ແຊງກຣີລາ ເມືອງຫ່າງໄກທີ່ໜ້າຄົ້ນຫາ

ພໍແຕ່ເອີ່ຍເຖິງຊື່ “ແຊງກຣີລ່າ” ກໍເຮັດໃຫ້ນຶກເຖິງສະຖານທີ່ແຫ່ງໜຶ່ງທີ່ຕັ້ງຢູ່ເທິງພູເຂົາອັນໄກໂພ້ນ ທ່າມກາງຕໍານານແຫ່ງຄວາມສະຫງົບ, ຄວາມຜາສຸກ, ແລະ ຄວາມເປັນໜຸ່ມຊົ່ວນິລັນດອນ, ທີ່ເປັນດິນແດນແຫ່ງສົມມຸດຕິຖານໃນນະວະນິຍາຍເລື່ອງ “Lost Horizon” ປີ 1993, ປະພັນໂດຍ ເຈມ ຮິລຕັນ (James Hilton).
ເຖິງແມ່ນໃນເວລານັ້ນຈະເປັນພຽງຕໍານານກ່າວຂານກໍຕາມ, ແຕ່ປັດຈຸບັນ ເມືອງໃນຕໍານານຊໍ້າພັດໄດ້ກາຍເປັນເມືອງທີ່ມີຕົວຕົນໃຫ້ສາມາດສໍາຜັດໄດ້ແທ້ ເຊິ່ງເມືອງແຫ່ງນີ້ຕັ້ງຢູ່ ມົນທົນຍູນນານ, ປະເທດຈີນ, ເນື່ອງຈາກໃນປີ 2001, ເມືອງຈົງຕ້ຽນ ໄດ້ຮັບການປ່ຽນຊື່ມາເປັນເມືອງແຊງກຣີລ່າ ເນື່ອງຈາກເປັນຄວາມພະຍາຍາມຂອງລັດໃນການຊຸກຍູ້ສົ່ງເສີມການທ່ອງທ່ຽວໃນເຂດດັ່ງກ່າວ. ດິນແດນທັງສອງແຫ່ງນີ້ ຖືເປັນສະຖານທີ່ທີ່ມີຄວາມງົດງາມທາງທໍາມະຊາດທີ່ໜ້າອັດສະຈັນ ໂດຍຕັ້ງຢູ່ເທິງພູເຂົາທີ່ຢູ່ເຂດຫ່າງໄກສອກຫຼີກ, ສາມາດເວົ້າໄດ້ວ່າ ສະຖານທີ່ແຫ່ງນີ້ຕັ້ງຢູ່ຂ້ອນຂ້າງຫ່າງໄກຈາກເຂດອື່ນໆຂອງໂລກກໍວ່າໄດ້, ແລະ ເປັນສະຖານທີ່ຢູ່ອາໄສຂອງປະຊາຊົນຜູ້ທີ່ມັກໃຊ້ຊີວິດດ້ວຍຄວາມສະຫງບົສຸກ ແລະ ມີຄວາມກົມກືນກັບທໍາມະຊາດອັນແທ້ຈິງ.
ສາມາດອອກເດີນທາງເພື່ອຄົ້ນພົບເມືອງແຊງກຣີລ່າໄດ້ດ້ວຍຕົນເອງ ໂດຍເດີນທາງຜ່ານທາງບົກ ຈາກລີ່ຈຽງ. ໃນທີ່ນີ້, ທ່ານຈະໄດ້ສໍາຜັດກັບພື້ນທີ່ທີ່ເຕັມໄປດ້ວຍທົ່ງຫຍ້າອັນຂຽວງາມ, ລວມທັງສາຍນໍ້າໃສພ້ອມສົ່ງແສງເຫຼື້ອມລະຍິບລະຍັບເມື່ອຕ້ອງກັບດວງຕາເວັນ, ພູເຂົາທີ່ຖືກປົກຄຸມໄປດ້ວຍຫິມະອັນເຢືອກເຢັນ ແລະ ວັດທະນະທໍາທີ່ເປັນເອກະລັກບໍ່ຄືໃຜ.

ວັດຊົ່ງຈ່ານຫຼິນ ເປັນວັດສາສະໜາພຸດແບບທິເບດທີ່ໃຫຍ່ທີ່ສຸດໃນແຂວງຍູນນານ

ນັກທ່ອງທ່ຽວຖ່າຍຮູບແກ້ງໃນແມ່ນໍ້າຢູ່ ຊ່ອງເຂົາເສືອກະໂຈນ

ທາງຍ່າງຂຶ້ນ ພູເຂົາຫິມະມັງກອນຢົກ

ຢູ່ແຂວງຍູນນານມີຊົນເຜົ່າຫຼາກຫຼາຍ ລວມເຖິງເຜົ່າ ນາຊີ່ ທີ່ຢູ່ບໍລິເວນ ແຊງກຣີລ່າ

ການເດີນທາງ
ສາຍການບິນລາວ ໃຫ້ບໍລິການຖ້ຽວບິນໄປຄຸນໝິງທຸກໆມື້. ຈາກນັ້ນທ່ານກໍ່ສາມາດເດີນທາງຕໍ່ດ້ວຍຖ້ຽວບິນສາຍໃໝ່ ຫຼື ລົດໄຟ ເພື່ອມຸ່ງໜ້າສູ່ເມືອງລີ່ຈຽງ, ຈາກນັ້ນຈຶ່ງເດີນທາງຕໍ່ໄປຍັງເມືອງແຊງກຣີລ່າ.

ແປ ແລະ ຮຽບຮຽງໂດຍ ໄພບູນ ທະນະບົວສີ
ຮູບໂດຍ ພູນຊັບ ເທບວົງສາ