ມາເບິ່ງນໍາກັນວ່າມີສະຖານທີ່ໃດທີ່ທ່ານອາດຈະພາດໄປໃນຊ່ວງບໍ່ໄດ້ມາຢາມລາວ
ຖືໄດ້ວ່າເວລາໄດ້ຜ່ານໄປດົນພໍສົມຄວນ​​ທີ່ປະເທດລາວບໍ່ໄດ້​ຕ້ອນຮັບ​ແຂກ​ຕ່າງດ້າວທ້າວຕ່າງແດນໃຫ້ເຂົ້າມາ​ຢ້ຽມຢາມ, ​ດັ່ງນັ້ນ ພວກ​ເຮົາຈຶ່ງ​ດີ​ໃຈເປັນຢ່າງຍິ່ງທີ່ພວກທ່ານ​​ໄດ້​ກັບຫວນ​ຄືນ​ມາທ່ຽວປະເທດເຮົາອີກຄັ້ງ. ນັບໄດ້ວ່າເປັນເວລາ 777 ວັນແລ້ວທີ່ໄດ້ມີການປິດປະເທດ, ເຊິ່ງໃນຊ່ວງທີ່ທ່ານບໍ່ຢູ່ ປະເທດລາວໄດ້ພັດທະນາບັນດາຈຸດທ່ອງທ່ຽວ, ໂຮງແຮມ, ຮ້ານອາຫານ ທີ່ເມື່ອທ່ານມາເຫັນແລ້ວຈະຕິດໃຈແນ່ນອນ.

ພູຫຍ້າຄາ
ພູຜາຫີນແຫ່ງນີ້ເໝາະສຳລັບການຍ່າງປ່າ ແລະ ຕັ້ງແຄ້ມ ເຊິ່ງສາມາດເດີນທາງເຂົ້າໄປໄດ້ແບບງ່າຍໆພຽງແຕ່ມີຜູ້ນໍາທ່ຽວທ້ອງຖິ່ນພາໄປ, ເພາະວ່າເສັ້ນທາງດັ່ງກ່າວຕັ້ງຢູ່ຫ່າງຈາກແຂວງອຸດົມໄຊພຽງແຕ່ 32 ກິໂລແມັດ ເທົ່ານັ້ນ. ທ່ານສາມາດເລືອກໄດ້ວ່າຈະທ່ຽວໃນປ່າເປັນເວລາໜຶ່ງ ຫຼື ສອງຄືນ ເພື່ອຊຶມຊັບກັບທິວທັດໂງ່ນຫີນອັນໜ້າແປກຕາທີ່ສາມາດພົບເຫັນໄດ້ຢູ່ບ່ອນນີ້ເທົ່ານັ້ນ, ມາຫາຍໃຈເອົາອາກາດບໍລິສຸດຈາກພູຜາປ່າດົງ ພ້ອມທັງຊົມດວງດາວກະພິບຍິບຍັບຢູ່ເຕັມທ້ອງຟ້າກັນເທາະ.

ລົດໄຟລາວ-ຈີນ
ລົດໄຟດັ່ງກ່າວແລ່ນດ້ວຍຄວາມໄວ 120 ກິໂລແມັດ ຕໍ່ ຊົ່ວໂມງ ຜ່ານທິວທັດທໍາມະຊາດທີ່ສວຍສົດງົດງາມ, ຂ້າມຂົວທີ່ມີຄວາມຍາວ 62 ກິໂລແມັດ ແລະ ຜ່ານອຸໂມງຍາວ 198 ກິໂລແມັດ ອອກໄປສູ່ ຊາຍແດນຈີນ. ນອກນັ້ນ, ເສັ້ນທາງດັ່ງກ່າວຍັງອໍານວຍຄວາມສະດວກໃຫ້ການເດີນທາງໄປເຂດນອກເມືອງເຊັ່ນ: ເມືອງກາສີ, ເມືອງງາ, ນາເຕີຍ ແລະ ບໍ່ເຕັນ ເຊິ່ງເປັນຈຸດໝາຍປາຍທາງເພີ່ມເຕີມຈາກສະຖານທີ່ທ່ອງທ່ຽວຫຼັກຄື: ເມືອງວັງວຽງ, ຫຼວງພະບາງ ແລະ ອຸດົມໄຊ.

ເດິ ຣັອກ ວິວພ້ອຍພູຜາມ່ານ
ແມ່ນຈຸດໝາຍປາຍທາງຂອງການປະຈົນໄພໃນແຂວງຄໍາມ່ວນ ທີ່ລວບລວມເອົາກິດຈະກໍາຕ່າງໆເຊັ່ນ: ການຂີ່ສາຍສະລີງ, ຂົວຕາໜ່າງແມງມຸມ ແລະ ເວຍ ເຟີຣາຕ້າ ທີ່ຕັ້ງຢູ່ລະຫວ່າງພູຫີນປູນອັນສວຍງາມ. ມາຮ່ວມເພີດເພີນໄປກັບການເຂົ້າພັກໃນຫ້ອງພັກແບບແຄັບຊູນທີ່ສະດວກສະບາຍ ຫຼື ສາມາດເລືອກເຮືອນຕົ້ນໄມ້ອັນຫຼູຫຼາ. ນອກນັ້ນ, ຍັງມີສາຂາຂອງ ຮ້ານອາຫານ ຂອບໃຈເດີ ທີ່ຂຶ້ນຊື່ໄວ້ຄອຍໃຫ້ບໍລິການທ່ານເພື່ອດື່ມດໍ່າໄປກັບບັນຍາກາດ ແລະ ທິວທັດອັນແສນສວຍງາມ.

ໂຮງແຮມ ສຸພັດຕຣາ
ທີ່ພັກສຸດເກ໋ແຫ່ງໃໝ່ຂອງຫຼວງພະບາງທີ່ມີຄວາມຫຼູຫຼາແຕ່ລາຄາຈັບຕ້ອງໄດ້. ສະຖານທີ່ດັ່ງກ່າວມີຫ້ອງພັກ 37 ຫ້ອງ, ຖືກຕົບແຕ່ງຢ່າງສວຍງາມທີ່ຍັງຄົງກິ່ນອາຍຄວາມເປັນລາວໄວ້. ມີສະລອຍນ້ຳສີຟ້າສົດໃສຄວາມຍາວ 25 ແມັດ ອັນໜ້າຕື່ນຕາຕື່ນໃຈເໝາະສຳລັບການລອງຊີມຄັອກເທວ ແລະ ເຕີມພະລັງຄວາມສົດຊື່ນກ່ອນຮັບປະທານອາຫານແຊບຊ້ອຍທີ່ ຫ້ອງອາຫານລາວເດີມ ຂອງໂຮງແຮມ.

ຮ້ານ ເຊົ່າສິ້ນ
ຮ້ານ ເຊົ່າສິ້ນ ​ເປັນຮູບແບບການ​ທ່ອງ​ທ່ຽວທາງ​ວັດທະນະທຳໃໝ່ທີ່ສ້າງສີສັນໃຫ້ກັບ ​ຫຼວງ​ພະ​ບາງ ເຊິ່ງເອີ້ນໄດ້ວ່າໃຫ້ບໍລິການ “ເຊົ່າ ແລ້ວໃສ່ເລາະ” ທໍາອິດຂອງເມືອງຫຼວງເລີຍກໍ່ວ່າໄດ້. ຮ້ານເຊົ່າສິ້ນມີເຄື່ອງທີ່ເປັນສິ້ນພື້ນເມືອງ, ເສື້ອ, ໂສ້ງ, ຜ້າບ່ຽງ, ເຄື່ອງປະດັບ, ແລະ ອຸປະກອນເສີມເພື່ອເຕີມແຕ່ງຕ່າງໆ ໃນທຸກຂະໜາດເພື່ອໃຫ້ນັກທ່ອງທ່ຽວໄດ້ເລືອກເຊົ່າໄປນຸ່ງ ບໍ່ວ່າຈະເປັນແບບເຄິ່ງມື້ ຫຼື ໝົດມື້ກໍ່ໄດ້.

ໂຮງແຮມຝຶກປະຕິບັດ
ສະຖານທີ່ເກີດຂຶ້ນໃໝ່ໃນວັງວຽງແຫ່ງນີ້ ໃຫ້ບໍລິການຕ້ອນຮັບແຂກທີ່ຕ້ອງການເຂົ້າມາພັກຄ້າງຄືນ, ຮັບປະທານອາຫານ, ຈັດກອງປະຊຸມ ແລະ ສໍາມະນາຝຶກອົບຮົມ. ນອກນີ້, ສະຖານທີ່ດັ່ງກ່າວຍັງເປັນບ່ອນສ້າງໂອກາດ ສ້າງສະພາບແວດລ້ອມພາກປະຕິບັດຕົວຈິງເພື່ອຊ່ວຍຝຶກຝົນຫຼໍ່ຫຼອມນັກສຶກສາ ສາຂາວິຊາການທ່ອງທ່ຽວ ແລະ ການບໍລິການ. ພະນັກງານໃນໂຮງແຮມ ແລະ ຮ້ານອາຫານລ້ວນແລ້ວແຕ່ແມ່ນນັກສຶກສາໜຸ່ມສາວໄຟແຮງທີ່ໄດ້ຮັບການເບິ່ງແຍງ ຊີ້ນໍາໃກ້ຊິດຈາກຄູອາຈານ ແລະ ທີມງານບໍລິຫານຈາກສາກົນ ເພື່ອພັດທະນາທັກສະສໍາຄັນ ແລະ ເພື່ອກຽມພ້ອມພວກເຂົາໃຫ້ກ້າວເຂົ້າສູ່ຕະຫຼາດແຮງງານ.

ທາງດ່ວນ ນະຄອນຫຼວງວຽງຈັນ – ວັງວຽງ
ຫາກທ່ານຕ້ອງການເດີນທາງໄປວັງວຽງແບບບໍ່ໃຊ້ເວລາດົນ, ທາງດ່ວນ ນີ້ຈະຊ່ວຍໃຫ້ເວລາການເດີນທາງດ້ວຍລົດຍົນຂອງທ່ານສັ້ນລົງເຫຼືອພຽງແຕ່ໜຶ່ງຊົ່ວໂມງເທົ່ານັ້ນ. ນອກນີ້, ເສັ້ນທາງດັ່ງກ່າວຍັງເຊື່ອມຕໍ່ໄປຫາຣີສອດຢູ່ດານເໜືອຂອງອ່າງນໍ້າງື່ມ ແລະ ບັນດາແຫຼ່ງທ່ອງທ່ຽວຕ່າງໆທີ່ຢູ່ໃກ້ກັບຂອບເຂດເຂື່ອນນ້ຳງື່ມ.

ແປ ແລະ ຮຽບຮຽງໂດຍ ວັນນະແສງ ອິນສານ
ຮູບໂດຍ ພູນຊັບ ເທວົງສາ