ປົດລັອກສັກກາຍະພາບພ້ອມປ່ອຍໃຫ້ການຮຽນຮູ້ນໍາທາງ

ດີມິດທ໌ (DMITH) ກໍາລັງຫັນປ່ຽນໂສມໜ້າອຸດສາຫະກໍາການບໍລິການໂຮງແຮມ, ຮ້ານອາຫານ ແລະ ທ່ອງທ່ຽວໃນປະເທດລາວແນວໃດ

ຢູ່ນອກຕົວເມືອງນະຄອນຫຼວງວຽງຈັນ ທີ່ຫ່າງໄກຄວາມວຸ້ນວາຍ ແມ່ນເປັນທີ່ຕັ້ງຂອງ ສູນຝຶກດີຟິກທ໌ ພັດທະນາທັກສະການໂຮງແຮມ ແລະ ການທ່ອງທ່ຽວ (DMITH) ທີ່ຫາກໍເປີດໃໝ່, ປັດຈຸບັນນີ້ຍັງຢູ່ໃນຊ່ວງທົດລອງເປີດໃຫ້ບໍລິການ ໂດຍສືບຕໍ່ທົດລອງຈົນຮອດທ້າຍເດືອນຕຸລາ. ສູນດັ່ງກ່າວໄດ້ຮັບການສ້າງຕັ້ງຂຶ້ນໂດຍ ບໍລິສັດ ດີຟິກທ໌ ຈໍາກັດຜູ້ດຽວ (DFICT) ເຊິ່ງເປັນຜູ້ໃຫ້ບໍລິການດ້ານຝຶກອົບຮົມການບໍລິການທີ່ມີຊື່ສຽງ, ສູນແຫ່ງນີ້ຖືກກໍານົດໃຫ້ເປັນພະລັງແຫ່ງການປ່ຽນແປງ, ເສີມສ້າງຄວາມເຂັ້ມແຂງແກ່ບຸກຄົນດ້ວຍການຍົກລະດັບທັກສະ ແລະ ຄວາມຮູ້ເພື່ອຄວາມເປັນເລີດໃນດ້ານອຸດສາຫະກໍາການບໍລິການໂຮງແຮມ, ຮ້ານອາຫານ ແລະ ທ່ອງທ່ຽວ. ສູນດີຟິກທ໌ ພັດທະນາທັກສະການໂຮງແຮມ ແລະ ທ່ອງທ່ຽວ ໄດ້ເປີດສອນຫຼັກສູດເລີ່ມແຕ່ 15 ວັນ ຈົນເຖິງ 6 ເດືອນ, ທາງສູນຈະພັດທະນາບຸກຄະລາກອນຮຸ່ນຕໍ່ຮຸ່ນທີ່ມີຄວາມປາຖະໜາໃນການຍົກລະດັບຄວາມຮູ້, ພ້ອມເປີດປະຕູສູ່ໂລກແຫ່ງໂອກາດ ແລະ ການເຕີບໂຕດ້ວຍຕົນເອງ.

ພາຍໃຕ້ການຊີ້ນໍາຂອງຄູຝຶກສອນຮຸ່ນເກົ່າທີ່ມີຄວາມເປັນມືອາຊີບ, ຫຼັກສູດການຮຽນການສອນຂອງສູນ ແມ່ນອີງຕາມມາດຕະຖານສາກົນ ທີ່ໄດ້ເລືອກເຟັ້ນມາເປັນຢ່າງດີ ​ເພື່ອ​ກວມລວມເອົາຫຼາຍແງ່ມຸມ​ຂອງ​ອຸດ​ສາ​ຫະ​ກຳ​ການ​ບໍລິການໂຮງແຮມ, ຮ້ານອາຫານ ແລະ ທ່ອງທ່ຽວ. ຫົວຂໍ້ຂອງຫຼັກສູດປະກອບມີ ພະແນກແມ່ບ້ານ, ພະນແກບໍລິການອາຫານ ແລະ ເຄື່ອງດື່ມ, ພະແນກຕ້ອນຮັບ, ການຮັກສາຄວາມປອດໄພ ແລະ ສຸຂາອະນາໄມໃນບ່ອນເຮັດວຽກ, ພະແນກຊັບພະຍາກອນມະນຸດ, ເບເກີຣີ, ການຄິດຄົ້ນຕົ້ນທຶນອາຫານ ແລະ ການນໍາສະເໜີ, ບາເທັນເດີ, ບາຣິສຕ້າ, ບໍລິການສະປາ ແລະ ການຈັດສວນ, ນັກສຶກສາຈະໄດ້ສໍາຜັດກັບຫຼາກຫຼາຍວິຊາຮຽນລວມທັງພາສາຕ່າງປະເທດ ໂດຍສະເພາະກໍແມ່ນການສອນພາສາທີ່ຈະເປັນການຊ່ວຍເຮັດໃຫ້ພວກເຂົາມີທັກສະຮອບດ້ານ.

ສໍາລັບນັກສຶກສາຫຼາຍຄົນທີ່ຕັດສິນໃຈເຂົ້າຮ່ວມຝຶກອົບຮົມທີ່ສູນຝຶກດີມິດທ໌ ເຊິ່ງບໍ່ພຽງແຕ່ເປັນບ່ອນສະໜອງຫຼັກສູດການຝຶກອົບຮົມເທົ່ານັ້ນ ແຕ່ຍັງເປັນປະສົບການທີ່ສາມາດປ່ຽນແປງຊີວິດຂອງຜູ້ຄົນໄດ້. ທາງສູນມີຄວາມຍິນດີທີ່ຈະເປີດໂອກາດຕ້ອນຮັບທຸກໆຄົນ ທີ່ມາຈາກພູມຫຼັງລວມທັງສາຍອາຊີບທີ່ຫຼາກຫຼາຍ ຕະຫຼອດເຖິງຊາວໜຸ່ມໃນເຂດຊົນນະບົດ ຜູ້ທີ່ຕ້ອງການຫຼຸດພົ້ນຈາກຂໍ້ຈໍາກັດທາງສະຖານະຂອງຕົນ ດັ່ງດຽວກັບມືອາຊີບໃນປັດຈຸບັນທີ່ຕ້ອງການຍົກລະດັບທັກສະໃຫ້ດີຂຶ້ນ. ພໍ່ຄົວ, ບາເທັນເດີ, ພະນັກງານເສີບ ແລະ ຜູ້ຈັດການພະແນກຕ້ອນຮັບທີ່ຕ້ອງການມາລວມຕົວກັນ ເພື່ອຮຽນຮູ້ທັງເຕີບໃຫຍ່ຢູ່ພາຍໃຕ້ຫຼັງຄາດຽວກັນ, ພ້ອມສົ່ງເສີມຄວາມຮູ້ສຶກແຫ່ງຄວາມສາມັກຄີ ແລະ ມິດຕະພາບ.

ໃນບັນດາຫຼັກສູດທັງໝົດນັ້ນ, ນັກສຶກສາຈະໄດ້ຮັບການຊຸກຍູ້ສົ່ງເສີມໃຫ້ສາມາດກ້າວຜ່ານຂີດຈໍາກັດ ພ້ອມເປີດຮັບຄວາມທ້າທາຍດ້ວຍຄວາມມຸ່ງໝັ້ນ ແລະ ຢືດຍຸ່ນ. ຫຼັກສູດດັ່ງກ່າວໄດ້ມີການປະສົມປະສານລະຫວ່າງຄວາມຮູ້ພາກທິດສະດີກັບການຝຶກອົບຮົມພາກປະຕິບັດຕົວຈິງ, ເຮັດໃຫ້ນັກສຶກສາໄດ້ຮັບປະສົບການຈາກພາກປະຕິບັດຕົວຈິງ ທີ່ຊ່ວຍກະກຽມພວກເຂົາໃຫ້ພ້ອມສໍາລັບຄວາມຕ້ອງການທີ່ບໍ່ມີວັນສິ້ນສຸດຂອງພາກອຸດສາຫະກໍາການບໍລິການ. ສູນຝຶກດີມິດທ໌ ຍັງເປັນຄູ່ຮ່ວມມືກັບໂຮງແຮມໃນບໍລິເວນໃກ້ຄຽງ ເພື່ອມອບປະສົບການຕົວຈິງໃນວຽກງານການບໍລິການທີ່ຫຼາກຫຼາຍ.

ຜູ້ທີ່ຮຽນຈົບຫຼັກສູດນີ້ ຖືເປັນທີ່ຕ້ອງການສູງຈາກບັນດາໂຮງແຮມຊັ້ນນໍາຂອງລາວ. ທ່ານ ນາງ ຈຸນລະຈັນ ແພງດີ (ນິກກີ້) ຜູ້ອຳນວຍການສູນດີຟິກທ໌ ພັດທະນາທັກສະການໂຮງແຮມ ແລະ ການທ່ອງທ່ຽວ ກ່າວວ່າ “ເປັນເລື່ອງທີ່ໜ້າຍິນດີເປັນຢ່າງຍິ່ງ ທີ່ໄດ້ຮັບຄວາມສົນໃຈຈາກໂຮງແຮມ ແລະ ຜູ້ໃຫ້ບໍລິການໃນການຈ້າງງານແກ່ນັກສຶກສາທີ່ຮຽນຈົບຈາກສູນຂອງພວກເຮົາ. ນັກສຶກສາຂອງພວກເຮົາທຸກຄົນລ້ວນແຕ່ມີວຽກລໍຖ້າຢູ່ເມື່ອພວກເຂົາຈົບຫຼັກສູດ ເຊິ່ງປັດຈຸບັນນີ້ແມ່ນມີຄວາມຕ້ອງການພະນັກງານບໍລິການທີ່ມີທັກສະສູງ, ພວກເຮົາຈິ່ງຢາກເປັນສ່ວນໜຶ່ງໃນການເຮັດໜ້າທີ່ຕື່ມເຕັມຄວາມຕ້ອງການນີ້ ເພື່ອຜົນປະໂຫຍດຂອງຊາດ ກໍຄືປະໂຫຍດຂອງນັກສຶກສາຂອງພວກເຮົາ ແລະ ນັກທ່ອງທ່ຽວທີ່ເດີນທາງເຂົ້າມາທ່ຽວລາວ.”

ເພື່ອໃຫ້ສອດຄ່ອງກັບຄວາມມຸ່ງໝັ້ນໃນການສ້າງຜົນໄດ້ຮັບທາງສັງຄົມ, ສູນດີມິດທ໌ ຈິ່ງໄດ້ເຂົ້າເຖິງຊຸມຊົນໃນເຂດຊົນນະບົດຢ່າງຈິງຈັງ, ພ້ອມທັງສະເໜີທຶນການສຶກສາ ແລະ ໃຫ້ຄວາມຊ່ວຍເຫຼືອທາງການເງິນແກ່ຜູ້ສະໝັກທີ່ມີຄຸນສົມບັດເໝາະສົມ ທີ່ຂາດຊ່ອງທາງດ້ານການສຶກສາຕາມລະບົບ. ທາງສູນໄດ້ໃຫ້ສະໜັບສະໜູນບັນດານັກສຶກສາເຫຼົ່ານີ້ ນັບແຕ່ຫຼັກສູດການຝຶກອົບຮົມ ລວມເຖິງຄ່າເດີນທາງຈາກບ້ານເກີດໄປຍັງນະຄອນຫຼວງວຽງຈັນ ພ້ອມຍັງມີຄ່າຫ້ອງພັກ ແລະ ຄ່າອາຫານນໍາອີກ. “ການຍົກລະດັບທັກສະໃນອຸດສາຫະກໍາການທ່ອງທ່ຽວຂອງລາວ ນັ້ນກໍໝາຍຄວາມວ່າ ພວກເຮົາຕ້ອງການກຳລັງແຮງງານຫຼາຍຂຶ້ນ. ການທ່ອງທ່ຽວຖື​ເປັນ​ວິທີການ​ອັນ​ດີ​ທີ່ຊ່ວຍ​ໃຫ້​ຜູ້​ດ້ອຍ​ໂອກາດສາມາດ​ປ່ຽນ​ແປງ​ຊີວິດ​ການ​ເປັນ​ຢູ່​ຂອງພວກ​ເຂົາ ​ທັງຫຼຸດພົ້ນອອກຈາກ​ວົງຈອນຂອງ​ຄວາມທຸກ​ຍາກ,” ທ່ານ ນາງ ນິກກີ້ກ່າວຢໍ້າ. ດ້ວຍ​ການ​ເສີມສ້າງ​ຄວາມ​ເຂັ້ມ​ແຂງ​ໃຫ້​ແກ່​ຊາວ​ໜຸ່ມ​ໃນເຂດຊົນ​ນະ​ບົດ​ ໃນການຍົກລະດັບ​ທັກ​ສະ​ທີ່​ຈຳ​ເປັນ, ສະ​ຖາ​ບັນ​ໄດ້​ເປີດ​ປະ​ຕູຕ້ອນຮັບບັນດານັກສຶກສາ ​ເຊິ່ງເຄີຍມີຄັ້ງໜຶ່ງທີ່ບໍ່​ສາ​ມາດ​ບັນ​ລຸຜົນສໍາເລັດ​ໄດ້ນັ້ນ ພ້ອມມາເຕີມເຕັມກໍາລັງໃຈເຂົ້າ​ສູ່​ຄວາມ​ຝັນ ແລະ ຄວາມ​ມຸ່ງ​ມາດ​ປາ​ຖະ​ໜາ​ ທີ່ເມື່ອກ່ອນເຄີຍຖືກຈໍາກັດ​ຢູ່ສະເພາະໃນໝູ່​ບ້ານ​ຫ່າງ​ໄກ​ສອກ​ຫຼີກ.

ຜູ້ທີ່ສໍາເລັດການຝຶກອົບຮົມທີ່ມາຈາກພື້ນຖານຊົນນະບົດເຫຼົ່ານີ້ ໄດ້ເດີນທາງກັບຄືນສູ່ຊຸມຊົນຂອງພວກຕົນ ເພື່ອເປັນສັນຍານຂອງແຮງບັນດານໃຈ, ປູກຝັງຄວາມຫວັງ ແລະ ກະຕຸ້ນຄວາມປາຖະໜາ ທີ່ຈະເຕີບໂຕດ້ວຍຕົນເອງໃນກຸ່ມຂອງໄວໜຸ່ມຮຸ່ນໃໝ່. ແຮງປາຖະໜານີ້ ມີສັກກາຍະພາບໃນການປ່ຽນແປງທົ່ວທັງຊຸມຊົນ ທີ່ສາມາດຂັບເຄື່ອນພວກເຂົາໄປສູ່ອະນາຄົດອັນສົດໃສ ແລະ ມີຄວາມໝັ້ນຄົງຫຼາຍຂຶ້ນ.

ໃນຂະນະທີ່ສູນຝຶກກ້າວເຂົ້າສູ່ການດຳເນີນງານຢ່າງເຕັມຮູບແບບ, ຜົນໄດ້ຮັບທີ່ມີຕໍ່ອຸດສະຫະກຳການບໍລິການໃນລາວ ກໍຈະມີຄວາມແໜ້ນແຟ້ນຢ່າງທີ່ບໍ່ສາມາດປະຕິເສດໄດ້. ສູນຝຶກດີມິດທ໌ ໄດ້ຢຶດໝັ້ນຕໍາແໜ່ງຂອງຕົນ ໃນຖານະເປັນແຮງຜັກດັນແຫ່ງການປ່ຽນແປງ, ຊ່ວຍໃຫ້ຜູ້ຄົນສາມາດກ້າວຂ້າມມາຢູ່ເໜືອສະຖານະການ ທັງກໍານົດເສັ້ນທາງສູ່ຄວາມສໍາເລັດໄດ້. ເມື່ອບັນດາມືອາຊີບຫາກຕ້ອງການຍ່າງຜ່ານປະຕູຂອງຕົນ, ພວກເຂົາຍ່ອມໄດ້ຮັບການຕ້ອນຮັບດ້ວຍໂອກາດອັນຫຼາກຫຼາຍ ລວມທັງຄໍາໝັ້ນສັນຍາແຫ່ງອະນາຄົດອັນສົດໃສ ບວກກັບຄໍາເຊື້ອເຊີນເພື່ອໂອບອ້ອມຄວາມຝັນ ແລະ ເລີ່ມຕົ້ນເດີນທາງແຫ່ງການປ່ຽນແປງໃໝ່.

ຂໍ້ມູນເພີ່ມເຕີມ
ຖ້າຕ້ອງການລົງທະບຽນຮຽນໃນຫຼັກສູດ ຫຼື ສຶກສາຂໍ້ມູນເພີ່ມຕື່ມ ສາມາດເຂົ້າເບິ່ງທີ່ເວັບໄຊ dfictlao.com

ແປ ແລະ ຮຽບຮຽງໂດຍ ໄພບູນ ທະນະບົວສີ
ຮູບໂດຍ ນຸທະພອນ ສິມມະວົງ