລ້ອມ ແລະ ການນໍາໃຊ້ເຕັກໂນໂລຊີທີ່ທັນສະໄໝເຂົ້າໃນການຜະລິດເພື່ອແນໃສ່ເກັບກ່ຽວຜົນຜະລິດທີ່ສົມບູນ ແລະ ໝາກກ້ວຍທີ່ມີລົດຊາດທີ່ດີທີ່ສຸດ. ບໍລິສັດ ສຸກຮຸ່ງເຮືອງ ໄດ້ມີການເຮັດວຽກຮ່ວມກັບ ກຸ່ມສະຫະບໍລິສັດ Nafoods ເຊິ່ງເປັນກຸ່ມບໍລິສັດຜູ້ຜະລິດ ແລະ ສົ່ງອອກສິນຄ້າກະສິກຳທົ່ວໂລກ ຈາກປະເທດຫວຽດນາມ ແລະ ກໍ່ເປັນບໍລິສັດທີ່ທໍາການຈັດສົ່ງໝາກກ້ວຍລາວ ອອກສູ່ຕະຫຼາດໃນບັນດາປະເທດເອີຣົບ ແລະ ຍັງໄດ້ແປຮູບຜົນຜະລິດ ເປັນສິນຄ້າສຳເລັດຮູບອີກດ້ວຍ. 

“ພວກເຮົາເອົາໃຈໃສ່ຜະລິດໝາກກ້ວຍແຕ່ລະໜ່ວຍ ຄືກັບພວກເຮົາປູກ ເພື່ອກິນເອງໃນຄອບຄົວກ່າວໂດຍ ທ່ານ ນາງຕຸ້ມຄໍາ ພວງມະຈັນ, ຫົວໜ້າກຸ່ມບໍລິສັດ Nafoods
ປະຈໍາປະເທດລາວພ້ອມນັ້ນ, ເພິ່ນຍັງໄດ້ກ່າວຕື່ມອີກວ່າສຳລັບພວກເຮົາແລ້ວ, ຄຸນນະພາບແມ່ນຖືກເນັ້ນເປັນອັນດັບຕົ້ນໆເພາະວ່າ ພວກເຮົາກໍ່ຮັບປະທານເອງ ແລະ ພວກເຮົາຢາກແບ່ງປັນສິ່ງທີ່ດີໃຫ້ແກ່ຄົນທີ່ເຮົາຮັກ.”

ການປູກສວນກ້ວຍໃນລາວແມ່ນມີພາບພົດທີ່ບໍ່ດີປານໃດໃນໄລຍະທີ່ຜ່ານມາໂດຍສະເພາະມີຂ່າວການຜະລິດກ້ວຍທີ່ສົ່ງຜົນກະທົບຕໍ່ຊຸມຊົນ.ສວນກ້ວຍແຫ່ງນັ້ນເປັນຂອງຄົນຕ່າງປະເທດ, ມັນໄດ້ສ້າງມົນລະພິດຕໍ່ແຫຼ່ງນໍ້າ, ທຳລາຍປາ ແລະ ສັດປະເພດອື່ນໆ ພ້ອມນັ້ນ ກໍຍັງສົ່ງຜົນກະທົບຕໍ່ສຸຂະພາບຂອງກຳມະກອນຍ້ອນມີການນຳໃຊ້ສານເຄມີທີ່ຫຼາຍເກີນໄປ. ໂດຍໃນປີລັດຖະບານແຫ່ງ ສປປ ລາວ ໄດ້ມີຄຳສັ່ງຫ້າມຂະຫຍາຍສວນກ້ວຍໃນຂອບເຂດທົ່ວປະເທດ ຍ້ອນວ່າມີການນຳໃຊ້ສານເຄມີທີ່ເປັນອັນຕະລາຍຕໍ່ສຸຂະພາບຂອງກຳມະກອນ.

ອີກໜຶ່ງພາລະກິດຂອງ ກຸ່ມສະຫະບໍລິສັດ Nafoods ຮ່ວມກັບ ບໍລິສັດ ສຸກຮຸ່ງເຮືອງ ແມ່ນການຢຸດນຳໃຊ້ສານເຄມີທີ່ຫຼາຍເກີນໄປ ເປັນຕົ້ນແມ່ນການໃຊ້ຢາຂ້າຫຍ້າ, ປຸ໋ຍເຄມີ, ສານເລັ່ງການຈະເລີນເຕີບໂຕ ແລະ ຢາຂ້າແມງໄມ້ ທີ່ເປັນສາເຫດຕໍ່ບັນຫາສຸຂະພາບຂອງກຳມະກອນ ໂດຍສະເພາະແມ່ນລະບົບຫາຍໃຈ ແລະ ຕັບ. 

ທ່ານ ນາງ ຕຸ້ມຄຳ ພວງມະຈັນ ໄດ້ຊີ້ແຈງວ່າພວກເຮົາເຮັດວຽກຢ່າງໜັກ ເພື່ອໃຫ້ແນ່ໃຈວ່າພະນັກງານທີ່ເຮັດວຽກກັບພວກເຮົາມີຄວາມສຸກ ແລະ ມີສຸຂະພາບທີ່ດີພ້ອມນັ້ນ, ເພິ່ນຍັງໄດ້ກ່າວຕື່ມວ່າຖ້າຫາກວ່າບໍ່ມີການນໍາໃຊ້ລະບົບການປູກທີ່ຖືກຕ້ອງຕັ້ງແຕ່ການນຳໃຊ້ສານເຄມີທີ່ຖືກຕ້ອງໃນໄລຍະເພາະກ້າເບ້ຍ ຕະຫຼອດຮອດການເກັບມ້ຽນຢູ່ໃນອຸນຫະພູມທີ່ເໝາະສົມ – ມັນຈະສ້າງຜົນກະທົບຕໍ່ທຸກຄົນຕັ້ງແຕ່ຜູ້ປູກໄປຈົນຮອດລູກຄ້າ

ບໍລິສັດ ສຸກຮຸ່ງເຮືອງ ຍັງຫວັງວ່າ ການລົງທຶນໂຄງການຜະລິດກ້ວຍຄັ້ງນີ້ ແມ່ນເພື່ອແນໃສ່ການສ້າງວຽກເຮັດງານທໍາແບບຍືນຍົງ, ປອດໄພໃຫ້ແກ່ເຂດຈຸດສຸມ ບ່ອນທີ່ແຕ່ກ່ອນປະຊາຊົນຫຼາຍຄົນ ຫາລາຍໄດ້ຈາກການຄ້າຢາ ແລະ ການຕັດໄມ້ຜິດກົດໝາຍຫຼຸດຜ່ອນບັນດາອຸດສາຫະກຳທີ່ເຮັດໃຫ້ເກີດຄວາມເສຍຫາຍໃຫ້ແກ່ຊຸມຊົມ ແລະ ສະພາບແວດລ້ອມ. ພ້ອມນັ້ນ, ເພີ່ນຍັງໄດ້ກ່າວຕື່ມວ່າພວກເຮົາຢາກເຮັດໃຫ້ທຸລະກິດ ທີ່ໄດ້ປະກອບສ່ວນເຂົ້າໃນການສ້າງຄວາມເຂັ້ມແຂງໃຫ້ແກ່ຊຸມຊົນ, ຊຸກຍູ້ເສດຖະກິດຂອງທ້ອງຖິ່ນ ແລະ ສ້າງວຽກເຮັດງານທຳທີ່ມີຄວາມຮັບປະກັນ ແລະ ປອດໄພ.

ເຖິງແມ່ນວ່າ ກຸ່ມສະຫະບໍລິສັດຈະເລັງໃສ່ສະໜັບສະໜູນຊຸມຊົນໃນທ້ອງຖິ່ນແຕ່ການຊອກຫາສະຖານທີ່ເໝາະສົມສຳລັບການເຮັດສວນກ້ວຍບໍ່ແມ່ນເລື່ອງງ່າຍ. ສວນທີ່ຈະເຮັດວຽກຮ່ວມກັນກັບບໍລິສັດໄດ້ ຕ້ອງມີເງື່ອນໄຂຕາມມາດຕະຖານ. ບໍລິສັດໄດ້ມີການຮຽກຮ້ອງໃຫ້ຊາວສວນທີ່ມາເປັນຄູ່ຮ່ວມງານປັບປຸງດ້ານລະບົບການດຳເນີນງານ
ເຊິ່ງເຈົ້າຂອງສວນຈຳນວນໜຶ່ງຍັງບໍ່ມີຄວາມພ້ອມທີ່ຈະເຮັດ. ເລີ່ມຈາກການຮັກສາຄວບຄຸມອຸນຫະພູມສະເພາະໃຫ້ຖືກຕ້ອງໃນໄລຍະການເກັບຮັກສາ ຕະຫຼອດຮອດການເອົາໃຈໃສ່ຄວບຄຸມຄຸນນະພາບຂອງຕົ້ນກ້ວຍແຕ່ລະຕົ້ນຊາວສວນທຸກຄົນແມ່ນຖືກຮຽກຮ້ອງໃຫ້ເພີ່ມຄວາມເອົາໃຈໃສ່ຕິດຕາມ ໃນລະດັບສູງຂອງທຸກໆຂັ້ນຕອນດ້ານການຜະລິດ. 

“ເນື່ອງຈາກທຸລະກິດຂອງພວກເຮົາເປັນທຸລະກິດທີ່ສະອາດ, ຈິ່ງມີຫຼາຍສິ່ງຫຼາຍຢ່າງທີ່ແຕກຕ່າງຈາກສິ່ງທີ່ຊາວສວນເຄີຍໄດ້ເຮັດ ແລະພວກເຂົາຕ້ອງໄດ້ປະຕິບັດຕາມມາດຕະຖານຂອງບໍລິສັດ ແລະ ມັນໄດ້ສ້າງການປ່ຽນແປງໃນສວນຂອງພວກເຂົາທ່ານ ນາງ ຕຸ້ມຄໍາ ໄດ້ອະທິບາຍຕື່ມວ່າດັ່ງນັ້ນ ພວກເຮົາດີໃຈຫຼາຍທີ່ໄດ້ເຮັດວຽກຮ່ວມກັບຄູ່ຮ່ວມງານ ແລະ ຂອບໃຈຢ່າງຍິ່ງ ທີ່ໃນທີ່ສຸດພວກເຮົາກໍໄດ້ເຮັດວຽກຮ່ວມກັບສວນທີ່ພວກເຮົາຕາມຫາມາດົນ.”

ບາງຄັ້ງຂະບວການປ່ຽນແປງ ອາດຈະດໍາເນີນຊັກຊ້າ – ແຕ່ຜົນທີ່ໄດ້ກັບມາແມ່ນມີຄ່າຢ່າງຫຼວງຫຼາຍ. ດັ່ງທີ່ທ່ານ ນາງ ຕຸ້ມຄຳ ໄດ້ກ່າວວ່າ “ຂ້າພະເຈົ້າຫວັງວ່າວັນໜຶ່ງ ຂ້າພະເຈົ້າຈະເຫັນໝາກກ້ວຍຂອງລາວເຮົາໄດ້ຮັບການຢັ້ງຢືນດ້ານຄວາມປອດໄພ, ສະອາດ ແລະ ຈຳໜ່າຍຢູ່ຮ້ານຄ້າຕ່າງໆໃນທົ່ວໂລກ.”

ແປ ແລະ ຮຽບຮຽງໂດຍ ວິໄລສອນ ເຫຼື້ອງ

ຮູບໂດຍ ພູນຊັບ ເທວົງສາ