English
ບົດຄວາມແນະນໍາອາຫານແບບຂ້າງທາງ (ສະຕຣີດຟູດ) ທີ່ ຫຼວງພະບາງ
ອາຊີ ແມ່ນທະວີບທີ່ຂຶ້ນຊື່ດ້ານອາຫານຂ້າງທາງເຊິ່ງ ຫຼວງພະບາງ ກໍ່ເປັນໜຶ່ງໃນສະຖານທີ່ດັ່ງກ່າວ. ຕາມຖະໜົນຫົນທາງທີ່ລຽບລຽງກັນໄປເປັນສາຍ ຈະເຕັມໄປດ້ວຍຮ້ານຂາຍເຄື່ອງຂາຍສິນຄ້ານ້ອຍໆທີ່ຂາຍນັບຕັ້ງແຕ່ ໂຣຕີໃສ່ກ້ວຍ ຈົນໄປເຖິງ ໄຂ່ນົກກະທາຕົ້ມ. ຍ້ອນມີຕົວເລືອກຫຼາກຫຼາຍແນວນີ້ ຈຶ່ງເປັນເລື່ອງຍາກໂດຍທີ່ເຮົາວ່າຄວນລອງຊິມຫຍັງແດ່ ແລະ ບໍ່ຄວນພາດໂຕໃດແດ່. ດັ່ງນັ້ນ ບົດຄວາມນີ້ຈະຊ່ວຍນໍາພາທ່ານໄປສໍາຫຼວດຄົ້ນພົບກັບຄວາມສຸກດ້ານການກິນອາຫານຂອງເມືອງຫຼວງພະບາງນໍາກັນເລີຍ!
ໃນຕອນເຊົ້າແມ່ນຊ່ວງເວລາທີ່ມີທາງເລືອກອາຫານການກິນທີ່ຫຼາກຫຼາຍໆແບບບໍ່ຊໍ້າກັນໄວ້ໃຫ້ທ່ານເລືອກ. ຍ້ອນຄົນລາວເປັນຄົນທີ່ຕື່ນເດິກລຸກເຊົ້າ ແລະ ສ່ວນຫຼາຍຈະລຸກອອກໄປຕະຫຼາດຕັ້ງແຕ່ 4 ໂມງ ດັ່ງນັ້ນ ຄາບອາຫານເຊົ້າຈຶ່ງເປັນຊ່ວງເວລາເໝາະສົມທີ່ສຸດທີ່ທ່ານຈະໄດ້ສຳຜັດກັບວິຖີຊີວິດຂອງຊາວເມືອງ, ຮັບຊົມພະສົງອອກມາບິນທະບາດແລ້ວຊອກເລາະກິນເຂົ້າ.
ຢູ່ທີ່ຮ້ານໃກ້ກັບຕະຫຼາດດາຣາ, ມາລອງກິນເຂົ້າຈີ່ປາເຕ້ ເມນູທີ່ເອົາເຂົ້າຈີ່ບາແກັດຝຣັ່ງມາສອດໄສ້ໃສ່ຊີ້ນໝູແຜ່ນ, ໝູຟອຍ, ຈືນໄຂ່, ກະຣົດ, ໝາກແຕງດອງ ຕົບທ້າຍດ້ວຍຊ໋ອດລົດເຜັດຫວານ ແລະ ແຕ່ງໜ້າດ້ວຍຜັກຊີສົດ. ເມນູດັ່ງກ່າວນີ້ແມ່ນໄດ້ຮັບອິດທິພົນ ສືບທອດຢ່າງຍາວນານມາຕັ້ງແຕ່ສະໄໝລາວຍັງເປັນຫົວເມືອງຂຶ້ນຂອງຝຣັ່ງ.
ນອກນີ້ ທ່ານຍັງສາມາດເດີນທາງໄປແຖວຫົວມຸມຂອງແຄມແມ່ນໍ້າຂອງ, ເຂົ້າໄປຕະຫຼາດເຊົ້າແລ້ວໄປລັດເລາະເບິ່ງຮ້ານຂາຍ ເຂົ້າປຽກເຂົ້າ, ເມນູແກງໃສ່ກັບເຂົ້າແບບຂຸ້ນໆທີ່ໂຮຍດ້ວຍກຸ້ງແຫ້ງນ້ອຍໆ, ລູກຊີ້ນໝູ, ເຫັດ ພ້ອມກັບຕ່ອນຊີ້ນໝູທີ່ຕົບທ້າຍດ້ວຍໄຂ່ຕົ້ມ. ນັ່ງກິນຢູ່ໂຕະແຄມແມ່ນໍ້າຂອງ, ຈິບກາເຟລາວຫອມໆທີ່ໃສ່ນົມຂົ້ນຫວານໜຽວໆເປັນຊັ້ນໆຢູ່ລຸ່ມຈອກ ທັງເບິ່ງເຮືອລ່ອງຢູ່ຕາມແມ່ນໍ້າ ສາມາດເປັນວິທີການເລີ່ມຕົ້ນວັນດີໆຂອງທ່ານເລີຍກໍ່ວ່າໄດ້.
ຫຼັງຈາກໃສ່ບາດກັບພະສົງຢູ່ໃກ້ກັບວັດແສນແລ້ວ ລອງຂ້າມທາງໄປທີ່ຮ້ານອາຫານເກົ່າແກ່ທີ່ສຸດຂອງເມືອງກໍ່ຄື ຮ້ານແມ່ຈັນ ອັນເປັນຮ້ານເຂົ້າຊອຍທີ່ຂຶ້ນຊື່. ເຂົ້າຊອຍຫຼວງພະບາງ ແມ່ນເມນູທີ່ປະກອບມີເສັ້ນເຂົ້າຊອຍສົດໆທີ່ຖືກໂຮຍໜ້າດ້ວຍຖົ່ວງອກ, ໝູຟອຍ ແລະ ໜ້າເຂົ້າຊອຍທີ່ເປັນເອກະລັກສະເພາະ (ໜ້າເຂົ້າຊອຍ ແມ່ນເຮັດມາຈາກການປະສົມປະສານລະຫວ່າງຖົ່ວເໜົ່າ, ຊີ້ນໝູສັບ ແລະ ໝາກເລັ່ນເຂົ້າກັນ) ພ້ອມກັບນ້ຳຊຸບຮ້ອນໆຕັກໃສ່ເຂົ້າໃນຖ້ວຍດຽວກັນ. ຈາກນັບຢິບເອົາຜັກສົດມາກິນກັບເພື່ອຄວາມແຊບຊ້ອຍຍິ່ງຂຶ້ນ. ພະຍາຍາມໄປແຕ່ເຊົ້າໆເດີ ເພາະຮ້ານນີ້ມັກຈະຂາຍໝົດກ້ຽງກ່ອນຮອດຕອນທ່ຽງ.
ຢູ່ຕາມຕະຫຼາດ, ໂຕະຂອງຮ້ານຂາຍຂອງກິນຫຼາຍໆຮ້ານຈະເຕັມໄປດ້ວຍເມນູ ໝົກ ທີ່ຫໍ່ດ້ວຍໃບຕອງເຊິ່ງມີຫຼາກຫຼາຍລົດຊາດໃຫ້ເລືອກຊິມໄປຕາມລະດູການ. ໝົົກປາແດກ ເມນູທີ່ຖືກເອີ້ນຕາມ ປາແດກ ອັນຂຶ້ນຊື່ຂອງປະເທດລາວ ທີ່ໃຊ້ເປັນສ່ວນປະກອບສໍາຄັນໃນການເຮັດໃຫ້ເກີດລົດຊາດທີ່ແຊບນົວໂດຍບໍ່ມີກິ່ນຄາວຂອງປາ. ນອກນັ້ນ ກໍ່ມີເມນູ ໝົກໝາກເຜັດ ທີ່ເຮັດຈາກຊີ້ນໝູບົດລະອຽດປະສົມໃສ່ກັບຫົວສິງໄຄ, ຫອມປ້ອມ, ຜັກທຽມ, ໜັງຄວາຍແຫ້ງ ແລະ ໝາກເຜັດເປັນຕ່ອນ ກໍ່ເປັນເມນູງ່າຍໆທີ່ແນະນໍາໃຫ້ລອງຖ້າທ່ານບໍ່ແມ່ນນັກກິນແບບປະຈົນໄພ.
ຄວັນອາຫານຈາກເຕົາປີ້ງທີ່ລ່ອງລອຍໄປກັບສາຍລົມດັ່ງກັບເມກເທິງທ້ອງຟ້າຈະຊັກຈູງໃຫ້ທ່ານສົນໃຈຢາກລອງຢາກຊີມອາຫານເມື່ອໄດ້ກິ່ນ. ນອກຈາກເມນູທີ່ເຫັນປົກກະຕິປົກກະຕິທົ່ວໄປເຊັ່ນຂອງປີ້ງໝູ, ປີ້ງໄກ່, ຫຼື ປີ້ງປາແລ້ວ ໃຫ້ລອງຊີມໄສ້ກອກຫຼວງພະບາງ (ໄສ້ອົ່ວ) ເບິ່ງ. ມັນແມ່ນອາຫານເມນູໜຶ່ງທີ່ມີຊື່ສຽງທີ່ສຸດຂອງເມືອງ ເຊິ່ງສາມາດຊອກຫາກິນໄດ້ຢູ່ຕາມຕະຫຼາດເຊົ້າ ແລະ ໜ້າບ່ອນຮົມຢາແຖວ ອົງການກາແດງລາວ.
ທ່ານອາດຈະໄດ້ພົບເຫັນກັບບັນດາແມ່ຍິງພາກັນຫ້ອມລ້ອມໝໍ້ສີດໍາທີ່ມີຮູກົມໆສໍາລັບເຮັດເຂົ້າໜົມຄົກ. ເຂົ້າໜົມດັ່ງກ່າວຈະມີຄວາມກອບ ແລະ ຮ້ອນທາງນອກແຕ່ມີລົດຊາດຫອມຫວານນຸ້ມນວນທາງໃນແບບແຊບສຸດໆໄປເລີຍທີ່ເສີບໃສ່ໃບຕອງໃຫ້ສາມາດຢ່າງໄປນໍາກິນໄປນໍາໄດ້. ເມນູຕໍ່ໄປແມ່ນ ເຂົ້າສີມ່ວງປົນຂາວ ທີ່ຖືກປຸງແຕ່ງໃສ່ກັບນ້ຳຕານ ແລະ ກະທິ ແລ້ວນຳມາເສີບໃສ່ໃບຕອງໂຮຍໜ້າດ້ວຍເນື້ອໝາກພ້າວທີ່ເຂັ້ມຂຸ້ນ (ເຂົ້າກໍ່າ) ເປັນອາຫານວ່າງສຸດຟິນສໍາລັບກິນເວລາເລາະໄປຕາມຫົນທາງຕາມຮ່ອມຕາມຊອຍທີ່ມີມົນສະເໜ່ຂອງເມືອງຫຼວງພະບາງ.
ຫຼວງພະບາງ ມີຫຼາຍເມນູອາຫານທີ່ເປັນເອກະລັກໄວ້ໃຫ້ນັກຊິມມາຢ້ຽມຢາມເລາະກິນ. ມາລອງຮ່ວມກັບກິນອາຫານກັບຜູ້ຄົນຢູ່ຕາມຮ້ານຂາຍຂອງກິນທ້ອງຖິ່ນທີ່ທ່ານອາດຈະໄດ້ພົບກັບໝູ່ໃໝ່ໆໃນຂະນະທີ່ເພີດເພີນໄປກັບອາຫານ.
ແປ ແລະ ຮຽບຮຽງໂດຍ ວັນນະແສງ ອິນສານ
ຮູບໂດຍ ອານິຕາ ເພຣສຕັ້ນ / ອີເວັນຊອງ ຟິມ