ຄວາມສຸດຍອດຂອງທຳມະຊາດ

ຕາດກວາງຊີທີ່ປຽບດັ່ງສວງສະຫວັນຂອງບັນດາສັດ ແລະ ພືດ

ປະຊາຊົນທ້ອງຖິ່ນຕ່າງກໍ່ພາກັນຄອຍບອກຄອຍຍ້ຳທ່ານຢູ່ສະເໝີວ່າ ຖ້າໄດ້ມາທ່ຽວປະເທດລາວແລ້ວຕ້ອງໄປຫຼິ້ນນ້ຳຕົກຕາດເດ. ລາວເປັນປະເທດທີ່ອຸດົມໄປດ້ວຍນໍ້າຕົກຕາດຫຼາກຫຼາຍແຫ່ງ, ດັ່ງນັ້ນ ຫາກທ່ານໄດ້ໄປບ່ອນໃດບ່ອນໜຶ່ງແລ້ວ ມັນກໍ່ຈະມີແຮງດຶງດູດທີ່ຊວນໃຫ້ທ່ານໄປຫຼິ້ນຕາດບ່ອນຕໍ່ໆໄປບໍ່ມີມື້ຈົບ. ແຕ່ນໍ້າຕົກຕາດກວາງຊີເອງເປັນຕາດທີ່ທ່ານພາດບໍ່ໄດ້ເດ. ເພາະຕາດກວາງຊີເປັນນໍ້າຕົກເຂດຮ້ອນທີ່ຖືກຊຸກເຊື່ອງໄວ້ຢູ່ໃນປ່າ ເຊິ່ງເອີ້ນໄດ້ວ່າເປັນໜຶ່ງໃນສິ່ງທີ່ດີທີ່ສຸດທີ່ທໍາມະຊາດປະທານໃຫ້ມາເລີຍກໍ່ວ່າໄດ້.
ລອງຈິນຕະນາການເບິ່ງວ່າໃນຂະນະທີ່ທ່ານກໍາລັງຍ່າງໄປຕາມປ່າ ທ່ານຈະໄດ້ພົບກັບແສງທີ່ສອດສ່ອງເຕັ້ນລໍາຜ່ານຕົ້ນໄມ້, ຄວບຄູ່ກັບແມງກະເບື້ອທີ່ສວຍງາມໂບຍບິນໄປຕາມສາຍລົມ. ສຽງຂັບຮ້ອງເບົາໆດັງມາແຕ່ໄກກະທົບເຂົ້າກັບປະສາດສໍາຜັດຂອງທ່ານ, ແຕ່ທ່ານບໍ່ແນ່ໃຈວ່າສຽງນັ້ນແມ່ນສຽງຫຍັງ. ທ່ານຈຶ່ງຕັດສິນໃຈຍ່າງໄປອີກໜ້ອຍໜຶ່ງຕາມທາງຮົ່ມຕົ້ນໄມ້ ເລິກເຂົ້າໄປໃນປ່າທີ່ຮົ່ມເຢັນສະບາຍກາຍໃຈ.

ສະພາບແວດລ້ອມທີ່ສວຍສົດງົດງາມນີ້ເຕັມໄປດ້ວຍພືດ ແລະ ສັດທີ່ຫຼາກຫຼາຍນາໆພັນ, ນັບຕັ້ງແຕ່ໃບເຜືອກຂະໜາດໃຫຍ່ໄປຈົນເຖິງ ດອກປາກນົກແກ້ວ ທີ່ເປັນສີເຫຼືອງແດງແຈດຈ້າ. ຫາກທ່ານລອງກວາດສາຍຕາໄປຈະເຫັນໄດ້ເຖິງກີບດອກສີແດງທີ່ໜາໆຂອງ ດອກຂີງປີດິນ ແລະ ດອກພວງພີ່. ນອກນີ້, ທ່ານກໍ່ຈະໄດ້ພົບກັບບັນດາແມງໄມ້ທີ່ໃຊ້ຊີວິດຢ່າງອຸດົມສົມບູນໃນເຂດດັ່ງກ່າວ. ຢູ່ຕາມໃບໄມ້ຈະມີບົ້ງເກາະຢູ່​, ມີທັງຕັກກະແຕນ​, ແມງແຮດສີສັນ​ສົດ​ໃສ ທີ່​ຢູ່​ຕາມຕົ້ນໄມ້ໃບຫຍ້າທາງທີ່ເຮົາເດີນທາງຜ່ານ.
ເມື່ອຍ່າງຕໍ່ໄປເລື່ອຍໆ ບໍ່ດົນທ່ານກໍ່ຈະຖືກຕ້ອນຮັບດ້ວຍສາຍນໍ້າໃສໆສີຟ້າສົດສວຍງາມໄຫຼລ່ອງລົງຕາມໂງ່ນຫີນ.
ສືບຕໍ່ເດີນທາງໄປຕາມເສັ້ນທາງຍ່າງ ແລ້ວທ່ານກໍ່ຈະພົບກັບດາວເດັ່ນຂອງທຣິບນີ້ເຊິ່ງກໍ່ຄື ນໍ້າຕົກຕາດທີ່ໄຫຼທັ່ງລົງມາຈາກດ້ານເທິງນັ້ນເອງ. ລອງມາຍ່າງໄຕ່ຂົວແລ້ວຖ່າຍຮູບກັບພາບພື້ນຫຼັງທີ່ສວຍສົດງົດງາມນີ້ເບິ່ງເດ. ທ່ານອາດຈະຕ້ອງໃຊ້ເລນກ້ອງທີ່ກວ້າງໆແນ່ຈຶ່ງຈະສາມາດເຫັນວິວທັງໝົດໄດ້.

ຖ້າທ່ານຕ້ອງການແຍກໂຕເອງອອກຈາກເສັ້ນທາງທີ່ບັນດານັກທ່ອງທ່ຽວທ່ານອື່ນໃຊ້,ທ່ານສາມາດລອງຂຶ້ນໄປເທິງຈຸດສູງສຸດຂອງນໍ້າຕົກດັ່ງກ່າວນີ້ໄດ້. ທາງຍ່າງເສັ້ນນີ້ຈະນໍາພາທ່ານຂຶ້ນໄປເທິງພູສູງຊັນທີ່ຢູ່ທາງຊ້າຍມືຂອງນໍ້າຕົກ, ທ່ານຈະພົບກັບຕົ້ນນຂອງຕາດທີ່ໄຫຼລ່ອງລົງໄປຫາອ່າງນໍ້າຢູ່ຂ້າງລຸ່ມ.
ຜ່ານວິວດັ່ງກ່າວທ່ານຍັງສາມາດແນມເຫັນສັດປ່າຂະໜາດໃຫຍ່ທີ່ອາໄສຢູ່ສູນຊ່ວຍເຫຼືອໝີໄດ້. ເວລາທີ່ເຮົາເບິ່ງໝີທີ່ໃຊ້ຊີວິດຢູ່ໃນສະຖານທີ່ແຫ່ງນັ້ນຢອກລໍ້ຫຼິ້ນນໍາກັນ ກໍ່ຈະໃຫ້ຄວາມຮູ້ສຶກຕະຫຼົກມ່ວນຊື່ນດີຄືກັນ. ໝີຄນ ເປັນສັດທີ່ໃກ້ຈະສູນພັນທີ່ມີຈຸດເດັ່ນແຕກຕ່າງຈາກຈໍາພວກອື່ນບ່ອນທີ່ມີເຄື່ອງໝາຍສ້ຽວພະຈັນສີຂາວຢູ່ໜ້າເອິກ ແລະ ສ່ວນໃຫຍ່ເໝືອຍເຫຼົ່ານີ້ຈະເປັນລູກກຳພ້າ ຫຼື ໄດ້ຮັບການຊ່ວຍເຫຼືອຈາກນັກລ່າສັດທີ່ຜິດກົດໝາຍ ແລະ ຟາມບີໝີ.

ຫາກທ່ານໄດ້ຮູ້ຈັກໃຜທີ່ເຄີຍໄປຫຼວງພະບາງ ແນ່ນອນເລີຍວ່າຜູ້ນັ້ນຕ້ອງເຄີຍໄປນ້ຳຕົກຕາດກວາງຊີ.
ຕາດດັ່ງກ່າວບໍ່ແມ່ນມີພຽງແຕ່ນັກທ່ອງທ່ຽວທີ່ໄປທ່ຽວຊົມເທົ່ານັ້ນ, ປະຊາຊົນທ້ອງຖິ່ນຫຼາຍໆຄອບຄົວກໍ່ພາກັນໄປກິນເຂົ້າປິກນິກ ແລະ ຖ່າຍຮູບຄືກັນ, ໂດຍສະເພາະໃນຊ່ວງທ້າຍອາທິດ ແລະ ຊ່ວງທີ່ໃກ້ກັບປີໃໝ່ລາວ.

ການເດີນທາງໄປສູນ:
ນ້ຳຕົກຕາດກວາງຊີ ຫ່າງຈາກ ຫຼວງພະບາງ 30 ກິໂລແມັດ ຫຼື ຂັບລົດປະມານ 45 ນາທີ. ການບິນລາວມີຖ້ຽວບິນເປັນປົກກະຕິໄວ້ໃຫ້ບໍລິການທ່ານເພື່ອເດີນທາງໄປ ຫຼວງພະບາງ.

ແປ ແລະ ຮຽບຮຽງໂດຍ ວັນນະແສງ ອິນສານ
ຮູບໂດຍ Anita Preston / Evensong Film