ເມັດທີ່ສົມບູນແບບ

ຈາກເບ້ຍສູ່ຕົ້ນ, ຈາກເມັດກາເຟສູ່ຄວາມຮູ້ສຶກດີໆທີ່ມອບໃຫ້ແກ່ທ່ານ

ບໍ່ມີຫຍັງທຽບໄດ້ກັບການຄົ້ນພົບຮ້ານກາເຟດີໆ ແມ່ນບໍ່? ມັນເປັນຄວາມຮູ້ສຶກທີ່ດີຕໍ່ໃຈ ເວລາທີ່ຍ່າງເຂົ້າຮ້ານ ແລະ ທຸກສິ່ງທຸກຢ່າງມັນລົງຕົວກັບຄວາມຮູ້ສຶກ. ບາງເທື່ອອາດແມ່ນຍ້ອນບັນຍາກາດ, ການຕົບແຕ່ງ, ສຽງດົນຕີ, ຫຼືສຽງບົດເມັດກາເຟທີ່ຄຸ້ນຫູ. ແຕ່ທີ່ແນ່ນອນແມ່ນກິ່ນອັນຫອມຫວນຂອງເມັດກາເຟທີ່ຂົ້ວມາໃໝ່ໆ. ຂະໜາດຍັງບໍ່ທັນໄດ້ລອງຊິມໄດ໋ນິ! ບາງຄັ້ງ ຄວາມຮູ້ສຶກນີ້ເຫຼົ່ານີ້ ກໍ່ພາໃຫ້ກາເຟຈອກທຳມະດາ ກາຍເປັນກາເຟລົດເລີດໄປເລີຍກໍ່ມີ.

ແຕ່ຖ້າເວົ້າເຖິງຮ້ານ ຊາຟຣອນ ຄອຟ໌ຟີ ທີ່ຫຼວງພະບາງ, ການຄັດສັນກາເຟແມ່ນສິ່ງທຳອິດທີ່ທາງຮ້ານໃຫ້ຄວາມສໍາຄັນ. ເພິ່ນເອົາໃຈໃສ່ຕັ້ງແຕ່ເບ້ຍຈົນເຖິງຕົ້ນ, ຕັ້ງແຕ່ດອກຈົນເຖິງໝາກ, ຕັ້ງແຕ່ການຂົ້ວເມັດກາເຟຈົນເຖິງການບັນຈຸຫີບຫໍ່.

ເມືອງທ່ອງທ່ຽວຄືຫຼວງພະບາງ ມີຮ້ານອາຫານຫຼາກຫຼາຍ, ແຕ່ກໍ່ຍັງບໍ່ມີຮ້ານກາເຟ ທີ່ພິຖີພິຖັນກັບເມັດກາເຟຫຼາຍເທົ່າທີ່ຄວນ.  ເມື່ອ 10 ປີກ່ອນ, ຮ້ານຊາຟຣອນເປີດເປັນຮ້ານຂາຍຜະລິດຕະພັນການກະເສດ ໂດຍສະເພາະແມ່ນເມັດກາເຟ ຈາກຊາວກະສິກອນທ້ອງຖິ່ນ ບໍລິຫານຮ້ານໂດຍທ່ານ ເດວິດ ເດວ,​ ນັກທຸລະກິດສັນຊາດອາເມລິກາ. ພາຍຫຼັງ ທີ່ຜູ້ບໍລິຫານໃໝ່ ທ່ານ ທ໋ອດ ມໍ ແລະ ເດເຣັກ ສະມິດ ມາບໍລິຫານຕໍ່ ຈຶ່ງເລີ່ມມາຈິງຈັງກັບການຂາຍກາເຟ ແລະ ເຮັດໃຫ້ຮ້ານກາຍມາເປັນຈຸດໝາຍປາຍທາງຂອງຄໍກາເຟ ແລະ ບັນດານັກທ່ອງທ່ຽວທີ່ມາຢ້ຽມຢາມຫຼວງພະບາງ.

ທ່ານ ເດເຣັກໄດ້ກ່າວວ່າ: “ມັນກໍ່ຍັງເປັນຮ້ານເກົ່ານັ້ນລະ, ພຽງແຕ່ເຮົາວາງວິໄສທັດໃໝ່, ວາງຈຸດປະສົງໃໝ່, ແລະວາງຈຸດສຸມ  ໃໝ່ຊື່ໆ”. ທ່ານໄດ້ເສີມຕື່ມວ່າ: “ຕອນທີ່ພວກເຮົາມາເຮັດທຸລະກິດນີ້ ເຮົາຄິດຢາກປ່ຽນແປງບາງຢ່າງ ເພາະໃນຫຼວງພະບາງມີຄູ່ແຂ່ງຫຼາຍ, ສະນັ້ນ ພວກເຮົາຈຶ່ງມຸ່ງເນັ້ນກັບການຄັດສັນຄຸນນະພາບກາເຟ ແລະ ຄວາມແຊບຂອງອາຫານເປັນຫຼັກ. ແຕ່ຈຸດສຸມໃຫຍ່ຂອງເຮົາແມ່ນຈະຢູ່ທີ່ກາເຟ, ເຊິ່ງຈະເຫັນໄດ້ຈາກທຸກມຸມໃນຮ້ານເຮົາເລີຍວ່າເຮົາພະຍາຍາມສຸມໃສ່ກາເຟ ແລະ ຮ່ວມມືກັບບັນດາຊາວສວນທີ່ປູກກາເຟໃຫ້ເຮົາ”

ທ່ານ ທ໋ອດ ໄດ້ກ່າວວ່າ: “ເຮົາພະຍາຍາມນຳໃຊ້ກຳໄລເປັນທຶນໝູນວຽນ ແທນທີ່ຈະໄປກູ້ຢືມມາ. ສະນັ້ນ ຍິ່ງເຮົາມີຄູ່ຮ່ວມງານຫຼາຍ ກໍ່ຈະຍິ່ງດີ, ແລະ ຍິ່ງເຮົາເຮັດວຽກກັບຊາວສວນໂດຍກົງໄດ້ຫຼາຍເທົ່າໃດ, ເຮົາກໍ່ຈະຍິ່ງສາມາດຊ່ວຍເຂົາເຈົ້າໄດ້ຫຼາຍຂຶ້ນເທົ່ານັ້ນ”

ທ່ານ ທ໋ອດ ແລະ ທີມງານ ເຊິ່ງສ່ວນຫຼາຍເປັນຄົນທ້ອງຖິ່ນ, ຕັ້ງແຕ່ຄົນເຮັດກາເຟ, ພະນັກງານບໍລິການ, ຄົນຂົ້ວ, ແລະ ຄົນ ຄັດກາເຟ, ຕ່າງກໍ່ມີສ່ວນຮ່ວມໃນຂະບວນການຜະລິດກາເຟ ຕັ້ງແຕ່ຂັ້ນຕອນທຳອິດ. ປະຈຸບັນ, ເມັດກາເຟຂອງເພິ່ນສ່ວນຫຼາຍແມ່ນ ມາຈາກທາງພາກເໜືອ ເຊັ່ນ ແຂວງຫຼວງພະບາງ, ຜົ້ງສາລີ, ຊຽງຂວາງ, ແລະ ຫົວພັນ.

ທ່ານ ທ໋ອດ ໄດ້ກ່າວເສີມວ່າ: “ເປົ້າໝາຍຂອງເຮົາແມ່ນການນຳໃຊ້ເມັດກາເຟຈາກພາກເໜືອ 100 ເປີເຊັນ. ແຕ່ປີກາຍນີ້ ເຮົາຕ້ອງໄດ້ຊື້ເມັດກາເຟຈຳນວນໜຶ່ງຈາກພາກໃຕ້ ເພາະມີໝອກຫຼາຍ ເຮັດໃຫ້ໄດ້ຮັບຜົນລະປູກບໍ່ພຽງພໍ. ທາງພາກໃຕ້ ກໍ່ມີກາເຟທີ່ຄຸນນະພາບດີ, ແຕ່ເຮົາບໍ່ສາມາດເດີນທາງລົງໄປເພື່ອສຶກສາເບິ່ງສວນຂອງທາງນັ້ນໄດ້. ແຕ່ຢູ່ນີ້ ເຮົາສາມາດໄປຢາມ ແລະ ກວດເບິ່ງສວນໄດ້ ເພື່ອຮັບປະກັນວ່າທຸກຢ່າງເປັນໄປຕາມມາດຕະຖານ ແລະ ຊ່ວຍແນະນໍາຊາວສວນໃນການສ້າງຜົນຜະລິດໃຫ້ໄດ້ດີກວ່າເກົ່າ.”

 ເພື່ອໃຫ້ໄດ້ແນວນັ້ນ, ບໍລິສັດໄດ້ມີສ່ວນຮ່ວມໃນການອົບຮົມ ຊາວສວນກ່ຽວກັບການປູກໄມ້ເປັນຮົ່ມ, ການບຳລຸງຮັກສາສວນ, ການເລືອກເວລາໃນການເກັບໝາກ, ແລະ ການຄັດເລືອກໝາກດີອອກຈາກໝາກບໍ່ດີ ຫຼື ທີ່ສຸກເກີນຄວນ. ປັດຈຸບັນມີຊາວສວນ 750 – 800ຄອບຄົວ ທີ່ປູກກາເຟຂາຍໃຫ້ຮ້ານຊາຟຣອນ. ທ່ານ ທ໋ອດ ກໍຫວັງຢາກເຫັນຊາວສວນສາມາດປູກໄດ້ຫຼາຍກວ່າເກົ່າ ແຕ່ທຸກສິ່ງທຸກຢ່າງລ້ວນຕ້ອງໃຊ້ເວລາ.

ທາງຮ້ານຍັງມີການຈັດລາຍການທ່ອງທ່ຽວ ເພື່ອໃຫ້ລູກຄ້າໄປເບິ່ງຂັ້ນຕອນການເກັບກ່ຽວເມັດກາເຟ, ຂັ້ນຕອນການກະກຽມ, ແລະ ສຳພັດກັບລົດຊາດ ແລະ ກິ່ນອາຍຂອງກາເຟແຕ່ລະຊະນິດ ທີ່ໂຮງຂົ້ວກາເຟ ທີ່ຫ່າງຈາກຕົວເມືອງໄປພຽງແຕ່ 15 ນາທີ ເທົ່ານັ້ນ.  

facebook.com/SaffronCoffee

Instagram @saffroncoffee

www.saffroncoffee.com

ຂຽນໂດຍ: Sally Pryor

ຮູບໂດຍ: ພູນຊັບ ເທວົງສາ