ຮ້ານອາຫານທີ່ສູງທີ່ສຸດໃນນະຄອນຫລວງວຽງຈັນ.

ເທິງຊັ້ນສິບຂອງໂຮງແຮມ Capitol Residence ເປັນທີ່ຕັ້ງຂອງຮ້ານອາຫານທີ່ສູງທີ່ສຸດໃນເມືອງ ແລະ ຕອນນີ້ ອາຫານເຊົ້າໄດ້ພ້ອມເສີບໃຫ້ທ່ານແລ້ວ. ສຽງຂອງຕະຫລິວກັບກະທະກະທົບກັນ
ເບົາໆ ແລະ ສຽງຂອງນມັນທອດເບຄອນກອບໆບວກກັບກິ່ນຫອມຫວານທີ່ປະສົມປະສານກັນລະຫວ່າງແພນເຄັກ ແລະ ກາເຟຮ້ອນໆໄດ້ພັດຜ່ານມາພ້ອມກັບສາຍລົມເບົາໆ. ກິ່ນຫອມທີ່ມາຈາກຫ້ອງຄົວຈະສ້າງຄວາມປະທັບໃຈບໍ່ໜ້ອຍໄປກວ່າວິວງາມໆທີ່ຢູ່ຕໍ່ໜ້າຂອງທ່ານຢ່າງແນ່ນອນ.

Ray’s Capitol Grille ເປັນຮ້ານອາຫານຂຶ້ນຊື່ຫລັກໆຂອງ Daniel Buchanan, ຊາຍທີ່ບໍ່ເຫລືອໃຜໃຫ້ເອົາຊະນະນອກຈາກຕົວລາວເອງ. Daniel ປະສົບຜົນສຳເລັດໃນການເປີດຮ້ານອາຫານສະໄຕລ໌ອາເມລິກາແບບດັ້ງເດີມໃນລາວໄດ້ ໃນເມືອງຫລວງນ້ອຍໆແຫ່ງນີ້.

Daniel ຕ້ອງການສະຖານທີ່ຕັ້ງຮ້ານອາຫານທີ່ສາມາດໃຫ້ປະສົບການການຮັບປະທານອາຫານສະໄຕລ໌ອາເມລິກາ, ແລະແນ່ນອນ ພ້ອມກັບທິວທັດທີ່ງົດງາມ, ເພື່ອໃຫ້ບໍລິການອາຫານເຊົ້າຕິດ
ລະບຽງ ແລະ ບາຣ໌ກິນດື່ມຕອນແລງ. ອາຫານເຊົ້າທີ່ເປັນເອກະລັກຂອງຮ້ານໄດ້ແກ່ບລູເບີລີ້ແພນເຄັກເສີບພ້ອມກັບມາກສຄາໂປນຊີສ  ແລະ  ນໍ້າບລູເບີລີ້ເຊື່ອມເຮັດເອງ, ແລະ ໄຂ່ເບເນດິກ ກິນກັບແຊວມອນ ຫລື ແຮມຮົມຄວັນ. ນອກຈາກນັ້ນ, ຍັງມີອາຫານເຊົ້າແບບອາເມລິກາອີກຫລາກຫລາຍລາຍການເຊັ່ນ: ເວໂວສ ແຣນເຊໂຣ (huevos rancheros) ກິນກັບໄສ້ກອກໂຊຣິໂຊທີ່ເຮັດເອງຢູ່ຮ້ານ,  ຫລື  ສະເຕັກໝູ ກັບ ຈືນໄກ່ພ້ອມກັບຊອສຄຣີມສີຂາວແບບທາງໃຕ້ຂອງອາເມລິກາ.

ຈຸດພິເສດອີກຢ່າງໜຶ່ງຂອງ Ray’s Capitol Grille ກໍຄືວິວທີ່ສາມາດເຫັນຕາເວັນຂຶ້ນແລະຕາເວັນຕົກດິນທີ່ລາລັບໄປກັບທິວທັດແມ່ນໍ້າຂອງໄດ້. ສຳລັບອາຫານແລງນັ້ນ, ທາງຮ້ານມີເມນູພິເສດໃຫ້ບໍລິການເຊັ່ນ: ເບີເກີທີ່ເປັນເມນູຂຶ້ນຊື່ຂອງ Daniel, ເຊີບແອນເທີບ(ສະເຕັກເສີບພ້ອມກັບອາຫານທະເລ), ສະຫລັດຜັກປອດສານຜິດທີ່ມີໃຫ້ທ່ານເລືອກຢ່າງຈຸໃຈ, ແລະລາຍການອາຫານສະໄຕລ໌ເທັກຊັດ-ເມັກຊິກັນທີ່ຫລາກຫລາຍ.

ແຕ່ກ່ອນທີ່ຈະມາຮອດຈຸດນີ້ໄດ້ນັ້ນ Daniel ກໍຜ່ານຄວາມຍາກລຳບາກມາບໍ່ໜ້ອຍ. ກ່ອນທີ່ຈະມາອາໄສຢູ່ລາວ, Daniel ອາໄສຢູ່ບາງກອກມາກ່ອນ. Daniel ມັກ ແລະ ມີຄວາມປະທັບໃຈທຸກຄັ້ງທີ່ມາຢ້ຽມຢາມທ່ຽວຊົມລາວ. ຈົນທ້າຍທີ່ສຸດກໍໄດ້ຕັດສິນໃຈຍ້າຍມາອາໄສຢູ່ປະເທດລາວ ຫລັງຈາກທີ່ປະສົບກັບເຫດການນໍ້າຖ້ວມໃນປະເທດໄທ ໃນປີ 2010.

“ເຮືອນຂອງພວກເຮົາຖືກນຳ້ຖ້ວມ ແລະ ຈົມຢູ່ໃນນໍ້າມັນເປັນຊ່ວງເວລາທີ່ຍາກລຳບາກສຳລັບທຸກໆຄົນ ແລະ ພວກເຮົາມີແຕ່ຄິດວ່າເຮົາຕ້ອງລົງມືປ່ຽນແປງບາງຢ່າງ” ກ່າວໂດຍ Daniel.

ເມື່ອຍ້າຍມາຢູ່ປະເທດລາວ, ລາວກໍ່ສັງເກດເຫັນທັນທີເຖິງຊ່ອງວ່າງໃນຕະຫລາດຂອງທຸລະກິດຮ້ານອາຫານໃນລາວ ເຊິ່ງສ່ວນໃຫຍ່ຈະມີແຕ່ຮ້ານອາຫານແບບຝຣັ່ງເຕັມໄປໝົດ ແລະ ເມນູສ່ວນຫລາຍທີ່ພົບເຫັນແມ່ນ ພິດຊ່າ ແລະ ພາສຕ້າ. ມີພຽງຮ້ານສ່ວນໜ້ອຍທີ່ໃຫ້ການບໍລິການອາຫານແບບອາເມລິກັນແທ້ໆ. Daniel ເລີຍເລີ່ມເປີດຮ້ານນ້ອຍໆໃຈກາງເມືອງ ຂາຍແຮມເບີເກີ ແລະ ຊີສສະເຕັກ ໂດຍມີພັນລະຍາ ແລະ ລູກຂອງລາວຊ່ວຍແລະ ຜົນຕອບຮັບກໍຖືວ່າດີເກີນຄາດ.

“ຄຳແນະນຳປາກຕໍ່ປາກແຜ່ກະຈາຍໄປຢ່າງໄວວາ. ຂ້ອຍມີທັງບັນດາລູກຄ້າຄົນຕ່າງປະເທດທີ່ອາໄສໃນລາວ ທີ່ຢາກກິນອາຫານອາເມລິກາແບບດັ້ງເດີມ ແລະ ມີທັງເດັກນ້ອຍໄວໜຸ່ມລາວທີ່ຕ້ອງການລອງສິ່ງໃໝ່ໆ.” ກ່າວໂດຍ Daniel.

ປະຈຸບັນ, Daniel ເປັນເຈົ້າຂອງທຸລະກິດຮ້ານອາຫານທັງໝົດຫລາຍແຫ່ງ ລວມທັງໂຮງອາຫານຂອງໂຮງຮຽນແຫ່ງໜຶ່ງ ແລະ ມີພະນັກງານທັງໝົດ 30 ຄົນ. ລາວເວົ້າວ່າ ພາລະກິດຂອງລາວແມ່ນເພື່ອຊ່ວຍສ້າງຄວາມເຂົ້າໃຈໃໝ່ໆໃນທຸລະກິດການບໍລິການໃນລາວໃຫ້ຫລາຍຂຶ້ນ, ໃຫ້ຄວາມຮູ້ແກ່ຜູ້ຄົນ ແລະ ຊ່ວຍໃຫ້ພວກເຂົາຮູ້ວ່າ ນີ້ກໍແມ່ນອີກໜຶ່ງທາງເລືອກສຳລັບການສ້າງອາຊີບໃນອະນາຄົດ. ລາວເອົາໃຈໃສ່ໃນການສະໜອງວຽກເຮັດງານທຳໃຫ້ກັບແມ່ຍິງລາວຜູ້ດ້ອຍໂອກາດໃນເຂດຊົນນະບົດ. ລາວໄດ້ສາງເສັ້ນທາງເພື່ອໃຫ້ພວກເຂົາໄດ້ເຕີບໂຕໂດຍເລີ່ມຈາກການເຮັດວຽກເປັນພໍ່ຄົວແມ່ຄົວ ຫລື ພະນັກງານເສີບຈົນກ້າວໄປເປັນຜູ້ຈັດການຮ້ານອາຫານ.

ເຖິງແມ່ນວ່າລາວຈະປະສົບຜົນສຳເລັດແລ້ວກໍ່ຕາມ, Daniel ຍັງບໍ່ພ້ອມທີ່ຈະວາງມືຈາກການເຮັດອາຫານເທື່ອ. ລາວມີແຜນການສ້າງທຸລະກິດໃໝ່ທີ່ກຳລັງດຳເນີນການຢູ່ ເຊິ່ງໝັ້ນໃຈໄດ້ເລີຍວ່າສິ່ງໃດກໍ່ຕາມທີ່  Daniel ກຳລັງຈະເຮັດນັ້ນ ເປັນແນວຄິດທີ່ແຊບສຸດໆແນ່ນອນ.

ຂໍ້ມູນເພີ່ມເຕີມ

ຮ້ານ Ray’s Capitol Grille ຕັ້ງຢູ່ເທິງຊັ້ນ10 ຂອງໂຮງແຮມ Capitol Residence
ແລະ ເປີດໃຫ້ບໍລິການອາຫານເຊົ້າ ແລະ ບຣັນສຕັ້ງແຕ່ 7 ຫາ14 ໂມງໃນວັນທ້າຍອາທິດ
(ເສົາ-ອາທິດ) ແລະ ໃນ ຕອນແລງແມ່ນຈະໃຫ້ບໍລິການ ທາປາສ, ຄອກເທວ ແລະ ອາຫານຄໍ່າ
ເຊິ່ງໄດ້ແກ່ເມນູເບີເກີ, ສະຫລັດຜັກປອດສານພິດ ແລະ ສະເຕັກທີ່ຫລາກຫລາຍໃຫ້ເລືອກ.
ນອກນີ້, ທາງຮ້ານຍັງມີພຶ້ນທີ່ສຳລັບຈັດງານລ້ຽງສ່ວນຕົວ ແລະ ມີບາຣ໌ເທັນເດີມືອາຊີບໄວ້ໃຫ້
ບໍລິການ.

ແປ ແລະ ຮຽບຮຽງໂດຍ ວັນນະແສງ ອິນສານ

ຮູບໂດຍ ພູນຊັບ ເທວົງສາ