ເລື່ອງກ້ວຍໆ

ເລີ່ມຕົ້ນຈາກກຸ່ມເຟສບຸກທຳມະດາໆ ໄດ້ສ້າງຫົນທາງໃຫ້ ເຢັບເປ້ ຄາວສັນ ຫຼື ທີ່ຮູ້ຈັກກັນດີໃນນາມ ເຈພີ​ (JP)  ສ້າງຕັ້ງທຸລະກິດການຕະຫຼາດດີຈີຕ້ອນແຫ່ງທຳອິດໃນລາວຂຶ້ນມາ. ກຸ່ມເຟສບຸກນັ້ນມີຊື່ວ່າ ໂຊ-ໂຊ ຄລັບ, ເປັນບ່ອນທີ່ໄວໜຸ່ມທັງຫຼາຍ ຈາກທຸກສາຂາອາຊີບ ມາແລກປ່ຽນສົນທະນາກັນ, ເປັນກຸ່ມຄົນທີ່ບໍ່ແມ່ນ ໄຮ-ໂຊ, ບໍ່ແມ່ນໂລໂຊ ແຕ່ເປັນຄົນທຳມະດາ ໂຊ-ໂຊ.

ກຸ່ມນີ້ໄດ້ຖືກສ້າງຂຶ້ນໃນປີ 2009 ແລະ ສະມາຊິກໃນກຸ່ມກໍ່ເພີ່ມຂຶ້ນເລື້ອຍໆ ເຈພີຈຶ່ງໄດ້ຈັດງານໜຶ່ງຂຶ້ນເພື່ອໃຫ້ຄົນໃນກຸ່ມໄດ້ມາພົບກັນ, ບໍ່ແມ່ນພຽງແຕ່ພົບກັນໃນໂລກອອນລາຍ.

“ຂ້ອຍຈື່ໄດ້ວ່າຂ້ອຍໄດ້ຈັດງານລ້ຽງຂຶ້ນທີ່ຕຶກຮ້າງແຫ່ງໜຶ່ງ ແລະ ເຮົາໄດ້ຈັດໃຫ້ມັນເປັນເທັກສຳລັບຄືນນັ້ນ, ມັນສຸດຍອດເລີຍ! ເຮົາຍັງເອົາຫ້ອງອາບນໍ້າມາເຮັດເປັນບູດດີເຈອີກ!” ກ່າວໂດຍ ເຈພີ.

ກຸ່ມບໍລິສັດ Carlberg  ໄດ້ໃຫ້ການສະໜັບສະໜູນງານນັ້ນ ແລະ ອີກຫຼາຍໆງານທີ່ ເຈພີ ຈັດຂຶ້ນ ເພື່ອເປັນການໂປຣໂມດແບຣນຂອງເຂົາເຈົ້າ ເພາະໄດ້ເຫັນວ່າກຸ່ມໂຊ-ໂຊເລີ່ມເປັນທີ່ສົນໃຈຂອງຄົນໃນສັງຄົມຫຼາຍຂຶ້ນ.

ຫຼັງຈາກນັ້ນ, ເຈພີໄດ້ຍ້າຍໄປເຮັດວຽກຢູ່ຕ່າງປະເທດໄລຍະໜຶ່ງ ເຮັດວຽກກ່ຽວກັບການຂາຍຊອບແວ ລະບົບ POS, ແຕ່ລາວຮູ້ສຶກບໍ່ມັກວຽກນັ້ນປານໃດ ຈຶ່ງກັບມາລາວເພື່ອມາຫາແຮງບັນດານໃຈໃໝ່. ແລະ ພໍດີກັບທີ່ບໍລິສັດ ເບຍລາວ ໄດ້ຕິດຕໍ່ຫາ ເຈພີ ເພື່ອໃຫ້ລາວຊ່ວຍທາງດ້ານການຕະຫຼາດດີຈີຕ້ອນ.

“ເຂົາເຈົ້າໂທມາຫາຂ້ອຍ ແລະ ຊວນຂ້ອຍໄປເຮັດການຕະຫຼາດດີຈີຕ້ອນໃຫ້ເຂົາເຈົ້າ. ຂ້ອຍບອກເຂົາເຈົ້າວ່າຂ້ອຍບໍ່ໄດ້ຊ່ຽວຊານດ້ານນີ້, ແຕ່ຂ້ອຍຍິນດີທີ່ຈະລອງ”.

ແລະ ນັ້ນກໍ່ເປັນຈຸດກຳເນີດຂອງບໍລິສັດ ດິຈິຕ້ອນ ມັງຄີ (Digital Monkey) ເຊິ່ງເກີດຂຶ້ນຢູ່ໃນເຮືອນຂອງ JP ໃນຕົ້ນປີ 2012. ພາຍໃນ 6 ເດືອນ, ເຈພີ ແລະ ໝູ່ຂອງລາວໄດ້ບໍລິຫານເລື່ອງການຕະຫຼາດດີຈີຕ້ອນໃຫ້ຜະລິດຕະພັນຫຼັກເກືອບທັງໝົດຂອງກຸ່ມເບຍລາວ.

“ພວກເຮົາເຮັດວຽກທຸກຢ່າງໃນຫ້ອງນັ່ງຫຼິ້ນໃນເຮືອນຂ້ອຍ ທັງຄິດເນື້ອຫາ ແລະ ຖ່າຍຮູບສຳລັບເຟສບຸກຂອງເບຍລາວ” ກ່າວໂດຍ ເຈພີ.

ຫຼັງຈາກນັ້ນ,​ ເຈພີກໍ່ຮ່ວມມືກັນກັບຄູ່ຄ້າຄົນລາວ ໃນຂະນະທີ່ຈຳນວນຜູ້ຊົມໃຊ້ເຟສບຸກໃນລາວນັບມື້ນັບຫຼາຍຂຶ້ນ ດຶງດູດໃຫ້ໃຫ້ມີລູກຄ້າລາຍໃຫຍ່ ຕົກລົງເຊັນສັນຍາກັບ Digital Monkey ຫຼາຍຂຶ້ນ ບໍ່ວ່າຈະເປັນ ລາວ ຟອດ ຊີຕີ້, ຢູນີລີເວີ, ບີລາຍ, ແລະ ເອັກເປຣສຟູດກຣຸບ.

“ທຸກຄົນໃນລາວຮູ້ເຖິງຄວາມສຳຄັນຂອງການຕະຫຼາດດິຈິຕ້ອນ, ແຕ່ຄົນທີ່ຖະໜັດວຽກງານດ້ານນີ້ ຍັງມີໜ້ອຍ, ເຊິ່ງພວກເຮົາໄດ້ຊ່ວຍໃຫ້ລູກຄ້າ ສາມາດເຂົ້າເຖິງກຸ່ມເປົ້າໝາຍຂອງເຂົາເຈົ້າໄດ້ ໃນແບບທີ່ບໍ່ມີໃຜເຄີຍເຮັດມາກ່ອນ” ກ່າວໂດຍ ເຈພີ.

ເພິ່ນກ່າວຕື່ມວ່າ ການຕະຫຼາດແຕ່ກ່ອນເປັນການສື່ສານແຕ່ພຽງຝ່າຍດຽວເທົ່ານັ້ນ, ບໍ່ວ່າຈະເປັນການສື່ສານ ຜ່ານທາງວິທະຍຸ, ປ້າຍໂຄສະນາ, ຫຼື ໂທລະພາບ, ເຊິ່ງແຕກຕ່າງຈາກການຕະຫຼາດດີຈີຕ້ອນ ທີ່ເປັນການສື່ສານສອງຝ່າຍ, ທີ່ລູກຄ້າສາມາດເຂົ້າເຖິງທຸລະກິດນັ້ນໄດ້.

ປັດຈຸບັນ ຫ້ອງການດິຈິຕ້ອນ ມັງຄີ ຕັ້ງຢູ່ຊັ້ນສາມຂອງຕຶກ K&C ແລະ ມີທີມງານລີງດິຈິຕ້ອນຈຳນວນຫຼວງຫຼາຍ ທີ່ເຮັດວຽກຢ່າງຫ້າວຫັນ, ກະກຽມເນື້ອໃນ, ວີດີໂອ, ແລະ ບໍລິຫານສື່ສັງຄົມອອນລາຍໃຫ້ແກ່ບັນດາບໍລິສັດໃຫຍ່ໆໃນລາວ.

ເຈພີ ກ່າວວ່າ ປັດຈຸບັນ ໂລກດິຈິຕ້ອນ ແມ່ນມີການປ່ຽນແປງຢ່າງໄວວາ, ຈາກຂໍ້ຄວາມ ກາຍມາເປັນຮູບພາບ, ຈາກຮູບພາບເປັນວີດີໂອ. ການທີ່ຈະນໍາໂລກດີຈີຕ້ອນໃຫ້ທັນແມ່ນມີເຄັດລັບຢູ່ບ່ອນວ່າ ເຮົາຕ້ອງຈັບກະແສຄວາມນິຍົມ ໃຫ້ໄດ້ກ່ອນທີ່ຄົນຈະຮູ້ຈັກ, ທັງຕ້ອງຮັບປະກັນວ່າ ຍຸດທະສາດການຕະຫຼາດຂອງເຮົາ ສາມາດປັບປ່ຽນ ແລະ ຢືດຢູ່ນຕາມສະພາບຕະຫຼາດໄດ້.

ແຕ່ມັນກໍ່ເປັນພຽງເລື່ອງກ້ວຍໆເທົ່ານັ້ນ ສຳລັບທີມງານ ດິຈິຕ້ອນ ມັງຄີ.

ຕິດຕໍ່ໄດ້ທີ່: 

info@digitalmonkey.la

+856 20 78893388

ບົດຕວາມໂດຍ: ແຄມເມຣອນ ດາຣກ
ຮູບໂດຍ: ພູນຊັບ ເທວົງສາ