ກິດຈະກຳການແລ່ນເພື່ອເດັກນ້ອຍ

ທຸກບາດກ້າວທີ່ທ່ານກ້າວເດີນເປັນການປະກອບສ່ວນຊ່ວຍຊີວິດເດັກນ້ອຍໄດ້
ໂຮງໝໍເພື່ອນລາວສຳລັບເດັກນ້ອຍ ມີຄວາມຍິນທີ່ຈະຂໍປະກາດໃຫ້ທຸກໆທ່ານຊາບວ່າ: ກິດຈະກຳການແລ່ນເພື່ອເດັກນ້ອຍ ຫຼວງພະບາງ ຮາຟມາຣາທອນຄັ້ງທີ 8 ຈະໄດ້ຈັດຂຶ້ນໃນວັນທີ 30 ຕຸລາ 2022 ນີ້ ທີ່ນະຄອນຫຼວງພະບາງ. ເຊງກິດຈະກຳດັ່ງກ່າວນີ້ຖືວ່າເປັນຄັ້ງທຳອິດທີ່ LFHC ສາມາດຈັດຂຶ້ນໄດ້ ນັບຕັ້ງແຕ່ເກີດມີການລະບາດຂອງພະຍາດໂຄວິດ-19 ແລະ ງານນີ້ຈະຖືວ່າເປັນງານທີ່ຍິ່ງໃຫຍ່ທີ່ຈະໄດ້ເຫັນຜູ້ເຂົ້າຮ່ວມຫຼາຍກວ່າ 2,000 ຄົນຮ່ວມກັນແລ່ນ ໂດຍຜ່ານສະຖານທີ່ທາງວັດທະນະທຳຂອງລາວ. ເສັ້ນທາງໃນການແລ່ນຄັ້ງນີ້ແມ່ນໄດ້ຜ່ານສະຖານທີ່ທີ່ມີວິວທິວທັດສວຍງາມ ເປັນການແລ່ນດ້ວຍຈິດໃຈ ແລະ ຄວາມຮູ້ສຶກທີ່ສຳຜັດໄດ້ເຖິງຄວາມເປັນຈິດໜຶ່ງໃຈດຽວກັນ.
ຄຳຂວັນຂອງການແຂ່ງຂັນນີ້ແມ່ນ “ເສີມສ້າງຄວາມແຂງແຮງໃຫ້ຫົວໃຈໃນຂະນະທີ່ຍັງເຕັ້ນຢູ່.” ໂດຍການປະກອບສ່ວນທັງດ້ານເຫື່ອແຮງ ແລະ ດ້ານເງິນທຶນ, ທ່ານກໍ່ຈະໄດ້ຊ່ວຍຮັກສາ ແລະ ຊ່ວຍຊີວິດລູກຫຼານປະຊາຊົນລາວ. ໂຮງໝໍເພື່ອນລາວສຳລັບເດັກນ້ອຍ ແມ່ນເປັນໂຮງໝໍເດັກແຫ່ງດຽວໃນປະເທດລາວ ແລະ ເປັນພຽງໂຮງໝໍເດັກແຫ່ງດຽວໃນພາກເໜືອທີ່ໃຫ້ບໍລິການປິ່ນປົວເດັກນ້ອຍໂດຍທີ່ບໍ່ເສຍຄ່າໃຊ້ຈ່າຍ. ເຊງເປັນເງິນທຶນສ່ວນຕົວຂອງພາກເອກະຊົນ 100%. ເປັນສະຖານທີ່ທີ່ໃຫ້ການເບງແຍງສຸຂະພາບທີ່ມີຄຸນນະພາບສູງ, ມີຄວາມເຫັນອົກເຫັນໃຈ ແລະ ເອົາໃຈໃສ່ຕໍ່ເດັກນ້ອຍ ເປັນຈຳນວນຫຼາຍກວາ 30,000 ຄົນໃນແຕ່ລະປີ. ເດັກນ້ອຍເຫຼົ່ານີ້ ແມ່ນມາຈາກເຂດພື້ນທີ່ທີ່ມີຄວາມທຸກຍາກ ແລະ ຫ່າງໄກສອກຫຼີກທາງພາກເໜືອຂອງປະເທດລາວ.

LFHC ດໍາເນີນງານບົນພື້ນຖານສາມດ້ານຄື: ເບງແຍງສຸຂະພາບ, ການສຶກສາ ແລະ ການປ້ອງກັນພະຍາດ ໂດຍ 12 ພະແນກ, ເຊງປະກອບດ້ວຍ 42 ຕຽງນອນໃນພະແນກຄົນເຈັບພາຍໃນ, ພະແນກຄົນເຈັບພາຍນອກທີ່ເບງແຍງເດັກນ້ອຍ 150 ຄົນຕໍ່ວັນ, ພ້ອມທັງໜ່ວຍງານເບິ່ງແຍງເດັກນ້ອຍເກີດໃໝ່ ທີ່ມີຄວາມທັນສະໄໝທີ່ໃຫ້ການເບງແຍງແອນ້ອຍທີ່ມີນ້ຳໜັກພຽງແຕ່ 700 ກຣາມ, ມີຄລີນິກພະຍາດ ປ້າງກິນເລືອດ ທີ່ປິ່່ນປົວເດັກນ້ອຍ 200 ຄົນຕໍ່ເດືອນ, ແລະ ໜ່ວຍງານປິ່່ນປົວທີ່ມີຄວາມປອດໄພສູງ (HAU) ໃໝ່ ທີ່ໃຫ້ການປິ່ນປົວໂດຍບໍ່ເສຍຄ່າໃຊ້ຈ່າຍແກ່ເດັກນ້ອຍທີ່ເຈັບປ່ວຍໜັກໃນພາກເໜືອຂອງປະເທດລາວ. HAU ທີ່ໂຮງໝໍເພື່ອນລາວສຳລັບເດັກນ້ອຍ ເປັນສູນກາງທາງການແພດທີ່ບໍ່ເສຍຄ່າໃຊ້ຈ່າຍແຫ່ງດຽວໃນທົ່ວປະເທດ. ນອກຈາກນີ້ LFHC ແມ່ນຍັງເປັນທີ່ຕັ້ງຂອງຄລີນິກເພື່ອພັດທະນາການເດັກນ້ອຍໂດຍບໍ່ເສຍຄ່າໃຊ້ຈ່າຍແຫ່ງດຽວໃນພາກເໜືອຂອງປະເທດລາວ ທີ່ໃຫ້ບໍລິການເບງແຍງ ແລະ ປິ່ນປົວບັນດາເດັກນ້ອຍທີ່ມີພັດທະນາການລ້າຊ້າ, ອໍທິສຕິກ ແລະ ດາວຊິນໂດຣມ.
ທີມງານເຜີຍແຜ່ປະຊາສຳພັນຂອງ LFHC ໄດ້ເດີນທາງດ້ວຍໄລຍະທາງຫຼາຍກ່ວາ 23,000 ກິໂລແມັດ ໃນປີ 2021 ເພື່ອລົງຢ້ຽມຢາມຄົນເຈັບຈຳນວນ 309 ລາຍ ເຖິງແມ່ນວ່າຈະມີການປິດປະເທດເຊງສົ່ງຜົນກະທົບຢ່າງຫຼວງຫຼາຍຕໍ່ການເດີນທາງ. ການຂະຫຍາຍວຽກງານ ແມ່ນຊ່ວຍໃຫ້ຮັບປະກັນວ່າຄົນເຈັບທີ່ມີອາການເຈັບປ່ວຍເກີນກ່ວາທີ່ຈະສາມາດເດີນທາງ ຫຼື ບໍ່ສາມາດເດີນທາງໄດ້ແຕ່ກໍໍ່ຈະໄດ້ຮັບການບໍລິການເບງແຍງສຸຂະພາບທີ່ຈຳເປັນ ແລະ ເໝາະສົມ.

ການສຶກສາແມ່ນໜຶ່ງໃນເສົາຫຼັກຂອງໂຮງໝໍເພື່ອນລາວສຳລັບເດັກນ້ອຍ. ທາງໂຮງໝໍແມ່ນຈະມີແຜນງານການສິດສອນທີ່ເຂັ້ມແຂງ ເຊັ່ນດຽວກັນກັບ ການເນັ້ນການຝຶກອົບຮົມພາຍນອກທີ່ຂະຫຍາຍຕົວຫຼາຍຂຶ້ນ. ທາງໂຮງໝໍ ໄດ້ເຊີນບັນດານັກສຶກສາຈຳນວນຫຼາຍຮ້ອຍຄົນຈາກມະຫາວິທະຍາໄລ ແລະ ວິທະຍາໄລຈາກນະຄອນຫຼວງພະບາງ ແລະ ນະຄອນຫຼວງວຽງຈັນ ເພື່ອມາຝຶກອົບຮົມຮ່ວມທີມງານ LFHC. ນອກຈາກນີ້ LFHC ຍັງຈັດການຝຶກອົບຮົມໃຫ້ແກ່ສູນສຸຂະພາບໃນທ້ອງຖິ່ນ ເພື່ອກະຈາຍຄວາມຮູ້ໄປສູ່ເມືອງຕ່າງໆ ແລະ ປັບປຸງຄຸນນະພາບໃນການເບງແຍງສຸຂະພາບໃນເຂດຊຸມຊົນຕ່າງໆໃນເຂດຊົນນະບົດ. ໂຮງໝໍຫາກໍ່ໄດ້ທຳການວ່າຈ້າງ ຜູ້ອຳນວຍການຝ່າຍປ້ອງກັນພະຍາດ ເພື່ອຄົ້ນຄວ້າ ແລະ ຫຼຸດຜ່ອນພະຍາດທີ່ຂັດຂວາງການຈະເລີນເຕີບໂຕຂອງເດັກ ແລະ ພະຍາດທີ່ກ່ຽວຂ້ອງກັບການຂາດສານອາຫານໃນຊຸມຊົນເຂດຊົນນະບົດເພື່ອຫຼຸດຈຳນວນຄົນເຈັບ.
ຄຳຂວັນທີ່ຈາລຶກໄວ້ເທິງປ້າຍທາງເຂົ້າໂຮງໝໍເພື່ອນລາວສຳລັບເດັກນ້ອຍ ແມ່ນຄຳວ່າ: “ປະຕິບັດຕໍ່ກັບເດັກນ້ອຍທຸກຄົນຄືກັນກັບວ່າພວກເຂົາເປັນລູກຂອງທ່ານເອງ.” ເຊງນີ້ແມ່ນຄໍາຂວັນທີ່ກ່າວໂດຍນັກຖ່າຍຮູບຍີ່ປຸ່ນຜູ້ໜຶ່ງ ຊື່ວ່າ Kenro Izu ແລະ ລາວເປັນຄົນທຳອິດທີ່ມີແນວຄິດລິເລີ່ມເລື່ອງໂຮງໝໍ ເມື່ອລາວໄດ້ເຫັນພໍ່ຜູ້ໜຶ່ງທີ່ສູນເສຍລູກສາວ ທີ່ມີອາຍຸ 7 ປີໄປຍ້ອນວ່າບໍ່ສາມາດຈ່າຍຄ່າຢາຮັກສາຈຳນວນ ພຽງ 2 ໂດລາ. ພະນັກງານ LFHC ໄດ້ຍຶດໝັ້ນຄຳກ່າວນີ້ມາຈົນເຖິງປັດຈຸບັນ ໂດຍໃຫ້ການເບີ່ງແຍງເອົາໃຈໃສ່ເດັກນ້ອຍທຸກຄົນທີ່ຕ້ອງການຊ່ວຍເຫຼືອ.

ກິດຈະກຳແລ່ນເພື່ອເດັກນ້ອຍ ແມ່ນໂອກາດທີ່ເໝາະສົມທີ່ສຸດໃນການສະໜັບສະໜູນວຽກງານຂອງ LFHC ທີ່ກຳລັງດໍາເນີນຢູ່ ແລະ ເປັນສ່ວນໜຶ່ງຂອງກິດຈະກຳຊຸມຊົນທີ່ເປັນເອກະລັກໃນຫຼວງພະບາງ. ທຸກບາດກ້າວທີ່ທ່ານກ້າວເດີນເພື່ອໄປສູ່ເສັ້ນໄຊ ເປັນການປະກອບສ່ວນຊ່ວຍໃຫ້ LFHC ບັນລຸເປົ້າໝາຍໃນການຊ່ວຍເຫຼືອເດັກນ້ອຍໃຫ້ຫຼາຍທີ່ສຸດເທົ່າທີ່ຈະເປັນໄປໄດ້!

“ປະຕິບັດຕໍ່ກັບເດັກນ້ອຍທຸກຄົນຄືກັນກັບວ່າພວກເຂົາເປັນລູກຂອງທ່ານເອງ.”

ການເດີນທາງ
ການບິນລາວມີຖ້ຽວບິນໄປຫຼວງພະບາງ ຈາກນະຄອນຫຼວງວຽງຈັນ ແລະ ບາງກອກທຸກມື້.

ຂໍ້ມູນເພີ່ມເຕີມ
ສະແກນລະຫັດ QR code ຂ້າງລຸ່ມ ເພື່ອຄົ້ນຫາຂໍ້ມູນເພີ່ມເຕີມ.

ແປ ແລະ ຮຽບຮຽງໂດຍ ຈັດຕະວາ ມາດມະນີສອນ
ຮູບໂດຍ ໂຮງໝໍເພື່ອນລາວສຳລັບເດັກນ້ອຍ (LFHC)