ໝາຍປະຕິທິນຂອງເຈົ້າຖ້າໄດ້ເລີຍ ສຳລັບວັນທີ 8–11 ທັນວານີ້
ຫຼັງຈາກການແຜ່ລະບາດຂອງພະຍາດໂຄວິດ-19 ທີ່ຜ່ານມາ ອາດເບິ່ງຄືວ່າເວລາທີ່ດີທີ່ສຸດໃນຊ່ວງນັ້ນຄື ການເບິ່ງຮູບເງົາໃນໂທລະພາບຢູ່ບ້ານເພື່ອໃຫ້ເວລາຜ່ານໄປໃນແຕ່ລະມື້, ແຕ່ມັນບໍ່ແມ່ນເລື່ອງງ່າຍເລີຍ ສຳລັບບຸນມະໂຫລານຮູບເງົາຂອງພວກເຮົາ. ເມື່ອບໍ່ສາມາດອອກໄປຂ້າງນອກໄດ້, ບໍ່ມີການພົບປະຂອງຄົນໃນສັງຄົມ, ບຸນມະໂຫລານຮູບເງົາຈຶ່ງໄດ້ປັບປ່ຽນໃຫ້ໄປຢູ່ໃນຮູບແບບອອນລາຍແທນ ເຊັ່ນ: ຜ່ານ ຊູມ (Zoom) ແລະ ຮູບແບບອອນລາຍອື່ນໆ.
ຊຶ່ງນັບວ່າໂຊກດີທີ່ທຸກຢ່າງສາມາດເປີດຄືນໃໝ່ໄດ້ແລ້ວ ນັ້ນຈຶ່ງເຮັດໃຫ້ບຸນມະໂຫລານຮູບເງົາສາມາດເກີດຂຶ້ນໄດ້ອີກຄັ້ງໃນໄວໆນີ້.
ການສາຍຮູບເງົາຊັ້ນນຳຂອງປະເທດລາວ ສຳລັບບຸນມະໂຫລານຮູບເງົາຫຼວງພະບາງ (LPFF) ພາຍໃນ ປີ 2020 ທີ່ຜ່ານມາກໍ່ແມ່ນໄດ້ຈັດໃນຮູບແບບອອນລາຍ ເຊິ່ງມີຮູບເງົາຈຳນວນຫຼວງຫຼາຍໃຫ້ສາມາດເລືອກຮັບຊົມໄດ້ໃນເວັບໄຊບຸນມະໂຫລານຮູບເງົາ ເປັນເວລາ 2-3 ວັນໃນເດືອນ ທັນວາ ຂອງປີທີ່ຜ່ານມາ. ແລ້ວຫຼັງຈາກນັ້ນ ກໍ່ຄືປີ 2021​ ເຫດການລັອກດາວກໍ່ໄດ້ເກີດຂື້ນອີກຄັ້ງ.

LPFF ເຊິ່ງເປັນຜູ້ຈັດການກອງທຶນສຳລັບຜູ້ສ້າງຮູບເງົາລາວ ໄດ້ຕັດສິນໃຈວ່າ ປີ 2021 ຈະເປັນປີແຫ່ງການພັດທະນາຮູບເງົາ. ບຸນມະໂຫລານໄດ້ຢຸດລົງ ແລະ ຫັນປ່ຽນຈຸດສຸມໄປສະໜັບສະໜູນການສ້າງຮູບເງົາໃຫ້ມີຊື່ສຽງທີ່ສາມາດເຮັດໄດ້ດ້ວຍການສະໜັບສະໜູນທັງໝົດທີ່ຈະໄດ້ຮັບໃນປີ 2020 ແລະ 2021 ຫຼາຍກວ່າ 100,000 ໂດລາສະຫະລັດ ສຳລັບໂຄງການພາຍໃນປະເທດ, ມີຮູບເງົາ 18 ເລື່ອງທີ່ມີຄວາມຍາວ ແລະ ປະເພດຕ່າງກັນທີ່ໄດ້ຮັບການຄັດເລືອກໃຫ້ໄດ້ຮັບການສະໜັບສະໜູນຈາກກອງທຶນຊ່ວຍເຫຼືອນີ້.
ມັນເປັນສິ່ງທີ່ນ່າຍິນດີຫຼາຍ. ເພາະຫຼັງຈາກທີ່ບໍ່ສາມາດຈັດງານມາໄດ້ໄລຍະໜຶ່ງແລ້ວ, ແຟນໆບຸນມະໂຫລານກໍມີຄວາມປິຕິຍິນດີເປັນຢ່າງຍິ່ງທີ່ໄດ້ຮູ້ວ່າເມືອງຫຼວງທີ່ເກົ່າແກ່ ແລະ ເປັນເມືອງມໍລະດົກໂລກຂອງໂຄງການອຸຍເນັສໂກ (UNESCO) ຈະໄດ້ເປັນເຈົ້າພາບຈັດບຸນສາຍຮູບເງົາຫຼາກຫຼາຍປະເພດທີ່ໜ້າຕື່ນເຕັ້ນນີ້ອີກຄັ້ງໜຶ່ງ. ທ່ານ Sean Chadwell, ຜູ້ອຳນວຍການຝ່າຍບໍລິຫານຂອງ LPFF ກ່າວວ່າ: “ການອອກຈາກໄລຍະແຫ່ງການແຜ່ລະບາດຂອງພະຍາດໂຄວິດ – 19 ນີ້, ພວກເຮົາຕ້ອງໄດ້ເລີ່ມຕົ້ນປີນີ້ດ້ວຍຈຸດເລີ່ມຕົ້ນໃໝ່ໆ” ແລ້ວທ່ານຍັງກ່າວຕື່ມວ່າ ເພາະໄດ້ຮັບການສະໜັບສະໜູນ ຈາກບໍລິສັດ ລາວໂທລະຄົມ (Lao Telecom), ເອັມ ມັນນີ (M Money) ແລະ ມູລະນິທິ ເອເຊຍ (The Asia Foundation) ຈຶ່ງເຮັດໃຫ້ບຸນມະໂຫລານຄັ້ງນີ້ສາມາດເກີດຂື້ນໄດ້.ໃນຂະນະທີ່ຮູບເງົາຈາກທົ່ວພາກພື້ນ ອາຊີຕາເວັນອອກສຽງໃຕ້ ຫຼາຍກວ່າ 20 ເລື່ອງທີ່ຈະໄດ້ເຂົ້າສາຍໃນປີນີ້, ຮູບເງົາທີ່ ເປັນພາສາລາວ ແລະ ພາສາໄທຈະໄດ້ສາຍທີ່ໂຮງຮຽນປະຖົມບ້ານວັດແສນ. ສ່ວນຮູບເງົາຈາກປະເທດອື່ນໆໃນພາກພື້ນ ເຊັ່ນ: ປະເທດກຳປູເຈຍ, ອີນໂດເນເຊຍ, ມາເລເຊຍ, ມຽນມ້າ, ຟິລິປິນ, ສິງກະໂປ ແລະ ຫວຽດນາມ ຈະໄດ້ສາຍໃນໂຮງແຮມ ໂຊຟີເທວ ຫຼວງພະບາງ (Sofitel Luang Prabang).
ເພື່ອຮັກສາປະເພນີຂອງ LPFF, ການເຂົ້າເບິ່ງຮູບເງົາທັງໝົດແມ່ນຈະບໍ່ໄດ້ເສຍຄ່າເຂົ້າງານໃດໆເລີຍ.

ເມື່ອຖະໜົນສາຍຫຼັກຂອງຫຼວງພະບາງຄ່ອຍໆກັບຄືນສູ່ສະພາບຄືກຄືນເເບບເກົ່າແລ້ວ, ປະຊາຊົນໃນຕົວເມືອງກໍກັບມາມີຄວາມຫວັງອີກຄັ້ງທີ່ຈະໃຫ້ມີການຈັດງານຄັ້ງຍິ່ງໃຫຍ່ໃນປີນີ້, ທ່ານ Sean ໄດ້ກ່າວວ່າ: “ຄວາມມີພະລັງ ແລະ ຄວາມກະຕືລືລົ້ນຢູ່ທີ່ນີ້ແມ່ນມະຫັດສະຈັນຫຼາຍ. ພ້ອມກັບໄດ້ຮັບຄວາມຮ່ວມມືຈາກ ໂຮງແຮມ ເອວານີ+ ຫຼວງພະບາງ (Avani+ Luang Prabang) ແລະ ໂຮງແຮມ ໂຊຟີເທວ (Sofitel Luang Prabang) – ທີ່ເປັນຜູ້ສະໜັບສະໜູນຢ່າງຍາວນານຂອງບຸນມະໂຫລານນີ້ – ແລະ ເຊັ່ນດຽວກັບທີ່ຜ່ານມາ ທັງສອງໂຮງແຮມນີ້ກໍ່ຈະເປັນຕົວແທນໃນການເຂົ້າຮ່ວມງານລະດັບໂລກກັບພວກເຮົາ ແລະ ຄູ່ຮ່ວມງານທົ່ວເມືອງກໍ່ກຽມພ້ອມທີ່ຈະຕ້ອນຮັບຄະນະຜູ້ບໍລິຫານ ແລະ ແຂກດ້ານອຸດສາຫະກຳກັບຄືນສູ່ຫຼວງພະບາງ”.
ຊ່ວງເວລາທີ່ຢຸດພັກໄປນັ້ນຍັງເຮັດໃຫ້ທີມງານຂອງໂຄງການມີຮູບເງົາໃຫ້ທ່ານເລືອກຢ່າງຫຼວງຫຼາຍ, ບໍ່ແມ່ນສະເພາະແຕ່ຮູບເງົາທີ່ດີທີ່ສຸດໃນປີນີ້້ເທົ່ານັ້ນ ແຕ່ຈະມີຮູບເງົາດີທີ່ສຸດໃນສາມປີທີ່ຜ່ານມາໃນທົ່ວພາກພື້ນ. ດັ່ງທີ່ ທ່ານ Sean ໄດ້ກ່າວໄວ້ວ່າ: “ການຫຼຸດຕາຕະລາງຈາກຈຳນວນຮູບເງົາທີ່ຫຼວງຫຼາຍແມ່ນ ສິ່ງທ້າທາຍທີ່ຈະຕ້ອງໄດ້ປະເຊີນ”.
ດັ່ງທີ່ຮູ້ກັນວ່າ ງານນີ້ເປັນງານມະຫາກຳຮູບເງົາສາກົນແຫ່ງດຽວໃນເມືອງທີ່ຈະສາຍໂດຍບໍ່ມີໂຮງຮູບເງົາ, LPFF ຈະເລີ່ມຂຶ້ນໃນຕອນແລງຂອງວັນທີ 8 ທັນວາ ແລະ ດຳເນີນໄປເປັນເວລາ 3 ວັນ. ສິ່ງທີ່ທ່ານຕ້ອງເຮັດເມື່ອເຂົ້າຮ່ວມງານນີ້ແມ່ນມ່ວນຊື່ນກັບການເບິ່ງຮູບເງົາ, ການສົນທະນາ ແລະ ການຖາມ-ຕອບກັບຜູ້ສ້າງຮູບເງົາ ຊຶ່ງເປັນສິ່ງທີ່ສ້າງຄວາມອົບອຸ່ນທີ່ສຸດໃນຄືນທີ່ໜາວເຢັນຂອງເດືອນທັນວານີ້.
ນັກທ່ອງທ່ຽວທີ່ຢູ່ໃນເມືອງຫຼວງພະບາງສາມາດເຂົ້າໄປຢ້ຽມຊົມຫ້ອງການ LPFF ໄດ້ທີ່ຖະໜົນສາຍຫຼັກໃນເມືອງ, ຊຶ່ງຈະຢູ່ຖັດຈາກ ປະຕູວັດ ຄີລີ ໂດຍຈະເປັນຮ້ານຄ້າທີ່ມີເສື້ອຍືດ ແລະ ຂອງທີ່ລະນຶກຈາກເທດສະການໜັງຄັ້ງກ່ອນໄວ້ຄອຍ ບໍລິການທ່ານ.​

ຂໍ້ມູນເພີ່ມເຕີມ
ສຳລັບຂໍ້ມູນເພີ່ມເຕີມກ່ຽວກັບການສາຍຮູບເງົາ ແລະ ໂຮງແຮມທີ່ເຂົ້າຮ່ວມງານ ກະລຸນາເຂົ້າຊົມໄດ້ທີ່ lpfilmfest.org

ການເດີນທາງ
ສາຍການບິນ Lao Airlines ທີ່ມີຖ້ຽວບິນ ຈາກບາງກອກ, ຮາໂນຍ, ຊຽງໃໝ່, ສຽມລຽບ ແລະ ວຽງຈັນ ໄປ ຫຼວງພະບາງເປັນປະຈຳທຸກມື້.

ແປ ແລະ ຮຽບຮຽງໂດຍ ບົວລະພຽນ ສີສຸກ
ຮູບໂດຍ ບຸນມະໂຫລານຮູບເງົາຫຼວງພະບາງ