ເຮືອໄຟສ່ອງແສງລະຍິບລະຍັບ

ງານບຸນປະເພນີອັນສວຍງາມຂອງແຂວງຫຼວງພະບາງໄດ້ຫວນກັບຄືນມາແລ້ວ
ພາຍຫຼັງ 2 ປີແຫ່ງການງົດງານບຸນເທດສະການຕ່າງໆ ເນື່ອງຈາກການລະບາດຂອງພະຍາດ, ບຸນອອກພັນສາ ແລະ ບຸນໄຫຼເຮືອໄຟທີ່ຫຼວງພະບາງ ຈະຖືກຈັດຂຶ້ນຢ່າງເຕັມຮູບແບບໃນປີນີ້ ຫຼັງຈາກທີ່ໄດ້ເປີດຊາຍແດນຢ່າງເປັນທາງການໃນເດືອນພຶດສະພາທີ່ຜ່ານມາ. ງານບຸນອອກພັນສາປະວໍລະນາ ແມ່ນກົງກັບວັນທີ 10 ຕຸລາຂອງປີນີ້, ແລະ ບຸນໄຫຼເຮືອໄຟກໍຈະໄດ້ຈັດຂຶ້ນໃນຕອນແລງຂອງມື້ດັ່ງກ່າວ. ນີ້​ແມ່ນ​ງານ​ບຸນ​ທີ່​ມີ​ສະ​ເໜ່​ທີ່​ສຸດ​ໃນ​ປະ​ຕິ​ທິນ​ລາວ. ເຖິງແມ່ນວ່າຈະມີຫຼາຍໆ ງານ​ບຸນປະເພນີ​​ໃນ​ທົ່ວ​ປະ​ເທດ​ລາວ, ແຕ່​ນະ​ຄອນ​ຫຼວງ​​ເກົ່າທາງພາກເໜືອແຫ່ງນີ້ຈະໃຫ້​ບັນ​ຍາ​ກາດອັນໜ້າປະທັບໃຈ​ທີ່​ສຸດ. ໄຟລະຍິບລະຍັບເປັນຈຳນວນຫຼວງຫຼາຍທີ່ຈັດວາງປະດັບປະດາຢ່າງງົດງາມຢູ່ທົ່ວທຸກຫົນແຫ່ງຕາມວັດວາອາຮາມ, ຕາມຖະໜົນຫົນທາງ, ແລະ ຕາມສະຖາປັດຕະຍະກຳທາງປະຫວັດສາດ ເຊິ່ງຍາກທີ່ຈະຫາບ່ອນໃດທຽບເທົ່າໄດ້. ສະນັ້ນ, ຖ້າຫາກນັກທ່ອງທ່ຽວທ່ານໃດທີ່ມີຈຸດປະສົງທີ່ຈະໄປຮ່ວມງານດັ່ງກ່າວນັ້ນ ກໍ່ຢ່າ​ລືມຖື​ກ້ອງ​ຖ່າຍ​ຮູບໄປພ້ອມເດີ້.

ການເຂົ້າພັນສາໃນໄລຍະ 3 ເດືອນ ສະທ້ອນໃຫ້ເຫັນເຖິງຊ່ວງເວລາທີ່ພຣະພຸດທະເຈົ້າຂຶ້ນສູ່ສະຫວັນເພື່ອຢ້ຽມຢາມມານດາຂອງພຣະອົງ ແລະ ການກັບຄືນສູ່ໂລກຂອງພຣະອົງກໍເປັນອັນສິ້ນສຸດຂອງຊ່ວງເວລານີ້ ເຊິ່ງກົງກັບລະດູຝົນພໍດີ. ການພັກຜ່ອນໃນຊ່ວງລະດູຝົນ ແມ່ນໄລຍະເວລາເພື່ອຊຳລະຈິດໃຈ ແລະ ພຣະສົງຈະສຸມໃສ່ການສຶກສາທັມມະ ແລະ ການສິດສອນຈົວໃຫມ່. ການອອກພັນສາຖືວ່າເປັນການສິ້ນສຸດໄລຍະເວລາທີ່ເຄັ່ງຄັດນີ້ ແລະ ກ້າວເຂົ້າສູ່ຄວາມມ່ວນຊື່ນລື່ນເລີງ ແລະ ເບີກບານ ທີ່ຈະໄດ້ກັບຄືນສູ່ການດຳເນີນຊີວິດປົກກະຕິ ແລະ ເປັນລະດູການແຫ່ງການແຕ່ງງານ. ໃນ​ໄລ​ຍະ​ເຂົ້າ​ພັນ​ສາ, ການ​ຈັດ​ກິດ​ຈະ​ກໍາລື່ນເລີງຕ່າງໆທາງ​ສັງ​ຄົມເຊັ່ນ: ການຍ້າຍ​ເຮືອນ​, ຫຼື ການ​ແຕ່ງ​ງານ ຖືເປັນສິ່ງທີ່ບໍ່ສົມຄວນ ແລະ ອາດຈະນຳຄວາມໂຊກຮ້າຍມາໃຫ້ແກ່ເຈົ້າພາບ​. ຜູ້ຄົນກໍຍັງພະຍາຍາມຫຼີກລ່ຽງ ແລະ ງົດການດື່ມສິ່ງມຶນເມົາ ຫຼື ງົດການບໍລິໂພກເນື້ອສັດ ເພື່ອດຳເນີນຕາມວິຖີຊີວິດນັກບວດຂອງພຣະສົງໃນຍາມເຂົ້າພັນສາ.
ການຕັກບາດຖືເປັນສິຣິມຸງຄຸນຢ່າງຍິ່ງໃນຕອນເຊົ້າຂອງວັນສິນເພັງ, ເພື່ອລະນຶກເຖິງບັນພຣະບູລຸດ, ແລະ ສ້າງບຸນກຸສົນເພື່ອບັນລຸໝາກຜົນໃນອະນາຄົດຂ້າງໜ້າ. ບັນດາປວງຊົນຜູ້ທີ່ມີຈິດໃຈໃສສັດທາຈະນັ່ງລຽນກັນເປັນແຖວ ຕາມຖະໜົນຫົນທາງໃນຕົວເມືອງ ເພື່ອລໍຖ້າໃສ່ບາດດ້ວຍເຂົ້າໜຽວ ຫຼື ເຂົ້າຕົ້ມເຂົ້າໜົມ ໃຫ້ແກ່ຂະບວນພຣະສົງທີ່ຫຼັ່ງໄຫຼມາບໍ່ຂາດສາຍ. ຕາມທໍາມະດາແລ້ວປະຊາຊົນກໍຈະໄຕ້ທຽນເພື່ອເປັນສັນຍາລັກຂອງຄວາມສະຫວ່າງສະໄຫວ ແລະ ຄວາມດີງາມດ້ວຍ.
​ໃນ​ຕອນ​ກາງ​ເວັນ, ຊາວ​ບ້ານ​ຫຼາຍ​ຄົນ​ຍັງໄດ້ປະດິດ ​ແລະ ຂາຍ​ກະທົງ​ທີ່ເຮັດດ້ວຍໃບຕອງກ້ວຍທີ່ປະດັບປະດາດອກໄມ້​ສີສັນ​ສົດ​ໃສ ແລະ ທູບທຽນ. ຢ່າລືມອຸດໜູນຊ່ວຍຊາວບ້ານຈັກອັນໜຶ່ງແລ້ວໄປຮ່ວມລອຍກະທົງຢູ່ແຄມແມ່ນ້ຳໃນຕອນແລງດ້ວຍ.

​ຈຸດ​​ເດັ່ນ​ຂອງ​ງານ​ບຸນນີ້​ແມ່ນ​​ ຂະ​ບວນແຫ່​​ເຮືອ​ໄຟ​ໃນ​ຕອນ​ຄ່ຳ ທີ່​ຕັ້ງຂະບວນ​ຈາກ​ຫ້ອງການໄປສະນີ​ລົງໄປຕາມ​ຖະ​ໜົນ​ສາຍຫຼັກ​ຈົນຮອດ​ວັດ​ຊຽງ​ທອງ. ເຮືອຈຳລອງຖືກປະດັບປະດາຕົກແຕ່ງ ແລະ ປົກຫຸ້ມໄປດ້ວຍທຽນ ແລ້ວໃນຕອນທ້າຍຂອງຄໍ່າຄືນນັ້ນ, ພິທີກໍຈະຈົບລົງດ້ວຍການລ່ອງເຮືອໄຟເຫຼົ່ານັ້ນລົງແມ່ນໍ້າຂອງ ແລະ ປ່ອຍໃຫ້ໄຫຼໄປຕາມແມ່ນ້ຳ.
ອີກໜຶ່ງຈຸດໜ້າສົນໃຈຂອງຂະບວນແຫ່ແມ່ນເຮືອລຳທີ່ບັນຈຸ ຫຼື ຈຳລອງເປັນຮູບພະຍານາກພົ່ນໄຟ ຫຼື ສ້າງເປັນຮູບສັດທີ່ມີການກະພືປີກຂຶ້ນລົງເປັນຈັງຫວະ. ແຕ່​ລະ​ວັດ​ຈະ​ໃຊ້​ເວ​ລາ​ຫຼາຍ​ອາ​ທິດ​ໃນ​ການ​ສ້າງ​ເຮືອ​ຂະ​ຫນາດ​ໃຫຍ່​ ແລະ ​ໂຄມ​ໄຟ​ໄມ້​ໄຜ່​ ພ້ອມທັງ​ເຈ້ຍ​ສີ​ທີ່ເຮັດເປັນຮູບພະຍານາກ ຫຼື​ ຮູບສັດໃນຕຳນານອື່ນໆ. ເຮືອຈຳລອງຖືກປະດັບປະດາຕົກແຕ່ງ ເພື່ອເຂົ້າຮ່ວມຂະບວນແຫ່ ຫຼື ບໍ່ກໍຈະເອົາໄປວາງສະແດງຢູ່ເດີ່ນວັດ. ແຕ່ລະວັດກໍຈະມີຫົວຄິດປະດິດສ້າງຕາມສິ່ງທີ່ຕົນມັກ, ວັດສີບຸນເຮືອງມັກຈະເຮັດແບບຈໍາລອງເຮືອບິນຂອງສາຍການບິນລາວ, ແລະ ໃນປີກາຍນີ້ ກໍມີວັດໜຶ່ງທີ່ໄດ້ປັບເຂົ້າກັບສະພາບການປະຈຸບັນ ໂດຍໄດ້ສ້າງໂຄມໄຟສີຂຽວເຈີດຈ້າເປັນຮູບໄວຣັສໂຄໂຣນາ.
ບຸນ​ເຮືອ​ໄຟ​ແມ່ນ​ເຕັມ​ໄປ​ດ້ວຍ​ທັດສະນີ​ຍະ​ພາບ​ ແລະ ​ກິ່ນ​ອາຍ​ທີ່​ອົບ​ອຸ່ນ​ ແລະ ອົບອວນໄປດ້ວຍ​ກິ່ນ​ຫອມລະມຸນ​ຂອງ​ຂີ້ເຜິ້ງ​ທີ່​ກຳລັງລະລາຍ ​ແລະ ກິ່ນ​ຄວັນອ່ອນໆ. ​ພ້ອມກັນນັ້ນກໍເຕັມໄປດ້ວຍແປວທຽນ​ລະຍິບລະຍັບ​ທີ່​ສວຍ​ສົດ​ງົດ​ງາມ, ປະຊາຊົນພາກັນ​ນຸ່ງ​ຊຸດ​ພື້ນ​ເມືອງ, ນັກ​ຟ້ອນ​ຈາກ​ໂຮງ​ລະຄອນ​ກໍ່ທຳການ​ສະ​ແດງ​ນິທານ​ເລື່ອງ​ພະລັກພະລາມໃນ​ຊຸດ​ຫະນຸມານ, ​ແລະ​ ບັນດານ້ອງນັກຮຽນ​ໃສ່​​ເສື້ອ​ຂາວກໍພາກັນ​ເຂົ້າ​ຮ່ວມ​ຂະບວນ​ແຫ່​ໂຄມ​ໄຟຢ່າງຟົດຟື້ນ.

ອີກກິດຈະກຳໜຶ່ງເຊິ່ງເປັນທີ່ນິຍົມຫຼາຍສຳລັບຄົນທ້ອງຖິ່ນກໍຄືການນຸ່ງຊຸດພື້ນເມືອງ ແລະ ຖ່າຍຮູບເຊວຟີກັບພາບພື້ນຫຼັງທີ່ເປັນແສງໄຟລະຍິບລະຍັບ, ຈຳນວນທຽນໄຂອັນອົບອຸ່ນທີ່ຫຼວງຫຼາຍພາຍມາກເຮັດໃຫ້ໄດ້ຮູບພາບທີ່ມີແສງສະຫວ່າງອ່ອນໆນວນຕາ. ຄົນທ້ອງຖິ່ນມັກໄປທ່ຽວຊົມວັດວາອາຮາມທີ່ມີຊື່ສຽງໂດ່ງດັງ ແລະ ມີການປະດັບປະດາທີ່ສວຍງາມ ເຊັ່ນ: ວັດຊຽງມ່ວນ ທີ່ປະດັບໂຄມໄຟເຕັມເດີ່ນວັດ, ວັດຈູມຄ້ອງ ເຊິ່ງອາດຈະມີໂຄມໄຟທີ່ຫຼາຍທີ່ສຸດໃນຕົວເມືອງ, ແລະ ພຣະທາດສີຂາວຂະໜາດໃຫຍ່ຢູ່ວັດວິຊຸນ ກໍມີຄວາມໜ້າຕື່ນຕາຕື່ນໃຈ ແລະ ມີບັນຍາກາດອັນອົບອຸ່ນ ດ້ວຍບັນດາໂຄມໄຟທີ່ຖືກໄຕ້ວາງໄວ້ໃນແຕ່ລະຊັ້ນ.
ຢູ່​ຂັ້ນ​ໄດ​ເກົ່າ​ຂອງ​ວັດ​ຊຽງ​ທອງ, ປະຊາຊົນ​ຈຳນວນ​ຫຼວງ​ຫຼາຍ​ມາ​ເຕົ້າ​ໂຮມ​ກັນເພື່ອ​ເບິ່ງ​ເຮືອ​ໄຟທີ່​ຖືກ​ປ່ອຍລົງໃນ​ແມ່​ນ້ຳ​ຂອງ ພ້ອມທັງລອຍກະທົງ​ຂອງ​ຕົນເອງ, ​ເປັນ​ສັນຍາ​ລັກຂອງການປົດປ່ອຍ ແລະ ປັດເປົ່າສິ່ງບໍ່ດີ​ອອກ​ສູ່​ຄວາມ​ມືດ​​ຂອງ​ແມ່ນ້ຳ. ອະທິຖານຂໍໃນສິ່ງທີ່ດີ ແລະ ກໍຫວັງວ່າຈະໄດ້ກັບຄືນສູ່ງານບຸນປະເພນີທີ່ງົດງາມນີ້ອີກຄັ້ງໃນປີຕໍ່ໄປ.
1. ການໄຕ້ທຽນປະດັບເຮືອໄຟ

2. ນັກຟ້ອນຈາກໂຮງລະຄອນ ພະລັກ ພະລາມ

3. ໂຄມໄຟປະດັບວັດຢ່າງສະຫງ່າງາມ

ຂໍ້ມູນເພີ່ມເຕີມ
ການທ່ອງທ່ຽວແຫ່ງຫຼວງພະບາງ ຈະປະກາດວັນທີ່ຈັດງານຂອງເທດສະການນີ້ລ່ວງໜ້າກ່ອນບຸນອອກພັນສາໃນແຕ່ລະປີ ທາງ Facebook Page: fb.com/tourismluang-prabang

ການເດີນທາງ
ການບິນລາວ ມີຖ້ຽວບິນຈາກວຽງຈັນ ແລະ ບາງກອກ ໄປ ຫຼວງພະບາງທຸກມື້.

ແປ ແລະ ຮຽບຮຽງໂດຍ ອຸໄລພອນ ເດກົງໄຊ
ຮູບໂດຍ Anita Preston / Evensong Film