ຄາເຟ່ທີ່ໃຫ້ບໍລິການທັງບັນຍາກາດ ແລະ ເຂົ້າໜົມອົບສູດຕົ້ນຕໍາລັບຈາກຝຣັ່ງ.

ໃນໄລຍະອາທິດທຳອິດຂອງການເປີດຮ້ານ Annabelle (ອານາແບລ) ສາຂາທີ 2 ທີ່ບ້ານ ສະພານທອງເໜືອ, ທາງເຈົ້າຂອງຮ້ານຍັງບໍ່ໄດ້ມີແຜນທີ່ຈະໂຄສະນາຫລາຍເທື່ອ, ພຽງແຕ່ຕ້ອງການບອກກ່າວແກ່ໝູ່ເພື່ອນ ແລະ ຄອບຄົວເພື່ອທົດລອງເປີດໃຫ້ບໍລິການກ່ອນ. ແຕ່ເມື່ອເປີດຮ້ານ, ຜູ້ຄົນທີ່ສັນຈອນຕາມເສັ້ນທາງກໍຢຸດແວ່ ແລະ  ເຂົ້າມາດື່ມກາເຟ ພ້ອມກັບຮັບປະທານຄົວຊອງຫອມໆ, ແລະ ຫລັງຈາກນັ້ນລູກຄ້າກໍຫລັ່ງໄຫລເຂົ້າມາຢ່າງບໍ່ຂາດສາຍ.

ທ່ານ David Bant, ໜຶ່ງໃນຜູ້ບໍລິຫານຮ້ານອານາແບລ  ເລົ່າຄືນຕອນກຳລັງຈະເປີດຮ້ານໃໝ່ໆວ່າຜູ້ຄົນທີ່ສັນຈອນໄປມາ ຕ່າງຢາກຮູ້ກ່ຽວກັບຮ້ານນີ້ ຕອນທີ່ພວກເຂົາເຫັນເຮົາກຳລັງກໍ່ສ້າງ ແລະ ຕົບແຕ່ງຮ້ານ. ບາງຄົນກໍມາທຸກໆມື້ ແລະ ຖາມເຮົາວ່າຈະເປີດມື້ໃດມັນເປັນຄວາມພາກພູມໃຈທີ່ໄດ້ເຫັນລູກຄ້າໃຫ້ຄວາມສົນໃຈຫລາຍຂະໜາດນີ້ ເຖິງແມ່ນວ່າຮ້ານບໍ່ທັນໄດ້ເຮັດການໂຄສະນາ ຫລື ເປີດຢ່າງເປັນທາງການເທື່ອກໍຕາມ.ໂດຍໄດ້ແຮງບັນດານໃຈຈາກຮ້ານຄາເຟ່ຢູ່ປາຣີ, ທາງທີມບໍລິຫານຈິ່ງໄດ້ປຶກສາກັບທີມອອກແບບເພື່ອປ່ຽນຮູບໂສສະຖານທີ່ແຫ່ງນີ້ໃຫ້ເປັນຮູບໂສມໃໝ່. ການຕົບແຕ່ງດ້ານໜ້າຮ້ານໄດ້ດຶງດູດໃຫ້ຜູ້ຄົນທີ່ກາຍໄປກາຍມາຢຸດເບິ່ງບໍ່ໜ້ອຍ. ມີການປະດັບນໍ້າພຸໄວ້ກາງສວນ, ມີການປູກຕົ້ນໄມ້ປະດັທາງຍ່າງ ສະຫລັບກັບໂຄມໄຟແບບຕັ້ງ ແລະ ຫິນແກະສະຫລັກ ແລະ ມີຊິງຊ້າເບາະນຸ້ມຢູ່ກ້ອງຕົ້ນໄມ້ໃຫຍ່ ເຊິ່ງປົກຄຸມຄວາມຮ້ອນຈາກແດດໄດ້ດີ ໃຫ້ຄວາມຮົ່ມເຢັນທົ່ວສວນ.

ຢູ່ປະເທດຝຣັ່ງ, ຜູ້ຄົນສາມາດອອກໄປຮັບປະທານຂະໜົມອົບ ແລະ ເຂົ້າຈີ່ແຊບໆໄດ້ພຽງຍ່າງກ້າວອອກຈາກເຮືອນ. ຖ້າຫາກທ່ານຕ້ອງການຮັບປະທານເຂົ້າຈີ່ ແລະ ເຂົ້າໜົມອົບລົດຊາດ ແລະ ສູດຕົ້ນຕໍາລັບຈາກຝຣັ່ງ, ອານາແບລພ້ອມໃຫ້ບໍລິການແກ່ທ່ານແລ້ວ. ເຂົ້າຈີ່ ແລະ ເຂົ້າໜົມອົບທຸກຢ່າງໃນຮ້ານແມ່ນເຮັດເອງ ແລະ ໃຊ້ແຕ່ວັດຖຸດິບຊັ້ນດີເທົ່ານັ້ນ, ບໍ່ມີການໃຊ້ສານແຕ່ງກິ່ນ ຫລື ຜະລິດຕະພັນສຳເລັດຮູບຈາກໂຮງງານ. 

ຊື່ຂອງຮ້ານແມ່ນຕັ້ງຈາກຊື່ຂອງລູກສາວຂອງໜຶ່ງໃນທີມຜູ້ບໍລິການ ກໍຄື ອານາແບລ ນັ້ນເອງ. ອານາແບລສາຂາທຳອິດໄດ້ເປີດໃຫ້ບໍລິການເມື່ອສອງປີທີ່ແລ້ວ ໃນເຂດສວນສາທາລະນະເຈົ້າອານຸວົງໃຈກາງເມືອງວຽງຈັນ. ທາງຮ້ານໄດ້ຮັບຜົນຕອບຮັບເປັນຢ່າງດີ, ໂດຍສະເພາະໃນກຸ່ມນັກທ່ອງທ່ຽວ. ແຕ່ທາງຮ້ານຕ້ອງການທີ່ຈະເສີບເຂົ້າໜົມອົບສູດຕົ້ນຕໍາລັບນີ້ໃນບັນຍາກາດທີ່ມັນໄດ້ແຮງບັນດານໃຈມາ, ຈິ່ງໄດ້ເກີດມີສາຂາສອງຂຶ້ນ. ອານາແບລ 2 ສືບຕໍ່ໃຫ້ບໍລິການຂະໜົມອົບຊັ້ນເລີດ ພ້ອມກັບໃນສວນທີ່ຮົ່ມເຢັ່ນ ແລະ ບັນຍາກາດທີ່ສະບາຍໆເຊິ່ງສາມາດດຶງດູດໄດ້ທັງລູກຄ້າຄົນລາວ ແລະ ຄົນຕ່າງປະເທດທີ່ມາເຮັດວຽກຢູ່ລາວ, ແລະ ບາງຄັ້ງກໍມີ ຄົນດັງຈາກປະເທດໄທມາຢ້ຽມຢາມພ້ອມ. 

ແລ້ວແຜນງານຕໍ່ໄປຈະເປັນແນວໃດມີຜູ້ປະກອບການຫລາຍຄົນຕ້ອງການຊື້ເຟຣນຊາຍຂອງຮ້ານອານາແບລ ເພື່ອໄປເປີດຢູ່ຫລວງພະບາງ ແລະ ໃນປະເທດໄທພ້ອມ, ແຕ່ວ່າທາງຜູ້ບໍລິການຕ້ອງການທີ່ຈະເອົາໃຈໃສ່ໃນການພັດທະນາຜະລິດຕະພັນໃນປັດຈຸບັນໃຫ້ເປັນສູດທີ່ສົມບູນທີ່ສຸດກ່ອນ. ປັດຈຸບັນ, ອານາແບລ 2 ກຳລັງຢູ່ໃນຂັ້ນຕອນຂະຫຍາຍຮ້ານ ເພື່ອຮັບຮອງລຸກຄ້າທີ່ເພີ່ມຫລາຍຂຶ້ນ, ສະນັ້ນ ຈິ່ງໄດ້ມີການຕໍ່ເຕີມບ່ອນນັ່ງດ້ານນອກເນື່ອງຈາກຈໍານວນລູກຄ້າທີ່ຕ້ອງການຮັບປະທານຢູ່ກາງແຈ້ງມີຫລາຍຂຶ້ນ. ທາງຮ້ານກໍກຳລັງສ້າງສັນເມນູພິເສດສຳລັບອາຫານແລງ, ຮັບປະທານໃນບັນຍາກາດທີ່ແສນໂຣແມນຕິກ ດ້ວຍແສງຈາກໂຄມໄຟສີນວນກາງສວນ ເຊິ່ງຄາດວ່າຈະເປີດໃຫ້ບໍລິການອາຫານແລງໃນຊ່ວງທ້າຍລະດູຮ້ອນນີ້.

ທາງຮ້ານເຊື່ອວ່າ ພວກເຂົາຈະສາມາດສ້າງຄວາມປະທັບໃຈແກ່ລູກຄ້າດ້ວຍການ ບໍລິການຂະໜົມອົບທີ່ມີຄວາມສວຍງາມທັງໜ້າຕາ ແລະ ລົດຊາດທີ່ເປັນຕົ້ນຕໍາລັບຝຣັ່ງແທ້ໆໃຫ້ແກ່ລູກຄ້າທຸກທ່ານໄດ້.

ວິທີເດີນທາງ

ຮ້ານອານາແບລສາຂາ 1 ຕັ້ງຢູ່ຖະໜົນ ຂີຟ້າງຸ່ມ ບ້ານ ຊຽງຍືນ, ສ່ວນສາຂາ 2 ຕັ້ງຢູ່ທີ່ບ້ານ ສະພານທອງເໜືອ ຂ້າງໂຮງຮຽນນາໆຊາດປັນຍາທິບ.

Facebook:

@annabelle.khemkhong
@annabelle2.vientiane

ແປ ແລະ ຮຽບຮຽງໂດຍ ດວງຕາວັນ ອຸດົມຈິດ

ຮູບໂດຍ ພູນຊັບ ເທວົງສາ / ຮ້ານ ອານາແບລ