ມາລອງເພື່ອຊຸກຍູ້ສົ່ງເສີມ, ຢູ່ຕໍ່ຍ້ອນການບໍລິການທີ່ດີເລີດ

ໂຮງແຮມ & ຮ້ານອາຫານຝຶກປະຕິບັດຕັ້ງຢູ່ໃຈກາງຂອງ ເມືອງ ວັງວຽງ ທີ່ປະກອບມີທີ່ພັກ, ອາຫານ, ສະຖານທີ່ຈັດກອງປະຊຸມ ແລະ ຝຶກອົບຮົມໄວ້ໃຫ້ບໍລິການແກ່ທ່ານ ພ້ອມທັງເປັນບ່ອນຝຶກຫຼໍ່ຫຼອມຄວາມຮູ້ຄວາມສາມາດໃຫ້ແກ່ບັນດາມືອາຊີບດ້ານການທ່ອງທ່ຽວ ແລະ ການບໍລິການໃນອະນາຄົດຂອງປະເທດລາວ.

ໂຮງແຮມຝຶກປະຕິບັດ ເປັນສ່ວນໜຶ່ງຂອງວິທະຍາໄລເຕັກນິກແຂວງວຽງຈັນ ທີ່ສະໜອງສະພາບແວດລ້ອມການຝຶກອົບຮົມແບບພາກປະຕິບັດແກ່ບັນດານັກສຶກສາພາກວິຊາການທ່ອງທ່ຽວ ແລະ ການບໍລິການ. ບັນດາມືອາຊີບໄວໜຸ່ມເຫຼົ່ານີ້ຈະປະຕິບັດໜ້າທີ່ພາຍໃຕ້ການຮັບຜິດຊອບຊີ້ນໍານໍາພາຂອງຄູອາຈານ ແລະ ທີມງານຜູ້ບໍລິຫານໂຮງແຮມທີ່ມາຈາກສາກົນເພື່ອຮຽນຮູ້ພັດທະນາທັກສະທີ່ສໍາຄັນ ຄຽງຄູ່ໄປກັບການກຽມຕົວເຂົ້າສູ່ຕະຫຼາດແຮງງານຂອງພວກເຂົາ.
ນອກຈາກແຂກຈະສາມາດລີ້ມລອງກັບອາຫານແຊບໆ ແລະ ຮັບການບໍລິການຈາກພະນັກງານທີ່ມີຄວາມກະຕືລືລົ້ນໄປກັບໂຮງແຮມ ແລະ ຮ້ານອາຫານທີ່ເປັນເອກະລັກບໍ່ຄືໃຜແລ້ວ ສະຖານທີ່ແຫ່ງນີ້ຍັງເປັນຫຼາຍກວ່ານັ້ນອີກ, ການທີ່ທ່ານມາພັກເຊົາ ແລະ ຮັບປະທານອາຫານຢູ່ທີ່ນີ້ຈະຍັງເປັນການຊ່ວຍໃຫ້ນັກສຶກສາໄດ້ຝຶກຝົນທັກສະ ແລະ ສ້າງຄວາມຮູ້ທີ່ເປັນປະໂຫຍດໂດຍກົງຕໍ່ກັບອະນາຄົດຂອງພວກເຂົາ.

ໂຮງແຮມຝຶກປະຕິບັດເປັນສະຖານທີ່ທີ່ທ່ານສາມາດສຳພັດກັບການພັກຜ່ອນທີ່ສະດວກສະບາຍໃນຫ້ອງພັກທີ່ມີມົນສະເໜ່ພ້ອມກັບລະບຽງ ແລະ ຫ້ອງນ້ຳສ່ວນຕົວ. ໂຮງແຮມຂອງພວກເຮາມີຫ້ອງພັກໄວ້ໃຫ້ບໍລິການໃນລາຄາ 150,000 ກີບ ຕໍ່ຄືນ ທີ່ລວມອາຫານເຊົ້າສຳລັບສອງທ່ານ ແລະ ນອກຈາກນີ້ ທ່ານກໍ່ຍັງສາມາດເພີ່ມຕຽງຕື່ມອີກໄດ້ດ້ວຍພຽງແຕ່ທ່ານທຳການຈອງລ່ວງໜ້າແລະຈ່າຍຄ່າບໍລິການເສີມເພິ່ມເຕິມ.
ທີມງານຄູອາຈານ ແລະ ນັກສຶກສາປະຈໍາຫ້ອງຄົວໄດ້ຜ່ານການຝຶກອົບຮົມຢ່າງຊ່ຽວຊານຈາກພໍ່ຄົວມືອາຊີບເພື່ອສ້າງສັນເມນູຟິວຊັ້ນແບບປະສົມປະສານລະຫວ່າງສາກົນ ແລະ ທ້ອງຖິ່ນທີ່ແຊບຊ້ອຍໂດຍການນໍາເອົາສ່ວນປະກອບທີ່ສົດໃໝ່, ພືດຜັກສະໝຸນໄພພື້ນເມືອງ ແລະ ເຄື່ອງເທດລວມເຂົ້າກັນເພື່ອສ້າງເມນູອາຫານທີ່ງ່າຍດາຍແຕ່ມີຄວາມເປັນເອກະລັກທີ່ແປກໃໝ່. ພິຊຊ່າ ແບບໂຮມເມດ ແມ່ນເມນູທີ່ທ່ານຈະພາດບໍ່ໄດ້ ແລະ ເປັນທີ່ນິຍົມຫຼາຍໃນການຖືກສັ່ງໃຫ້ໄປສົ່ງຢູ່ບ້ານ ຫຼື ທີ່ພັກ.ຮ້ານອາຫານຂອງໂຮງແຮມຝຶກປະຕິບັດ ເປີດຕັ້ງແຕ່ວັນພະຫັດ ເຖິງ ວັນອາທິດ, ທີທັງບໍລິການສົ່ງເຖິງທີ່ພັກ ແລະ ກິນໃນຮ້ານ.

ຖ້າທ່ານກຳລັງຊອກຫາບ່ອນນັ່ງຊິວໆຜ່ອນຄາຍດື່ມເຄື່ອງດື່ມ, ໂຮງແຮມຝຶກປະຕິບັດກໍ່ມີໄວ້ໃຫ້ບໍລິການແກ່ທ່ານເຊັ່ນກັນ ຕັ້ງແຕ່ເຄື່ອງດື່ມຄ໋ອກເທວແບບຄລາສສິກ ຈົນໄປເຖິງ ເຫຼົ້າແວງຫຼາກຫຼາຍຊະນິດພ້ອມກັບອາຫານຫວ່າງກັບແກ້ມທີ່
ແຊບໆ.
ເຂົ້າມາລອງ ແລະ ມ່ວນຊຶ່ນໄປກັບຊ່ວງເວລາແຮັບປີ້ອາວເວີ້ (happy hours) ຂອງພວກເຮົາແຕ່ 5–7 ໂມງແລງ ທຸກໆວັນພະຫັດ, ວັນສຸກ, ແລະ ວັນເສົາ.
ການໃຊ້ເວລາຂັບລົດພຽງແຕ່ຊົ່ວໂມງດຽວ ຫຼື ພຽງແຕ່ນັ່ງລົດໄຟຜ່ານ 2 ສະຖານີຈາກ ນະຄອນຫຼວງວຽງຈັນ ທ່ານກໍ່ຈະສາມາດມາຮອດມາເຖິງໂຮງແຮມຝຶກປະຕິບັດໄດ້ ບ່ອນທີ່ຈະສະໜອງສະຖານທີ່ຈັດທຣິບພັກຜ່ອນໃຫ້ແກ່ພະນັກງານຂອງທ່ານ, ຈັດຝຶກອົບຮົມ ຫຼື ກອງປະຊຸມ. ຫາກທ່ານເດີນທາງມາແຕ່ ຫຼວງພະບາງ, ຂີ່ລົດໄຟບໍ່ຮອດຊົ່ວໂມງກໍ່ຮອດວັງວຽງແລ້ວ!
ກະລຸນາຕິດຕໍ່ຫາພວກເຮົາຖ້າທ່ານຕ້ອງການລອງຊິມອາຫານທີ່ມີລົດຊາດແຊບຊ້ອຍ ແລະ ຫ້ອງນອນທີ່ສະດວກສະບາຍຄຽງຄູ່ໄປກັບການຊຸກຍູ້ຝຶກຝົນພັດທະນານັກສຶກສາທີ່ມີຄວາມທະເຍີທະຍານຂອງພວກເຮົາ!

ໂຮງແຮມຝຶກປະຕິບັດ ແມ່ນໄດ້ຮັບການສະໜັບສະໜູນຈາກໂຄງການທັກສະ ສຳລັບວຽກງານທ່ອງທ່ຽວ (ລາວ/029), ສົມທົບທຶນໂດຍ ລັດຖະບານ ສປປ ລາວ, ໄດ້ຮັບການຊ່ວຍເຫຼືອລ້າຈາກປະເທດ ລຸກຊໍາບວກ ແລະ ສະວິດເຊີແລນ ແລະ ຈັດຕັ້ງປະຕິບັດໂດຍກະຊວງສຶກສາທິການ ແລະ ກິລາ ແຫ່ງ ສປປ ລາວ ແລະ ອົງການຮ່ວມມືເພື່ອການພັດທະນາ ລຸກຊໍາບວກ (LuxDev).

ຂໍ້ມູນເພີ່ມເຕີມ:
ໂຮງແຮມຝຶກປະຕິບັດ, ເມືອງ ວັງວຽງ
ໂທ: +856 30 522 1052
ອີເມລ: theacademytraininghotel@gmail.com
facebook: @TheAcademy.VangVieng

ແປ ແລະ ຮຽບຮຽງໂດຍ ວັນນະແສງ ອິນສານ
ຮູບໂດຍ ໂຄງການທັກສະ ສຳລັບວຽກງານທ່ອງທ່ຽວ (ລາວ/029)