ເພື່ອຮັບປະກັນການອະນຸລັກຄວາມສວຍງາມຂອງປະເທດໃຫ້ແກ່ຄົນລຸ້ນຫຼັງ

ໃນຖານະທີ່ທ່ານເປັນນັກເດີນທາງທ່ອງທ່ຽວ ບໍ່ວ່າໃນ ປະເທດລາວ ຫຼື ຢູ່ທົ່ວທຸກແຫ່ງໃນໂລກ, ສິ່ງທີ່ມີຄວາມສຳຄັນແມ່ນທ່ານຈະຕ້ອງຄຳນຶງເຖິງບົດບາດຂອງຕົວເອງທີ່ມີຕໍ່ລະບົບນິເວດ. ຕໍ່ການເປັນນັກເດີນທາງທ່ອງທ່ຽວຢ່າງມີຄວາມຮັບຜິດ
ຊອບ, ພວກເຮົາຈະຕ້ອງມີຄວາມເຂົ້າໃຈເຖິງບັນຫາດ້ານຄວາມສ່ຽງ ແລະ ວິທີການໃນການປ້ອງກັນບັນຫາດັ່ງກ່າວ ເພື່ອຫຼຸດຜ່ອນການຖິ້ມຮ່ອງຮອຍຂອງພວກເຮົາໄວ້. ນອກຈາກນີ້ ແມ່ນຍັງພົວພັນເຖິງ ຄວາມມີສະຕິວ່າການກະທຳຂອງພວກເຮົາ ອາດຈະສົ່ງຜົນກະທົບຕໍ່ສຸຂະພາບຂອງຜູ້ອື່ນ, ພືດ, ສັດສາວາສິ່ງ ແລະ ສິ່ງແວດລ້ອມ ທີ່ພວກເຮົາຮ່ວມອາໄສຢູ່ ຄືແນວໃດ.
ດ້ວຍການຄິດຕຶກຕອງພຽງແຕ່ເລັກນ້ອຍ, ກໍ່ຈະເປັນສິ່ງທີ່ງ່າຍທີ່ຈະຫຼຸດຜ່ອນຮ່ອງຮອຍການເດີນທາງຂອງທ່ານ ແລະ ຄຳນຶງເຖິງສະຖານທີ່ທີ່ທ່ານກຳລັງຢ້ຽມຊົມ. ຈົ່ງຊ່ວຍກັນຮັກສາສິ່ງແວດລ້ອມ, ຜູ້ຄົນ ແລະ ສັດສາວາສິ່ງຂອງປະເທດລາວ ໃຫ້ມີຄວາມຈະເລີນຮຸ່ງເຮືອງ, ມີສຸຂະພາບທີ່ດີ ແລະ ມີຄວາມປອດໄພໃນອານາຄົດ.

ການທ່ອງທ່ຽວຢ່າງມີຄວາມຮັບຜິດຊອບມີປະໂຫຍດແນວໃດແດ່?
ການທ່ອງທ່ຽວຢ່າງມີຄວາມຮັບຜິດຊອບຊ່ວຍໃຫ້:

• ຫຼຸດຜ່ອນຜົນກະທົບດ້ານລົບທາງດ້ານເສດຖະກິດ, ສິ່ງແວດລ້ອມ ແລະ ສັງຄົມ;

• ສ້າງຜົນປະໂຫຍດທາງດ້ານເສດຖະກິດຢ່າງໃຫຍ່ຫຼວງສຳລັບປະຊາຊົນໃນທ້ອງຖິ່ນ ແລະ ຊຸກຍູ້ສົ່ງເສີມຊີວິດການເປັນຢູ່ທີ່ດີກວ່າເກົ່າຂອງບັນດາຊຸມຊົນ, ປັບປຸງສະພາບແວດລ້ອມການເຮັດວຽກ ແລະ ການເຂົ້າເຖິງອຸດສາຫະກຳດ້ານການທ່ອງທ່ຽວ;

• ປະຊາຊົນໃນທ້ອງຖິ່ນໄດ້ມີສ່ວນຮ່ວມໃນການດໍາເນີນການຕັດສິນໃຈ ຕໍ່ບັນຫາທີ່ສົ່ງຜົນຕໍ່ຄວາມເປັນຢູ່ ແລະ ການປ່ຽນແປງຂອງຊີວິດ;

• ມີການປະກອບສ່ວນດ້ານບວກຕໍ່ການອະນຸລັກມໍລະດົກທາງດ້ານວັດທະນະທຳ ແລະ ທຳມະຊາດຂອງປະເທດລາວ ເພື່ອເປັນການປົກປ້ອງ ຊີວະນາໆພັນ ແລະ ຄວາມຫຼາກຫຼາຍທາງດ້ານວັດທະນະທຳ;

• ມອບປະສົບການຄວາມມ່ວນຊື່ນຍິ່ງຂຶ້ນໃຫ້ແກ່ບັນດານັກທ່ອງທ່ຽວ ໂດຍຜ່ານການເຊື່ອມໂຍງຢ່າງມີຄວາມໝາຍປະຊາຊົນໃນທ້ອງຖິ່ນ ແລະ ຄວາມເຂົ້າໃຈທີ່ດີຍິ່ງຂຶ້ນຕໍ່ກັບບັນຫາທາງດ້ານວັດທະນະທຳ, ສັງຄົມ ແລະ ສິ່ງແວດລ້ອມໃນທ້ອງຖິ່ນ;

• ໃຫ້ການເຂົ້າເຖິງທີ່ສະດວກສະບາຍແກ່ຜູ້ພິການ;

• ກໍ່ໃຫ້ເກີດຄວາມເຂົ້າໃຈທາງດ້ານວັດທະນະທຳ ແລະ ໃຫ້ຄວາມເຄົາລົບນັບຖືລະຫວ່າງ ບັນດານັກທ່ອງທ່ຽວ ແລະ ປະຊາຊົນໃນບ້ານ, ສ້າງຄວາມພາກພູມໃຈ ແລະ ຄວາມໝັ້ນໃຈໃຫ້ທ້ອງຖິ່ນ.

ຂ້າພະເຈົ້າສາມາດເດີນທາງທ່ອງທ່ຽວຢ່າງມີຄວາມຮັບຜິດຊອບໄດ້ຄືແນວໃດ?
ຕໍ່ໄປນີ້ແມ່ນ 5 ສິ່ງງ່າຍໆ ທີ່ທ່ານສາມາດປະຕິບັດໄດ້ ເມື່ອທ່ານເດີນທາງມາທ່ອງທ່ຽວທີ່ປະເທດລາວ ແລະ ເພື່ອໃຫ້ເປັນການຊ່ວຍເຫຼືອປະເທດໃນຂະນະດຽວກັນ:

1. ເພີດເພີນໄປກັບອາຫານລາວ. ເງິນຂອງທ່ານຈະຢູ່ໃນຊຸມຊົນ ແລະ ຈະເປັນການຊ່ວຍເຫຼືອຊາວກະສິກອນລາວ. ເມື່ອທ່ານເດີນທາງມາທ່ອງທ່ຽວ, ຂໍໃຫ້ທ່ານກິນອາຫານຢູ່ໃນໝູ່ບ້ານ ແທນທີ່ ທ່ານຈະນຳເອົາອາຫານຈາກຕົວເມືອງມາກິນ. ການກະທຳເຊັ່ນນີ້ ຈະເຮັດໃຫ້ຊາວບ້ານໄດ້ມີແຫຼ່ງລາຍຮັບ, ແລະ ໃນຂະນະດຽວກັນ ທ່ານຍັງຈະໄດ້ເພີດເພີນໄປກັບລົດຊາດອາຫານລາວແບບທ້ອງຖິ່ນທີ່ມີຄວາມແຊບຊ້ອຍ ແລະ ສຳຜັດກັບປະສົບການວັດທະນະທຳທ້ອງຖິ່ນທີ່ມະຫັດສະຈັນ.

2. ຊ່ວຍອຸດໜູນເຄື່ອງຫັດຖະກຳທ້ອງຖິ່ນ. ສະໜັບສະໜູນຊ່າງຫັດຖະກຳໂດຍກົງ ແລະ ຊ່ວຍຮັກສາເຄື່ອງຫັດຖະກຳພື້ນເມືອງໃຫ້ມີຊີວິດຊີວາ ດ້ວຍການອຸດໜູນເຄື່ອງຫັດຖະກຳທີ່ຈຳໜ່າຍຢູ່ໃນໝູ່ບ້ານ ແລະ ຕະຫຼາດ.

3. ຂໍຄຳແນະນຳ. ການເດີນທາງທ່ອງທ່ຽວຂອງທ່ານຈະໄດ້ຮັບຄວາມມ່ວນຊື່ນ ແລະ ຂໍ້ມູນຫຼາຍຂຶ້ນ ຖ້າຫາກວ່າທ່ານຈ້າງຜູ້ນຳທ່ຽວໃນທ້ອງຖິ່ນ. ເຊງນອກຈາກນີ້, ແມ່ນຍັງເປັນການຊ່ວຍສະໜັບສະໜູນເສດຖະກິດໃນທ້ອງຖິ່ນອີກດ້ວຍ. ໃຫ້ທ່ານຊອກຫາແພັກເກັດການທ່ອງທ່ຽວທີ່ຄອບຄຸມ ທີ່ພັກອາໄສ, ອາຫານ ແລະ ຜູ້ນຳທ່ຽວໃນທ້ອງຖິ່ນ.

4. ໃຫ້ທ່ານລອງໃຊ້ບໍລິການເຮືອນພັກແບບໂຮມສະເຕ. ເຊງຈະຊ່ວຍໃຫ້ທ່ານໄດ້ຮັບຄວາມຮູ້ເບື້ອງຕົ້ນກ່ຽວກັບ ວັດທະນະທຳ ແລະ ຊີວິດຂອງຄົນລາວ ດ້ວຍການພັກຄ້າງຄືນກັບຊາວບ້ານ ເຊງເປັນສ່ວນໜຶ່ງຂອງການເດີນທາງທ່ອງທ່ຽວ. ແຕ່ຢ່າລືມທີ່ຈະຈ່າຍຄ່າທີ່ພັກ ແລະ ຄ່າອາຫານໃຫ້ຊາວບ້ານໃນທ້ອງຖິ່ນ ແລະ ຢ້ຽມຊົມບ້ານກັບຜູ້ນຳທ່ຽວທ້ອງຖິ່ນ.

5. ຫຼີກລ່ຽງການລົບກວນສັດປ່າ. ສັດປ່າແມ່ນມີບົດບາດທີ່ມີຄວາມສຳຄັນໃນຕ່ອງໂສ້ອາຫານ. ນອກຈາກນີ້, ສັດປ່າຍັງຊ່ວຍສ້າງຄວາມສົມດຸນຂອງລະບົບນິເວດພາຍໃນປ່າ. ການສູນເສຍ ແລະ ການສູນພັນຂອງຫຼາຍສາຍພັນ ເນື່ອງມາຈາກການລ່າສັດ ແມ່ນສາມາດນຳໄປສູ່ຄວາມບໍ່ສົມດຸນຂອງລະບົບນິເວດທີ່ເປັນອັນຕະລາຍ ແລະ ການແຜ່ລະບາດຂອງພະຍາດຕ່າງໆ. ດັ່ງນັ້ນ, ທ່ານຈົ່ງປະຕິບັດຕາມຂັ້ນຕອນຕ່າງໆ ເພື່ອຮັບປະກັນວ່າມີການປະຕິສຳພັນລະຫວ່າງທ່ານກັບປະຊາຊົນ ແລະ ສັດ ມີຄວາມປອດໄພ ເພື່ອຫຼຸດຜ່ອນຄວາມສ່ຽງຈາກການແຜ່ລະບາດຂອງພະຍາດຈາກສັດສູ່ຄົນ. ພຽງແຕ່ນັກທ່ອງທ່ຽວຜູ້ດຽວທີ່ຕິດເຊື້ອ ກໍ່ສາມາດປ່ຽນແປງສຸຂະພາບຂອງຄົນເປັນຈຳນວນຫຼາຍໄດ້ – ຈົ່ງຢ່າປ່ອຍໃຫ້ມັນເກີດຂຶ້ນກັບຕົວທ່ານ!

ບົດຄວາມນີ້ແມ່ນໄດ້ຂຽນ ແລະ ອອກແບບ ໂດຍຄູ່ຮ່ວມງານໃນການຈັດຕັ້ງປະຕິບັດ ແລະ ເປັນຜູ້ຮັບຜິດຊອບໂດຍກົງຕໍ່ກັບເນື້ອຫາດັ່ງກ່າວ ໂດຍໄດ້ຮັບທຶນສະໜັບສະໜູນຈາກ ສະຫະພາບ ເອີຣົບ.

ແຫຼ່ງຂໍ້ມູນ: https://responsibletourismpartnership.org/what-is-responsible-tourism

ຂໍ້ມູນເພີ່ມເຕີມ
ສຳລັບຂໍ້ມູນເພີ່ມເຕີມກ່ຽວກັບການຕ້ານຄວາມສ່ຽງດ້ານສຸຂະພາບຈາກການຊື້ຂາຍສັດປ່າ, ທ່ານສາມາດເຂົ້າເບີ່ງໄດ້ທີ່: fb.com/onehealthlaos

ແປ ແລະ ຮຽບຮຽງໂດຍ ຈັດຕະວາ ມາດມະນີສອນ
ຮູບໂດຍ ພູນຊັບ ເທບວົງສາ / Southern Laos